Psa 96 | XteSC | STEP | Tuai mutu kurum nesala yumada, nun nai Allah Yahweh, er tepapu ukupu kange lon mut pemumdi gudinkamrume.

Psalms 96

“Tuai mutu kunge nesala yumadi, Allah Yahweh er si eremna tep, mut penkamrume,” pepu upu

1 Tuai mutu kurum nesala yumada, nun nai Allah Yahweh, er tepapu ukupu kange lon mut pemumdi gudinkamrume.
2 Tonda tupa-tupa er sipu eremumdi, “Kanda pio telepe,” pepra kange lon mut penkamrume. Allah er si Yahweh gudina tepapu kunkamrume.
Ada, erdi nun mali kuramepu keca cap, mali kunup keca yuma cap tep, lyemdoserura tep, er si erepra gudinkamepe.
3 Atep, ‘Nesala ban-ban yuma gekenkameng’ tenen, er pio telep kure keca cap, ila puto di pel dorenge cap tep, lap penkamrume.
Ada, ware nesala do, yala-yala yumadi, ‘Allah er mambul weik kure keca tep gekenkameng’ tenen, Allahdi nimi men kupmanto keca kurenge yuma peda, yuk yala nesala yuma gekenkamengaipu lap penkamrume.
4 Yuk nesala ban-ban yuma gekenkamengai penkamrumaida, tali tep gume. Deiyoda, Allah er si Yahweh ila mambul cap, puto weik cap ngebo kurura tep, er tepapu gudinkamepe.
Yuk nengdi, tali keca cap, isok cap tep, ‘Nun nai bo ake,’ tenengedi, kware kupra kunung dinino, Allah Yahwehda yuk puto keca yala-yala yuma deiki tara kuredi, ila puto weik ngebo kurura cadi, nimi yumadi er tepapu kware weik kuprepa, er si pio eremkamrume. Ada tali tep gume, isok si eremnung ngeda, Allah er puto utopunge ton men kurure.
5 Nimi ban-ban yumadi, sun pe buru di petupra deriramenge keca, er si patung ketenepra deipmengedi, ‘Nun nai ake,’ tenen, akeca talepra er tep si eremnunge.
Tuai mutu nesaladi talepra si eremenge isok-isok yumada, tali akapre keca urasin utopu kupra deipmengedi si eremnunge. Dinino, nun nai bo Allah Yahwehdi im neitamai cap, im deiki kure keca yuma cap, er dipapu ketekepra deiamu.
6 Allah erda pio telep kuredi, erda ila eremna cap, er ila puto kurenge cap, mambul weik kurenge cap, urasin pio telep-telep kurenge capda, pio akurure.
Tonda, er si eremna ati pumbon dinin, Pio Telep Lengna Ati pumbonda, er puto weik kurenge cap, urasin pio telep kurenge cap, dirine weik kurenge cap, akati pumbon neitamai akurure.
7 Atep nengeda, nun tuai mutu neitamai kunup nesala yala-yala yumadi, nun nai Allah er si Yahweh tep, “Uo naio, kan ila puto weik kurumnge cap, kan dirine weik kurumnge cap, kanda pio telep kurumnge cap yumada, kael kepmepedi, kan si tep, pio eremkenupe!” pepra, er si pio eremkamepe.
8 Allah Yahweh er cap, er si cap, ila mambul weik ngebo kurura cadi, nun tuai mutu neitamai kunup nesala yumadi, er gispal dona tepapu, “Nun nai Allah, kanda pio telepe,” pepra, er sipu eremkamepe.
Tonda, Allah er si eremna tep, nun yumadi telep karen keca dopra, er gispal dona tep, er si eremna ati damai duyakankamepe.
9 Nun tuai mutu kunup nesala ban-ban yumadi, Allah Yahweh tep, uo nun nai Allah, mali keca tenpunge peda men kuredi, pio dumsisipu kurure. Erda pio telep lengna ngebo kurure.
Atep nengeda, nimi ban-ban yuma kunung nesala yumadi, er tepapu, ‘Uo ila mambul ngebo kurure’ tenen, kwar-kwar kupmepedi, nun nong yo yuma moropsemnapu kunkamre.
10 Nun teka tenenup nesala yumadi, sun yuk yala nesala ban-ban yuma kunge nesala yuma gekenkamengai di, “Nun nai bo Allah Yahwehda, akeca-keca deiki tara taleredi, ila nimi deiyo ngebo kurure,” pepra, lap perbenkamepe.
Tonda, Allahdi, tuai mutu yuma ketekepra deipupa, pio dimpeprappu kunkamre. Allah teneamu taru konum kupyopda, tuai mutu neitamai kunup nesala yumadi kunup keca yuma tep, “Telep ngeda ake, mali ngeda ake,” pepredi, nimi yuma tep, upu bokeipseredi, menenga keca karepkamsere.
Ada, nimi yuma kuramengtopu, dumsisi kupra upu bokeipseredi, yuk-yuk wilipra deipkamsere.
11 Im deiki cap, im neitamai kure keca cap, tuai mutu ban-ban yuma kure keca cap, nesala yuma capdi, kange deipra, kange pingpinga dipapu gudinkamrume.
Tonda, ila pala laut mokon deipkai peda, laut mokon neitamai kure keca yumadi, Allah tepapu ila upu deiki di pemumdi gudinkamrume.
12 Ange utopu mutmuta paramre mutu kure keca yuma pe, tonda nimidi wa pepra kouramnup keca damai kure keca yuma pe, ila co palpal tekamrai kure keca yuma peda, nimidi kuramengtopu, akeca yala-yala yuma, ila upu di Allah tep, er si erepra gudinkamenge.
13 Nun yumadi, Allah Yahweh tep, er si erepra, kange lon mut penkamrume! Nun yumadi, gudinkamepada, tali tep gume.
Deiyoda, Allah yankamre taruda, nun upu bokeipredi, wilipra deipkamsera tep, er si erepmepedi, nun yuma ila upu deiki di kange lon mut penkamepe.
Allahdi, tuai mutu tamupra yaredi, tuai mutu ban-ban yuma neitamai kunup nesala yuma tep nengeda, nimi pel donup keca tep, apel-apel donuptopu, ‘Telepnge ake, malinge ake,’ tenepredi, nun wenemna tep, upu bokra deipkamsere.
Ukupra upu bokeipkamser taruda, mali kuna gum dipu, pio dumsisi kupra upu bokeipkamsere. Allahdi pesere upu, er tek sisi upu deiki di, nimi yumada, sun kuramengetopu, menenga keca karepkamsere. Atep, Allah er tepapu, er si pio eremkamepe.