Psa 98 | XteSC | STEP | Nun yumadi, nun nai Allah Yahweh, er si eremna tep, ukupu kange lon Mazmur upu deiki, mutpu penkamepe. Deiyoda, Allah erdi, pio ila puto weik kunupsek pen pel dorura tepa. Tonda, Allah er ila puto weik dumsisi tara buru cap, er pio telep dumsisi kure puto cap deiki di, er tep, ‘Nun songe, er dakwapye,’ tenenung nesala yuma tep nengeda, popra gawal dangrure.

Psalms 98

Allahdi tuai mutu ban-ban yuma taleredi, ila puto deiyo ngebo kurura tep, pepu upu

1 Nun yumadi, nun nai Allah Yahweh, er si eremna tep, ukupu kange lon Mazmur upu deiki, mutpu penkamepe. Deiyoda, Allah erdi, pio ila puto weik kunupsek pen pel dorura tepa.
Tonda, Allah er ila puto weik dumsisi tara buru cap, er pio telep dumsisi kure puto cap deiki di, er tep, ‘Nun songe, er dakwapye,’ tenenung nesala yuma tep nengeda, popra gawal dangrure.
2 Allah Yahwehdi, ‘Tuai mutu neitamai kunge nesala yala-yala yumada, moupra kael kepkameng’ tenen, erdi lyemdoserur ngeda, konum katawai di peteremserure.
Teka, tuai mutu nesala yala-yala yumada, sun pe asuru di, Yahweh er dumsisi kupra pio teleppu kure kecada, konum katuai derirura cadi, dinunge.
3 Tonda, Allahdi, “Sun tep ila bicau tenesenuna cadi, pio melimsenedi, pio telep kupra derinkamsene,” pepra, pedina upu deiki di peipseu ngeda, konum jenek kupra peteremserure.
Ange utopu, Allahdi nun tep, “Ukupra melimkamsene. Sun tep ukunkamsene,” pesere upu utopu, tamna gum dipapu, angepu tek sisi tupa kunkamserure. Ange tep nengeda, mutu sirik, im sirik dakunge nesala yumada, Allahdi lyemdoserur ngeda, konum katuai di dinunge.
Teka, nun Israel nesaladi si eremnup Allahda, erdi melipra lyemamseu ngeda, yuk mutu nesala yuma diramidi, konum kael kemami.
4 Ange tep nengeda, sun tuai mutu neitamai kurum nesala yumadi, Allah Yahweh er gispal dona tep, ila upu deiki di penkamrume. Ada, sun yumada adipapu gonga kepra, kange deiprumudi, kange lon mut pena deiki di, Allah er sipu eremkamrume.
5 Tonda, Yahweh er si eremna tep, amut penkamrum taruda, bung-bung pena keca, er sida kecapi deiki di, lelim pemumdi, mut penkamrume. Amut penkamrum taru peda, nimi upu cap, kecapi lelim cap deiki di, amut penkamrume.
6 Angepu gum dinin, tonda pung pen keca butene, ton ngeda er sida terompet cap, ton ngeda er sida sangkakala cap di, amut penkamrum taruda, akeca dopra pung penkamrume.
Ada, nun Israel nesala yuma tep taleserur nimi deiyo ngebo, Allah Yahwehda, nun Raja kuserure. Atep, er damai yana kunkamep taru yumada, ila upu deiki di, er si eremkamepe!
7 Ila laut mokon neitamai me kait welepredi, ila lelim penkamre! Tonda, ila laut mokon pumbon gam kure keca yuma peda, ila upu deiki di penkamrume!
Ange utopu, tuai mutu ban-ban yuma neitamai kunge nesala peda, ila upu deiki dipapu penkamrume!
8 Ukupmantoda, nimida, kange deipmengedi, sun buru bongopmengedi, lelim weik perameng utopu, ila embaramre me yuma peda, sun opdoua barumudi, ila lelim weik penkamrume!
Tonda, yambul mutu buma cap, ila mutu yuma capda, tenpu taru dipapu sun yumadi, Allah Yahweh yaryopda, longnapu kurumudi, ila kange lon mut pemumdi, ila lelim penkamrume.
9 Deiyoda, Allah Yahwehdi yana, nimi tuai nesala yuma tep, dipetepredi, sun mali kuramenge nge cap, telep kuramenge nge cap tep, upu bokeipseredi, menenga keca karepkamsere.
Allahdi, tuai mutu neitamai kunge nesala yuma tep, upu bokeipkamser taruda, erdi, “Angeda kunkamrume, angeda pio men kunkamrume,” pepra, deiamseu upu deiki di, dumsisi kupra upu bokeipkamsere.
Teka, Allahdi tuai nesala yala-yala yuma tep, sundi kuramenge keca moupra dipetepredi, sun kuramengetopu, upu bokeipredi, menenga keca karepkamre.
Nun kuramepetopu kupra, “Anengda telep kununge, anengda malipu kununge,” pepra, nun kuramepe keca epredi, ange utotopu kupra, upu bokeipkamser ja!