Rev 17 | XteSC | STEP | Sun yoneitam bari malaikat, ada karu me mau doupmai malaikat kan-kan dinin, tenpu ngebo ne damai yana domona upu deiki di pepneu. “Kanda yarume. Allahdi pio mali ner, tali nyangtamameng ner, nimi yuma kael keami ner tep, wenepra popkamrenge benbenepkenepa, dinkureme,” pepneu. Aupu pepneua nong neitamai deiyoda ake. Ada ila me dan-danai ila ati arum domi mutu, Babel mutu neitamai kurami nesalada, Allah tamamidi, pio mali weik kuramya tep, tali nyangdana ner utopu kurami.

Revelation of John 17

Nesala ban-ban yumadi, ila mali ner tep kael keamidi, tali-tali nyangdarami ner tep, pepu upu

1 Sun yoneitam bari malaikat, ada karu me mau doupmai malaikat kan-kan dinin, tenpu ngebo ne damai yana domona upu deiki di pepneu.

“Kanda yarume. Allahdi pio mali ner, tali nyangtamameng ner, nimi yuma kael keami ner tep, wenepra popkamrenge benbenepkenepa, dinkureme,” pepneu. Aupu pepneua nong neitamai deiyoda ake. Ada ila me dan-danai ila ati arum domi mutu, Babel mutu neitamai kurami nesalada, Allah tamamidi, pio mali weik kuramya tep, tali nyangdana ner utopu kurami. 2 Babel mutu neitamai kurami nesala cap, mutu ban-ban yuma, ila nimi deiyo neng raja-raja neng cap, sun kikiman pio mali kecapu talepra kuramidi, mali kudidarami. Nimidi kange yawaramne me weike jenunga deiki di, sun kange yawaramrepa, kange douna gum dipapu, pio mali kuramengtopu, Babel mutu nesala mali weik kuramya deiki di, yuk mutu neng yuma kael kemamidi, sun peda utopu mali kecapu talepra kurami.

3 Amalaikatdi aupu pepneupa, Allah er Lek Sambala talepneua deiki di, amalaikat ngebo dopropneudi, yukai dubeneu. Ada, me cap, nimi cap pio gumai dubeneupa, akeca epsi. Epsi kecada, pepkune. Ada, pio mali gam kure keca, er nongda yapi bi kwamu keca abukmaupa, epsi. Amali gam kure keca er nong bol deiki yumada, si sekamu keca katuai kupu. Nimidi asi-asi yuma peptengepa, Allah gekeptudi, ‘Ne song’ tenen, yu kuptue. Ada, Allah er si yanina upu kupka tep pepne. Asi yumada, Allah er yanina tep, akeca nong bol deiki sekra deiamu. Agam kecada, er giso yoneitam bari kupu dinin, er giso deikida, sapi bisam abolyakot, takke utopu keca sepuluh (10) kupu. Amali Gam Kure Keca, er bali tarada, nimi yuma kael kemami ner, tali nyangdarami ner bukmaupa, epsi.

4 Aner kenekmau opkalda, pio telep mirin cap, bi cap kupupa, aopkal deiki wipra deipi ngeda, emas keca cap, laut mokon pumbon keca, kunumna weik keca, er sida mutiara cap, kunumna weik metek gel cap kupu. Aner er buru di karu me mau emasnge doupmau.

Amau pumbonda, anerdi pio mali-mali kuramunge cap, uda, yuk nesala yuma tali-tali nyangdaraminge cap kupu. Telep kun nesala ban-ban yumadi, ‘Aner kure kecada, pio mali cadi, telep nesaladi pio men kuptepe keca,’ tenerami dinin, anerdi akeca yuma kange deiamudi, akeca talepra kuramu. 5 Aner er aso deiki sekra deiami upuda, ake.
“Aner er kamoda, ukupmanto ner kurur dinin, akeca nong neitamai ngeda nimidi, ‘Deiyo ake’ tenen, kapul men kael keptenge.
Ila ati arum domi mutu si Babel mutu ner tali-tali nyangdarameng nerapu, sun nin deiyo ner akurure. Tuai nesaladi pio men tenepmanto, pio mali kunge keca deiyo ner kurure.”

Aupu dumbarida, aner er aso deiki sekra deiaminge katuai kupupa, epsi.

6 Aner dipetepsidi, kael kepsi. Anerda, teka tenena nesala pio weik poramupa, sun yapi embaramnga gwepra jeramupa, adeiki di, kange deipudi, er kange yawaramu. Ada, nimidi kange yawaramne me weika di jengepa, sun kange yawaramrepa, telep kange douna gum di, mali kun keca tali lupra kuramengtopu, aner ton ukupra kupmaupa, epsi. Anerdi nesala poramngada, tali neng gum dinin, anerdi peamupa, yu nengdi, Allah weamupa, er tep teka teneramidi, Yesus er upu dopra peterep embarami nesala tep porami. Yesus er upu gekerami nesala pio weik poramya tep, amali nerda kange deipra kuramua deiki di, er kange yawaramu.

Ukupupa, epsidi, pio lukdasi. 7 Lukdasipa, amalaikatdi upepneu. “Kan lukdanmaremada, ware deiyo di do? Nimidi men kael keami keca, aMali Gam Kure Keca er giso yoneitam baringe cap, er giso takke, abolyakot sepuluh (10) kurenge cap, angebo er bali deiki bukra embaramre mali kuna deiyo ner cap tep lape pepkukene,” pepneu. Upepudi, aupu dukdongopra pepu.

8 “Yohanes kandi arup taru epmaumum keca, pio Mali Gam Kure Kecada, men di tuai mutu neitamai embaramu. Ukutaru dimpeprepa, nimi men dinung dinin, amenda taruda, tuai mutu neitamai, tu pumbon kaurye kwamyai, utara di belepra tekamre. Amenda taru tu pumbon di welepre pangeda, Kristusdi angebo tep wenepra poptapkamre. Allahdi akeca-keca yuma ketekepra deiamu taru di, ‘Anesala lyepkamne’ tenen, Gam Kunkameng Nesala Si Sengna Buku neitamai, sun si men sekeiamu nesalada, amenda taru aMali Gam Kure Keca kange di ton cap epkamenge. Menop taru di tuai mutu embaramu dinin, ukutaruda, nimi men dinung dinin, amenda taru ton cap katuai yarepa, epkamenga tep pepkene. Amali Gam Kure Keca dinkameng nesalada, Allahdi ‘Sun gam pio kunkameng’ tenen, si men sekeiamu nesaladi, akeca epmengedi, lukdankamenge.”

9 “Akeca yumada, ila kael kemenge nengpu, ‘Deiyo ake’ tenen, kael keptenge. Yuk tali nengda, akeca yumada men kael keptenge. Amali Gam kure Keca, er giso yoneitam bari kupre ngeda, ukupmanto kurur dinin, agiso yoneitam bari nong neitamai deiyo ngeda, ake. Ton ngeda, Tali Nyangdana Deiyo Nerdi mutu buma deiki bungrurai yoneitam bari kwamunge tep kael kemnupe. Ton deiyoda, ada sun yoneitam bari ila nimi deiyo neng, 7 Raja nengdi ila mali keca talepra kunge neng tep kael kemnupe. 10 Sun 7 Raja kan-kan ada, pamu bari mali Raja nengda, konum bisbisa kapupa, gum kupmang dinin, tenpu mali Raja ngebo tupa kurure. Tenpu mali Raja ngeboda, kapul men yanmar dinin, amenda taru konum yaryopda, ue yambul weikanun neitam taruda, angebodi tuai nesala yuma talepra kunkamre.”

11 “Apio Mali Gam Kure Keca menop taru gam kuramu dinin, ukutaruda, gam men kurure. Er peda ukupmanto keca kure dinin, akeca nong neitamai deiyoda, ake. Ada pio mali nimi deiyo ngebo, Raja ban ngebo kurure. Sun yuk yoneitam bari pio mali nimi deiyo neng, 7 Raja nengdi, tuai nesala talepra kuramengepane, amenda taruda sun gum kupmengopda, angebo mali Raja ban ngebo tekredi, tuai nesala yuma talenkamre. Angebo peda, amenda taru Kristusdi wenepra poptapkamre.”

12 “Amali Gam Kure Keca, er bol yapi bi utopu kupu ngeda, er giso yoneitam bari deiki kupu takke keca, 10 abolyakot epmum ngeda lape pepkune. Er giso deiki, giso takke 10 abolyakotda ukupmanto keca kurur dinin, akeca nong neitamai deiyoda ake. Ada, yambul amutara nimi deiyo neng, 10 neng tep kurure. Animi deiyo neng 10 nengda, kapul men yanmanga tep, amali deiyo ngebodi, sun talenkameng mutu, 10 mutu kapul bokra men karepmare.

Dinino, amenda taru sun 10 deiyo neng konum yangopda, pio Mali Gam Kure Keca ngebo, sun deiyo ngebodi, er amutara 10 nimi deiyo nengdi talenkameng mutu, 10 mutu bokra kareprepa, er amutara bukra kunkamenge. Sunda ue denge weik gam men kunkameng dinin, sundi 10 mutu talepra kunkameng taruda, metekanunpu. 13 Sun mali nimi deiyo neng, 10 deiyo neng yumadi, tenpu kangepu tenepra, ‘Ukunkamepe,’ tenepmengedi, amsepu kunkamenga cadi, sun puto cap, sun talenkameng deiyo keca yuma cap dopra, sundi pio Mali Gam Kure Keca ngebo tep, karepkamenge.”

14 “Karepmengedi, aila mali deiyo ngebo cap tapakmengopda, Domba Mi Utopu Ngebo tep, ‘Popbisipkamep’ tenen, popetepkamenge. ‘Domba Mi Utopu Ngebo popbisipkamep’ tenen, piripetepkameng dinin, Domba Mi Utopu Ngebodi sun yuma tep bisbisa kapredi, poptapkamre. Ukupkamrada, tali tep gume. Ada, yuk nimi deiyo neng weik akunung dinin, sun deiki tara Ila Nimi Deiyo Ngeboda erpu kurure. Tonda, yuk raja-raja neng weik akunung dinin, sun deiki tara Ila Eremna Raja Deiyo Ngeboda, Domba Mi Utopu Ngebo, erpu kurure.

Ange tep nengeda, Domba Mi Utopu Ngebodi, sun mali nimi deiyo neng yuma tep bisbisa kapredi, sun yuma tep poptapkamre. Ataruda, Domba Mi Utopu Ngebodi, ‘Anesala ne nyapu kunkameng’ tenen, weamudi, kongpeamupa, er tep teka teneramidi, tamna pio gum di, er upu talepra domyakanung nesala cap, er cap kikiman kunkamenge.”

Amalaikatdi ne Yohanes tepapu ange yuma lap pepneu.

15 Lap pepneudi, aupu ton cap dukdongopra lape pepneu. “Arup taru Tali Nyangdana Deiyo Ner, ila me dan-danai bukmaupa, epmum keca peda, lape pepkune. Ila me dan-danaida, ukupmanto keca kurur dinin, ame sun nong neitamai deiyoda, ake. Ada, nimi yala-yala yuma cap, upu yala-yala yuma penge nesala cap, negara-negara yuma neitamai kunge nesala cap, denge pio weik tep kael kemnupe.”

16 “Apio Mali Gam Kure Keca ngebo cap, er amutara bukameng 10 nimi deiyo neng capdi, atali nyangdaramipa pio mali kurur ner tep, ‘Nun song,’ tenepmengedi, aner tep bisbisa kapkamenge. Amali nerdi talerur keca yuma dalupra dopropmengedi, aner poptapmengopda, nong dempu kupkamre. Aner popmengedi, er nong galepra jenkamenge. Jenmanganen, er nong galepra tapkamenge ngeda, uku dongopmengepa, ukudi jepropkamre.”

17 “Ukupra kunkamenge deiyoda, ake. Ada sunda pio mali kunung dinin, Allahdi, ‘Ukunkamne,’ teneamsi ngeda, sun dipru neitamai dongopne pangeda, sun 10 nimi deiyo nengdi, sun puto cap, sun talenge keca yuma cap, Mali Gam Kure Keca ngebo deiki deipmengopda, erdi amutu yuma talepra kunkamre. Ukunkamra deiki di, ne teneamsi pel yuma dopkamnenge. Konum dopmengopda nedi, ‘Walito,’ tenenkamne. Nedi, ‘Amenda sirya taru kunkamre kecada ake,’ pepra lap peramsi upu yuma, nong konum kupyopda, nedi amali deiyo ngebo peda poptapkamne. Allahdi tenerure.”

Amalaikatdi ne Yohanes tep aupu yuma pepneu.

18 “Tali Nyangdana Deiyo Ner epmum ngeda, ukupmanto keca kurur dinin, er nong neitamai deiyoda, ake. Ada, pio ila ati arum domya Babel mutu neitamai kunge nesala tep kael kemnupe. Babel mutu kunge nesaladi, yuk mutu deiyo neng, Raja neng yuma tep, sun deiki tara kungedi, nimi deiyo talepra kununge.”

Malaikat ngebodi lap pepneutopu, ne Yohanesdi pepsene.