Rev 20 | XteSC | STEP | Akeca yuma epsi dingeda, amenda epsi keca ton lap pepkune. Im deiki tara di tenpu malaikat kwerepu. Angebodi, tuai mutu dinin, tu pum ila kaurye kwamngai tep, er buplan pangna keca kunci cap, ateng koudongon keca, ila rantai tapu cap doupra kwerepyakanmaupa epsi.

Revelation of John 20

Keteng tamun denge weik 1.000 tahun tep, pepu upu

1 Akeca yuma epsi dingeda, amenda epsi keca ton lap pepkune. Im deiki tara di tenpu malaikat kwerepu. Angebodi, tuai mutu dinin, tu pum ila kaurye kwamngai tep, er buplan pangna keca kunci cap, ateng koudongon keca, ila rantai tapu cap doupra kwerepyakanmaupa epsi. 2 Kwerepudi, adipapu, ila Mem Bal Urasin Utopu Ngebo, ada pumun taru bal utopu daudi dakuramu ngebo, er sida Kain Jen Ngebo, tonda Setan penup ngebo tep, amalaikat puto di talepdongopu. Malaikatdi Kain Jen Ngebo talepdongoprapudi, ila rantai tapu di ateng koupdongopu. Ada, ‘Keteng tamun denge weik 1.000 tahun deiki di, pio men loptapmanto kunkamre’ tenen, amalaikatdi, Kain Jen Ngebo tep ateng koupdongopu.

3 Ateng koupdongopudi, tu pumbon ila kaurye kwamngai neitamai dokotepu. Ila kaurye tu pumbon dokotepudi, abon buplan dengna buplan deipdongopudi, kunci dekdongopu. Ukupka deiyoda, ‘Keteng tamun seribu tahun kapul men kupre taru neitamai yumada, Kain Jen Ngebodi, tuai mutu nesala yala-yala yuma tep, mok upu ton cap pio men penkamre. Mok upu men peptua cadi, ataru neitamaida tuai nesala ban-ban yuma erdi perur mok upu ton teka men tenenkamenge’ tenen, atu pumbon buplan dekdongopudi kunci dekdongopu. Keteng tamun 1.000 tahun konum kupyopda, amenda taru ue tenpu metekanun ton cap loptapkamre dinin, ne epsi taruda tu pumbon dokotepupa, epsi. Ne Yohanesdi pepne.

4 Ange epsi dingeda, akeca ton epsi. Ila deiyo neng bungna keca deiki bukmai nesala ton epsi. Allahdi anesala tep, upu lepsikra bongdina deiyo keca konum karepu. Ada, ‘Yuk nesala tep upu lepsisikra bokeipmengedi, wenepkameng’ tenen, Allahdi anesala tep upu bongdina deiyo keca karepupa, deiyo neng bungna keca deiki bukmaipa epsi. Tonda, pumun taru Yesus cap, er upu cap tep teka teneramidi, Allah er upu dopra peterep embaramipa, yu nengdi, ‘Nun song’ tenen, sun kum sengtamami nesala sambala weik akunmaipa epsi.

Anesala sun sambala yuma gam bukidi, keteng tamun denge weik 1.000 tahun deiki di, Kristus cap, sun capdi, akeca-keca yuma talepra deiyo neng kuramidi taleami. Apepmasen nesalada, tali nesala gume. Ada, pio Mali Gam Kure Keca ngebo cap, er urasin utopu keca cap tep, si pio men eremami.

Tonda, angebo er peten kemdin keca, er nomorda, anesala sun aso deiki cap, sun buru deiki capdi, er nomor men sengami nesala tep pepsene. 5 Anesala sun sambala gam bukidi, Kristus cap 1.000 tahun deiki di, nimi deiyo neng kuramidi, akeca-keca yuma talerami. Sunda ukurami dinin, yuk nesala, men di konum deami nesala yumada, ataruda gam kapul men buki. Keteng tamun denge weik, 1.000 tahun kupbaramnganen, konum kupupa, sun yuk tali dadeami nesala peda gam buki. Dinino, sun sambala menmena taru gam buki nesalada, ataru tep penup sida, Gam Bungdina Menmena Tarunge tep penupe.

6 Sun menmena taru gam bukameng nesalada, Allahdi telep kweiprepa, pio kange deipra kunkamenge. Sunda pio mambule. Allahdi anesala tep wepra deiamupa, sunda mali kun keca tenpu peda men talengedi, pio dumsisi nesalapu kununge. Anesalada, Allahdi menmena taru gam bukeipkamre. Dinino, yuk mali nesala yumada, dena butene taru ton depkameng dinin, ataru menmena gam bukra kunkameng nesalapuda, ue butene taru men depkamenge. Teleppu pio gam kunkamenge. Sunda, keteng tamun denge weik 1.000 tahun deiki di, Allah cap, Kristus cap, sun amutara bukameng dinin, sun butene cap, anesala cap, nimi deiyo keca talepra, akeca-keca yuma talepra kunkamenge. Sun anesalada, Allah er mambul pel don neng pio kunkamenge.

Kain Jen Ngebo tep, pepu upu

7 Aketeng tamun denge weik 1.000 tahun kupbaramyanen, konum kupyopda, tenpu malaikatdi, Kain Jen Ngebo talepra ateng koupdongopudi, ila kaurye weik tu pumbon neitamai dongopudi, kunci dekdongopkada, ataruda kange di Kain Jen Ngebo loptapkamre. 8 Kain Jen Ngebo loptaprepa, atu pumbon di weleryaryopda, tuai mutu dana-dana tara kunge nesala tep, mok upu perbenkamre. Ataruda, sun tuai mutu dana-dana tara kunkameng nesala sun yala sida butene. Ton nesala gung sun sida, Gok si sipenkamenge. Ton nesala gung, sun sida, Magok si sipenkamenge. Kain Jen Ngebo er mok upu peprepa, gekepmengedi teka tenepmengopda, erdi sun yuma tep bulupra derinkamre. Ada, ila podana taru ketenemna tep, anesala gung butene bulupra derinkamre. Anesala sun gungda, men nukmanto kununge. Ada, laut mokon pirmanai, gel wenenga pio weik akuretopu, denge pio weik men nukmanto kunkamenge.

9 Ne Yohanesdi epsinge ton pepkune. Ada, sun Gok si talepra kunkameng nesala cap, Magok si talepra kunkameng nesala cap, wisipra tuai mutu neitamai bisi embanmaiyanen, bei dingeda, Allah er tep teka tupa tenerami nesala, sun kunmaiyai dana-dana yuma warekra ongopgenepmaipa epsi. Amutuda, Allahdi er kange deiamu mutu Yerusalem ati arum dominge tep pepne. Akati arum warekra ongopgenepmai dinin, im deiki tara di, ila uku bu kwerepudi, amali kun nesala yuma, Gok nesala cap, Magok nesala cap jepropu.

10 Uku di jepropupa, amali kun nesala tep, mok upu peramu deiyo ngebo Kain Jen Ngebo, sun malaikatdi kange di ton cap tomopidi, ila uku jen ban neitamai dokotepi. Ada uku bu jeramudi, bupu cap, poron gel si belerang, uku bupu weika di jerepa, gel but tong dinin, siken tong utopu tong weik peramrenge tong cap peramudi, uku deiamu mokon neitamai dokotepu. Ada, pio Mali Gam Kure Keca ngebo cap, Mok Upu Peramu ngebo cap menmena taru malaikatdi dokotepkaipu, Kain Jen Ngebo peda, auku jen ban neitamaipu dokotepu. Keteng komuni pe, lukunda peda, yuma taru yuma, tamna pio gum dipu, auku di sun nong deiki jeramyanen, pu weik jeramrepa, pio donmanganen, engenapu kunkamenge.

Men taru di konum deami nesala tep, upu lepsisikra bokeipredi, wenepkamrenge tep, pepu upu

11 Akeca yuma epsi dingeda, akeca ton epsi. Ada, ila nimi deiyo ngebodi bungrurai epsi. Ada, pio ila kurun bungna keca cap, akeca deiki bukmau ngebo cap epsi. Angebo katuai kupupa, im cap, im neitamai kure keca yuma cap, tuai mutu cap, tuai mutu neitamai kure keca yuma capda, aila deiyo ngebo damai men yanmanto cadi, akeca yuma gum kupupa, angebopu epsi. 12 Dipetepsipa, sun konum deami nesala mambul neng pe, mambul gum neng peda yakanmaipa, epsi. Sun yuma aila kurun bungna keca urasin tara tengyakanmaipa, im deiki tara kure buku-buku yuma tepra deipi.

Tonda, tenpu buku, er sida Gam Kunkameng Nesala Si Sengna Buku ton tepra deipmaipa epsi. Abuku neitamai sengami upu yuma dipetepipa, sun konum deami nesala yumada, sun gam tupa kurami taru akeca-keca yuma kuramitopu, sekra deriramya cadi, abuku sekeiamya neitamai akwamutopu, sun konum deami nesala yuma tep, upu lepsisikra bokeipudi, wenepu.

13 Ataruda, laut mokon deiki embarami dinin, deamipa ila laut mokon jeramupa, daneitamai kurami dinin, men di konum deami nesala katuai tengyai. Tonda dena deiyoi cap, uda, deami nesala kuramyai er sida Kerajaan Maut cap, aca kurami dinin, men taru di konum deami nesala cap katuai yakanmaipa epsi. Aila deiyo ngebo, ila bungna keca deiki bungmau ngebodi, anesala yuma tep, upu lepsikra bokeipudi, wenepu. Anesala yuma peda, sun tuai mutu tup gam kurami taru neitamai di, kurami keca yuma, im deiki buku neitamai konum sekra deiamya cadi, abuku dipetepidi, abuku sekeiamya neitamai kwamutopu, upu lepsisikra bokeipudi, anesala tep wenepu.

14 Aila nimi deiyo ngebodi apel yuma konum dopbaramnganen, gawal konum daku dingeda, dena deiyo keca cap, deami nesala wengbaramyai, er sida Kerajaan Maut capda, amutu butene dopropudi uku jen ban neitamai dokotepu. Uku jen ban neitamai uku tupa jeramre mokonda, Dena Butenenge tep penupe.

15 Ware nesala do yuma, Allah er buku si, Gam Kunkameng Nesala Si Sengna Buku neitamai, sun si men kwamu nesala yumada, adipapu anesala dopropidi, uku deipupa, uku pio jeramre mokon neitamai dokotepipa, ne Yohanesdi epsi.