Rev 21 | XteSC | STEP | Ayuma epsi dingeda, amenda epsi keca ton lap pepkune. Ada, pumun taru tuai mutu yuma cap, im deiki cap kwamunge yuma konum gum kupka cadi, dinmasipa, Allahdi tuai mutu ukupunge ketekepra deipmaunge cap, im deiki ukupunge ketekepra deipmaunge cap, epsi. Tonda, pumun taru deiamu laut mokon yuma peda, gum kupu dinin laut mokon ukupunge ton men ketekeipu.

Revelation of John 21

Allahdi ila ati arum Yerusalem ukupu mutu ketekeipkamrenge tep, pepu upu

1 Ayuma epsi dingeda, amenda epsi keca ton lap pepkune. Ada, pumun taru tuai mutu yuma cap, im deiki cap kwamunge yuma konum gum kupka cadi, dinmasipa, Allahdi tuai mutu ukupunge ketekepra deipmaunge cap, im deiki ukupunge ketekepra deipmaunge cap, epsi. Tonda, pumun taru deiamu laut mokon yuma peda, gum kupu dinin laut mokon ukupunge ton men ketekeipu. 2 Allah im deiki tara neitamai di, ila ati arum ukupunge er sida, Yerusalem Baru dokotepupa, kwereryakanmaupa, epsi. Yerusalem Baru neitamaida, mali keca tenpu peda men kuramudi, leknapu kwamu ati arum kupmaupa epsi. Ukupmantoda nimidi, ‘Nun tara ner dopkur’ tenen, akaber ner er nong deiki pio urasin telep opkal cap, kwerya keca cap weika di ketenepra kemdiramengtopu, Yerusalem Baru ati arum ukupunge yumada, urasin pio teleppu kupupa, epsi.

3 Epsipa, Allah er ila bungna keca damai, tenpu ngebodi aupu pepu. “Ukutaruda, Allah er pio kunkamraida, er cap, nimi cap, kikiman pio kunkamenge. Gam tupa kunge nesala yumada, Allah er nyapu sisa kunkamenge. Allahdi anesala yuma tep talerepa, sundi, ‘Nun Nai’ tenen, Allah er sipu pio eremkamenge. Allah erda, sun cap kikiman kunkamenge.

4 Allahdi anesala yuma tep, kange mun keca yuma gum kupra deiprepa, pio teleppu kunkamenga cadi, kange di ton cap pio men engenkamenga tep, sun asi me kiliptapredi, engena gum kupra deipkamre. Pumun taru kuramu keca yuma, konum gum kupmara tep, dena cap, nimi depnepa engena cap, kange mun kupserya tep, engena cap, pu jeserya deiyo keca yuma cap, amali keca yumada, pio gum kupmara cadi, kange di ton cap pio men kunkamre,” Allahdi upepupa, gekepsi.

5 Gekepsi taruda, Ila Nimi Deiyo Ngebo, er ila kurun bungna keca deiki bukmau ngebodi aupu pepu. “Ukuda, ware keca do, yala-yala yumada, ukupungepu ketekeipra deipne. Atep, ne pepkuken upuda, pio tek sisipu kurura cadi, nesala yumadi teka tenenkamenge. Atep, apepkuken upuda, gekepmemdi sekurume,” pepneupa, gekepsi.

6 Allahdi pepneu upuda, ake. “Ukuda ne teneamsi pel yumada, konum gawal dakne. Akeca-keca yuma kapul men kwamu taru, ne konum kuramsa tep, neda gonga kemna deiyo ngebo kununa cadi, ne si ton Alpa penenunge. Tonda, akeca-keca yuma gum kupkamre taru peda, nepuda pio gam kunkamna tep, neda pio men gum kunkamre ngebo kununa cadi, ne si ton Omega penenunge. Ne si ton, Gonga Kemna Deiyo Ngebo cap, tonda, Gawal Dangna Deiyo Ngebo cap penenunge. Ware nesala do yuma, me putapyopda, nedi sun tep Pio Gam Kun Me karenkamsene. Ada pio gam kuna deiyo me bungna di, gam kuna me gwepra talipu karenkamsene. Ameda men kunumkamenge.”

7 “Ware ner do, ware ngebo do, mali kun keca cap, mali kun nesala cap yuma tep, ‘Nun song’ tenen, bisbisa kapmengedi, ne tep men tapnengyopda, menenga keca karenkamne. Ada, kandi dinmarem keca cap, nedi pepkenepa, gekenmarem keca yuma cap karepnepa, ne tep men tamamnei nesaladi doronkamenge. Ne Allahdi anesala yuma tep talenepa, sunda ne nyapu sisa pio kunkamenge. Ne sipu eremkamnenge.”

8 “Dinino, ila uku bu jeramudi, bupu cap, poron gel er sida belerang, ada uku bupu weika di jerepa, gel but tongda, siken tong utopu tong, weik peramrenge peramudi deiamsi mokon, uku jen ban neitamai dokotepnepa, acapu pio dakunkameng nesalada lap pepkune. Sunda, teka tenena gum nesala cap, ‘Yu nengdi popsenung’ tenen, kwar kuprepa, ne tep tamnenung nesala cap, ker dona nesala cap, nimi bousi pona neng cap, amali pel donge nesala yuma cap, tonda tali keca tep, ‘Nun nai bo’ tenen, si eremenge nesala cap, mok upu penge nesala cap, anesala yumada uku jen ban neitamai dokotepnepa, apio kunkamenge. Uku jen ban neitamai kunkameng ngeda, ada Dena Butenenge tep pepkene.” Allahdi upepneupa, ne Yohanesdi gekepsi.

9 Aupu gekepsipa, tenpu malaikat ne damai yanmau. Angeboda, sun yoneitam bari malaikatdi, karu me mau yoneitam bari talepmaipa, ame mau pumbon ila kange mun keca, yoneitam bari kwamunge doupmai malaikat, sun kan-kan dinin, tenpu malaikat ne damai yaudi, “Kanda yarume. Domba Mi Utopu Ngebo dopkur nerda, benbenepkenepa, epkurume,” pepneu. 10 Allah er Lek Sambala talepneua deiki di, amalaikat dopra dubeneudi, ila mutu dup deipneu.

Ila mutu dup deipneupa, Allah im deiki tara di dokotepmaupa, kwereryakanmau ila ati arumda, Yerusalem Baru epsi. Akati arum neitamai yumada, mali keca tenpu peda men kwamu. Pio teleppu kwamupa, epsi. 11 Allah er dirineda, pio weik kupka deiki di, Yerusalem Baru peda dirin weik kupu. Er dirinda, pio kunumna weik maibi gel meteknge, er sida yaspis, agel utopu dirin weik kupu dinin, pio lek ^{▼▼lek – Pio lek kupu pepi ngeda, ada warna putih tep gume. Ada mali keca tenpunge peda men kupkamra tep, ‘pio lek kupu’ pepra seki} kupu.

12 Akati arum dana-dana tara yuma, ila lyom gel beilya kupupa, abeilya buplanda amul dam di dutara yuma 12 kupu. Abuplan urasin deikida, Israel nesala sun yala deiyo si 12 sekra deiaminge akupmaupa, epsi. Abuplan dam yuma, buplan kalengna tep malaikatda, 12 malaikat tekra kalekmaipa, epsi. 13 Agel beilya neitamai potokra deiami buplanda, keteng yakan tarada 3 kupu, keteng wengbare tarada 3 kupu, tonda ange utopu, deiki tarada buplan weneri kupu, tonda dutarada, buplan weneri ton kupupa, epsi.

14 Akati arum dana-dana tara domi lyom gel beilya amutarada, ati ayumna sisa ikra doramengtopu, ila mutu yangna gel utopu, deiyo gel yuk-yuk 12 deiamya epsi. Adeiyo gel urasin katuai kupmauaida, yuk-yuk dinin, nimi si 12 ton sekra deiaminge epsi. Animi si 12 ngeda, Domba Mi Utopu Ngebo, ‘Ne upu dopra peterembana gonga kemna deiyo neng kunkameng’ tenen, men di wepra deiamu neng, sun si agel deiki yuk-yuk, sun si sekra deiaminge kupmaupa epsi.

15 Ne tep upu pepmaneu malaikatdi, ‘Lyomda ake, palada ake’ tenen, kunumpeten keca, pina utopu dinin, emas di ketekeipinge doupmau. Akunumpeten keca doupmauada, ila ati arum Yerusalem Baru, ‘Er lyomda ukupra, er palada ukupra’ tenen, ‘Kunupetepnedi, kael kepkun’ tenen, kunumpeten keca doupmaupa epsi. 16 Allahdi akati arum Yerusalem Baru dopkada, er lyom panjang cap, er pala lebar cap amsepu kupu. Malaikatdi kunumpeten keca emasnge dopra, Yerusalem Baru kunupetepmaupa, er lyom panjangda, denge pio weik 2.200 kilometer kupu. Tonda, er pala lebar peda, denge weik utopu 2.200 kilometer kupu.

Ange utopu, tuai udi dipra, adine kunupetepmaupa, er lyom tinggida denge weik 2.200 kilometer kupu. 17 Amalaikatdi, akati arum dana-dana kupu gel beilya kunupetepupa, er gu weik kupu ngeda, 65 meter kupu. Ange yumada, nimidi peramengtopu, “Lyomda ace, palada ace,” pepmaupa, gekepsi. 18 Akati arum dana-dana wipi beilyada, kunumna weik gel, er sida yaspis, maibi gel utopu gel di domi. Akati arum neitamai domi ati nong yumada, kunumna weik gat keca, er sida emas di domi. Emas kupu dinin, pio yung turungna gumnge kupu.

19 Abeilya iriamu tara deiyo gel urasin deikida, kunumna weik gel palepra deipi ngeda epsi. Menmena deiyo gelda, kunumna weik gel maibi gel, er sida yaspis, gel deipi. Butenenge deiyo gelda, kunumna weik gel singkaluma utopunge cap, kurun cap turuku gel, er sida nilam, gel deipi. Weneringe deiyo gelda, kunumna weik gel gat gel urasin utopu dinin, er sida mira, ton yakut ton perameng gel deipi. Dumbaringe deiyo gelda, kunumna weik gel embek ekayongoramretopu kupudi, sukup-sukup peramre gel, er sida zamrud, gel deipi.

20 Pamunge deiyo gelda, kunumna weik gel er urasinda bi cap, kurun cap telen gel, er sida unam, gel deipi. Ngantan deiyo gelda, kunumna weik gel, bisam boukke gel urasin utopu dinin, er sida sardis ton, delima perameng gel deipi. Yoneitam deiyo gelda, kunumna weik gel poron cap, embek cap turuku gel, sir gel utopu dinin, er sida ratna cempaka, gel deipi. Ban baringe deiyo gelda, kunumna weik gel galunapu derin gel, er sida, beril, tonda pirus perameng gel deipi.

Topnenge deiyo gelda, kunumna weik gel mangai denge utopu gel, er sida, topas, ton kerisolut perameng gel deipi. Morokyo deipi deiyo gelda, kunumna weik gel yaru gel dinin, kaca utopunge, agel er sida krisopras gel deipi. Kum di dutara yuma, 11 deipi deiyo gelda, kunumna weik gel dinin, er urasinda sisilya gel utopu kupu. Er sida, lasaudi gel deipi. Amul di dutara yuma, 12 deipi deiyo gelda, kunumna weik gel sukun gel utopu dinin, kaca utopu kupu. Er sida, kecubung gel deipi.

21 Abeilya buplan yumada, laut mokon pumbon di dororameng keca, er sida mutiara dinin, metek ngeda gume. Pio ilange cadi, tenpu buplanda, tenpu mutiara deipra dopi. Akati arum neitamai kwamu bisida, kunumna weik keca emas dinin, pio telepnge kaca utopu, kukidin emas di deiaminge, epsi.

22 Akati arum Yerusalem Baru neitamai yuma dipetepsi dinin, Allah er si eremna ati men doamya tep men kupu. Akeca-keca yuma deiki tara kure ila puto ngebo Allahda, nun Ila Deiyo Ngebo kurure. Er cap, Domba Mi Utopu Ngebo cap, akati arum neitamai kurengepa, im deiki kunge nesaladi, ‘Sun si erepkup,’ tenepmenge taru yumada, adipapu tali lupra eremkamenga cadi, sun si eremna ati men putarya tep, akati ton men domi. 23 Ange utopu, keteng dirin cap, ware dirin cap, ‘Adirin deipsetupa eptepe’ tenen, putarepa, pio men tenenunge. Allah er pe dirineda, pio weik kurura cadi, im deiki kunkameng nesalada, yuk dirin keca ton men putarure. Tonda, Domba Mi Utopu Ngebodi, er pe dirin weik kurepa, akati arum neitamai yuma, weik dirin utopu kunkamra cadi, keteng cap, war capda, ukupu im deiki men kurure.

24 Ataru di dipra doryankamre taru neitamai yumada, gam kunkameng nesala ban-ban yumada, Yerusalem Baru neitamai dirin weik kunkamra cadi, embangedi, adirin deikipu kunkamenge. Tonda, ataru kunkameng nimi deiyo neng, Raja utopu nesala yumadi, sun talenge keca, isomka keca dopra, Yerusalem Baru neitamai duyakankamenge. 25 Yuma taru yuma amutu lukunda men yarepa, pio men kunungamra tep, Yerusalem Baru ati yuma kunkamraida, beilya buplan pio men dengdongonkamenge. Abuplan tali paktapnapu pio kunkamenge. 26 Ataru neitamai yuma, gam pio kunkameng nesala mutu-mutu yuma, sun telep keca cap, kunumna weik keca yuma cap, gispal dona deiyo keca cap yumada, akati arum Yerusalem Baru neitamai duyakankamenge.

27 Yuma taru yumada, mali keca tenpu peda, akati arum Yerusalem Baru neitamai pio men duyankamenge. Tonda, mali kunge nesala cap, mok keca talepra kunge nesala cap, akati arum neitamai pio men wengyakankamenge. Amutu neitamaida sun mali kunge nesala men yanmanto dinin, Domba Mi Utopu Ngebodi talere buku, Gam Kunkameng Nesala Si Sengna Buku, abuku neitamai sun si konum sekeiamu nesalapuda, sundi Yerusalem Baru mutu wengyangedi, akati neitamai pio akunkamenge. Ne Yohanesdi pepne.