Psa 97 | XteSC | STEP | Allah Yahwehdi, akeca-keca yuma talepra, deiki tara ila puto ngebo kurure. Ange tep nengeda, tuai mutu ban-ban yuma cap, amutu-amutu neitamai kunge nesala yala-yala yuma cap, kange deipra kunkamrume. Tonda, ila laut mokon neitamai dinin, mokon dana-dana tara sekdongopu mutu neitamai kunge nesala peda, kange deiprumudi, pingpinga dipapu kunkamrume.

Psalms 97

Allah Yahwehdi, akeca-keca yuma taleredi, deiki tara erepra, Ila Deiyo Ngebo kurura tep pepu upu

1 Allah Yahwehdi, akeca-keca yuma talepra, deiki tara ila puto ngebo kurure. Ange tep nengeda, tuai mutu ban-ban yuma cap, amutu-amutu neitamai kunge nesala yala-yala yuma cap, kange deipra kunkamrume.
Tonda, ila laut mokon neitamai dinin, mokon dana-dana tara sekdongopu mutu neitamai kunge nesala peda, kange deiprumudi, pingpinga dipapu kunkamrume.
2 Allah er damaida, ila dua cap, kunungna cap akurure. Ada, nimidi er urasin men dinkamenga tepa. Dinino, Allahdi akeca-keca yuma talepra kurura deiyoda, dumsisi kunangepu talepra kurure.
Tonda, nimi yumada kuramengetopu, konum dirura cadi, erdi tek sisi dumsisipu kupra, upu bokeipseredi, menenga keca karepkamsere.
3 Allahdi upu bokra karepkamser taruda, ukupmantoda, ila uku bu jeredi, akeca-keca yuma jepra gawal dakredi, sikke bungtamamretopu kupkamre.
Ada Allah er tep, ‘Erda nun song cadi, er dakwapye,’ tenenung nesala tep, Allahdi anesala yuma tep nengeda, adipapu popra gawal dakamre ja!
4 Allahdi pereng lang penange dokoteprepa, pereng lang pepyopda, tuai mutu ban-ban yuma neitamaida, ila dirine pio weika di kurure. Ukupre taruda, nimi tuai nesala yuma, ange epmengedi, kware kuprepa, mambul kange doupra, sun nong yuma moropsemnapu kununge.
5 Allahdi, mambul pel dore taruda, ila mutu-mutu yuma longnapu kurure. Ukupmantoda, lilin weica deipmengepa, uku bu jerepa, auku bu bupu di, alilin nong me kupra embaramretopu, mutu buma longrepa, teno pangrure. Ukurura deiyoda, Allah Yahwehdi yare pangeda, mutu buma yuma longnapu kurura tepa.
Ada, tuai mutu ban-ban yuma talepra, ila deiyo ngebo kurur Allahda, er yakaryopda, tuai mutu kure keca yumada, kware pio weik kuprepa, longnapu kurure.
6 Tonda, Allahdi ketekepra deipupa, im neitamai kure keca yuma epmepya deiki di, Allah er pio telep, dumsisipu kure ngeda, moupra tenepmepedi, kael kemnupe.
Tonda, tuai mutu ban-ban yuma neitamai kunge nesala yala-yala yumadi, erdi ketekepra deiamu keca epmengopda, ‘E, Allahda, tek sisi pio puto weika di kuna cap, pio telep kuna cap ngebo kurure,’ tenen, moupra kael kemnunge.
7 Tonda, ware yala nesala do yuma, sundi, ‘Nun nai ake’ tenen, nimi urasin utopu keca petupra derinung keca, er si patung, atali keca tepapu si eremnung nesala yumada, Allahdi pel dorurnge epmengopda, ‘Uo,’ tenen, ali weik dangnunge.
Ange utopu, ware nesala do, yuma, sundi, ‘Nun nai ake’ tenen, tali-tali keca si eremna tep, nimi urasin utopu kupra, petupra derinung keca tep, ‘Uo, angeda pio telepe,’ penge nesala yumada, amenda taru Allah Yahweh, er damai yangopda, sundi, ‘Uo’ tenen, kware kuprepa, gutam tu deiki dipdongopra, sun giso genepra, er sipu eremkamenge.
Atep, sun isok-isok yuma peda, Allah er damai yange dingeda, sun yumadi Allah tep, ‘Uo’ tenen, kware kuprepa, gutam tu deiki dipdongopra, sun giso genepra, er sipu eremkamenge.
8 Allahdi, nimi tuai nesala tep, upu bokeipkamre taruda, Sion mutu neitamai kunge nesala gekepmengedi, kange deipra pingpinga di kunkamenge.
Ange utopu, sun Yehuda yala nesala peda, Allahdi upu bokamre taruda, kange deipra kunkamenge. Kange deipra kunkamenga deiyoda, ake. Ada, kan Allah Yahwehdi, nun Israel nesala pona tep neng yuma tep, upu bokeipkamrum taruda, Yehuda tara neitamai kunge nesala yuma gekengedi, kange deipra kunkamenge.
9 Teka, sun anesala yumadi, kange pio deipra kununga deiyoda, ake. Ada, Allah ^{▼▼Allah – Acada, Ibrani upu deiki di, Allah er si tep, ‘Yahweh’, tonda, ‘Allah Elyon’ pepra seki. Indonesia Allah upu buku neitamaida, aupu ‘Elyon’ tep, ‘Allah yang Mahatinggi’ pepra sengnunge. Dinino, aupu deiyoda, sun kael kemna tep, angeda konum jenek kupra sekmepu.} Yahweh, kanda tuai mutu neitamai kure keca yuma talepra, deiki tara kumemdi, Ila Puto Eremna Ngebo kuruma tepa.
Tonda, nimi tuai nesaladi, tali keca tep, ‘Nun nai boda ake’ tenen, isok-isok yuma cap, yambul puto kure keca yuma cap, tali yuk-yuk yala keca yuma cap tep, si eremnunge.
Dinino, tek sisi ngeda, kanda Allah, akeca-keca yuma pio deiki tarapu kurume. Kanda pio ila puto weik ngebo kuruma tepa.
10 Ange tep nengeda, ware nesala do yuma, sundi, Allah Yahweh tep, ‘Nun nai bo ake’ tenen, teka tenepra, er tep kange derimumdi, bicau tenerum nesala yumada, sun yumadi, mali kun keca yuma tep nengeda, sundi, ‘Nun pio songe,’ tenenkamrume. Allah er tepapu, sun kange dipru er deikipu derinkamrume.
Allahdi, ‘Ne mawa nesala kunkameng’ tenen, konum wepra deiamseu neng tep, “Angeda kunkamrume, angeda pio men kunkamrume. Ukupmumnyopda, nedi sun tep pio telep kudinkamsene,” pepra, deiamseu upu, moupra talenung nesala tep nengeda, Allahdi pio melipra kalengserure.
Ukurura cadi, sun pona tep neng cap, sun pio mali keca talepra kunge neng cap tep, popra gawal dakyopda, er mawa nesala dopra, teleppu kupra deipkamsere.
11 Ware neng do yuma, Allahdi peserur upu moupra talepmengedi, dumsisipu kunge nesala tep nengeda, Allahdi sun tep lyemdoredi, dirine deiyonge karerura deiki di, moupra kael kemnunge.
Tonda ware nesala do yumadi, telep dumsisipu kunung neng tep nengeda, sun damaida pio kange deipra pingping kuna tep kecada, sun aneng damai kunkamre.
12 Ange tep nengeda, sun dumsisipu kurum nesala yumada, sun nai bo Allah Yahweh tep, teka teneprumudi, er damaipu kurumu taru yumada, pio kange deipra kunkamrume.
Tonda, Allah Yahwehda, mali kun keca tenpunge peda, ton men kuredi, pio Lengna Ngebo kurura cadi, sun dumsisipu kurum nesaladi, ange tupa teneprumu dingeda, Allah tep, “Uo naio, kanda pio teleppu kurum ngebo,” pepra, er sipu eremkamrume.