Rev 2 | XteSC | STEP | Nimi Mi Sisa Utopu Ngebodi upepneu. “Yohanes, kandi Efesus mutu teka tenenge nesala, sun melimna malaikat tep aupu sekra dokoteprume. Dokotepkurum upuda, ake.” Aupu pepkere ngeboda, tali ngebo gume. Ne dumsisi buru di kuru yoneitam bari talenune. Tonda, nedi ayoneitam bari weica derin keca emasnge neitamai embanune. Nedi aupu pepkene.

Revelation of John 2

Allahdi Efesus mutu teka tenerami nesala tep, pepu upu

1 Nimi Mi Sisa Utopu Ngebodi upepneu. “Yohanes, kandi Efesus mutu teka tenenge nesala, sun melimna malaikat tep aupu sekra dokoteprume. Dokotepkurum upuda, ake.”

Aupu pepkere ngeboda, tali ngebo gume. Ne dumsisi buru di kuru yoneitam bari talenune. Tonda, nedi ayoneitam bari weica derin keca emasnge neitamai embanune. Nedi aupu pepkene. 2 Sun kurumu keca yuma cap, sun ikin pel weika di doramumnge capda, kael keamsisi. Sun nong deiki ikin keca akwamupane, tamna gum di, pio pe deipra, ne pel tupa doramrum ngeda, ne kaele.

Sundi, yuk pio mali kunge nesala tep, ‘Nun song’ tenen, beipra yuk kurumada, ne kaele. Mok nesaladi, “Allah er upu dopra peterembana tep, gonga kemna deiyo neng, Rasul neng kunupe,” pepra tali pertamami dinin, sun Efesus mutu kurum nesaladi, ‘Anengda tek do, telel do?’ tenen, kurpeteramrumdi, ‘Anengda mok neng pua’ tenepra kael keamrum ngeda, kael keamsisi. 3 Tonda, ne tep teka tenepra ne sipu eremamnerumupa, mali nengdi, ikin keca weika di sun nong deiki deriramseiya peda, sundi, ‘Nun dabale’ tenen, men tamamnerum dinin, pio pe deipra, ne pelpu tupa doramnerume. Akuramrumnge yumada, ne kael keamsisi.

4 Dinino, mali kuramruma tep, upu lepsisikra bokeipkamsena deiyo kecada, pepkusene. Ada, ne tep teka tenepra gonga keamrum taruda, ne tep teka teneprumdi sun kange dipru weika di ne deikipu deriramnerum dinino, ukutaruda, yambula dipu ne tep kange derinerume. 5 Atep sun moupra tenenkamrume. Pumun taru ne tep kange deiamnerum ngeda, pio telep dinin, ukutaru kurumada, pio yuk tenepra kurume. Yambula dipu kange derinerume. Amali kuprumnge tep, tapmumdi, amnyo karikra, pumun taru pio telep kuramrumtopu, kange di ton cap kuprumnyopda, telepe pepsetene. Ukutaru sun mali kuprumnge tep, men taprumnyopda, nedi sun damai yanedi, sun weica derina deiyo keca deipsisada, dopropkamsene.

6 Ange pepmasen dinin, tenpu keca telep kupra kurumnge tep nengeda, ne kange deipsene. Ada, sun pio mali kunge nesala, sun Nikolaus mutu kunge nesaladi mali kunge keca tep, sun Efesus mutu kurum nesaladi, ‘Nun songe’ tenerumutopu, ne peda utopu ‘Angeda ne song’ tenenuna cadi, ange tep ne kange derisenune.

7 Sun amul kwapserepa, ‘Aupu deiyoda ake’ tenen, gekepmanto nesala yumada, Allah er Lek Sambaladi, Allah teka tenenge nesala yuma tep pere upuda, moupra gekenkamrume. Ada, mali kun keca yuma tep, bisbisa kapra kemenge nesala yuma tep nengeda, ne pio telep kununa neitamai tengamre co tep, “Telepe aco mouramre co duda, sun dakra jepso,” pepkamne. Aco du jenge nesala yumada, pio gampu kunkamenga cadi, aco er sida, Gam Kuna Co penupe.

“Aupu yumada, Efesus mutu kungedi, teka tenena nesala tep pepkamrume,” pepneu.

Allahdi Semirna mutu kuramidi teka tenerami nesala tep, pepu upu

8 Nimi Mi Sisa Utopu Ngebodi upepneu. “Yohanes, kandi Semirna mutu teka tenenge nesala, sun melimna malaikat tep, aupu sekra dokoteprume. Dokotepkurum upuda, ake.”

Akeca-keca yuma kapul men kwamu taruda, ne konum kuramsa tep, neda Gonga Kemna Deiyo Ngebo kunune. Tonda, akeca-keca yuma konum gum kupre taru peda, ne pio gam kunkamna cadi, neda Gawal Dangna Deiyo Ngebo kunune. Ne gam kuramsanen, depsi dinin, kange di ton cap gam buksidi, gam pio kunune. Nedi sun Semirna mutu kurumu nesala tep upepsene.

9 Sun kange mun kange doupra kumum keca cap, ikin kuserenge cap, akeca-keca yuma gum kupseupa, tali kankan kunge nesala kumumnge capda, ne kael keamsisi. Akeca-keca yuma men talerum dinin, ne kangeda, sunda isomka nesala utopu kurume. Sun yuk nengdi, “Nunda, tek sisi Yahudi yala nesala, Allah er nyapu kunupe,” pepra tali pertamenge nesaladi, sun Semirna mutu teka tenena neng tep, mali upu weika di pesenga deiki di luludisenungada, ne kaele. Anengda, Kain Jen Ngebodi talerepa, er sipu eremnunge. Ne nyapu men kununge.

10 Amenda taru ikin keca weik, sun nong deiki kupserepa, kange mun kange dounkamruma tep nengeda, kwar dangna gume. Ne tek sisi pepsene. Kain Jen Ngebodi, sun tep, ‘Anesala mali kuptenge’ tenen, upu peiprepa, mali neng sun kan-kan di, ton nesala dopropmengedi, wenemna ati dongopkamsenga deiki di kurpetenkamsere. Sundi ne tep teka teneneruma tep nengeda, ikin keca weika di sun nong deiki derinkamsenge. Ada denge weik 10 tumi deiki di, ikin keca sun nong deiki derinkamsenge. Ukupkamsenga peda, ne teppu teka tenepra dimpeprappu kurumupane, mali nengdi poptapsenga peda, pio men tapkamnerume. Pio men tapnerumnyopda, nedi sun menenga keca dorona tep, pio gam kuna deiyo keca karepsenepa, pio gampu kunkamrume.

11 Ange tep nengeda, sun amul akwapserepa, ‘Aupu deiyoda ake’ tenen, gekepmanto kurum nesala yumada, Allah er Lek Sambaladi, Allah teka tenenge nesala yuma tep pere upuda, moupra gekenkamrume. Mali kun keca yuma tep, bisbisa kapra kemenge nesala yumada, nimi dena ue butene taru depkameng ngeda, sun men depkamenge. Mali kun nesala kange di ton cap ue butene depkameng dinin, mali keca tep, ‘Nun songe’ tenepra, bisbisa kamenge nesalada ue butene taru men depkamenge. Gampu kunkamenge. Aupu yumada, Semirna mutu kungedi teka tenena nesala tep pepkamrume. Aupu yuma upepneu.

Allahdi Pergamus mutu teka tenerami nesala tep, pepu upu

12 Nimi Mi Sisa Utopu Ngebodi upepneu. “Yohanes, kandi Pergamus mutu teka tenenge nesala, sun melimna malaikat tep aupu sekra dokoteprume. Dokotepkurum upuda, ake.”

“Nedi parang ya dana-dana tara, si takke weik kurenge talene ngebodi, sun Pergamus mutu kunge nesala tep aupu pepsene. 13 Sun kurumu mutuda, ne kaele. Kain Jen Ngebodi amutu nesala yuma tep talerepa, er upu gekepra dombanunge. Amutu nesala weika di ukunung dinin, ne tep tupa teka tenenerum nesalapuda, men tamnerumdi, tupa teka tenepnemumdi domyakanerume. Tamna pio gum dipapu, ne upu dopra peteremamu ngebo, er sida Antipas, sun mutu mali nengdi poptamya tep, ikin weik kuramseu dinin, ataru neitamai peda, ne tep men tamnerume. Tupa teka tenenerume. Dinino, sun mutu neitamaida, Kain Jen Ngebo akurure.”

14 “Ikin kuramseua peda, ne tep men tamnerumdi, telep kuramrum dinin, ton ngeda mali kuprum keca tep, upu lepsisikra bokeipsenedi, wenepkamsene. Tenpu ngeda, sun kan-kan neitamaida, ton nengdi pumun kuramu ngebo Bileam er peramu upu talepra dombanunge. Bileamdi, yuk ngebo er sida Balak tep peterepupa, Balakdi Israel nesala sun dipru gipropupa, mali-mali kurami. Balak peterepka deiki di mali kurami ngeda, isok si eremna tep, gam keca popra kareraminge atu dopra jerami. Tonda, upula nyangdana keca yala-yala yuma kurami. Bileam mali upu peteremamnga deiki di, Israel nesala amali keca kuramitopu, sun Pergamus mutu neitamai kunge nesaladi, amali kun keca utopu kupra kununge.”

15 “Butene ngeda, arup pepmasentopu, sun pio mali kunge nesala, Nikolaus mutu kunge nesaladi peteremenge upu gekepra dombanung nesala ton, sun Pergamus mutu neitamai ton kununge. 16 Ange peda pio mali tep, akeca yuma tapra amnyo karikra, dumsisipu kunkamrume. Amali kun keca yuma men tapmumnyopda, nedi sun damai menmena yanyopda, ne sipyal pum belepneu parang ya di, amok upu talepra dombange nesala tep, poptapnedi bisbisa kapnyopda, gawal dakamne.”

17 “Ange tep nengeda, sun amul akwapserepa, ‘Aupu deiyo ake’ tenen, gekepmanto kurum nesala yumada, Allah er Lek Sambaladi, Allah teka tenenge nesala yuma tep pere upuda, moupra gekenkamrume. Mali kun keca yuma tep, ‘Nun song’ tenepmengedi, bisbisa kamenge nesala yuma tep nengeda, nedi iniamsi kwaneng, er sida mana, bokra karenkamne. Tonda sun ukupu si tep, tenepra wepnedi, yaru gel kurun nge deiki seknyopda, anesala tep karepkamne. Sun ukupu sida, yuk nesala men kael kepkamenge. Ukupu si karepnepa dopropmenge nesala, sun dipu sun pe sipu kael kepkamenge. Aupu yumada, Pergamus mutu kunge teka tenena nesala tep pepkamrume,” pepneu. Nimi Mi Sisa Utopu ngebodi, ne Yohanes tep pepneu.

Allahdi Tiatira mutu teka tenerami nesala tep, pepu upu

18 Nimi Mi Sisa Utopu Ngebodi upepneu. “Yohanes, kandi Tiatira mutu teka tenenge nesala, sun melimna malaikat tep aupu sekra dokoteprume. Aupuda, ake.”

“Neda, Allah er Mi Sisadi pepkene. Ne asuruda, ila uku bu jeramretopu kunerure. Tonda, ne yanda gat keca er sida tembaga dopra uku neitamai dongopmengepa, lyeipredi, mereng-mereng peramretopu kunerur ngebodi pepsene. 19 Sun kurumu keca yumada, konum kael keamsisi. Ada, sundi yuk nesala tep bicau tenepra melimumnge cap, Allah tep ila di teka tenemumnge cap, ne pel tep tamna gum di, pio pe deipra pel donemumnge cap, ikin keca akapserya peda, pio pe deipra pel tupa domumnge cap, ayumada, ne kael keamsisi. Tonda, ukupu gonga kepra teka teneamnerum taruda, akeca-keca yuma yambula di kuramrum dinin, ukutaruda weika di ton cap tapakra telep kumum ngeda, konum kael kemsenune.”

20 “Ange yumada, telep kurum dinin, ange akapserya peda, sun tupa mali kumum keca tep, upu lepsisikra bokeipsenedi, wenepkamsene. Ada, tenpu mali kure ner, er sida Isebeldi, ‘Neda Allah upu cap, amenda kupkamre keca cap tep, lap pena deiyo ner, nabi ^{▼▼Nabi, Allah er upu lap pena neng – Allah er upu lap pena nengda, Allahdi, ‘Nimi gekepkameng’ tenen, erdi wepra deiamu neng tep, er upu lap pepu pangeda, anengdi, yuk nesala yuma tep lap perbarami. Anengda nabi neng penupe. Nabi neng, sun lap pena upuda, nomor 25 dirume.} ner kunune,’ pepra, er pe si eremdaredi, tali pertamrur dinin, tek sisi upu men perure. Anerda, pio mali ner dinin, sun Tiatira mutu kurumu nesaladi, ‘Dakwapye, nun cap, aner cap kikiman kunupada, mali gume’ tenen, kikiman tupa kurume.”

“Angeda mali kuruma tep pepsene. Anerdi er upu peteremrura deiki di, ne nyapu sun dipru gidoredi, anesala dopra yuk mali bisi lerekra dubarure. Mali bisi dubarepa, sundi tali upula nyangdana keca yala-yala yuma kununge. Tonda, yuk nengdi isok si eremna cap, isok gispal dona cap tep, gam keca popmengedi, tu galepra deriramengepa, ne nyapudi atu kunupmengedi, jenunge. Ange yumada pio mali, tenenune.”

21 ‘Aner er mali kun keca yuma tapredi, amnyo karikra dumsisipu kunkamre’ tenen, go kareamsi dinin, anerdi, ‘Gume, ne mali kun keca pio men tapkamne,’ teneredi, balila weik tupa kurure. 22 Balila weik kurura tep, ikin keca weik er nong deiki deipnepa, ila pu weik jenkamemere. Tonda, aner cap upula nyangdaramidi, er mali kuramretopu kikiman mali kunge nesala cap tep, sun mali kunge keca men tapmengopda, ila kange mun keca karepnepa, amali kunge nesala mali pengedi, engepra weika di dounkamenge.

23 Anerdi deiamu nyapu yumada poptapkamne. Ukupnepa, amutu-mutu teka tenenge nesala yuma epmengedi moupra kael kepkamnenge. Ada, ‘Uo, nimi kange tenenange cap, nimi dipru neitamai kusere keca yuma capda, Allah erdi kael kemserure. Nun yumadi kuramepetopu, upu lepsisikra bokeipseredi, wenemkamserure,’ tenepmengedi, kael kepkamnenge. 24 Uda, sun Tiatira mutu kurum nesala dinin, aner perur upu talepra men dombarum nesala tep yuk upu ton pepkusene. Tonda, yuk nengdi, “Kain Jen Ngebo er kure keca, inimrur keca pio neitamai ngeda, ake,” peramenge ngeda, sundi amali upu kael kepra men talerum nesala tep yuk upu pepkusene.

Sunpu tep nengeda, ikin keca ton cap, sun nong deiki men derinkamsene. 25 Yuk ikin keca ton cap tapakra sun nong deiki men derinkamsen dinin, ukutaru di dipra amenda tamupra yankamne taru, daneitam taru yumada, ne upu konum teka tenepra talerum ngeda, tamna gum pio talerumudi, dimpeprappu pio kunkamrume.

26 Ukunmarumupane, mali kun keca yuma tep, ‘Nun song’ tenen, bisbisa kamengedi, ne teneamsisitopu, angepu talepra dumsisipu kunge nesala tep nengeda, ereipkamsene. Ila di ereipsenedi, deiyo nesala keipsene pangeda, nesala ban-ban yuma kunge nesala tep, nimi deiyo kupra talenkamrume. 27 Nimi yala-yala yuma tep, talepra ila nimi deiyo neng kunkamruma tep, Mazmur upu buku neitamai aupu seki.
‘Angebodi tuai nesala yala-yala yuma tep, ila puto deiki di talenkamre. Boun keca, olokmanto keca dopra gel deiki puto di doupmengepa, olokra ketbula bungamretopu, er amutara kunge nesala mali kupmengopda, ila puto di wenepra poptapredi, gum kupra deipkamre.’ (Mazmur 2:9)

Atep, ne nai bo Allahdi, ‘Nimi ban-ban yuma talepredi, ila deiyo ngebo kunkamre’ tenen, adeiyo keca kareamneutopu, ne Nimi Utopu Ngebodi, sun teka tupa tenenerum nesala peda, nimi deiyo talena keca karepkamsene. 28 Tonda, mali kun keca tep bisbisa kamenge nesala tep, bereng yan taru tengamre kuru ton dopra karepkamsene. 29 Atep, sun amul akapserepa, apepmasen upu tep, ‘Deiyo ake’ tenen, gekepmanto kurum nesalada, Allah er Lek Sambaladi, sun teka tenerum nesala tep pesere upuda, moupra gekenkamrume. “Aupu yumada, Tiatira mutu kungedi teka tenena nesala tep pepkamrume,” pepneu. Allahdi ne Yohanes tep pepneu.