Revelation of John 22

Gam Kuna Deiyo Me embaramupa, epudi pepu upu

1Akeca yuma kael kepsidi, amalaikat ngebodi benbenepneupa, akati arum neitamai embaramre me, Gam Kuna Deiyo Me embanmaupa epsi. Ameda, buya gum, pio telep yo mepu embaramu cadi, ame neitamaida men kunukmaupa epsi. Ame bungnada, Allah cap, Domba Mi Utopu Ngebo cap, sun ila nimi deiyo neng bungna keca deiki bungrerungai di embarure. 2Amenda akati dana-dana neitamai kupu bisi, emas bisi neitamaipu ame embarure. Ame pirman, dana-danada Gam Kuna Deiyo Co tekamu. Tekamudi, er co du mouramne li taruda, awar-awar yuma du pio tupa-tupa mourure. Keteng tamun tenpu neitamaida, yuk-yuk dinin, 12 kali du mourure. Gam Kuna Deiyo Co er co boda, ataru gam kunkameng nesala ban-ban yuma, sun kwetena tep, pio pendu lyengrure.

3Doryankamre taru neitamai yumada, Allahdi, ‘Akecada ne song,’ tenerur kecada pio men kunkamre. Allahdi nimi wenemna tep, ketenem din kecada, amutu pio men kunkamre. Akati arum neitamaida, Allah cap, Domba Mi Utopu Ngebo cap, sun ila bungna keca deiki bungrengedi, sun butene di akeca yuma cap, amutu yuma cap, talepra ila deiyo neng pio kunkamrenge. Akati arum neitamai kunkameng nesala yumadi, Allah er amutara bukra, er pel teppu pio melipra donkamenge.

4Allah er nyapu yumadi, er urasin, sun pe asuru di dinkamenge. Sun aso deiki Allah er si sekeipkamre. 5Dortaru yankamre keteng tamun yuma neitamaida, lukunda maramep utopu men kupkamre. Pio berektapnapu kunkamre. Tonda, Yerusalem Baru neitamai kunkameng nesalada, weica dirin cap, keteng dirin cap tep, pio men putankamre. Nun Ila Deiyo Ngebo Allahdi, er dirin deiki dipu, dingedi embankamenge. Dortaru yankamre keteng tamun yuma neitamaida, Allahdi talerepa, amutu neitamai kunkameng nesala yumada, er cap akeca-keca yuma talepra, deiyo nesala pio kunkamenge.

6Malaikatdi aupu ton pepneu. “Kan gekepmaumum upu yumada, pio tek upupu kurura cadi, nesala yumadi aupu teka tenenkamenge. Nun Ila Deiyo Ngebo Allah, er upu lap perami nesala, nabi-nabi neng sun dipru taleamupa, sundi er upu lap pepra sengami. Angebo er dipu, ‘Ne nyapu yumadi amenda kupkamre keca kael kepkameng’ tenen, er malaikat dokotepupa, kan Yohanes tep lap pepmakere.” Amalaikatdi upepneupa, gekepsi.

Amenda taru Yesusdi tamupra yankamra tep pepu upu

7Aupu gekepsi taruda, amenda yankamre ngebo Yesusdi upepu. “Sun kange moupso. Ne menmena yankamne.

Ware nesala do yuma, Yohanesdi sekeipkuser buku neitamai kure upu gekepmengedi, aupu peseretopu pio talepra kunkameng nesalada, Allahdi telep kweipserepa, kange deipra pio teleppu kunkamenge.” Yesusdi upepneupa, ne Yohanesdi sekeipsene, pepne.

8Ne Yohanesdi abuku neitamai sekeipmasen keca yumada, nedi epsi. Abuku neitamai kure upu yumada, nedi gekepsi. Ange yuma gekepsidi, epsopda, ‘Uo’ tenen, mambul kange doupsidi, akeca yuma benbenepneu malaikat tep, ‘Gisal dopkun’ tenen, er yan damai gutam tu dipdongopra buksi. 9Ukupsi dinin, amalaikatdi upepneu.

“Ne tep gispal dona gume. Allah tep, kan cap, teka teneramidi, Allah er upu lap penge nabi-nabi neng, kan du yapu utopu nesala cap, uda, abuku neitamai sekurem upu talepra kunkameng nesala yuma cap, sundi Allah er amutara bukra er pelpu dorume. Sundi ukurumutopu, ne peda Allah er pelpu donuna cadi, ne tep gispal men dopkunerem dinin, Allah er tepapu gispal dopra, er sipu pio eremkamrume,” pepneu.

10Aupu pepneu dingeda, aupu ton dukdongopra pepu.

“Amenda sirya taru kupkamre keca tep, abuku neitamai sekurem upu yumada, inimdongona meme. Akeca yuma kupkamre taru konum damai yanmara tep, ange men kunkamrume. Abuku sekurem keca yumada, ‘Nesala yuma kael kemkameng’ tenen, katuai dipu penkamrume. 11Dinino, pio mali kunge nesalada, tupa malipu kunkamenge. Allah er kure keca yuma tep, ‘Nun song’ tenen, yanipmengedi, mali kun kecapu talepra kunge nesalada, apio kunkamenge. Telep kun kecapu talepra dumsisi kunge nesalada, tupa telep kecapu kunkamenge. Mali keca pio men kurepa, dumsisipu kunge nesalada, Allah er nyapu sisa kununa cadi, tupa dumsisipu kunkamenge,” pepneupa, gekepsi.

12Aupu gekepsipa, Yesusdi aupu pepneu.

“Sun kange moupso. Neda menmena sun damai yankamne. Nedi tuai nesala sun kunumna tep, menenga keca cap, wenemna keca capda konum keteneipsi. Nesala ban-ban yuma tep nengeda, sun kurum keca akwapmaretopu, ayuma dipetepnedi, sun tep upu lepsisikra bokeipsenedi, wenepkamsene. 13Neda, akeca-keca yuma kapul men kwamu taruda, ne kuramsi. Akeca-keca yuma konum gum kuprepa, nepu pio kunkamne. Neda Gonga Kemna Deiyo Ngebo cap, tonda Gawal Dangna Deiyo Ngebo cap kunune. Menmena Ngebo cap, Amenda taru Sirik Ngebo cap, ayumada nepu kunune.”

14“Nimidi, sun opkal dereng baprepa, ‘Lek kupkur’ tenen, me kuramengtopu, ware nesala do yuma, ne Yesus tep teka tenepmenga deiki di, sun mali keca gum kupra deiamsisi nesalada, Allahdi anesala tep telep kweiprepa, kange deipra pio teleppu kunkamenge. Anesalada, Gam Kuna Deiyo Co, er du dakra jeptenge. Tonda, anesalapu Yerusalem Baru dana-dana wipi beilya buplan neitamai di, tali lupra wektengedi, akati arum neitamai tali kange deipra mesumpu lupra wengkamenge.

15Dinino, akati neitamai pio men wekmanto nesala, bura tara utopu kunkameng nesalada, pio mali-mali kecapu talepra kunge nesala. Ada, ker dona cap, bousi pona cap, isok mirye tenengedi, akeca yala-yala yuma mali pel donge nesala cap, tali nyangdange nesala cap, nimi potamenge nesala cap, tali keca tep, ‘Nun nai bo’ tenen, isok si eremenge nesala cap, mok kun keca yala-yala yuma tep, kange deipra mok pel donge nesala cap, sun yumada, Yerusalem Baru pio men wengkamenge.”

16“Ne Yesusdi, ne im deiki pel dona ngebo, malaikat dopra kan damai dokotepmakenada, ‘Aupu yuma lape pepkerepa, kandi ne tep teka tenenge nesala yuma tep, lap perbenkurum’ tenen, amalaikat dokotepmakene. Pumun taru kuramu ngebo Raja Dauddi deipupa, dadeipdanen yakaramyanen, deipi mi, ila mambul mida, ne ca. Ne si tep, ‘Bereng Yan Tara ▼
▼Berengna Taru Yakarur Kuru – Aupu pepu ngeda, nun Ketengban mutu nesaladi, akuru si tep Ululkor penupe. Asi peramenge deiyoda, ‘Kuru si eremkamep’ tenena tep gume. Deiyoda ake. Ada, Ululkor kwiryada, dirin weik kuramretopu, Yesusda, nimi dipru neitamai dirin weik karena deiyo ngebo kuserura tep, domon upu deiki di asi peramenge.
 Tengyakaramre Kuru,’ penenunge.”

17“Allah er Lek Sambala cap, tonda Domba Mi Utopu Ngebodi, er dopkamre ner utopu nesala, sun teka tenenge nesala cap, sun yumadi ne tep, ‘Yarume,’ pepra moronenunge. Aupu gekepmengedi, teka tenenung nesala yumadi ne tep, ‘Yarume,’ pepra moronenunge. Ware nesala do yuma, gam kuna deiyo me tep putare nesala yumada, ne damai yakana telepe. Tonda, ‘Uo, ameda dopra jeptepe’ tenen, pio putarepa, dipru engenung nesala yuma tep, nedi gam kuna deiyo me, kunumna gum talipu gwepra karenuna cadi, ame putare nesala yumadi, gam kuna deiyo me doryakana telepe pua.”

18“Dinino, ware nesala do yuma, amenda taru kupkamre keca tep, abuku neitamai pere upu dopra peterepmengepa, gekenkameng nesala yuma tep nengeda, upepsene. Sun kange moupso. Aupu neitamai di sun kange dipu tenepmenge upu cap tapakra pepmengopda, Allahdi anesala tep wenepredi, abuku neitamai kange mun keca lap pepmaken keca yumada, sun nong deiki deipkamre.

19Ange utopu, abuku neitamai amenda kupkamre keca tep, lap pena upu ton wilipra tamengedi, ‘Ange men pepkup’ tenen, aupu tenpunge peda yamdongonge nesala tep nengeda, Allahdi anesala tep ila di wenepkamre. Ada, abuku neitamai lap pepmaken keca, gam kuna deiyo co du jena cap, Allah er pio telep ati arum, er sida Yerusalem Baru kuna cap, anesala dopropmantonge, Allahdi akeca ka tamupra doproprepa, anesalada amutu wekra pio men kunkamenge.”

20Abuku neitamai kure upu pere ngebo, ne Yesusdi, “Ne tek sisi menmena sun damai yankamne, pepsene,” pepneupa, gekepsi.

Atep nengeda, ne Yohanesdi, “Nun Deiyo Ngebo Yesus, adipapu yarume,” penune. Tonda, ‘Ange tek sisi kupkamre’ tenen, “Amin,” pepne.

21Ukuda, ‘Nun Deiyo Ngebo Yesus, er kange dipu bicau teneseredi, melimsere kecada, Allah er nyapu yuma tep, weika di karenkamser’ tenen, sun yuma tep, Allah morosenune. Atep, “Amin,” pepne.

Telepe, ne Yohanesdi pepsene.

Acapu sekra deipsene. Akonuma.
Copyright information for XteSC