Psa 95 | XteSC | STEP | Nun yumada, pingping kange deipra nun nai Allah Yahweh er tep, mut pepedi, er sipu eremkamepe. Allah erda nun lyemdoserura cadi, ila upu deiki di mut pepra er si eremkamepe. Mutu yangne gel ila puto di bungamretopu, Allah er peda ange utopu ila puto di lyemdoserure.

Psalms 95

“Allah erda akeca-keca yuma deiki tara talepra, Ila Eremna Ngebo kuredi, nun tep melipra kalengserura cadi, er si erepra mut penkamepe,” pepu upu

1 Nun yumada, pingping kange deipra nun nai Allah Yahweh er tep, mut pepedi, er sipu eremkamepe. Allah erda nun lyemdoserura cadi, ila upu deiki di mut pepra er si eremkamepe.
Mutu yangne gel ila puto di bungamretopu, Allah er peda ange utopu ila puto di lyemdoserure.
2 Ange tep nengeda, nun yumadi er damai bulupra wekmepedi kange deipra, er tep, “Telepe,” pepra mut penkamepe.
Tonda kange deipmepedi, mut pena tep bung-bung pena cap, mut pena yuk keca cap deiki di, “Allah kure keca yumada pio telepe. Erda ila mambul ngebo,” pepra Allah er si erepra gispal don mut penkamepe.
3 Allah Yahweh er si eremkamepada, tali tep gume. Deiyoda, nun nai bo Allah er si Yahweh, erda akeca-keca yuma deiki tara erepra talepu ila deiyo ngebo kurura cadi, tali keca dinin, nimidi, ‘Nun nai,’ pepra, si eremenge keca cap, isok yuma cap, yuk puto kure keca yala-yala yuma cap, er amutarapu kununge. Allah erda ila puto eremna ngebo kurure.
4 Tuai mutu cap, tuai mutu neitamai kapu keca yala-yala yuma cap, tuai mutu amutara kurepa, nimidi men dinung keca cap, tonda mutu deiki kure keca cap yumada, er dipapu ketekepra deiamudi talerure. Tu amutara di dipra ila mutu deiki kapu keca yuma, er dipapu ketekepra deiamudi talepra kurure.
5 Ange utopu, ila pala laut mokon cap, tuai mutu yuma capda, Allah er dipapu ketekepra deiamudi talepra kurure. Akeca-keca yuma talepra ila deiyo ngebo kurure.
6 Ange tep nengeda, Allah Yahweh er dipapu nun yuma ketekepra deiamseua cadi, nun yumadi gutam tu dipdongopra nun nai Allah Yahweh er si tepapu eremkamepe.
7 Deiyoda, tali tep gume. Nun nai bo Allah erda, nun ila deiyo ngebo kurure. Nunda er amutarapu kupepa, erdi nun tep moupra kalengserure. Ukupmantoda, domba bisam peina deiyo nengdi, sun domba bisam moupra kalengmengedi, sun jen keca tep mutmuta batu telepai deipmengedi, telep kupra peiramengtopu, nun nai Allahdi nun Israel yala nesala yuma tep, ‘Ne mawa nesala’ tenen, melipra kalengserure.
8 Allahdi upeserure. Ataru neitamai, ne Allahdi pesene upu yuma gekepmumnyopda, aupu moupra taleprumudi dombankamrume. Sun co puna neng Meriba mutu neitamai kuramidi, ‘Nun song’ tenen, kika deiamitopu men kunkamrume.
Ange utopu, me pio gumai tep, nimi men kunungai, ila katuai mutu, er sida Masa mutu neitamai, sun apu yapu yakaramidi mali upu weik pepyakaramitopu men penkamrume.
9 Sun apu yapu yumada, nedi pio mambul pel weik doramsa deiki di sun tep meliamsi keca yumada moupra dirami dinino, ange yuma tep moupra tenena gum dipapu, sun amutu bisi butene yakarami taruda, sun apu yapudi ne tep mali kuramya di kurpeteramnei.
Ada, nedi sun damai tep nimi men kupmanto keca kupyakaramsipa, sundi ne tep kurpeteramnei.
10 Akurpeteramnei ngeda, keteng tamun denge weik empat puluh tahun (40) neitamai yuma, sun apu yapu bisi yakarami taruda, mali weik kuramya cadi, nedi sun tep yu kuramneupa pio mali kange douramsi.
Tonda, nedi sun tep uperamsi. “Nedi pediramsi upu cap, dumsisi kupra kuramsinge capda, moupra men tenemidi, tali kange doupra mali kupyakaramipa, yu kuramneu.
11 Atep nengeda, nedi sun anesala yuma tep pio yu teneramsi. Ukupra, ‘Anesala tep telep kudisenepa, sun kwar tenena gum dipapu, telep kange doupra kunkamenge,’ pepra pediramsi upuda, ‘Anesala tep pio men karenkamsene,’ peiamsi.” Allahdi pepu.