Rev 14 | XteSC | STEP | Arup pepmasen keca epsi dingeda, ne Yohanesdi amenda epsi keca ton lap pepkusene. Ada tenpu ila mutu dup, er sida Sion mutu, Domba Mi Utopu Ngebo cap, erdi konum lyepu nesala cap, sun denge weik 144.000 nesala, amutu dup deiki tekmaipa, epsi. Sun denge weik 144.000 nesala yumada, Domba Mi er si cap, er nai bo Allah er si cap, sun aso deiki sekra deiamu ngeda, epsi.

Revelation of John 14

Domba Mi Utopu Ngebo cap, erdi lyepu nesala, sun denge weik 144.000 nesala cap tep, pepu upu

1 Arup pepmasen keca epsi dingeda, ne Yohanesdi amenda epsi keca ton lap pepkusene. Ada tenpu ila mutu dup, er sida Sion mutu, Domba Mi Utopu Ngebo cap, erdi konum lyepu nesala cap, sun denge weik 144.000 nesala, amutu dup deiki tekmaipa, epsi. Sun denge weik 144.000 nesala yumada, Domba Mi er si cap, er nai bo Allah er si cap, sun aso deiki sekra deiamu ngeda, epsi. 2 Epsidi, im deiki tara di ila lelim butene gekepsi. Tenpu ngeda, ila me ounmaredi, lelim weik peramretopu lelim cap, tonda ila kulman peramre utopu lelim cap penmaupa gekepsi. Tonda, nesala denge weik buluptengedi, sun gitar bung-bung pena lelim weika di peptenga utopu, alelim ton penmaupa gekepsi.

3 Ayuma gekenmasipa, sun 144.000 nesala, Domba Mi Utopu Ngebodi konum lyepu nesaladi ukupu mut penmai. Ukupu mut penmaidi kunmaiyaida, Allah er ila bungna keca deiki bukmauai damai penmai. Tonda, sun dumbari telep gam kunge keca cap, sun 24 wisi deiyo neng cap acapu, Allah er urasin tara tekmaiyai damai mut penmaipa, gekepsi. Sun denge weik 144.000 nesaladi, ukupu mut penmai dinin, yuk nesala yumadi sun penmai mut, ukupu ngeda, men kael kepmanto kunmai. Dinino, Domba Mi Utopu Ngebodi sun denge weik 144.000 nesala, tuai mutu neitamai di konum lyemamu nesala, sun dipapu amut kael kemaidi penmai.

4 Anesalada, sun denge weik 144.000 kunmai nesalada, tuai mutu kurami taru neitamai yumada, mali keca yala-yala yuma talepra men kuramya tep, tali nyangtameng nerapu cap upula men nyangdaramidi, pio dumsisipu kurami. Domba Mi Utopu Ngebodi mepra barepa, er amnyo tara dombarameng nesala yumada, sun denge weik 144.000 kunmai nesala, adipapu er tep dombanunge. Tuai nesala ban-ban yuma kan-kan neitamai di, Domba Mi Utopu Ngebodi kunupra lyemamudi, Allah er gispal dona tep, anesala dopra Allah tep kareamu. Ada, weni kwaneng yongopra, ‘Allah er gispal dopkup’ tenen, kareramengtopu, Allah er cap, Domba Mi Utopu Ngebo cap, sun butene gispal dona tep, sun denge weik 144.000 kunmai nesala kunupra lyemamudi, Allah cap, Domba Mi Utopu Ngebo cap tep kareamu.

5 Sun denge weik 144.000 nesala kan-kan yuma, mok upu tenpu peda pio men peramya utopu, ataru peda mok upu pio men penmai. Tek sisi upupu peramitopu tupa penunge. Yuk nesala yumadi aneng tep, “Sun mali kurami kecada ake-ake,” pepra, sun nong deiki mali upu lulupra men peptenge. Mali kun keca tenpunge peda men kuramya cadi, deiyo men kurura tep, yuk nengdi, sun 144.000 nesala tep, mali upu men peptenge. Ne Yohanesdi pepsene.

Malaikat weneri ton epudi, lap pepu upu

6 Anesala yuma epsi dingeda, tenpu malaikat ton im neitamai lakra embanmaupa, epsi. Pumun taru di dipra ukutaru neitamai yuma, Allahdi er kai telep upu, nimi lyemna upu perur upuda, amalaikatdi dopropudi, lap pepra embanmau. Pepra embanmaupane, ataru tuai mutu ban-ban yuma neitamai tupa kurami nesala gekerami. Ada mutu ban-ban yuma kunge nesala cap, nimi yala-yala yuma cap, upu yuk-yuk penge nesala yuma cap, negara-negara yuma neitamai kunge nesala yuma cap, ‘Nimi lyemna tep kai telep upu gekenkameng’ tenen, amalaikatdi aupu lap pepra embanmaupa, gekepsi. 7 Amalaikat ila upu deiki di aupu penmaupa gekepsi.

“Allahdi nesala ban-ban yuma tep, upu lepsisikra bokeipseredi, wenepkamser taruda, konum kupsera tep, sun yumadi Allah tep kwar dangkurume. Kware kupserepa, Allah tep, ‘Uo, kanda pio telepe kurume,’ pepra, er tep gispal donkamrume. Ware keca do yuma, im neitamai cap, tuai mutu cap, laut mokon cap, embaramre me yuma cap, akeca-keca yuma ketekeipra deiamu deiyo ngebo, Allah tep, sun yumadi er sipu ereipkurume,” pepra embanmaudi, amalaikat lakra embanmaupa, ne Yohanesdi epsi.

8 Menmena malaikat lakra banmaupa, er amnyo tara tenpu malaikat ton cap amenda lakra yakanmaupa, epsi. Butene yanmau malaikatda, aupu pepbanmau. “Ila ati arum domyai, er si Babel mutu perami mutuda, konum gum kupre. Allahdi amutu kwamu keca yuma urupra sikke buktapmare. Deiyoda, Babel mutu kurami nesaladi, sun pio mali keca putaramupa, akecapu talepra pio mali kuramya deiki di Allah tamamidi, yuk tali keca talepra malipu kurami.

Ukurami taru yumada, yuk mutu kurami nesaladi, sun mali kun keca epra kael keamidi, sun peda pio mali kuramidi, Allah tep tamami. Angeda, nimidi kange yawaramne me weika di jengepa, sun kange yawaramrepa, pio mali kuramengtopu kurami. Ukupra pio mali weik kurami ngeda, sun Babel mutu kurami nesala, sun deiki kwapka cadi, Allahdi amutu kwamu keca yuma konum urupra tapredi, sikke buktapmare,” pepu. Amalaikatdi upepra banmaupa, ne Yohanesdi gekepsi.

9 Ange epsi pangeda, malaikat weneringe ton yakanmaupa, epsi. Sun butene menmena lakra banmareipa, amenda yakanmau malaikatda, ila upu deiki di aupu pepu. “Ware nesala do yuma, laut mokon neitamai di tengyau ngebo, pio mali gam kure ngebo, er peten kemdina nomor sun aso deiki do, sun buru deiki do, sekra deipmengepa, amali ngebo cap, er urasin utopu petupra deipinge cap tep, gispal dopra er si eremenge nesalada, sun pio bicaue. 10 Ada tali tep gume. Deiyoda ake. Allahdi anesala yuma tep, yu pio weik kuprepa, wenemredi, sun nong deiki ikin keca pio weika di deipredi, poptapkamre.

Akunkamre ngeda, ukupmantonge tep pepne. Ada, yu weik kange yawaramre me gwepra, tali me cap men tapakmengedi, tenpu me mau pumbon weika di dikdongopmengepa, dinikredi diningsangamretopu, Allahdi anesala weika di wenemkamre ngeda, ikin pio weik kuprepa, men lyepdanmanto kunkamenge. Allahdi poron gel, er sida belerang, ada uku bupu weika di jerepa, gel but tongda, siken tong utopu tong weik peramrenge dopra, anesala sun nong deiki deiprepa, ukudi sun nong bol jeramrepane, pu weik jerepa pio doungedi, engenkamenge. Engepra doungepa, Domba Mi Utopu Ngebo cap, Allah er im deiki pel don neng, sun pio dumsisi kunge malaikat yuma capdi dinkamenge.

11 Anesala dopra uku jeramre mutu neitamai dongoprepa, uku bu di sun nong jerepa, ket welenkamrada, pio men gum kupkamre. Amenda yankamre taru yuma peda, auku pio jeramreyanen, ket pio welenkamre. Pio Mali Gam Kure Keca, er peten kemdin keca, er nomor sun nong bol deiki sengmengedi, er pe nong cap, er urasin utopu keca petupra deipinge cap tep, gispal dopra, er si eremenge nesala yumada, sun beipye peingna tep, go ton pio men kunkamre. Auku neitamaipu, ukudi sun nong jerepa, pio engepra dounapu kunkamenge.” Weneri taru yanmaudi lakra embanmau malaikatdi aupu pepmaupa, gekepsi.

12 Ange tep nengeda, moupra gekenkurume. Ne Yohanesdi pepsene. Ikin keca weik yankamrenge tep nengeda, Allahdi weamupa, er tep teka tenengedi, er upu talepra dombanung nesala yumada, ikin keca kupserya peda, tamna pio gum dipapu, pio pe deipra, Yesus er tep pu, teka tenemumdi, Yesus tep pio talepra kunkamrume. Ikin weik kunkamre ngeda, menmena men gum kupkamra tep pepsene.

13 Amalaikat weneri dinmasipa, adipapu im deiki tara di nimi upu utopu upu di aupu ton pepupa, gekepsi. Aupuda ake. “Aupu sekrume. Ukutaru di dipra amenda doryankamre taru neitamai yuma, Yesus cap dipru dukdongopra kunung dinin, amenda taru depkameng nesala yuma tep, Allahdi telep kweiprepa, kange deipra pio teleppu kunkamenge,” pepu. Upepupa, Allah er Lek Sambaladi upepu. “Tek sisi peprume. Sun pel telep kupra doramipa, nong kwamu ngeda, Allahdi kael kemrura cadi, anesala depmengedi er damai welepmengopda, ikin keca sun nong deiki kuramupa, pel ikin di doraminge yuma tapmengedi, beipye peikmengedi, telep kange doupra kunkamenge. Sun ikin ton cap pio men kunkamenge.” Allah er Lek Sambaladi pepupa, gekepsi.

Sirya taru Allahdi tuai nesala yuma tep, upu lepsisikra bokeipredi, wenepkamrenge tep, domon upu deiki di pepu upu

14 Ne Yohanesdi gekenmasi upu cap, tonda, dinmasi keca cap tep pepkune. Ne urasin tarada, pio lek dua kupmauai, adua deiki bukmau ngebo er urasinda, Nimi Mi Sisa Utopu Ngebo bukmaupa, epsi. ‘Erda ila deiyo ngebo kurure, tenepkameng’ tenen, er giso deikida, emas di ketekepra giso galupra deipi keca, er sida mahkota deiaminge kupmaupa, epsi. Tonda, er buru deikida yu weik parang ya doupmaupa, epsi. 15 Adinenda, Allah er im deiki tara si eremna ati pumbon di, tenpu malaikat ton yaudi, Nimi Mi Sisa Utopu Ngebo tep, ila upu deiki di adomon upu pepu.

“Ukuda konuma. Kan yu parang doupmaremada, dopra tuai mutu kure keca ya turberume. Tuai mutu bolongami keca yuma, konum wisipudi, ekmara tep, sekra derin taru konum kupmara cadi, ya sekra derirberume,” pepu. Adomon upu pepkada, mali kurami nesala wenemna taru konum kupka tep, pepu.

16 Upepka tep, dua deiki bukmau ngebodi, er yu parang ya dopra, tuai mutu ban-ban yuma deiki, ya pepkopra kunupetepu. Kunupetepka deiki di, tuai mutu bolokamipa, engamu keca yumada, yatupra tapu. Aupu deiyoda ake. Engamu ngeda, ada nesaladi mali kuraminge. Ya tunada, wenemna tep pepu.

17 Ukupupa, adipapu Allah er im deiki tara si eremna ati pumbon di, tenpu malaikat ton yanmau ngeboda, er peda yu weik parang ya dopra yaupa, epsi. 18 Ange utopu, Allah er gispal dona tep, nintong telep keca uku dongoramengai, emas meja dam, tonda Allah er kundam pel dore malaikat, erda uku derina deiyo ngebodi, Allah er si eremna ati pumbon yaudi, yu weik parang ya dopmau malaikat tep, domona upu deiki di upepu. “Tuai mutu ban-ban yuma neitamai bolongami anggur tapu yuma konum wisipka cadi, kan doupmarem parang ya yunge di, atapu yuma sektapmemdi, anggur du yuma dakembenkurume,” pepu.

19 Upepu pangeda, parang ya doupmau malaikatdi, er yu weik parang ya tuai mutu deiki yuma pepkopra kunupetepka deiki di, tuai mutu anggur du yuma dakra kipu. Kipra dubeudi, ‘Anggur du yanipmengedi, anggur me mokon embenkamre’ tenen, Allah er ila gel deiki bon potokra kumupra keteneiaminge pumbon, anggur du yamopdongopu.

20 Aila keca, anggur du darapdongopra yanipmai keca, er nongda, ada Allah er yu weik kuprepa, tuai nesala yuma ila di wenepra upu lepsisikra bokeipredi, ponkamrenge tep kurure. Malaikatdi anggur du yuma, yaniramenge keca pumbon yamupra dongopu pangeda, anggur du yuma darapdongopra yanipmaipa, me mokon embenmau ngeda, tali mokon gume. Anggur du ^{▼▼Anggur du pepkada, mali kunge nesala tep pepu. Yapi mokon pepkada, mali nesala pio weik poprepa, yapi mokon weik deipkamra tep pepu. Yanina deiyo ngeboda, ada Allahdi amali kun nesala wenepredi ponkamrenge tep, pepu.} yanipmaipa, yapi mokon weika di embanmau. Pio weika di embanmaupane, ila yapi mokon dana-dana tara deipu ngeda, metek gume. Ace di ortara karenaida, denge weik 300 kilometer mokon deipbanmau. Ayapi karuda, tenpu meter cap, tonda meter neitamainge cap satu setengah meter (1.5 meter) mokon karu deipupa, epsi. Ne Yohanesdi pepsene.