Psa 94 | XteSC | STEP | Uo, nun nai Allah Yahweh, nimi mali kunge keca tep, kanda kwangdana deiyo ngebo kuruma cadi, kandi, “Ange kunkamrume, angeda pio men kunkamrume,” pepra deiamsemum upu peserurtopu kupra, nimi yuma men kupmengedi, mali kunge keca tep, wenemkamserume. Teka nun nai Allah, kanda sun mali kunge neng tep, kwangdana deiyo ngebo kuruma cadi, menmena di yana, nimi yuma tep, upu bokra wenemkamrume!

Psalms 94

Nimi tuai nesala yumada, sundi kuramngetopu, Allah tenepredi sun wenemna tep, upu bokeipkamsera tep, pepu upu

1 Uo, nun nai Allah Yahweh, nimi mali kunge keca tep, kanda kwangdana deiyo ngebo kuruma cadi, kandi, “Ange kunkamrume, angeda pio men kunkamrume,” pepra deiamsemum upu peserurtopu kupra, nimi yuma men kupmengedi, mali kunge keca tep, wenemkamserume.
Teka nun nai Allah, kanda sun mali kunge neng tep, kwangdana deiyo ngebo kuruma cadi, menmena di yana, nimi yuma tep, upu bokra wenemkamrume!
2 Uo, tuai mutu ban-ban yuma neitamai kunge nesala yuma tep, kanda Allah, upu bongdina deiyo ngebo kuruma cadi, menmena di yana, nimi tuai nesala yuma tep wenemkamrume!
Ada, ‘Sun balila kemengedi, salnong-nong kamengedi, sun mali weik kuramenge utopu kupra, menenga keca karenkamrum’ tenen, moropkepe!
3 Uo nun nai Yahweh, kan tep, ‘Nun pio songe,’ tenepra, kan peserum upu yuma yanirtamenge nengda, ware kuprap taru ton tupa malipu kunkameng do?
Ada, sun mali kun kecapu talepra, mali-mali weik kunge nengda, salnong-nong kapra, tali lupra kange derinungada, ware kuprap taru ton tupa akunkameng do? Kandi tupa kaukemnapu kunkamrum do?
4 Ukupmantoda, nimidi ila me mau dopra, me gwepmengedi, adipapu dingtamamengtopu, asalnong-nong kamna nengdi mali upu weika di tupa-tupa pesenunge. Sun mali kun kecapu talepra, mali weik kunge nengda, gemena upu weika di penunge.
5 Anengda, ukungedi, kandi, ‘Ne mawa nesala kunkameng’ tenen, wepra deiamsemum nesala, nun Israel nesala tep, pio ikin keca dopra, nun nong deiki derisengepa, nun dipru bulungsangserure.
Teka, nun Israel nesala tep, kandi, ‘Ayala nesalada, ne mawa nesala pio kunkameng’ tenen, weiamsemum dinin, sun mali kunge nengdi, ikin keca pio weik karesenunge.
6 Anengdi, solu nerapu cap, tonda nun mutu neitamai kunge nimi bo neng cap tep, tali lupra portamnunge. Tonda, sun nai yapu cap, sun nin yapu cap, konum deamipa, tali lyan kunge nyapuda, deiyo ton men kwapmarepapu, ayu nengdi, anesala tali lupra portamnunge.
7 Anyapu cap, solu nerapu cap, popmenge taruda, sun yu nengdi, “Gume, Allah Yahwehda, nun kuramep keca pio men diserure. Er walwale,” pepra, balila weik kupmengedi, mali upu penunge.
Tonda, sundi, “Gume, sun Israel nesala, sun apu bo Yakub tep, melipra kalengamu Allahda, nun ataru kunup nesaladi kunup kecada, pio men dirura cadi, er walwale,” penunge.
8 Sundi upenung dinin, ne amazmur upu sengna ngebo dingeda, aupu pepsene. “Tuai nesala Kankan neitamaida, walwal neng kunung dinin, sun amutu kurum nengda, pio walwalpu kurume.
Atep, nedi pepkusen upuda, moupra gekepkunerume! Sun pio walwalpu kurum nesala yumada, dan taru di, telep upu gekeprumudi, kael neng ton kunkamrum do?
9 Sun moupra tenipetepso! Nun amul ketekepra deipseua deiyo ngebodi, sundi perumu upuda, men gekepsetu do? Nun asuru ketekepra karepseua deiyo ngebodi, nun tuai nesala kunup keca moupra men diredi, men kael kepsetu do?
10 Gume, yuk-yuk mutu neitamai kunge nesala, yala-yala yumada, Allah er dipapu, sun mali kunange tep, upu bokeipredi, wenepra porure.
Tonda, tuai mutu ban-ban yuma neitamai kunge nesala tep nengeda, Allah er dipapu ila kael kemna deiyo keca peteremrure. Yuk ngebodi gume. Erdi peteremrepa, tuai mutu neitamai kunge nesala yala-yala yumadi kael kemnunge.
Atep nengeda, tuai mutu nesaladi mali kunge keca tep, tali kaukemnapu kurur do? Gume, erdi, sun mali kunange tep, tek sisi wenepra popkamre ja!
11 Teka, nun nai bo Allah Yahwehda, nun tuai nesaladi tenenup keca yumada, er konum kael kemserure. Kael kemredi, nun tuai nesala tep konum teneserurada, ake. ‘Gume, tuai mutu kunge nesaladi tenenge keca yumada, nong men kupkamre kecapu kurure. Tali-tali kecapu tenenunge.’ Allahdi uteneserure.
12 Dinino, nun nai bo Allahdi, ware nesala tep do yuma, sundi mali kunge keca tep, “Kanda, ange yapkurume. Angeda meme!” pepra, wenemrure. Allahdi wenemrur nesalada, konum gekepmengopda, kange deipra teleppu kunkamenge.
Tonda, kandi, “Ange kunkamrume, angeda pio men kunkamrume,” pepra, deiamsemum upu deiki peteremserum nesala yumada, kange deipra teleppu kunkamepe.
13 Allah kandi nun tep, kange di tamupra, telep kudisememdi, nun ikin weik kunupnge yuma dopropsemempa, ka di tamupra teleppu kunkamepe.
14 Kandi lyepropsemempa, tali kange dopra kuramepyanen, amenda sirya taruda, kan upu yaninapu kungedi, mali kecapu talepra kunge nesala yumada, wenepmemdi, sun tep upu bokra deipmemdi, sun tep ila ikin keca karenkamrume. Teka nun nai bo Allah Yahweh, kandi, ‘Ayala nesalada, ne mawa nesala pio kunkameng’ tenen, weiamsemum Israel nesalada, pio tep men tamkamserume.
15 Angeda tali tep gume. Deiyoda, Allah kandi, “Ange kunkamrume, angeda pio men kunkamrume,” pepra, deiamsemum upu moupra gekepmengedi, dumsisipu kunge nesala tep nengeda, kandi pio telep kupra upu bokeipsememdi, kange di tamupra, telep kudinkamserume.
Allah kan dipapu, “Ukupkamne,” pepra, dumsisi kuruma deiki di, penkamserum upu yumada, sun dipru neitamai dumsisipu kunge nesaladi, aupu gekepmengedi, pio moupra talepmengedi, angepu kunkamenge.
16 Sun yumada, moupra tenipetepso! Pio mali kunge yu nesaladi, ‘Angebo popkupe’ tenen, ne damai yange pangeda, ware ngebo tekredi, ne tep melipra kalengnerur do?
Tonda, sun pio mali kun kecapu talepra, mali-mali weik kunge nengdi, ‘Angebo er deiki ikin keca derinkamepe’ tenen, ne damai yange pangeda, ware ngebo tekredi, ne tep melipra lyemdonerur do?
17 Yuk ngebodi gume. Nun nai bo Allah Yahweh, er dipapu ne tep, pio melipra lyemdonerure. Teka, Allahdi men meliamnetu pangeda, sun yu nengdi konum popmanetengepa, neda konum derami nesala kunungaipu, konum bena kunmatene. Ukunmatenedi, konum dimpepnapu kwamtene.
18 Men taruda, nedi, ‘Uo neda puto bounpu kununa cadi, nedi teka tenemsi keca yumada, konum gum kupbanmanere,’ tenepsi. Ange tenepsidi, men kupmanto kunmasi dinin, ne nai Yahweh, kandi, “Neda sun tep, ila di bicau tenesenedi, pio teleppu kudinkamsene.
Pio men tapkamsene!” pepra, pedina upu ^{▼▼pedina upu – Ayat 18 neitamaida, Ibrani upu deiki di ‘hesed’ pepra seku. Indonesia Alkitab neitamaida, ‘kasih-Nya kekal’ sengnunge. Ange telep dinin, nundi, ‘Ketengban nesaladi aupu ‘hesed’ deiyo neitamai ngeda, moupra kael kepkameng’ tenen, aupu ‘hesed’ deiyo ngeda, jenek kupra sekmepu.} deiki peiamsemum upu kange di ton cap tenepsa deiki di, angeda men tapsi. Aupu deiki di, ne puto kange di ton cap karepnemuma tep, men tapsi. Tupa gampu kunune.
19 Ne kange dipru ikin kunere taruda, kanda Allah, kandi ne dipru kwa dimneremepa, ka di ton cap, ne kange deipra kunune.
20 Pio mali kun kecapu talepra kunge nimi deiyo nengda, kan Allah cap kikiman pio men kutenge. Sun anengda, nimi deiyo pel talepra donung dinin, sundi, ‘Ange kunkamrume. Ukupra kunkamrume,’ pepmengedi, aupu sekra karesenung dinin, sundi pesenge upuda, tek sisi mali upupu kurure.
21 Tonda, anengdi, ‘Sun telep kecapu talepra, dumsisipu kunge nengda, yanipra popkamepe,’ tenengedi, tenpu gung bulupra deipmengedi, anengdi kikiman porbanunge.
Ukupmengedi, nimi upu bongdina taruda, amali kunge nengdi, deiyo men kwapmarepapu, yuk telep kunge neng tep, “Mali kupmanga cadi, adipapu aneng poptapkamepe,” pepra, mok upu pengedi ponunge.
22 Ukunung dinino, Allah Yahwehdi, ne tep pio melipra kalengnerura cadi, yuk nengdi men popnetenge. Teka, ukupmantoda, ila mutu bungne gel damai inipra kutenepa, yu nengdi men popnetenge utopu, Allah damai bena kunepa, er dipapu melipra kalengnerure.
23 Sun pio mali kun kecapu talepra, mali-mali kununga deiyo neng tep nengeda, anengdi mali kunge keca tep, Allah wenepredi, kwang dangkamre ja!
Tonda, sun mali-mali weik kunge keca tep, ila yu kupkamra deiki di, aneng yuma popredi, sikke buktapkamre. Teka, nun nai Allah, er si Yahwehda, amali kun kecapu talepra, mali weik kunge neng yumada, popredi, gum kupra deipkamre ja!