Rev 10 | XteSC | STEP | Akeca yuma epsi pangeda, adipapu ila puto weik kupu malaikat, im deiki tara di kwereryakanmaupa, epsi. Er nong dana-dana yumada, dua geproupa, er giso deikida ambuka deipupa, epsi. Amalaikat er urasinda, keteng dirin weik kuretopu, dirin weik kupupa epsi. Er yanda, ila ati ayumna ingameng utopu kupu dinin, yapi bi kupupa, epsi.

Revelation of John 10

Ila puto malaikatdi yambul buku dopupa, Yohanes epudi, pepu upu

1 Akeca yuma epsi pangeda, adipapu ila puto weik kupu malaikat, im deiki tara di kwereryakanmaupa, epsi. Er nong dana-dana yumada, dua geproupa, er giso deikida ambuka deipupa, epsi. Amalaikat er urasinda, keteng dirin weik kuretopu, dirin weik kupupa epsi. Er yanda, ila ati ayumna ingameng utopu kupu dinin, yapi bi kupupa, epsi. 2 Er buru di doupmau kecada, metek buku dinin, er urasinda pakupra deiamnganen, tepbaupa epsi. Ukupu dinin, er buru deiki tepra doupmaupa, epsi. Amalaikatdi abuku tekrapudi, er dumsisi tara yanda, laut mokon deiki yanipu. Er tebalal tara yanda, tu deiki yanipu. 3 Ukupra tekudi, ila yu pus er sida singa pus upu peramretopu, ngolokudi, upu ila di pepu.

4 Upepupa, kulman yoneitam neitamai di nimi upu utopu upu deiki di pepipa, sun pepi upu gekepsidi, ‘Aupu sekun’ tenen, ketenepmasi dinin, im deiki tara di, yuk nimi upu utopu upu di upepneu. “Gume, sun yoneitam bari kulman di penmang upuda sengna meme. Aupuda inipkurume,” pepneua cadi aupu men seksi.

5 Upepneupa, adipapu arup taru epmasi ila puto malaikat, dana tara yan di tuai cap, dana tara yan di laut mokon deiki cap, tekmau malaikatdi, er dumsisi buru ereipu. 6 Er buru ereipudi, aupu puto di pepu. “Ukutaru di dipra, amenda doryankamre taru neitamai, pio gampu kunkamre ngeboda, im deiki tara cap, im neitamai cap, tuai mutu cap, laut mokon yuma cap, uda, akeca-keca yuma neitamai kure keca yala-yala yuma cap, ketekeiamnga deiyo ngebo, er si deiki di aupu pepsene.

‘Go pio akamseryanen, amenda tarupu gawal dakamsera’ tenena pio gume. 7 Go ton cap men kwapkamre dinino, yoneitam bari malaikat sirik ngebodi, er terompet pepkure taru neitamaida, Allahdi, ‘Ukunkamne’ tenen, pumun taru konum teneamu dinin, iniamu kecada, pel mumupra dopredi, gawal dakamre. Allahdi er pel don neng, ada er upu lap pena neng, sun nabi-nabi neng tep, “Ne teneamsi keca gawal dakamne,” pepra lap peramutopu, ukuda nong kupkamre,” pepra amalaikatdi pepu.

8 Erdi pepneu upu gekepsi pangeda, arup taru im deiki di pepneu ngebodi, kange di ton cap aupu pepneu. Aupu pepu. “Kanda ila puto malaikat tuai cap, laut mokon deiki cap, tekmau malaikat damai bememdi, er buru di doupmau metek buku, getedongopunge dinin, tepra doupmau ngeda dopra talepkurume,” pepneu. 9 Upepneua cadi, aputo weik malaikat kori, er damai bena moropsi. “Metek buku, getedongopmumnge dinin, ukutaru kan buru deiki tepra doupmarem bukuda karepkunerume,” pepra moropsipa, erdi ne tep tamupra pepneu.

“Telepe, ametek buku dopra jepo. Jepmem taruda, kan sipyal pumbonda, mong mokon mikip peramretopu kupkur dinin, kan mundu pumbon kwererbakeryopda, matang pepkeredi, siken tong utopu keca belepkamakere. Belepkerdi su pepkakere,” pepneu.

10 Upepneupa, ne Yohanesdi ametek getedongon buku dopropsidi, jepsi pangeda, erdi peipneutopu, ne sipyal pumbon mong mokon utopu tau pepneu dinin, mundu pumbon puda, matang pepneudi, siken tong belepnue. 11 Ukupneupa, amalaikatdi, “Kanda, tuai ban-ban yuma kunge nesala tep, upu ton cap lap penkamrume. Ada, mutu-mutu yuma kunge neng cap, upu yala-yala yuma penge nesala cap, nimi yala-yala yuma cap, negara-negara kunge nesala yuma cap, tuai mutu ila nimi deiyo neng, raja-raja neng yuma cap, sun yuma tep amenda kunkamre keca lap penkamrume,” peipneupa, ne Yohanesdi gekepsi.