Revelation of John 16

Allahdi mali kun nesala tep, er yu kuna cap, nimi wenemna cap, pona cap tep, pepu upu

1Akeca yuma epsi dingeda, adipapu, Allah er si eremna ati pumbon di tenpu ngebodi, sun yoneitam bari malaikat tep, ila upu di pepu. Erdi pepu upuda ake. “Allah er yu kuna cap, nimi wenemna cap, pona cap tep deiyo kecada, sun doupmarum bukmau pumbon kurure. Atep sun bukmau utopu dinin, emas di keteneipinge doupmarumnge yumada, tuai mutu tupa kunge nesala deiki diktapra embeso,” pepupa, gekepsi.

2Aupu pepupa, adipapu sun yoneitam bari kan-kan dinin, menmena tenpu malaikatdi er emas bukmau tu deiki diktapupa, ataru kurami nesala deikida, ila kange mun toro deipu. Ada, laut mokon neitamai di menmena yau ngebo, pio mali gam kure ngebo, er cap, er urasin utopu keca petupra deipinge cap tep, tuai nesaladi si eremamidi, er nomor sun nong deiki sengami nesala tep, toro pio weika di karepupa, sun nong deiki toro weik deipu.

3Ukupupa, malaikat butene ngebo, er bukmau pum kwamu keca diktapupa, laut mokon deiki sakupa, laut mokon me yumada, sun depmange nesala goukke pumbon yapi mokon deriramre utopu kupupa, laut mokon yuma yapi mokon utopu deipu. Ukupupa, laut mokon neitamai gam kuramu keca cap, mekina yala-yala yuma cap adipapu depropi. 4Ukupupa, malaikat weneri ngebo, er bukmau pum kwamu keca tuai mutu diktapupa, akange mun kecada, tuai mutu neitamai embaramu me cap, me bungnai cap yuma deiki sakupa, ame yumada yapi kupu.

5Ame yuma yapi utopu kupupa, ame cap, amokon cap neitamai kurami keca yuma depropi pangeda, me yala-yala yuma talepra kuramu deiyo malaikatdi aupu pepu.
“Allah kanda pumun taru kuramumanen, tupa gampu kurum ngeboda, mali keca tenpu peda men kukerura cadi, kanda Pio Lek Ngebo kurume. Kandi tuai mutu nesala tep, kange mun kun keca karepmaremdi, wenepmaremada, walito kunmarume.”
6“Angeda tali tep men pepne. Deiyoda, amali kunge nesaladi kan nyapu weik portamami. Ada, kandi, ‘Anesala ne nyapu kunkameng’ tenen, weamumpa, kan tep teka tenerami nesala cap, kan upu lap pena deiyo neng, nabi-nabi neng cap, weika di portamami.
Ukupra mali kuramya tep nengeda, kandi peipmarempa, sun me yuma yapi mokon danmarepa, yapi mepu jenkamenge. Sunda pio mali kun kecapu talepra kunge nesala tep, ‘Walito wenepmarume,’ pepne.”

Me deiyo talepra kuramu malaikatdi aupu pepupa, gekepsi.
7Angebodi aupu pepupa, Allah er ati pum emas meja dam kure ngebo, aupu gekenmaudi, erdi tamupra pepu.
“Tek sisi pepreme. Nun nai Allah, kanda akeca-keca yuma bisbisa kapra, akeca yuma deiki tara kumemdi, ila puto weik ngebo, kurume. Yuk puto kure keca yumada, puto metekpu kurur dinin, kanda ila eremna ngebo kumemdi, ila puto weik ngebo kurume.
Kanda nun Ila Deiyo Ngebo kurume. Ila mambul pel doramum ngeda, nimi men kupmanto keca, kunupsek pen pel doramumnge yumada, dumsisipu kurure.
Kandi tuai nesala tep lepsisikra upu bokeipmemdi, anesala yuma wenepra ponmaremada, pio dumsisipu kuruma cadi, ‘Ange yumada pio telepe. Walito ponmarume’ tenen, pepkene.”

Allah er ati pum emas meja dam kure ngebo, aupu penmaupa, gekepsi.

8Aupu pepupa, gekepsi pangeda, malaikat dumbari ngebodi er bukmau kwamu keca, keteng deiki diktapupa, keteng bupu puto pio weik kupupa, tuai nesala sun nong bol deiki bupu weik teng-teng pepka deiki di, sun nong bol boupudi, bol kwiripu. 9Sun nong bol bupu weik kupudi, bol kwiripupa, Allah er si tep pio mali upu weika di penmai. Deiyoda, sundi, ‘Akange mun keca nun nong deiki sakmaserya deiyo ngeboda, Allah er pua,’ tenepidi mali upu penmai. Allah er si tep mali upu weik penmai dinin, sun mali-mali kurami keca tep, amnyo karikroidi, men tapi. Tonda, er tep “Kanda pio telepe,” pepra, er si men eremai. Amali kun keca yuma, tupa talepra kunmaipa, ange yuma epsi.

10Epsi pangeda, pamu malaikatdi er karu mauda, laut mokon neitamai di menmena belepra yau ngebo, pio mali gam kure ngebo, er taleamu keca yuma deiki di diktapu. Er karu mau pumbon kwamu keca diktapupa, Mali Gam Kure Ngebo, er taleramu mutu yuma cap, er taleramu nesala kuramyai yuma cap, dana-dana yuma kunuku. Dirine pio men kupu. Ukupupa, erdi taleamu nesala yumada, sun toro weik cap, sun nong deikipu yala-yala yuma jeramunge cap tep, ila di engepra donmaidi, sun pe lyemupu sengdanmai. 11Ukunmaidi, Allah im deiki tara kure ngebo tep, pio mali-mali upu er nong deiki penmaidi derirami dinin, sun mali kurami keca yuma tep nengeda, ‘Uo, nun tek sisi malipu kuramupke,’ pepra, sun amnyo karikra, amali kun keca tep men tamami. Balilapu kunmaidi, mali kun kecapu talepra kunmaipa, epsi.

12Ngantan bari malaikatdi kange mun keca er bukmau pumbon kwamu ngeda, ila embaramu me, er sida Efrat me deiki diktapupa, ame yuma adipapu cepropudi, gelal sepu. Tu kalkal pepra deipka deiyoda, ‘Ame ortara keteng yakan tara kurami ila nimi deiyo neng, sun raja-raja neng yumadi, abisi deiki di yakankameng’ tenen, ame yuma adipapu cepropu. 13Ange epsi pangeda, isok-isok weneri di, damai urasin utopu daidi, yakanmaipa, epsi. Tenpu ngeda, Mem Bal Urasin Utopu Ngebo tekupa, er sipyal pumbon di akori gutukra yau. Butene ngeda, Pio Mali Gam Kure keca, laut mokon neitamai di belepra tengyau ngebo, er sipyal pumbon di akori gutukra yau. Ange utopu, weneri ngeda Mok Upu Pena Deiyo Ngebo, er sipyal pumbon di akori gutukra yau. Aisok damai urasin utopu danmaidi yakanmaipa epsi.

14Aisok wenerida, tuai mutu tupa kurami nimi deiyo neng damai embaramidi, nimi men kupmanto keca mambul pel weik dopembarami. Tonda, aweneri isokdi, tuai mutu nimi deiyo neng yuma bulupra keteneipmaiya deiyoda, ‘Aneng cap, sun nyapsilip cap yumadi, Allah er tara neng popbisipetepkameng’ tenen, bulupra yanmai. Angeda, ila puto kure ngebo, Allahdi nesala yuma tep upu lepsisikra bokeipredi, wenepra popkamre tumida, ‘Atuai mutu ila nimi deiyo nengdi, Allah er upu yanipetepkameng’ tenen, bulupmaidi, nimi men kupmanto pel donmaipa, epsi.

15Ataru dipu Yesusdi aupu pepupa, gekepsi.
“Sun yuma kange moupso. Upula don neng dato-dato di inipra yakaramengtopu, sun men tenepmarum tarupu, dato-dato di yankamne. Allahdi telep kweipredi, melimrepa, kange deipra kunkamre ngebo kunkamre kecada, lape pepkusene.
Ukupmantoda nimidi, ‘Nun mankau mapmepe taru, opkal men kenekmepepapu, nun kayapu yangopda, ali dakdanup’ tenen, opkal kenekmengedi kange moupra, ketenepra diramengtopu, Allahdi melimkamre ngebo peda, ketenepra dinapu kunkamre.”
“Aupu nong neitamai ngeda, ake. Sundi, ‘Nun nai bo dan taru doryankamser do?’ tenen, ketenepra dinapu kupmumyopda, amenda taruda, sun ali men dangkamrume.
Tonda, ukupmantoda, ketenemna gum dingeda, nesala dinmangai, tali nong dempu embange nesalada, ali dangamengtopu, sun peda ketenepra dinapu men kupmumnyopda, ne tamupra yankamne taruda, ali dangdankamrume. Atep kange moupso pepsene.” Yesusdi apu penmaupa gekepsi.

16Aupu gekepsi pangeda, sun isok-isok weneri di, tuai ila nimi deiyo neng, raja-raja neng yuma dopra tenpu mutu buluprap deipidi, amutu si Harmagedon mutu deipi. Ada Ibrani upu deiki di Harmagedon penunge.

17Bulupra deipipa, malaikat yoneitam ngebodi kange mun keca, er karu mau pumbon kwamu ngeda doprapudi, im neitamaipu diktapupa, Allah er im deiki tara si eremna ati pumbon di, tenpu ngebo ila di upu pepu. “Ukuda konuma. Konum gawal dakmare,” pepupa, gekepsi. 18Upepupa, adipapu kulman cap, perenglang pena cap, ila lelim cap, ila puto weik mutu longna cap kupupa epsi. Allahdi akeca-keca yuma ketekepra deipudi, nimi ketekepra tuai mutu neitamai deipu taru di dipra, ukutaru daneitamai taru yumada, mutu longna weik akuramu dinin, ayuma taru yumada, yambula dipu longamu. Dinino, asirya gawal dangne taru tuai mutu yuma lokamre ngeda, ila puto pio weika di lokamre ja. Amutu longna ila di longmaupa, ne Yohanesdi epsi.

19Mutu longna ila di lokupa, adipapu akati arum dominge, er sida Babel mutu neitamai di, tu yuma derekudi, bokra weneri keipu. Tuai mutu ban-ban yuma neitamai di, ila ati arum doramyai yuma adipapu loka beudi, akati-akati yuma dourbeupa, sikke utopu buktapu. Deiyoda, Allahdi ila mutu si Babel mutu nesaladi pio mali kuraminge yuma tep, tupa teneramudi, amutu nesala wenemna tep, yu pio weik kuramnga tep, asirya gawal dangne taru, ila puto di poptapu. Allah er yu ukupmanto ngeda, yu weik kange yawaramne me gwepra, tenpu me mau pumbon weika di dikdongopmengedi, yuk neng tep, puto di sun sipyal pumbon dikdongopmengopda, me mokupra men tukmanto kuptengetopu kupu. Ada, Allahdi ila wenemna keca karepupa, sun Babel mutu nesala men lyepdanmanto kunmaipa epsi.

20Ila mutu longna lokupa, laut mokon neitamai di sengdongoramu mutu buma, er sida pulau yumada, mokon jepropupa, adipapu gum kupu. Mutu gon yuma cap, ila mutu yuma capda, mutu longna ila di lokupa, teno pakredi, yamurtamamretopu kupudi, amutu-mutu dup yuma saka banpu kupu. Mutu gon yuma gum kupu. 21Tonda, im neitamai di nimi nong deiki saka popu keca, er urasinda gel utopu dinin, mul duduya saku. Esda, mul duduya yuma yuk-yuk dinin, tenpu ngeda, 45 kilo kupu. Akecada pio weika di sangmauadi, nimi pio weik popu. Popupa, tuai nesala yumadi, ila kange mun kange doupra kunmaidi, asangmau mul duduya tep, Allah er nong deiki pio mali upu pepra derinmaipa, gekepsi. Ne Yohanesdi pepsene.