Rev 12 | XteSC | STEP | Akeca-keca yuma konum kupupa, tenpu ila mambul keca ton, im deiki tara neitamai belepra tengyau. Akeca yumada, nimidi, ‘E, deiyo ake’ tenen, men kael keptenge. Tenpu ila mambul ner tengyaupa, er opkalda keteng dirine weik kuramretopu kupupa, epsi. Er giso deiki deipmau kecada, tali ingamre kuru dukdongopra ongomgenem pepra deipkada, epsi. Tonda, aner er yan amutarada, war bukupa epsi.

Revelation of John 12

Ila mambul ner cap, Mem Bal Utopu dinin, er nongda bi kwamu mali keca cap epunge tep, pepu upu

1 Akeca-keca yuma konum kupupa, tenpu ila mambul keca ton, im deiki tara neitamai belepra tengyau. Akeca yumada, nimidi, ‘E, deiyo ake’ tenen, men kael keptenge. Tenpu ila mambul ner tengyaupa, er opkalda keteng dirine weik kuramretopu kupupa, epsi. Er giso deiki deipmau kecada, tali ingamre kuru dukdongopra ongomgenem pepra deipkada, epsi. Tonda, aner er yan amutarada, war bukupa epsi. 2 Anerda mundu konum douamnga cadi, mi deiyo jenmaupa, ‘Mi deipkun’ tenen, ngolongmaupa, gekepsi.

3 Aner epsi taru dipu, tenpu ila mambul keca ton belepra tengyau. Akeca er urasinda, ila yu mem bal utopu kupu dinin, yapi bi kwamupa epsi. Er gisoda, yoneitam bari kupupa, agiso deikida, ila nimi deiyo nengdi sun giso deiki galunung keca er sida mahkota, giso galuna keca sepuluh kupupa epsi. 4 AMem Yu Bal er lyom amnge puto di donmaua deiki di, im neitamai tup kwamu kuru weika di doprapudi, tu deiki dokotepu. Ukupu dingeda, amundu douamu ner tekmauai, er urasin damai tara kalekra tekmau. Aca tekmaua deiyoda, ‘Anerdi mi deipkotepreopda, ne adipapu ami popra jepkune,’ tenepudi, aner damai kalekra tengmaupa, epsi.

5 Kalekra teka dinmaupane, anerdi sal mi deipu. Sal mi deipu pangeda, adipapu asal mi dopra, im deiki tara Allah er damai dubei. Allah er bungyai dubei. Asal mida, tali mi gume. Amenda taruda, amidi Allah tep teka tenena gum nesala, mutu-mutu yuma kunge nesala tep, puto weik kuprepa, yu weik deiki di, anesala yuma talepra, sun ila nimi deiyo ngebo kunkamre. Ware nesala do yuma, ami tep men bisbisa kapmanto kunkamenge. 6 Allahdi, ‘Aner kalekra melimkamne,’ teneamngadi, mo cap, nimi cap, pio men kurur mutu neitamaida, anerdi, ‘Allahdi keteneiamngaipu benkun’ tenen, sepra beu. Aner sepra beudi, inipmaupa, Allahdi tumi denge weik keteng tamun weneri cap, tonda neitamainge ton cap, (1.260 tumi) ataru neitamai di, aner tep kalekra melimamu.

7 Ataru dipapu akeca ton epsi. Im deiki tara neitamai yumada, podanapu kunmaipa, epsi. Angeda, Malaikat Deiyo Ngebo, er sida Mikael kurure. Mikael er amutara bukra kunge malaikat cap, sun yumadi, Ila Mem Bal Utopu Ngebo cap, amem bal er amutara bukra kunge malaikat tep, sun yuma podanapu kunmaipa, epsi. 8 Aila Mem Bal Utopu Ngebo cap, er nyapu sun malaikat malinge capdi, Mikael tara malaikat tep, ‘Bisbisa kapkup’ tenen, piripeterami dinin, sun mali malaikat puto yambulpu kwamnga cadi, Mikael cap, er tara malaikat capdi, Mem Bal er tara mali malaikat tep, bisbisa kapi. Ukupipa, Ila Mem Bal Utopu Ngebo cap, er nyapsilip sun mali malaikat yuma cap dopra, im deiki kuramyai neitamai di dopra, bura dokotepipa, tuai saka yai.

9 Mikael cap, er nyapsilip capdi, Ila Mem Bal Utopu Ngebo cap, er amutara kurami mali malaikat cap bisbisa kapidi, sun aneng yuma tuai dokotepi. Er aMem Bal Utopu Ngeboda, yuk ngebo gume. Er sida Kain Jen Ngebo, tonda Setan ton penupe. Pumun taru di dipra ataru neitamai yuma, erdi tuai nesala sun dipru gipra dubaramnga deiki di, nesala ban-ban yuma, Allah er dumsisi bisi tamengedi, lerekra mali bisipu banunge. Allah tapra mali bisipu banunga deiyoda, er tepa.

10 Kain Jen Ngebo cap, er malaikat cap, tuai mutu dokotepipa, im deiki tara tenpu ngebodi aupu ila di pepupa, gekepsi.
“Ukutaruda konuma. Teka teneramipa, nun weit yapu utopu kunge nesala tep, Kain Jen Ngebodi, ‘Sunda mali,’ pepra, mali upu sun nong deiki deriseredi, luludiserur ngeboda, konum bisbisa kapmange.
Kain Jen Ngebodi teka tenena nesala yuma tep, keteng komuni pe, lukunda peda, ayuma taru yuma, Allah gekerurai tekredi, ‘Sunda mali kurume,’ pepra luludiserure. Dinino, erda konuma. Tuai mutu konum dokotepmange.
Atep konuma. Nun nai bo Allahdi er nyapu yuma tep lyepkure. Ataru dipapu, Allah er ila puto deiki di, akeca-keca yuma deiki tara kuredi talerepa, akeca yuma er amutarapu kunkamre.
Tonda, Allahdi, ‘Nesala yuma lyepkamre’ tenen, dokotepseu ngebo Kristus cap, er Allah capdi akeca-keca yuma talepra kunkamrenge.”
11 “Allah er nyapu yumada, Domba Mi Utopu Ngebo, er yapi sun lyemna tep karepka deiki di, Kain Jen Ngebo bisbisa kapi. Tonda, anesaladi, “Nimi lyemna tep kai telep upu ake,” pepra katuai di peteremamya deiki di, Kain Jen Ngebo bisbisa kapi.
Anesala yumadi, ‘Gume, nun gam kunupada ila mambule. Nun gam kunada nun mawa cadi, popsenung tep, Allah upu penupada tapkupe’ tenen, kwar pio men dangami. ‘Mali nengdi popsenga peda, telepe pua,’ tenerami. Ange yuma kuramya deiki di, Kain Jen Ngebo tep, bisbisa kapra kurami.
12 Ukupra kuramya tep nengeda, im deiki tara neitamai kumum nesala yumada, kange deipra pingpinga di kunkamrume. Dinino, sun tuai mutu cap, laut mokon pirman cap, mokon neitamai cap, kumum nesala yumada, sunpuda bicaue.
Allahdi Kain Jen Ngebo dopra, im deiki di dokotepupa, sun damai tuai mutu sakmare. Malaikatdi, Kain Jen Ngebo dokotepmangepa, tuai mutu kwerepmara cadi, er cap sun tuai nesala cap kikiman kunkamruma tep, kange mun kange doupra kunkamrume.
Seramkida, ‘Uo, ne tupa tali lupra embetene taru tupa akwapmanere ngeda, go metekanun pua’ tenen, konum kael kepmara cadi, yu pio weik kupmara tep, sun tuai mutu tupa kurumu nesalada bicaue.” Tenpu im deiki kure ngebodi pepupa, gekepsi.

13 Aupu gekepra epsi keca ton pepkusene. Uda, sun telep malaikatdi, Kain Jen Ngebo bisbisa kapidi, er dopra tuai mutu dokotepipa, angebo, Ila Mem Bal Urasin Utopu Ngebodi tenepu. ‘Gume, sal mi ukupu deipmau nerda, popbisipkune,’ tenepudi, aner tep piripetepra tomorbeu. 14 ‘Aner tamopkune’ tenen, sepra beupane, Allahdi aner tep, ila Seng-seng Pena ma pol utopunge butene karepu. Allahdi aner tep ma pol karepka deiyoda, ‘Aner er kalengna tep, mo cap, nimi cap, men kurur mutu neitamai, keteneiamsi mutu lakra betupa, aneitamaida keteng tamun weneri cap, tenpu keteng tamun neitamai cap deiki kunkamre,’ tenepu. Allahdi aner kalekra melimkamna deiki di, ‘Kain Jen Ngebodi aner men poptue,’ tenepudi, Allahdi aner tep Seng-seng Pena ma pol utopunge butene karepu.

15 Karepupa, angebo, Ila Mem Bal Urasin Utopu Ngebodi, er sipyal pumbon di, ila me mokupra tuku. Atuku meda, ila me deipredi ouramretopu, kupudi beu. Ada, ‘Ame oupbaredi, aner jepra popkur,’ tenepudi, er sipyal pumbon di, ila me mokupra duktapu. 16 Duktapupa, ame oupudi beu dinin, tuai mutu di, ‘Aner melipra lyepkun’ tenen, dana-dana tu bokrapupa, me abisi wekroudi, gum kupu.

17 Ukupupa, Ila Mem Bal Urasin Utopu Ngebodi aner tep, ila yu kupupa, ‘Aner men di deiamu nyapu yuma epnedi poptapkun’ tenen, yukai beu. Anerdi deiamu nyapu pepu ngeda, ada yuk nesala tep gume. Ada Allahdi, ‘Ukunkamrume, angeda men kunkamrume,’ pepra, deriserur upu teka tenepmengedi, aupu talepra dombangedi, Yesus er kai telep upu talepra, pio peteremameng nesala tep pepu. Ila Mem Bal Urasin Utopu Ngebodi, ‘Uo, ware kuptene do?’ tenepudi, mali kange doupra, laut mokon pirmanai tengbeu.