Rev 19 | XteSC | STEP | Aupu yuma gekepsi dingeda, im deiki tara neitamai di, nesala denge pio weik, gung men nukmanto di, upu ila di penmaipa, aupu ton cap gekepsi. “Haleluya, nun yumadi, Allah er sipu pio eremkamepe. Nun nai bo Allah pio teleppu kurura cadi, er dirinda pio weik kurure. Nimi Lyemna Deiyo keca cap, ila Puto Kure Deiyo keca yuma cap, er deikipu kurure. Erda Ila Eremna Ngebo kurura cadi nun yumadi er sipu pio eremkamepe.

Revelation of John 19

Im deiki tara kunge nesala, denge weika di, Allah er si erepinge tep, pepu upu

1 Aupu yuma gekepsi dingeda, im deiki tara neitamai di, nesala denge pio weik, gung men nukmanto di, upu ila di penmaipa, aupu ton cap gekepsi.
“Haleluya, nun yumadi, Allah er sipu pio eremkamepe. Nun nai bo Allah pio teleppu kurura cadi, er dirinda pio weik kurure. Nimi Lyemna Deiyo keca cap, ila Puto Kure Deiyo keca yuma cap, er deikipu kurure. Erda Ila Eremna Ngebo kurura cadi nun yumadi er sipu pio eremkamepe. 2 Allahdi nimi upu lepsikra bokeipseredi, kusere keca yumada, pio dumsisipu kurure. Er pere upu yumada, pio tek sisi upupu perure. Tali Nyangdana Deiyo Ner, er mali kuramnga deiki yuk mutu nesala ban-ban yuma epra kael keamidi, sun peda pio mali kun keca talepra kurami.
Atep nengeda, Allahdi aner tep, upu lepsikra konum bokeipmardi wenepra poptapmare. Allah er pel dorami nesala tep, yu nengdi portamamipa, sun yapi embaramunge yuma tep nengeda, animi poramya deiyo, aner deiki deipmardi, sun yapi kwangdangna tep, aner wenepra poptapmare,” penmaipa gekepsi.

3 Aupu penmaidi, kange di ton cap aupu ton penmaipa, gekepsi.
“Haleluya, nun yumadi, Allah er sipu pio eremkamepe. Allahdi Babel mutu kurami nesala, tali nyangdarameng ner utopu kuramya tep, wenepudi, uku dokotepupa, auku jeredi, ket welenkamre ngeda, pio men gum kupkamre. Aketda, pio welenkamre.”

4 Aupu pepipa, gekepsi. Aupu penmaipa, sun 24 wisi nimi deiyo neng cap, sun telep gam kun keca dumbari cap, sun yumadi Allah er nimi deiyo ngebo bungna keca deiki bukmauai, urasin tara gutam tu dipdongopra bukmaidi, aupu ton pepi.
“Nundi, ‘Amin,’ pepmepe. Ada, ‘Ange yuma tek sisi pio akunkamre’ tenen, ‘Haleluya. Allah kan sipu pio eremkamkepe,’” penmaipa gekepsi.

5 Aupu pepipa, gekepsi dingeda, adipapu tenpu ngebo Allah er ila nimi deiyo ngebo bungna keca damai di aupu ton cap pepupa, gekepsi.
“Allah er amutara bukra, er pelpu dorum nesala yumadi, nun nai bo Allah tep, er sipu eremkamrume. Allah tep, ‘Uo, erda mambul pio weik’ tenen, er tep gispal dorum nesala yuma, mambul neng pe, mambul gum neng peda, sun yuma wisipra er sipu eremkamrume,” pepu.

6 Upepu pangeda, nesala denge pio weika di, upu ila di penmaipa, alelimda kulman cap, me ounmaredi, ila lelim peramretopu lelim cap penmaupa, gekepsi. Sundi penmai upuda, ake.
“Nun nai Allah tep, Haleluya, pepmepe. Nun Ila Deiyo Ngebo, nun nai bo Allahdi akeca-keca yuma deiki tara kuredi, ila eremna ngebo kurure. Yuk puto keca akurur dinin, erda ila puto weik ngebo kuredi akeca yuma er amutara kuprepa, er dipu talerure.
7 Atep nengeda, nun yumadi kange deipra, pingpinga di, er tep, ‘Kanda pio telepe,’ pepra er tep gispal donkamepe.
Deiyoda, ukupmantoda, Domba Mi Utopu Ngebo, er ner dopmanto taru, konum yanmara cadi, erdi dopkamar ner utopu nesalada, sun kange dipru yuma konum ketenepmange.
8 Er dopkamar ner utopu nesalada, pio telep boun opkal, leknge, dirin weik kure ngeda, konum karepmarpa, aopkal dopra kenekmange.”

Aupu yuma penmaipa, Ne Yohanesdi, gekepsi.

Ne Yohanesdi pepsene. Pio lek boun opkal pepu ngeda, ukupmanto kurur dinin, akeca nong neitamai deiyo ngeda, ake. Ada, Allahdi weamupa, er tep teka tenepra, er upu gekepra dombarami nesaladi, dumsisipu kuraminge tep, tenenupe.

9 Aupu gekepsi taruda, tenpu malaikatdi ne tep upepneu. “Apepkuken upuda, sekurume. Aupuda, ake. Domba Mi Utopu Ngebo, er ner dopkamar taru tep, ila kailya kalepra deipkamenge tep, erdi sun tep kongpepredi, ‘Sunda yakaso. Kikiman jepkamepe,’ pepkamre nesala yumada, Allahdi anesala tep pio telep kupra deiprepa, kange deipra teleppu kunkamenge. Apepken upuda, tek sisi Allah er dipapu pepmanerpa, pepkene,” pepneu.

10 Upepneu pangeda, nedi, ‘Angebo tep gispal dopkun’ tenen, er damai gutam tu dipdongopra bukmasi dinin, upepneu. “Kao, ukunada gume. Kan cap, kan weit yapu utopu nesala cap, sun yumadi Yesus er upu talepra, er pelpu dorume. Sundi ange ukurumtopu, ne peda, er pel melimna ngebopu kununa cadi, kandi ne tep gispal dona gume. Allah er teppu er si erepra, er tep gispal donkamrume. Sun yumadi, ‘Yuk nesala ton Yesus er kai telep upu, nimi lyemna upu gekenkameng’ tenen, aupu dopra peteremamruma utopu, sun pumun taru kuramidi, Allah upu lap perami neng, nabi-nabi neng peda, Yesus tep upu lap perami,” pepneu.

Kurun kuda deiki bukra, kunmau ngebo tep, pepu upu

11 Upepneu taru im deiki tara, dipetepsipa, im deiki tara yuma katuai kupupa, epsi keca pepkune. Tenpu ngebo, er sida Tek Sisi Ngebo, tonda, Tamna Gum Ngeboda, tenpu kurun kuda bali deiki bukmaupa, epsi. Angeboda, tali kuna gum dinin, pio dumsisipu kupra, upu lepsisikra bongdiredi, mali kun keca yuma cap, Allah tep yaninung nesala yuma cap tep porbarure.

12 Er asuruda, ila uku bu jeramretopu kupu. Er giso deikida, ila nimi deiyo nengdi sun giso deiki galupra kemnung keca, er sida mahkota, er giso deiki akeca weik kupupa, epsi. Er nong bol deikida, ila mambul si sekra deiamu ngeda, er pedipapu asi kael keamu. Yuk nesala yumadi men kael keami. 13 Er kenekamu opkalda, lyom opkal kum dam di dipra, yan damai sengdon opkal kwamupa, epsi. Aopkalda, yapi mokon neitamai burupramu opkal kenengrure. Angeboda er si ton, Allah Upu Deiyo Ngebo penunge.

14 Angeboda, kurun kuda deiki bukmaudi menepra banmaupa, Allah er im deiki tara jen talen malaikat yumadi, er amnyo tara amenda yakanmaipa, epsi. Ajen talen malaikat peda, kurun kuda bali deiki bukmaidi banmai. Sun opkalda, pio telep lek boun opkal. Pio telep kurun opkal kenengmaipa, epsi.

15 Allah Upu Deiyo Ngebo, er sipyal pumbon di, yu weik parang ya belepupa, epsi. Aparang ya di, sun mali kun keca talepra kunge nesala yala-yala yuma cap, mutu ban-ban neitamai kungedi, mali kun nesala cap tep, aparang ya di popkamre. Tuai nesala ban-ban yuma tep, ila puto deiki di talenkamre. Nesala yumadi, er tep men bisbisa kapmanto kunkamenge. Ukupmanto tep, ‘Anggur me mokon embenkamre’ tenen, ila gel deiki bon kumupmengedi, anggur du dongopra, yanipmengepa, amokon embaramretopu, angebodi, Allah tep mambul pel donkamre.

Aupu nong neitamai deiyo ngeda, ake. Ada akeca-keca yuma deiki tara kuredi, ila puto cap, ila eremna cap kure ngebo Allahda, er yu weik kuprepa, tuai mali kun nesala yuma tep, upu lepsisikra bokeipredi, ila di wenepra poptapkamrenge tep tenenupe. Mali kun nesala wenemna deiyo ngeboda, akurun kuda deiki bukra embaramre ngebo pua. 16 Allah Upu Deiyo Ngebo, er kail deiki cap, er opkal deiki capda, er si ton sekeiami. Asida, ake.
Raja neng yuma deiki tara kurur Raja. Tonda, nimi deiyo neng yuma deiki tara kurur Deiyo Ngebo.

Asi butene sekra deiaminge deiyoda ake. Ada, tuai mutu ila nimi deiyo neng, raja-raja neng yuma er amutara kungepa, sun Ila Nimi Deiyo Ngebo Raja kuredi, sun yuk Raja neng yuma talerure. Angetopu, sun yuk deiyo neng yuma er amutara kungepa, sun Ila Deiyo Ngebo kuredi, sun yuk deiyo neng yuma talerure. Ware deiyo neng yuma, er amutarapu kungepa, erdi sun yuma talerure. Erda ila eremna ngebo kurure.

17 Akeca yuma epsi dingeda, amenda taru yuk keca ton epsi ngeda lap pepkune. Ada, keteng deipmaudi, dirin kupmaua neitamai, tenpu malaikat ton tekmaudi, ma yala-yala yuma im neitamai lakra embanmai ma tep, ila upu deiki di pepu.

“Sun ma yala-yala yuma bulupso. Allah er ila kalemna jenkamre ngeda, sun peda jeryankurume. 18 Tali kecapu men jenkamrum dinin, ila nimi deiyo neng Raja neng cap, jen talen neng sun ila deiyo neng cap, puto kunge nesala cap, jen talen neng sun kuda bisam cap, kuda bali deiki bukmengedi jen talepra embange jen talen neng cap, tali-tali dakunge nesala yuma cap, mambul nesala pe, mambul gum nesala peda, co bo deiki kunupmengepa ^{▼▼Co bo deiki kunumami nesalada, isomka nengdi, pio kankan kunge nesala tep, co bo deiki di kunuamipa, akankan kunge nesaladi sun isomka nesala tep, sun pel talipu pel dorami. Tonda, lap pena upuda, nomor 36 dirume.} mesum dipu pel donge neng pe, sun kange dipu pel dongedi, co bo doronung neng peda, anesala yala-yala yuma, anesala poptapnepa, sun ma yumadi, sun nong tu dopra jenkamrume. Atep nengeda, sun ma yala-yala yuma bulupra yaso,” penmaupa, gekepsi.

19 Upepupa, adipapu epsi kecada pepkune. Ada, menmena laut mokon neitamai di yau ngebo, Gam Kure Ngebo dinin, Pio Mali Ngebo epsi. Er cap, tuai mutu tali kunge nesala, sun ila nimi deiyo neng Raja neng yuma cap, uda, aneng sun jen talen neng yuma cap bulupra yanmai. Sun yanmaiya deiyoda ake. Ada, kurun kuda deiki bukmau ngebo cap, er tara neng cap, ‘Porbenkup’ tenen, bulupra yanmai. Ada, Ila Nimi Deiyo Ngebo, er si ton Allah Upu Deiyo Ngebo, er opkal yapi buruprami opkal kenekmau ngebo cap, er melimna jen talen neng cap tep, Pio Mali Ngebo cap, er amutara kurami neng capdi, ‘Popetepkup’ tenen, sun mali kun nesala yuma bulupmai.

20 ‘Kurun kuda bisam deiki bukra embarur ngebo, bisbisa kapra popkup’ tenen, piripetenmai dinin, men kupmanto kupmaipa epsi. Ada, kurun kuda bisam deiki bukra embarur ngebo, er jen talen nengdi, Gam Kuredi Pio Mali Ngebo tep tomopidi ateng koupdongopi. Tonda, Mok Pena Deiyo Ngebo ton tomopidi, ateng koupdongopi. Angeboda, mok nabi kuramu. Erdi, ‘Mali Gam Kure Keca, ne nai bo kurura cadi, er tep melipkun’ tenen, men di nimi men kupmanto keca, mambul pel doramu ngebo, er sida, Mok Pena Deiyo Ngebo, er ton tomopi. Pumun taruda, aMok Pena Deiyo Ngebodi, nimi men kupmanto pel doramupa, nesala weika di mok kecapu teka tenerami. Er tep teka tenerami nesalada, Gam Kure Ngebo dinin, Pio Mali Ngebo er peten kemdina keca, er nomor sun nong bol deiki sengamidi, er urasin utopu keca petupra deiamipa, er tep gispal dorami neng tep pepne.

Kurun kuda deiki bukmau ngebo cap, er tara neng capdi, Gam Kure Ngebo dinin, Pio Mali Ngebo cap, Mok Pena Deiyo Ngebo, mok nabi ngebo cap tomopidi, uku pio jeramngai pumbon dokotepi. Uku pio jeruraida, mokon urasin utopu kurure. Dinino, amokonda, me mokon gume. Ada poron gel si belerang, uku bupu weika di jerepa, gel but tongda, siken tong utopu tong weik peramrenge cap, bupu cap, weleramudi, mokon utopu deiamudi, uku bu piliramudi, uku pio jeramngai neitamai dokotepi.

21 Atep, Pio Mali Gam Kure Ngebo cap, Mok Pena Deiyo Ngebo, mok upu penung nabi cap, uku pio jeramngai pumbon dokotepi. Kurun kuda bali deiki bukra embarur ngebo, er jen talen malaikatdi, amali deiyo neng butene, sun amutara mali neng yuma cap, sun jen talen neng yuma cap, poptapi. Poptapipa, im neitamai bulupra yanmai ma yala-yala yumadi, anesala sun poptapmaidi, katuaipu deiptapmai nong yuma, ama yuma jenmaipane, boupu. Akeca yuma ukupra kunmaupa ne Yohanesdi epsi.