Psa 99 | XteSC | STEP | Allah Yahwehdi akeca-keca yuma talepra, ila deiyo ngebo kurure. Atep nengeda, nimi tuai mutu neitamai kunge nesala yala-yala yumada, kware kuprepa, sun nong yuma moropsemnapu kunkamre. Malaikat sun sida Kerub kunungai deiki tarada, Allah bukudi, akeca-keca yuma talepra, ila deiyo ngebo kurure. Allah er puto weik ngebo kurura cadi, tuai mutu ban-ban yuma longnapu kunkamre.

Psalms 99

Allah Yahwehdi akeca-keca yuma talepra, ila deiyo ngebo Raja kurura tep pepu upu

1 Allah Yahwehdi akeca-keca yuma talepra, ila deiyo ngebo kurure. Atep nengeda, nimi tuai mutu neitamai kunge nesala yala-yala yumada, kware kuprepa, sun nong yuma moropsemnapu kunkamre.
Malaikat sun sida Kerub ^{▼▼Kerub – Aupu deiyoda, ake. Kerubda, yuk yala malaikat kununge. Menop taru Ibrani nengdi, Allah er si eremna ati neitamaida, keana taru tep, opkal bol di dodin ati domi taruda, Allahdi peiamu mem upu dopra, co bekin pumbon dongopidi, akeca deiki Kerub urasin utopu keca butene petupra deipi. Sun tenerami ngeda, ‘Allah Yahweh, aKerub butene deiki tara kunkamre,’ tenerami. Tonda, Allah upu buku Keluaran 25:17-22 dinkamrume.} kunungai deiki tarada, Allah bukudi, akeca-keca yuma talepra, ila deiyo ngebo kurure.
Allah er puto weik ngebo kurura cadi, tuai mutu ban-ban yuma longnapu kunkamre.
2 Allah er si Yahwehda, pio puto weik kuredi, Sion ^{▼▼Sion – Ada menop taru sun Israel yala nengdi, Yerusalem mutu si pena tep, asi Sion perami. Ukutaruda, Yerusalem mutu penunge. Dinino, amutuda tenpua. Tonda, sun Israel nesaladi, Allah er si eremna ati dopi taru di, utenerami. ‘Nun nai Allah Yahwehda, er si eremna ati pumbon dinin, Pio Telep Lengna Ati pumbon neitamaida, akuredi, nun moronup upu yuma gekeserure,’ tenerami. Tonda, Allah upu buku Keluaran 25: 22 dinkamrume.} mutu deikipu kurure.
Tonda, nun nai bo Allah Yahwehda, yuk-yuk mutu kunge nesala yala-yala yumada, er amutarapu kununge. Erda, tuai mutu kunge nesala yuma talerure.
3 Atep nengeda, sun yuk-yuk mutu nesala yala-yala yuma peda, sundi Allah er sipu erepmengedi, ‘Kanda pio telepe,’ penkamenge.
Allah Yahwehda, pio ila puto weik ngebo kurura cadi, nimi tuai nesala yumadi, er tep kware weik kunkamenge. Allahda, mali kun keca tenpunge peda, pio men kurure. Erda pio yuk, pio telep lengna ngebo kurure.
4 Tonda, Allahda ila puto weik deiyo ngebo Raja kurure. Tonda, er Allahdi, “Angeda kunkamrume, angeda pio men kunkamrume,” pepra, deiamseu upu peseretopu, nimi tuai neng tep, upu bokeipseredi, menenga keca kareseure. Erdi peiamseu upu tep, kange derirure.
Allah er dipapu, nimi upu bongdina tep, “Tali upu cap, nong gum tali pena upu cap, minina upu cap pena gum dipapu, dumsisipu kupra, yuk neng tep nimi upu bongdinkamrume,” pepra deipseu.
Allahdi, “Angeda kunkamrume, angeda pio men kunkamrume,” pepra, deiamseu upu peseretopu kupra, nun Israel nesala ^{▼▼Israel nesala – Yuk Allah upu buku neitamaida, ‘Yakub’ si pepra seki. Ada, ‘Yakubdi deipupa dadeipdanen yakarami nesala, keturunan Yakub,’ tenena tep seki. Deiyoda, ‘Yakubda, nun co puna ngebo kuramseu’ tenena tep, er sipu seki. Dinino, ada tek sisi sun Israel yala nesala yuma tenena tep, Yakub er sipu seki.} tep, dumsisipu kupra, melipra telep kemdiserure.
5 Nun Israel yala nesala yumadi, Allah Yahweh, er sipu eremnupa cadi, er tep nengeda, “Naio kanda pio teleppu kurume,” pepra, er si tupa eremkamepe.
Tonda, ukupmantoda, beipe peingna tep, er yan erepra derirurai damai, sun yumadi gutam tu deiki dipdongopra, giso genepra, er sipu eremkamrume.
Nun nai bo Allah, erda pio yuke. Mali kunange tenpu peda men kuredi, pio telep, lengnapu kurure.
6 Musa cap, Harun capda, Allah er si eremna ati pumbon pel talena deiyo neng, imam neng pel talepra doramrei. Tonda, Samuel peda, nun Israel nesala melimna tep, imam deiyo ngebo kuramudi, Allah er si pepra, nun tep mororamu.
Aimam deiyo neng weneri nengdi, nun nai Allah Yahweh tep, “Naio, nun Israel nesala yuma tep melipseo!” pepra mororami. Sundi Allah tep mororami pangeda, Allah gekeramudi, nun Israel yala nesala tep yana melimamu.
7 Ada, Mesir mutu neitamai di, lopra lyepromseudi, pio katuai mutu neitamai embaramepu taruda, ila dua neitamai di, Allahdi, “Ukunkamrume, abisipu embankamrume,” pepra melimamseu.
Tonda, Allahdi, “Ange kunada telepe pua, ange kunada meme,” pepra, gel pala deiki sekra kareamseu upu peda, sundi angepu talepra kurami.
8 Uo, nun si eremnup Allah, nun nai Yahweh, sun Israel nesaladi, kan tep, ‘Naio melipseo!’ pepra mororamipa, kandi aupu gekepmumdi, sun moromi keca tep, melimamume.
Allah, kanda sun Israel yala nesala yuma tep nengeda, sun yambul mali kurami ngeda, kaukepmumdi, gum kupra deriramume. Dinino, sun pio mali weik kuraminge tep nengeda, ka tamupra kwang dakamomdi, wenemamume.
9 Ange tep nengeda, nun Israel yala nesala yumadi, nun si eremnup Allah, er si Yahweh tep, “Kanda pio-pio telep kurume,” pepra, er si weika di eremkamepe.
Ukunkamep taru di, Allah er si eremna ati domi mutu buma deiki, amutu damai yakankamepe. Amutu deiki yape dingeda, er si erepmepedi, gutam tu deiki dipdongopra, giso genepra, er pio dumsisipu pio telep kurur keca tenepra, er sipu eremkamepe.
Ange ukunkamep taruda, ada tali tep gume. Deiyoda, nun nai Allah Yahweh, erda pio telep lengna ngebopu kurura tep, er sipu erepmepedi, er kure mutu buma damai yape dingeda, gutam tu dipdongopra, giso genepmepedi, er sipu eremkamepe.