Rev 18 | XteSC | STEP | Akeca yuma konum epsi dingeda, im deiki tara di yuk malaikat ngebo kwerepupa, epsi. Amalaikat er puto cap, er deiyo keca taleamunge capda, pio weik kupu. Er pio telep kupka deiki di, dirine pio weik kupupa, tuai mutu yuma dirin deipupa, katuai kupu.

Revelation of John 18

Babel mutu nesala tep, bisbisa kapra poptapkamrenge tep, pepu upu

1 Akeca yuma konum epsi dingeda, im deiki tara di yuk malaikat ngebo kwerepupa, epsi. Amalaikat er puto cap, er deiyo keca taleamunge capda, pio weik kupu. Er pio telep kupka deiki di, dirine pio weik kupupa, tuai mutu yuma dirin deipupa, katuai kupu. 2 Er upuda, puto weika di aupu pepupa, gekepsi. Erdi pepu upuda, ake.
“Ila ati arum domya, er sida Babel mutuda, Allahdi amutu kunge nesala tep bisbisa kapra poptapkure. Poptapredi, amutu cap, amutu kunge nesala cap, amutu kunge isok yuma capda, Allahdi gum kupra deipredi, gawal dakamre. Amutu neitamaida, isok yala-yala yuma kununge.
Tonda nimi kunai gum tep, pio mali ma weik dakununge. Ada, telep kunge nesaladi, ‘Ama yala yumada pio mali ^{▼▼mali ma – Musa sekeiamu upu neitamaida, Allahdi Israel nesala tep, ‘Ama yalada, pio mali cadi, pio men jenkamrume,’ pepra deiamnga tep, ama yala yumada, sun Israel nesaladi, ‘Nun song’ tenerami (Ulangan 14:12-18).} cadi, nun song’ tenen, pio men jenung ma yala-yala yuma amutu neitamai kununge.”
3 “Allahdi amutu urupra gum kupra deipkamra deiyoda ake. Nimidi kange yawaramne me weika di jepmengepa, sun kange yawaramrepa, pio mali kuramengtopu, Babel mutu kurami nesalada, Allah tep tamamidi sun pio mali keca yala-yala yuma talepra kuramya deiki di, sun kange dipru yuma malipu kupbaramu.
Ukupra mali weik kuramipa, yuk mutu kurami nesala yuma diramidi, ‘E, sun kungetopu, nun peda kunkamepe,’ teneramidi, amali keca yuma sun peda talepra kurami.
Tonda, mutu ban-ban yuma sun ila nimi deiyo neng, raja-raja nengdi, amutu kurami nerapu cap, tali nyangdarami. Tonda, Babel mutu nesaladi, ‘Akeca-keca yuma weika di dopropmepedi isomka nesalapu kunkamepe’ tenen, ila di putaramupa, sun dipru ila di engerami.
Sun dipru engeramiya tep, yuk mutu ban-ban yuma kunumna deiyo nengdi, bung keca yala-yala yuma dopra Babel mutu dekaramipa, Babel mutu kurami nengdi kunumami. Kunumami pangeda, co bo weik dororamidi, isomka neng kurami.” Malaikat ngebodi aupu pepupa, gekepsi.

4 Gekepsi pangeda, im deiki tara di aupu ton pepupa, gekepsi.
“Ne Allahdi pepsene. Babel mutu neitamai tupa kurum dinin, ne tep teka teneamnerum nesalada, adipapu amali mutu tapra yukai bendopso. Ada tali tep gume.
Amutu tapra yukai mepra men bemumnyopda, amutu nesaladi mali kunge keca kael kepmumdi, sun peda utopu kumumnyopda, Allahdi amutu nesala, sun wenemna tep, ila kange mun keca, sun nong deiki dokotepkure kecada, ‘Sun peda tapakra popserur’ tenen, pepsene.
Atep, ne Allah tep teka tenenerum nesalada, ‘Babel mutu nesaladi mali weik kunge keca, sun peda kumumpa, nedi Babel mutu nesala sun wenemna tep, sun nong deiki kange mun keca weik deipkun keca, sun nong deiki peda deipsenedi popsenun’ tenen, adipapu Babel mutu tapmumdi, mepropkurume.
5 Allahdi Babel mutu nesala yuma tep ila di wenepkure ngeda, tali tep gume. Deiyoda, sun pio mali keca weika di tapakra kupbaramipa, men nukmanto kurure.
Ada, gel taplakra meneng deiki deipdanen, baramengepane, im bepmanto kuramretopu, sun mali kun keca yala-yala yuma talepra kupbaramya tep, ukutaruda amali keca yumada men nukmanto kurure.
Babel mutu kunge nesaladi mali kecapu talepra kuramenge yumada, Allahdi tupa tenerura cadi, amutu nesala weika di wenepkamre.”
6 “Atep, Babel mutu kunge nesaladi yuk mutu nesala tep mali weik kuramitopu, Allahdi sun wenemna tep, sun nong deiki ikin keca pio weika di deipkamre. Amutu nesaladi yuk neng tep mali weik kurami ngeda, yambul utonun kuramu.
Dinino, Allahdi sun wenemna tep, sun nong deiki deipkamre ikin kecada, pio weika di kupkamre. Sundi yuk nesala tep, sun nong deiki derirami ngeda, ikin yambulanunpu kwamu dinin, Allahdi sun wenemna tep, sun nong deiki kange mun keca deipkamre ngeda, ikin pio weike kupkamre.”
7 “Pumun taru Babel mutu nesaladi isomka keca cap, kunumna weike keca cap, weik dororamidi karerdaramipa, men nukmanto kuramu. Isomka weik kuramipa, yuk mutu nesaladi, ‘Uo, sunda pio teleppu kununge,’ teneramidi, amutu nesala tep gispal dorami.
Atep, isomka weik kuramitopu, ukutaruda, Allahdi kange mun keca pio weika di, sun nong deiki deiprepa, pio weika di engepra donkamenge.
Babel mutu kunge nesala, sun dipru neitamaida, utenenunge. ‘Gume, sun solu nerapudi mali kange doupra engeramengtopu, men kunupe. Nunda ila nimi deiyo neng, Raja nengdi tali kange doupra pingpingapu kuramengtopu pio kunkamepe’ tenerami. Ukupra tenerami dinin, ukutaruda, Allahdi sun tep ila di wenepkamre.
8 Babel mutu kunge nesaladi, ‘Nunda pio teleppu kunkamepe,’ teneramya tep nengeda, konuma. Allahdi tenpu tumi neitamaida, Babel mutu kunge nesala, sun kange mun keca adipapu weika di kareprepa, weik kupkamre.
Ada, dena cap, jen putaprepa, jen bulungapu kuna cap, mambul kange doupra engena cap weik kupkamre. Tonda ila uku bu dokoteprepa, sun mutu cap, sun nong cap jepropkamre.
Akeca-keca yuma talepra Ila Deiyo Ngebo Allahdi, Babel mutu kunge nesala upu lepsisikra bokeipredi, wenepkamre ngeboda, er puto pio weik kurura tep, apepman keca yumada, tek sisi nong kupkure, pepne.” Im deiki di pepmau upu, aupu penmaupa, gekepsi.

9 Aim deiki di pepmau ngebodi, aupu pepmaudi, aupu ton cap dukdongopra pepu.

“Allahdi, Babel mutu kunge nesala tep, wenepra poptaprepa, ukudi amutu kure keca yuma jeredi, ila ket weleprepa, yuk mutu kunge nesala yumadi epkamenge. Yuk mutu ila nimi deiyo neng, raja-raja neng peda epkamenge. Araja-raja nengdi, Babel mutu nesala cap nyangdaramidi, amutu neitamai isomka weik kuramu keca, kange deriraminge cap, kunumna weik keca cap, talepra kikiman kuraminge cap, uku depropredi, ket weleprepa, sun raja-raja nengdi, awelepkamre ket epmengopda, pio mambul kange doupra, ila di engenkamenge.

10 Allahdi akange mun keca weika di, Babel mutu kunge nesala sun nong deiki dokoteprepa, yaryopda, mambul kange doupmengedi, ‘Uo’ tenen, ila di engepra doungepa, yuk mutu raja-raja neng yuma, akeca yuma karenai di tekra epmengedi, aupu pepkamenge.”
‘Uo, Uo. Amutuda, ila mambul mutu, pio telep mutu kuramu. Babel mutu neitamai kuramrum nesalada, puto weik cap, pio telep cap kuramrum dinino, ukutaru adipapu tenpu keteng neitamaida, Allahdi wenepmaserpa, konum gum kupra deipmasere,’ pepra engenkamenge.

11 Upepmengopda, ware bung keca do, yala-yala yuma dopra kunum baramenga deiyo neng yumadi, Babel mutu gum kuprepa, mali kange doupra engenkamenge. Deiyoda, pumun taru Babel mutu neitamai kurami nesaladi, sun bung keca weika di kunumami dinin, ukutaruda, akeca-keca yuma kunupmanto nesala yumada, konum gum kupre. Sun bunga yala-yala yuma dopra kunumbarameng kecada, akeca kunupmanto nesala konum gum kupmara cadi, ‘Uo,’ tenen, engenkamenge.

12 Sun kunumbarami bung keca sida yuma men nukmanto dinin, bung keca yala-yala kunumbarami ngeda ake. Ada, emas cap, perak cap, kunumna weik gel cap, laut mokon neitam di doronung keca, er sida mutiara cap, pio telep boun opkal mirin nge cap, binge cap, nintong telep co yala yuma cap, bisam si cap, kunumna weik co cap, besi keca cap, urasin telep gel cap, dopropmengedi petupra deipmengedi, ketkemenge keca kunumna weik keca yala-yala yuma dopra kunumbarami.

13 Tonda, tau pen keca er si kulit kayu manis cap, nintong telep peramre keca yala-yala yuma sun sida, mur cap, kemenyan cap, tonda anggur me cap, ara co du taikra doroami minyak cap, roti dana deiyo keca er sida, terigu pio telepnge cap, tonda nimidi peirameng keca sapi bisam cap, domba cap, kuda cap, tonda tu deiki embaramre keca yala yuma cap, tonda nimidi, ‘Sun co bo deiki kunupmengedi, ^{▼▼Co bo deiki kunumami nesalada, isomka nengdi, pio kankan kunge nesala tep, co bo deiki di kunuamipa, akankan kunge nesaladi sun isomka nesala tep, sun pel talipu pel dorami. Tonda, lap pena upuda, nomor 36 dirume.} ikin pel dipmengepa, talipu pel donkameng’ tenen, nimi nong ateng koupra dubarami nesala cap, akeca-keca yuma, sun Babel mutu kunge nesala kange di ton cap men kunumkamenga tep, abunga kunumbaramenge deiyo nengdi, ‘Uo,’ tenen, engengkamenge.
14 Mutu-mutu yuma, ware bung keca do, yala-yala yuma dopra kunum baramenga deiyo neng yumadi, Babel mutu gum kuprepa, mali kange doupra engepmengedi, aupu ton penkamenge.
“Uo, sun Babel mutu nesaladi, ‘Pio telep keca, yala-yala yuma dopropkamepe’ tenen, dipru engeramrum keca yumada, konum gum kupmasere. Tonda, sun taleamrum isomka keca cap, urasin pio telep kupra kwamupa taleramrum keca yuma capda, konum gum kupmasere.
Akeca yumada kange di ton cap, pio men dopropkamrume. Sunda bicaue,” pepra, sun bunga kunumna deiyo nengdi penkamenge.

15 Sun bunga kunumna deiyo nengdi, akeca yala-yala yuma kunumamipa, Babel mutu nesaladi co bo pio weik kareramipa, co bo weik dororamidi, isomka weik kurami deiyo nengdi, karen mutu di tekmengedi, Allahdi Babel mutu nesala wenemna tep poptapkamrenge epmengedi, kware weik kuprepa, mali kange doupra ila di engenkamenge.

16 Engepmengedi, aupu ton penkamenge.
“Uo, Uo, sun Babel mutu kurumu nesalada, pio telep puto weik nesala kuramrumdi, kunumna weik opkal, pio boun opkal kenekra kuramrume.
Sun mirin opkal cap, bi opkal cap, aopkal deikida emas keca cap, kunumna weik gel meteknge cap, laut mokon neitamai di dororami keca, er sida mutiara cap dopra, sun opkal bol deiki wipra deriramipa, dirin weik kwamu. Ukuamupa, sunda isomka weik nesala kuramruma cadi, apio telep opkal kenengamrume.
17 Dinino ukutaruda, tenpu keteng deiki dipapu, sun cap, sun kunumna weik keca taleramrumnge cap yumada, konum gum kupmare,” pepra engenkamenge.

“Tonda angetopu, sun laut mokon deiki, ila gapung co talepra embaramenga deiyo neng cap, sun amutara bukra agapung co deiki pel donge neng cap, agapung co neitamai bukra tali embange nesala cap, tonda laut mokon neitamai kure keca, mekina do, yuk keca do, dopra kunumenga deiki di kunge nesala cap, sun yuma ukupkamenge.

18 Karen mutu tekmengedi dinmengepa, Allahdi Babel mutu kunge nesala yuma tep wenepra popredi, uku karepredi, amutu keca yuma jerepa, ila ket welenkamrenge epmengedi, aupu pepkamenge.
‘Uo, yuma taru yuma, yuk mutu nesaladi pio telep ati arum mutu-mutu yuma dopra deriramipa, akati-akati yumada yambul telep kuramu dinin, Babel mutupuda, pio urasin telep mutupu kuramu.’ 19 Ukupra pepmengedi, kange mun kange doupra, kalkal tu dopra sun pe giso deiki dikeipmengedi, ‘Uo, Babel mutu gum kupmara cadi, nunda mambule weik kunmaser’ tenen, ila di engenkamenge. Engepmengedi, aupu pepkamenge.”
‘Uo, Uo, Babel mutu kuramrum nesalada, sun bicaue. Sun gapung co talerami nesala, bung keca yala-yala yuma kipra sun mutu dubaramipa, bung keca yuma kunumamruma deiki di, agapung co talena deiyo nengdi isomka nesala kepbarami.
Dinino, ukutaruda, tenpu keteng deiki dipapu, Allahdi sun Babel mutu kurumu nesala wenepra poptapmaserpa, gum kupmarume,’ pepra engenkamenge.

20 Ange tep nengeda, amalaikatdi aupu ton pepu.
“Allahdi Babel mutu kurami nesala sun wenemna tep, konum poptapmara cadi, sun im deiki tara kurum nesala yumadi, kange deipra pingpinga di kunkamrume.
Tonda, Allahdi weamsupa, er tep teka tenepra kurum nesala cap, er upu dopra peterembana tep, gonga kemna deiyo neng dokotemamseu Rasul neng cap, er upu lap pepra peterep embaramrum nabi-nabi neng cap, sun yuma peda kange deipra pingpinga di kunkamrume.
Deiyoda, sun Babel mutu kurami nesaladi, sun nong deiki ikin keca weika di deriramseiya tep nengeda, Allahdi sun Babel mutu kunge nesala tep konum wenepra poptapmara tepa. Atep sun yumadi, kange deipra kunkamrume.”

21 Angebodi aupu pepupa, ne Yohanesdi gekepsi. Gekepsi taruda, adipapu yuk ngebo, ila puto weik malaikatdi ukupmanto kuna tep, tenpu mutu yangne gel, ikin weik gel dopra ereprapudi, laut mokon neitamai dokotepudi, aupu pepu.
“Aila gel dopra, puto di laut mokon neitamai dokotepmantopu, Allahdi Babel mutu kunge nesala yuma wenepredi, puto di poptapmare.
Ukutaru di dipra, amenda doryankamre taru neitamai yumada, kange di ton cap amutu ati cap, nesala cap men kunkamenge.”
22 “Sun mutu neitamai pumun taruda, bung-bung pena utopu keca, sun sida gitar cap, terompet cap, uda, akeca yala-yala yuma taleramya deiki di mut perami dinin, ukutaru di dipra, amenda doryankamre taru neitamai yumada, amut pena keca sun Babel mutu neitamai kange di ton cap pio men penkamenge. Abung-bung pen keca di men pengepa, alelim ton Babel mutu neitamai pio men gekenkamenge.”
“Ware pel do yuma, Babel mutu neitamai pel yala-yala yuma dorami dinin, ukutaru di dipra doryankamre taru neitamaida, sun mutu neitamaida, pel yala-yala yuma kange di ton cap pio men donkamenge.
‘Roti kwaneng jen keca dapkup’ tenen, ketenemna tep, terigu taingna pel doramipa, alelim gekerami dinin, ukutaru di dipra doryankamre taru neitamai yumada, Babel mutu neitamaida, kange di ton cap, roti jen keca er deiyo keca, terigu taingna pel ton pio men donkamenga cadi, alelim ton cap men gekenkamenge.”
23 “Ange utopu, sun mutu neitamaida weica deriramipa, dirin kwamu dinin, ukutaru di dipra doryankamre taruda sun Babel mutu neitamaida, dirin ton cap pio men kunkamre. Tonda, pumun taruda, nimidi, ‘Ner dopkup’ tenen, kange deipra upu peraminge, Babel mutu neitamai gekerami dinin, kange di ton cap sun mutuda nimi cap, nerapu cap dopdangedi, pio men kunkamenge.
Pumun taru sun Babel mutu neitamai kurami kunumna deiyo neng tep, yuk mutu ban-ban yuma kurami nesaladi, ‘Uo, sunda ila mambule,’ tenerami dinino, sun peda gum kupmange.”
“Babel mutu kurami nesaladi, sun mali kun keca yala-yala yuma kuramya deiki di, yuk mutu nesala yuma epra kael keamidi, mali bisipu kupbarami.
24 Tonda, Babel mutu kurami nesaladi, sun mutu neitamai, Allah er upu lap pena deiyo neng, nabi neng cap, Allah er nyapu cap, uda, yuk nesala weik ton cap, portamamipa, anesala sun yapi embaramupa, Babel mutu neitamai katuai kuramu.
Atep, Allahdi Babel mutu kurami nesala yuma poptaprepa, amutu cap, anesala cap yuma gum kupmare.”

Amalaikatdi pepupa, ne Yohanesdi gekepsi.