Rev 11 | XteSC | STEP | Tenpu kurpeten keca, pina lyom utopu keca karepneudi, Allahdi upepneu. Akunumpeten pina dopra bememdi, Allah er karena cap, er si eremna cap tep domi ati, Yerusalem ila domi ati nongda, ‘Lyom ake, er pala ake’ tenen, kunumpeterberume. Tonda, ange utopu, Allah er gispal dona tep, nintong telep keca uku dongorameng emas meja ton, ‘Er lyomda ake, er palada ake’ tenen, kunupetepmemdi, akati pumbon kungedi, Allah er si eremenge nesala, ‘Ware kupra kunung do?’ tenen, nukpetepkurume.

Revelation of John 11

Allah er upu lap pena deiyo neng butene di kunkamareng keca tep, pepu upu

1 Tenpu kurpeten keca, pina lyom utopu keca karepneudi, Allahdi upepneu.

Akunumpeten pina dopra bememdi, Allah er karena cap, er si eremna cap tep domi ati, Yerusalem ila domi ati nongda, ‘Lyom ake, er pala ake’ tenen, kunumpeterberume. Tonda, ange utopu, Allah er gispal dona tep, nintong telep keca uku dongorameng emas meja ton, ‘Er lyomda ake, er palada ake’ tenen, kunupetepmemdi, akati pumbon kungedi, Allah er si eremenge nesala, ‘Ware kupra kunung do?’ tenen, nukpetepkurume.

2 Ange yuma kunupetepra, nimi nong nukra deipkurum dinin, akati pum tara dana-dana nimi bulumengaipuda, kunumpetena gume. Deiyoda, akati bura tarada, sun Yahudi yala gum nesala, teka tenena gum nengdi war denge weik 42 war neitamai yumadi, Allah er wepra deiamudi, kange deiamu ati arum Yerusalem mutu yanipmengedi, mali-mali kupra deipkamenga tep pepkune.

3 Tonda, ne upu lap pena deiyo neng butene tep nengeda, ne puto weik sun deiki deipnyopda, denge weik keteng tamun weneri cap, tonda neitamainge ton cap, ataru neitamai yumadi, seribu dua ratus enam puluh (1.260) tumi, ne upu lap penkamrenge. Aupu penkamreng taruda, pio mali opkal, karung goni utopunge kenengkamrenge. Ada, ‘Kange mun kange doupra nesala yumadi engenkameng’ tenen, amali opkal kenengkamrenga tep pepkene.

4 Abutene neng tep nengeda, sun ukupmanto kecada, du mouramre co si, ara co butene cap, weica derin keca butene cap, dopra deipipa, akeca-keca yuma cap, tuai mutu yuma cap taleredi, Ila Deiyo Ngebo, er urasin tara deipipa dirure. 5 Abutene upu lap pena deiyo nengdi, pel donkamreng taru neitamai, yuk nengdi, ‘Anengda, nun song cadi popkupe’ tenen, piripetepmengopda, abutene neng sun sipyal pumbon di, uku bu belepredi, sun mali nesala tep uku jepropkamre. Sun butene tep popterepkameng nesala yumada, ukudi jepropkamre.

6 Aneng buteneda, puto deiyo keca, sun nong deiki konum kurura cadi, sundi Allah er upu penkamreng taru yuma, sun peprenga deiki di, mo pio men cemkamre. Tonda, sun teneprenge taru yumada, sun puto deiki di upu peprengepa, tuai mutu me yumada, yapipu kunkamre. Tonda sundi peprengopda, tuai mutu ban-ban yuma kunge nesala tep, ila kange mun pu, yala-yala yuma jenkamre.

7 Allah er upu lap pena deiyo neng butene di, upu dapepbaramrenganen, konum gawal dakrengopda, tuai mutu neitamai ila tu pumbon di, pio mali gam kure keca welepredi, abutene neng tep popembaramyanen, sun abutene neng pio poptapkamre. 8 Poptapre pangeda, abutene neng sun nong dopra men peipkamenge. Ange gum dinin, aila ati arum domyai, sun Deiyo Ngebo sengdin co deiki popmemei mutu, Yerusalem mutu neitamai, nimi emban bisi neitamaipu, sun nong acapu tapmangepa akupkamre.

Sirya taruda, Yerusalem mutu yuma pio malipu kunkamra tep, domon upu deikida, er si Mesir cap, Sodom cap si butene ton penkamenge. 9 Aneng butene poptaprepa, sun nongda bisi neitamaipu tapkamenge. Nimi yuma gum dinin, ban-ban yuma kunge nesala cap, upu yala-yala penge nesala cap, nimi yala-yala yuma cap, negara-negara kunge nesala cap, ton neng weika di adeprei neng, sun nong butene akwamya dinkamenge. Dinkameng dinin, anesala kan-kan di tenpu ngebo peda, “Uo, aneng butene peipmeko,” men penkamenge.

10 Ange gum dinin, tuai mutu ban-ban yuma, ataru kunkameng nesala yumadi, abutene neng popunge tep, “Walito popmare. Atep nun kange deipmepe,” pepra, kange deipmengedi, pingping kuprepa, sun kayapu tep, tali karena keca yuk-yukai yuma pe karedankamenge. Deiyoda, Allah er upu lap pena neng, gam kuramrei taruda, kange mun pu jena cap, tuai mutu me yuma yapi kupunge cap, uda yuk ikin keca cap, ‘Nun nong deiki wenepra deipsereiya tep, walito’ tenen, kange deipra karerdanapu kunkamenge. Ange yumada, tumi weneri cap, ton tumi neitamai cap neitamai di kunkamenge. Akunkamenge yuma epsi.

11 Dinino, ken utopu keca epsa deiki di atumi weneri cap, tenpu tumi ton neitamai cap konum kupupa, Allahdi gam kuna deiyo keca, sun butene tep karepudi, gam bukeipupa, kange di ton cap gam bukra tekrorei pangeda, akeca dinmai nesala yumada, ila kware weik kupudi, giso talenga beupa, ayuma epsi. 12 Allah er upu lap pena deiyo neng butene gam bukra tekroreipa, im deiki tara di nimi upu utopu upu di, “Aca weleryareso,” pepupa, sun adipapu dua kan-kan di, im deiki tara welerbereipa, akunmai nesala yumadi dinmai. 13 Dinmaipane, ataru dipapu ila mutu longna puto di lokupa, Yerusalem ati arum domyai weike loka embendau. Ati pio weike loka embendaua deiki di, nimi denge weik 7.000 nesala poptapu.

Ange yuma kupunge tep, sun gam tup kunmaidi, dinmai nesalada, im deiki tara talepra kure ngebo Allah tep, “Kanda pio mambule,” pepra gispal donmaipa, epsi. 14 Ange yuma epsa deiki di kael kepsi. Sun malaikatdi, “Bicaue,” pepi ngeda, ‘Kange mun keca butenenge konum kupu dinin, weneri ngeda menmena yankamre,’ tenepsi. Utenen kael kepsi. Ne Yohanesdi pepsene.

Yoneitam bari malaikatdi er terompet lelim pepupa, kupu keca tep, pepu upu

15 Ayuma dinmasipane, amendada tenpu ngebo ton, yoneitam bari malaikatdi, er terompet deiki lelim pepu pangeda, im deiki tara neitamai yuma ila upu weika di penmaipa, gekepsi upuda, ake. Aupu penmai.
“Tuai mutu ban-ban yuma talepra nimi deiyo ngebo deiyo keca yumada, nun nai bo Allah cap, erdi dokotepseu nimi Lyemna Deiyo Ngebo Kristus cap, sun butene di konum bisbisa kapmarengdi, akeca yuma talerunge.
Atep ukutaru di dipra, amenda doryankamre taru peda, akeca-keca yuma taleprengedi, Ila Deiyo neng pio kunkamrenge.”

16 Aupu penmaipa, Allah er urasin tara sun ila bungna keca deiki bungmai ila deiyo neng, sun 24 wisi deiyo nengda, Allah damai gutam tu dipdongopidi, Allah er si eremna tep aupu pepi.
17 “Nun nai bo Allah, kanda akeca-keca yuma bisbisa kapra, akeca yuma deiki tara kumemdi, ila puto weik ngebo kurume. Kanda nun Ila Deiyo Ngebo kurume. Menop taru kuramumanen, adi diprap tupa gampu kurume.
Kan ila puto deiki di, akeca-keca yuma konum talepra kuruma cadi, nun yumadi kan tep, ‘Telepe,’ pepkepe.
18 Ban-ban yuma kungedi, teka men tenenung nesaladi, kan tep yu weik kuramupa, mali upu weik peramkei dinino, ukutaruda konuma. Kanda sun men di konum deami nesala tep, upu lepsisikra bokeipmemdi, wenepkurem taruda, konum kupre.”
“Tonda, kan amutara bukra kan pelpu doramidi, kan peiamum upu lap pena deiyo neng cap, kandi weamumpa, kan tep teka teneamkei nesala yuma cap, uda, sundi, ‘Allah erda mambul weik ngebo’ tenen, kan si eremamkei nesala yuma tep nengeda, sun kunumna tep menenga keca karepkurem taru konum kupsere.
Ada, kan nyapu dinin, ila mambul neng pe, yambul mambul neng peda, sun yuma tep menenga keca karepkurume. Tonda, ware nesala do yuma, sundi yuk tuai nesala tep, mali kemdirami neng yuma tep nengeda, ila di wenepra poptapkurem taru konum kupsere.”

19 Sun 24 wisi deiyo nengdi aupu yuma pepipa, gekepsi. Gekepsi taru dipapu im deikinge dinin, Allah er si eremna ati buplan paktapipa, akati pumbonda bekin deipmaiya epsi. Abekin pumbonda, menop taru Allahdi Musa tep, “Ne nyapu yumada ukunkameng keca ake, mali tep men kunkameng keca ake,” pepra, pala gel deiki sekinge deipmai ngeda epsi. Epsi taruda, kulman cap, perenglang pena cap, lelim weik cap, mutu longna cap, im neitamai di mul duduya sangmaunge cap, ayuma epsi.