Rev 1 | XteSC | STEP | Aupu yumada, pumun taru Allahdi iniamu dinin, ‘Amenda taru Yesus Kristusdi ukunkamre,’ tenen, kael kemna tep lape peipu. Ada, ‘Yesusdi amenda sirya taru kupkamre keca lap pepnepa, er tep teka tenepra er amutara bukra, er tep dombanung nesala gekenkameng’ tenen, Allahdi aupu lape peipu. Allahdi, er im deiki pel dona ngebo, malaikat tenpu dopra dokotepupa, Allah er pel dona ngebo ne Yohanes tep ne damai lap peryaneu.

Revelation of John 1

Allahdi katuai lap peipupa, Yohanesdi sekeipseu upu

1 Aupu yumada, pumun taru Allahdi iniamu dinin, ‘Amenda taru Yesus Kristusdi ukunkamre,’ tenen, kael kemna tep lape peipu. Ada, ‘Yesusdi amenda sirya taru kupkamre keca lap pepnepa, er tep teka tenepra er amutara bukra, er tep dombanung nesala gekenkameng’ tenen, Allahdi aupu lape peipu. Allahdi, er im deiki pel dona ngebo, malaikat tenpu dopra dokotepupa, Allah er pel dona ngebo ne Yohanes tep ne damai lap peryaneu. 2 Malaikatdi akeca yuma lap pepra benbenepneupa, ne Yohanesdi epsinge cap, gekepsinge cap, abuku neitamaida, lap pepra sekra deipsisi. Ange yumada, Allah erdi lap peipu upu cap, Yesus Kristusdi er tek sisi peramu upu cap tep, lap pepra sekeipsisi.

3 Abuku neitamai lap pepsisi keca yuma, nong kupkamre taru konum damai yanmasera tep, nesala gekenkamengai abuku dopra, amenda kupkamre keca tep, katuai lap penge nesalada, Allahdi melimrepa, kange deipra teleppu kunkamenge. Tonda, aupu pengepa, gekepmengedi, aupu peseretopu teka tenepra, talepra dombankameng nesala peda, Allahdi melimrepa, kange deipra teleppu kunkamenge. Apepkusen upu ^{▼▼Apepkusen upu – Yohanesdi abuku neitamai seku upu deiyo kecada, kene utopu keca deiki di epka cadi, domon upu weik sekeipseue. Ange tep, Allah moropmumdi, dinkamrume. Erdi melimserepa, sundi, ‘E, deiyo ace’ tenen, kael kemkamrume.} yuma nong neitamai kupkamser taru damai konum kunmasera tep, ne Yohanesdi pepsene.

Yohanesdi Asia tara neitamai yoneitam bari mutu kuramidi, Allah teka tenerami nesala tep, pepu upu

4 Ne kayapu, ne Yohanesdi, sun Asia tara neitamai dinin, Allah teka tenepra, yoneitam bari mutu neitamai kurum nesala tep, “Telepe,” pepsenedi, abuku sekeipsene. Ne Yohanesdi, sun Asia tara kurum nesala tep tenepnedi, Allah morosenun kecada, pepkusene. Ada, Allah er kange dipu bicau teneseredi, melimsere keca cap, kange mun kange douna gum di, kange deipra telep kuna tep kareserya deiyo keca cap, ‘Weika di karenkamser’ tenen, Allah morosenune. Apepmasen keca karenkamseng nesalada pepkusene. Allahda, menop taru konum kuramnganen, aneitam taru kuredi, amenda sirya taruda yankamre ngebodi karenkamsere. Tonda, akeca-keca deiki tara kuredi, Ila Nimi Deiyo Ngebo kuna tep, ila bungna keca deiki bukrepa, er urasin tarada, Allah er melimna sambala yoneitam bari bungnunge. Sun asambaladi ton karenkamsenge.

5 Uda, Yesus Kristusda, pio dumsisi ngebo kuredi, tamna gum dipapu, Allah tep pio tek sisi upupu peserure. Yesusda, depu dinin, Allahdi menmena gam bukeipu ngeboda, er Yesus pua. Tuai mutu neitamai ila nimi deiyo talepra raja-raja neng weik akunung dinin, sun deiki tara kuredi, akeca-keca yuma talepra Ila Nimi Deiyo Ngebo Yesusda, erdi ton apepmasen keca karenkamsere. ‘Allah cap, Yesus cap, Allah er damai bungnung sambala yoneitam bari cap, sun yumadi apepmasen keca karenkamseng’ tenen, Allah morosenune. Ne Yohanesdi pepsene.

Yesus Kristusda, ila di bicau teneamseudi, er yapi embeua deiki di, nun mali kun keca ateng kouamseua neitamai di loptapra lyepseue. 6 Lyepseua deiyoda, ‘Ne nai Allah er amutara bukra, er tep pel donga deiki di, yuk nesala ban-ban yuma Allah er upu gekenkameng’ tenen, Yesusdi nun tep telep kweipseupa, Allahdi, ‘Sunda ne mawa nesala kunkameng’ tenen, lyemserurdi taleserure. Atep, ‘Nesala ban-ban yumadi Yesus er sipu pio eremkameng’ tenen, Allah moronune. Nesala ban-ban yumadi Yesus tep, “Erda ila puto weik ngebo kurure. Doryankamre taru yumada er sipu ila di eremkamepe,” pepra, ‘Er tep gispal pio donkameng’ tenen, putanerure. ‘Angeda tek sisi nong kupkamre’ tenen, “Amin,” pepsene.
7 Sun moupra gekemumdi dinapu kunkamrume. Amenda taru dua kan-kan neitamai Yesus tamupra yankamser taruda, nesala ban-ban yumadi epkamenge. Er popi nesala peda, epkamenge. Yesus yakarepa, er popi nesala cap, yuk nesala yuma cap, sun asuru epkamenge. Epmengedi, er popipa, depunge tep mali kange doupra engenkamenge. ‘Tek sisi Yesus Kristus epmengedi engenkameng’ tenen, ne Yohanesdi, “Amin,” pepsene.

8 Akeca-keca deiki tara kunedi, ila puto ngebo kunune. Neda, akeca-keca yuma talepra deiki tara kunedi ila eremna ngebo kununa cadi, neda pio Ila Nimi Deiyo Ngebo Allahdi peipsene. Akeca-keca kapul men kwamu taruda, ne konum kuramsa tep, ne si ton, Alpa penenunge. Tonda, akeca-keca yuma konum gum kupre pangeda, nepuda pio gam kunkamna tep, ne si ton Omega ^{▼▼Omega – Sun Yunani yala nesala ‘Omega’ sengami upu huruf-huruf ngeda, menmena ngeda, huruf A sengamidi, ahuruf si tep, Alpa perami. Sun gonga kemna huruf sida Alpa peramitopu, Allahdi, “Neda akeca-keca ketekepra gonga kemna deiyo ngebo kunune,” pepra deipu. Ange utopu, sun huruf sirik ngeda, huruf si tep, Omega perami. Ange pepu deiyoda, Allahdi, “Akeca-keca yuma gum kupkamre dinin, nepuda, pio gam kunkamne. Neda sirik ngebo kunkamne,” pepu.} penenunge. Neda, menop taru kuramsanen, aneitam taru kunedi, amenda doryankamra sirya taruda, ne yankamne. Ne Allahdi peipsene.

Nimi Mi Sisa Utopu Ngebo epu keca tep, pepu upu

9 Uda, ne Yohanesda teka tenepsa tep, sun du bo utopu kusenune. Tonda, sun cap, ne cap teka tenepmupka deiki, Yesusdi taleserepa, er cap dipru dukdongopra kupedi, er pel dopepa, yuk mali nengdi ikin keca nun nong deiki weika di derisenunge. Derisengepa, kange mun kange kuserya peda, tamna gum, pio pe deipra, dipru bouna di er pel tupa donupe. Sun pe, ne peda amsepu kunupe. Uda, Allah er upu cap, Yesusdi tek sisi peramseu upu cap, dopra peteremamsa tep nengeda, ateng kouprapneidi, laut mokon di sekdongomu mutu, me dum-dumai, er si Pulau Patmos mutu deipneipa, kuramsi.

10 Dakuramsanen, tenpu minggu tumi, Allah er si eremna tumi neitamai, Allah er Lek Sambaladi ne kange dipru yuma talepneue. Talepneupa, ne amnyo tara di, Allah er upu peipneupa, er upu lelimda bung-bung pena keca er sida terompet utopu, ila lelim pepupa, gekepsi. 11 Gekepsipa, Allahdi upepneu. “Kan gekenkurem upu cap, dinkurem keca cap yumada, moupra sengkurume. Surat sekmem dingeda, Asia tara neitamai teka tenenge nesala tep, mutu si yoneitam bari kunge nesala tep, aupu sekra dokotepkurume. Amutu sida, ake. Efesus cap, Semirna cap, Pergamus cap, Tiatira cap, Sardis cap, Filadelfia cap, Laodikia cap, kurure,” pepu.

12 Upepneupa, ‘Aupu pepner ngebo urasin dinkun’ tenen, tamupra dipetepsipa, weica upra derin keca yoneitam bari kupupa, epsi. Aweica derin keca, er nongda kunumna weik keca er sida emas di ketekepra deipunge akwamupa, epsi. 13 Ayoneitam bari weica derin keca emasnge dana-dana ongomgenem pepka neitamaida, Nimi Mi Sisa Utopu Ngebo ^{▼▼Nimi Mi Sisa Utopu Ngebo – Yesusda, Allah er Mi Sisa kuramu dinin, er tuai mutu yau taruda, nimi urasin utopu daudi, er kange tenena cap, er nong cap, er putaramu keca cap ayumada, nun kurameptopu kuramu, dinino, mali keca tenpu peda men kuramu. Ukupra kuramunge tep nengeda, Nimi Mi Sisa Utopu Ngebo, penupe. Yesus er pedi, er pe teppu, “Neda, Nimi Mi Sisa Utopu Ngebo kunune,” peramu (Lukas 18:31). Erda, nimi tuai nesala yuma tep, nimi Lyemna Deiyo Ngebo kurura tep, aupu pepdau. Tonda lap pena upu nomor 22 dirume.} tekmaupa, epsi. Er lyom opkal keneku ngeda, er kum damai di dutara yuma bisipmaupa, er yanpu katuai kupu. Er taram deikida, emas urasin utopu lyom opkal poronge koupdongopmau ngeda epsi.

14 Angebo er giso cap, er giso potong capda, pio telep kurupmaupa, epsi. Er giso cap, er giso potong capda, pio lek kupka cadi, es keca er si salju peramengtopu kupupa epsi. Er asuruda, ila uku bu jeramretopu dirin weik kupu. 15 Er yanda, gat keca er sida tembaga dopra uku neitamai dongopmengepa, dakuramrepane, bupu weik kupredi, mereng-mereng peramretopu, kupu. Er upu pepupa, lelim pepu ngeda, ila me oupredi, lelim weika di peramretopu kupu.

16 Angebo er dumsisi buru neitamai di kuru yoneitam bari doupmau. Er sipyal pumbon di ila parang ya, dana-dana tara si takke weik kwamu parang dekmaupa, epsi. Er urasinda, keteng di melangdan peramretopu, dirine pio weik kupupa, epsi.

17 Angebo epsidi, mambul kange douprap, ‘Gisal dopkun’ tenen, er yan damai besidi, gutam cap, giso cap tu dipdongopra buksidi, upu pena gum di, pio dimpeprappu kupsi. Ukupsipa, angebo er dumsisi buru ne nong deiki deipra talepneudi, aupu peipneu. Ada, kanda kwar dangna gume. Akeca-keca yuma kapul men kwamu taruda, ne konum kuramsa tep, neda Gonga Kemna Deiyo Ngebo kunune. Tonda, akeca-keca yuma konum gum kupre taru peda, ne pio gam kunkamna cadi, neda Gawal Dangna Deiyo Ngebo kunune.

18 Pumun taru dakuramsanen, depsi dinin, gam buksidi, ukutaru gam kunetopu, pio tupa gam kunkamne. Neda, pio Gam Kuna Deiyo Ngebo kununa cadi, amenda doryankamre taru peda, pio gampu kunkamne. Tonda nedi, Nimi Dena deiyo keca cap, konum deamenge nesala kungai wengbarameng bisi buplan pangna tep anak kunci cap, talepra kuna deiyo ngeboda, nepu kununa cadi, akeca yumada talepra kunune.

19 Ange tep nengeda, kan epmarem keca yumada, sekurume. Tonda, ukutaru kure keca cap, amenda taru kupkamre keca cap tep, lap peipkenepa, kandi sekurume. 20 Ne dumsisi buru talepman kuru yoneitam bari cap, ayoneitam bari weica derin keca emasnge capda, ‘Deiyo ake’ tenen, moupra men tenepmarem dinin, ‘Akeca nong neitamainge ake’ tenen, kael kepkurema tep, lape pepkukene. Ada, yoneitam bari weica derin keca er nongda, ada Asia tara neitamai, Allah teka tenepra kunge nesala, mutu si yoneitam bari jemaat tep kurure. Yoneitam bari talepman kuru sun nongda, ada Allah teka tenenge nesala yoneitam bari mutu jemaat, ^{▼▼Jemaat penung upu deiyoda ake. Ada gereja peramenga utopu upu. Ada tenpu mutu neitamai sun teka tenenge nesala yuma bulupra, Allah upu gekenge nesala tep, jemaat penunge. Amutu-mutu yumada, jemaat si ton perami. Ton tupa penunge. Atep, yoneitam bari jemaatda, ada yoneitam bari mutu, sun gereja si tep perami.} sun melimna malaikat kununge. Adirin weik ngebodi, ne Yohanes tep lap pepneu.