Rev 13 | XteSC | STEP | Mem Bal Urasin Utopu Ngebodi, laut mokon pirmanai tengbeupa, ne Yohanesdi epsi keca pepkusene. Ada, laut mokon neitamai di, mali kudina keca, ilange gam kurenge belepra tengyau. Akeca er urasinda lap pepkune. Er gisoda yoneitam bari kupu dinin, er giso galuna keca mahkota yuk-yuk kwamu ngeda, denge gona di 10 kupu. Tonda, er yoneitam bari giso aso deikida, si katuai kupu. Asi sekra deiamupa, katuai kwamu ngeda, nimidi amali ngebo tep er si sipeptengopda, Allah gekeptudi, ‘Ne song’ tenen, yu weik kuptu. Amali ngebo er si yumada, Allah yanina upu kurura tep pepne.

Revelation of John 13

Ila Mali Gam Kure Keca epudi, pepu upu

1 Mem Bal Urasin Utopu Ngebodi, laut mokon pirmanai tengbeupa, ne Yohanesdi epsi keca pepkusene. Ada, laut mokon neitamai di, mali kudina keca, ilange gam kurenge belepra tengyau. Akeca er urasinda lap pepkune. Er gisoda yoneitam bari kupu dinin, er giso galuna keca mahkota yuk-yuk kwamu ngeda, denge gona di 10 kupu. Tonda, er yoneitam bari giso aso deikida, si katuai kupu. Asi sekra deiamupa, katuai kwamu ngeda, nimidi amali ngebo tep er si sipeptengopda, Allah gekeptudi, ‘Ne song’ tenen, yu weik kuptu. Amali ngebo er si yumada, Allah yanina upu kurura tep pepne.

2 Gam kure keca pio malinge epsada, er nongda ila yu pus, er sida macan tultul utopu cadi, er potongda, boromboroma damu. Er yantangda, bura kuramre keca er sida beruang utopunge cadi, er yantangda pala weik kupudi, er buru galada lyom weik kupu. Er sipyalda, ila yu weik pus er sida singa pus utopu kupu. Ila Mem Bal Urasin Utopu ngebodi, ‘Laut mokon pumbon di yanmar keca melipkuner’ tenen, er ila puto cap, er nimi deiyo keca cap, er taleamu keca cap, laut mokon neitamai di belepra tengyanmau mali gam kure keca deiki deipu.

3 Apio mali keca gam kure keca, er giso yoneitam bari kupu dinin, tenpu ngeda aso deiki pomya dila kupu. Tali ngebo kuptutoda, konum deamtu dinin, pomya dila kaikamupa, gam tup kunmaudi, bumnya dila kwamupa, epsi. Tuai mutu ban-ban yuma tupa kunmai nesaladi, amali gam kure keca tep, ‘Uo, er giso deiki dila weiknge akapka cadi, konum deamtu dinin, tupa gam kurure’ tenen, lukdaidi, er peramu upu gekepra dombarami. 4 Mem Bal Urasin Utopu Ngebodi, laut mokon pumbon di yanmau ngebo tep, er puto weik karepka cadi, nimi tuai nesala weika di Mem Bal Utopu Ngebo tep si eremami.

Tonda tuai neng weika di, laut mokon pumbon yanmau mali keca gam kure keca tep, ‘Uo, ware keca yumada, er kuretopu kurur do? Gume, er pio yuk kuredi, puto pio weik ngebo kurura cadi, ware nesaladi balila kuptupa, angebo bisbisa kapkup’ tenen, ‘Er tep poptenge do? Gume, angeboda, men poptenga tep, er si peda eremkamepe,’ tenenmaidi, er si eremnapu kurami.

5 Mem Bal Kamu Utopu Ngebodi, laut mokon pumbon di yanmau keca tep, ila puto karepupa, akeca di ila gemena upu cap, er pe kange dipu tenepra eremdana upu cap, Allah tep yanina upu cap, weika di peramudi, tuai mutu keca yuma taleamu. Akeca yuma taleamu taruda, ware denge weik 42 war deiki di akeca yuma taleamu. 6 Ataru yuma neitamai di, Allah er tep mali upu peramudi yaniramnga cadi, Allah er si cap, Allah er damai im deiki tara cap, Allah cap im deiki kikiman kunge nesala cap, im deiki kunge malaikat cap, akunge nesala yuma tep, pio mali luludina upu weika di peramu.

7 Tonda Kain Jen Ngebodi amali gam kuramu keca tep, ‘Allah tep teka konum teneami nesala tep, porberedi sun yuma bisbisa kapkamre’ tenen, er puto karepka deiki di, Allah er weamupa, er tep teka teneramidi, tuai mutu neitamai tupa kunmai nesala tep, porbanapu kuramu. Ange utopu, er puto kwamnga deiki di, ban-ban yuma kunmai nesala, nimi yala-yala yuma cap, upu yala-yala yuma penge nesala cap, negara-negara yuma neitamai kunge nesala yuma cap tep, laut mokon pumbon di yanmau ngebodi, er dipapu bisbisa kapudi, sun yuma taleamu.

8 Taleramuanen, ataru neitamai tuai ban-ban yuma, Allah tep teka men teneamidi, talipu kunkameng nesala yumada, er sipu eremkamenge. Dinino, Gam Kunkameng Nesala Si Sengna Buku neitamai, Allahdi si konum sekeiamu nesalapuda, amali gam kun keca, er si men eremkamenge. Allahdi akeca-keca kapul men ketekeiamu taru di, ‘Nimi Lyemna Ngebo popmenga deiki di, teka tenenge nesala lyepkamne’ tenen, Allahdi Domba Mi Utopu Ngebo keteneiamseudi, tuai mutu dokotemseu ngeboda, erdi animi si sengna buku talerure. Ada gam kunkameng nesala sun si sengamu bukuda, ernge pua.

9 Ne Yohanesdi pepsene. Ware nesala do yuma, amul akapserepa, apepkusen upu tep, ‘Deiyo ake’ tenen, gekepmanto nesala kurum nesala yumada, apepkusen upu moupra gekenkamrume. Aupuda, ake.
10 “Ataru tuai mutu neitamai tupa kunkameng nesalada, Allahdi teneamutopu, angepu kunkamenge. Ada Allahdi, ‘Anengda ateng koupmengedi, wenemna ati dongopkamenge,’ teneamu nesalada, tek sisi ateng koupra wenemna ati dubenkamenge. Tonda, Allahdi, ‘Aneng tep nengeda, yuk nengdi parang ya dopra poptapkamenge,’ teneamu nesalada, tek sisi parang ya di poptapkamenge.”

“Ukupra kunkamsenga tep nengeda, tali kange doupra kunada yapso. Aikin keca kunkamrenge tep nengeda, Allahdi weamupa, er tep teka teneami nesala yumada, ikin kuptua peda, ‘Tapkup do?’ tenena pio gum di, pio pe deipra puto dipu kunkamenge. Dinino, ikin weik kuprepa, kange mun kange doupra, ‘Allah tapkup do, teneprum’ tenen, Allah er upu peseretopu, aupupu talepra, pio dimpeprappu kunkamrume.” Ne Yohanesdi pepsene.

Mali Gam Kun Keca tu pumbon neitamai di belepra tengyau atep, pepu upu

11 Amendada, yuk Mali Gam Kure Keca tu pumbon di belepra tengyaupa, epsi. Akeca er giso deikida, yambul domba bisam mi giso takke (abolyakot) kuretopu kwamu. Er upu lelimda, Ila Mem Bal Urasin Utopu Ngebodi peramutopu upu penmaupa gekepsi. 12 Menmena taru laut mokon neitamai di tengyau mali gam kure ngebodi, ‘Amenda taru tu pumbon di belepra tengyanmau ngebo melipkuner’ tenen, er puto cap, er deiyo keca cap dopra, amenda taru tu pumbon di yanmau Mali Ngebo er nong deiki deipupa, aputo deiyo keca yuma talepra apel doramu. Amenda ngebo pepka deiki di, ataru tuai mutu tupa kurami nesala ban-ban yumadi, menmena tengyau Mali Ngebo tep er si eremami. Ada, er aso deiki pomya dila kwamu ngebo tep, er si eremami. 13 Amenda taru tu pumbon di belepra teku ngebodi, nimi men kupmanto keca cap, ila mambul pel, nimi men kupmanto keca, kunupsek pen pel cap doramu. Tonda, tuai mutu tupa kunmai nesala yuma dinmaipa, erdi peipupa, im neitamai di uku bu sakupa, epi.

14 Menmena yau ngebo, mali gam kure ngebodi, ‘Amenda ngebo melipkamner’ tenen, puto weik karepupa, amenda tu pumbon di belepra tengyau Mali Ngebodi, pio mambul pel weik doramu. Amambul pel doramnga deiki di, sun tuai mutu tupa kurami nesaladi, er mok peramu upu yuma teka tenerami. Mok kecapu teka teneramya tep, amenda taru tengyau ngebodi peipupa, tuai nesala yumadi, menmena taru yau ngebo, er urasin utopu keca, sun pe buru di petupra ketekepra deipi. Ada er giso tenpunge, ya di copra popi dinin, men deamudi, er giso deiki dila weik kuramu ngebo, ‘Er tep gispal dopkamep’ tenen, amali gam kure keca er urasin utopu petupra deipi.

15 Sundi er urasin utopu keca petupra deipipa, amenda yau ngebodi, puto weik karepka deiki di peipupa, sun nimidi petupra deipi keca, tali keca kwamu dinin, gam bukra isin kupu. Isin kupudi, upu ton peramu. Yuk nesaladi, “Gume, pona dila kure ngeboda nun song cadi, er urasin utopu keca petupra deipmaseng kecada, nundi er si men ereipkupe,” pepra, tapi. Mali gam kure keca urasin utopu keca petupra deipmainge tep, ‘Nun song’ tenen, tapi neng tep nengeda, petupra deipipa, gam bukra isin kupu keca di, upu peipupa, yuk nengdi anesala portamami. Ada, ‘Tali keca er si men eremkamepe,’ perami nesala tep, yu nengdi porami.

16 Tonda, amenda taru tu pumbon di yau ngebo, er upu peipka deiki di, tuai mutu neitamai tupa kurami nesala yuma sun dumsisi buru deiki peten kemdin keca sekra derirami. Sun buru deiki peten kemdina tep, men sengami nesalada, sun aso deiki sengdirami. Ange tep nengeda, amenda taru tu pumbon di yau ngebodi peipupa, nesala yala-yala yuma, sun nong deiki akeca sengdirami. Ada, ila mambul neng pe, mambul gum neng peda, tonda isomka neng pe, tali kankan kunge nesala peda, tonda kunumna keca dorona gum di, yuk neng tep pel dorami nesala pe, sun kange dipu, sun yuk pel dorami nesala peda, nimi yala-yala yuma, sun nong deiki akeca peten kepra sengdirami.

17 Petenkemdina tep sengdirami kecada, tali tep men sengami. Deiyoda ake. Ada menmena laut mokon neitamai di yau ngebo, ‘Anesala yuma talerure, tenepkamneng’ tenen, er peten kemdin keca tuai nesala, sun nong deiki sengdirami. Angeda, er si utopu, tonda er nomor utopunge tuai nesala sun nong deiki sengdirami. Ton nengda, sun giso deiki sengami. Ton nengda, sun buru deiki sengami. Akeca sengdiraminge deiyoda, ake.

Ada ware nesala do yuma, sun aso deiki do, sun dumsisi buru deiki do, menmena yau ngebo, pio mali gam kure ngebo, er tep peten kemdin keca men kapyopda, anesaladi akeca-keca yuma men kunuptenge. Tonda, sun pe keca dopra, ‘Co bo doproptepe’ tenen, yuk neng tep men kunuptenge. ‘Petenkemdina tep, sun nong deiki sengaminge men kapyopda, bung keca yumada kunumna cap, dorona cap men kuptenge’ tenen, tuai mutu neitamai tupa kurami nesala, sun nong deiki sengami. Ukuraminge yumada, ne Yohanesdi epsi.

18 Uda, ne Yohanesdi arup sekmasen upuda, tali kange doupra kunge nengdi men kael keptenge. Aupu deiyo, nong neitamai ngeda, ila kael kemna deiyo keca talepra kunge nengpuda, moupra kael keptenge. ‘Deiyo ake’ tenen, moupra kael kepmanto nengdi, menmena laut mokon neitamai di belepra tengyau ngebo, pio mali gam kure keca, er nomor 666 kupmarada, nukpetepkamenge. Anomorda, tuai nengdi penge nomor cadi, laut mokon pumbon di tengyanmau ngebo er nomorda 666 kurure. Ne Yohanesdi pepsene.