Revelation of John 3

Allahdi sun Sardis mutu teka tenerami nesala tep, pepu upu

1Nimi Mi Sisa Utopu Ngebodi upepneu. “Yohanes, kandi Sardis mutu teka tenenge nesala, sun melimna malaikat tep, aupu sekra dokoteprume. Dokotepkurum upuda, ake.”

“Allah er bungrurai urasin tara kunge sambala, yoneitam bari cap, tonda kuru yoneitam bari cap talepra kune ngebodi aupu pepsene. Sun Sardis mutu nesaladi kurumu keca yumada, nedi kael kemsenune. Yuk nesaladi sun tep, ‘Gume, anengda, sun telep kupra Allah upu gekepra dumsisipu dombanunge,’ pesenunge. Ukupra pesenung dinin, nedi tek sisi kael kemsenune. Sunda, tek sisi telep kupra ne upu tep men dombarume. Atep, ne kangeda, sunda konum deami nesala utopu kurume.”

2“Atep sun kange moupso! Yambula di ne upu gekepra domyakanerum ngeda, ‘Gum kupbaserur’ tenen, puto kemdinkamrume. Ne upu moupra talepmumdi, telep kupra domyakankamnerume. Gum dingeda, tali tep men pepsene. Ne pesene upu yuma tapbanemumya cap, sun kumum keca yuma cap, dipetepsisa cadi, ne kael kepsisi. Allahdi, ‘Ukupra kunkamenge,’ teneamseutopu telep kupra men kurume. Ton ngeda tapra, talipu kuruma tep pepsene. Allahdi, sun tep, ‘Sun Sardis mutu kunge nesalada malipu kununge,’ teneserure.”

3“Ange tep, yuk nengdi sun tep peteremamseipa, gekeramrum keca yumada, kange di ton cap teneprumdi, kange di ton cap tamupra tek sisi dumsisipu dombankamnerume. Sun mali kurumu keca taprumudi, amnyo karikra dumsisipu kunkamrume. Dinino, sun kange men moupmumnyopda, sun upula don neng dato-dato di, inipra yakaramengtopu, sun damai yankamsene. Sundi, ‘Ataru neitamai, atumi deiki yankamser’ tenen, moupra men kael kepmanemum taru dipu yana wenepkamsene.”

4“Dinino, sun Sardis mutu kurum nesala kan-kan di ton nengda, mali kun keca talepra kapul men kununge. Nimidi, ‘Nun opkal bental baprur’ tenen, moupra kuramengtopu, anesalada mali keca talepra men kungedi, mepronunge. Adumsisi kunge nesala dopropnedi, pio lek kurun opkal karepnepa, kenekmengedi, ne cap kikiman kunkamepe. Allahdi sun tep ‘Mali men kununga tep sunda telepe’ tenerura tep, ne cap kikiman kunkamepe pepsene. 5Atep mali kun keca yala-yala yuma, ‘Nun song’ tenen, bisbisa kamenge nesala tep nengeda, apepmasen nesala utopu, pio lek kurun opkal karepnepa, kenengkamenge. Gam Pio Kunkameng Nesala Si Sengna Buku neitamai, sun nimi si sekeipsi nengda, pio men kilipkamne.

Ato nesala sun si men kilipnedi, ne nai Allah er damai bena, “Anesalada, ne nyapu sisa kununge,” pepra, sun si katuai sipepkamne. Tonda, Allah er im deiki pel don neng, sun malaikat yuma peda, anesala si sipepnepa, anesala sun si gekenkamenge. 6Atep sun amul akapserepa, apepmasen upu tep, ‘Deiyo ake’ tenen, gekepmanto kurum nesala yumada, Allah er Lek Sambaladi sun teka tenerum nesala tep pesere upuda, moupra gekenkamrume.” Nimi Mi Sisa Utopu Ngebodi, ne Yohanes tep, upepneu.

Allahdi Filadelfia mutu teka tenerami nesala tep, pepu upu

7Nimi Mi Sisa Utopu Ngebodi upepneu. “Yohanes, kandi Filadelfia mutu teka tenenge nesala, sun melimna malaikat tep, aupu sekra dokoteprume. Dokotepkurum upuda ake.”

Mali kun keca tenpunge peda men kunedi, pio dumsisi ngebo kunune. Tonda, ne pesene upu yumada, pio tek sisi upu cadi, aupu tamna gum di, apesenetopu tek sisi mumupra kune ngebodi aupu pepsene. Ne dipapu penkamne upuda ake. Ada, “Anesalada, Allah er damai im deiki wengna telepe. Dinino, anengda, im deiki men wektenge,” pepra, tuai nesala wepra yuk-yuk bongdina deiyo ngeboda, ne kunune. Nedi buplan pakrapnyopda, yuk nesaladi abuplan kange di ton cap men dekdongoptenge. Ange utopu, nedi buplan dekdongopnyopda, yuk nesaladi men pakeiptenge. Buplan pangdina cap, buplan dengdongona cap tep, deiyo ngeboda ne pua.

8Sun Filadelfia mutu kurumu nesalada, sun kurum keca yuma konum kael keamsisi. Sun kange moupso. Nedi buplan konum pakeipmasen ngeda, yuk nesaladi men dekdongopsetenge. Ne kaele, sundi ne pel dona tep, sun puto yambulanunpu kapmaser dinino, sun puto metekanunpu kapserya peda, ne upu moupra talemumdi, domyakanerume. Sundi ne cap, ne si cap tep, ‘Nun song’ tenen, “Angeboda nun walwale,” pepra pio men tamnerume. Atep nengeda, nedi sun damai ila kange mun keca dopra sun kurpetena tep, men karenkamsene.

9Sun yuk nengdi, “Nunda, tek sisi Yahudi yala nesala, Allah er nyapu sisa kunupe,” pepra tali pertamenge dinin, tek sisada, anesalada Kain Jen Ngebodi talerepa, er sipu eremnunge. Anesalada, mok upu pen nesalapu kununga cadi, ne puto deiki peipnepa, amali nengdi, sun tupa teka tenenerum nesala yan damai gutam tu dipdongopra bungkamenge. Ukupmengopda, sun Filadelfia mutu teka tenerum nesala tep, “Gume, sun Filadelfia neng tep nengeda, tek sisi Allah ila di bicau tenepra makurure,” pepra katuai di pepkamenge.

10Nedi sun yuma tep, “Ikin keca kupserya peda, tamna gum di, pio pe deipra bouna di ne pel tupa donkamnerume,” peipsisitopu, tupa kuruma tep nengeda, nedi sun tep tek sisi lyepkamsene. Ada, tuai nesala ban-ban yuma tep, ila kange mun keca karepnepa, sun nong deiki yankamra deiki di, anesala yuma tep, ‘Yesus tapkameng do, tupa teka tenenkameng do?’ tenen, kurpetenkamne. Ukupkamne dinin, akurpeten keca kapul men yanmare taruda, nedi sun Filadelfia nesala tep, lyepra dopropkamsene. Akange mun kecada, sun damai men yarepa, nedi sun tep men kurpetenkamsene.

11Nedi menmena yankamna tep, sundi konum telep kupra kumum kecada, pio moupra talepmumdi, tamna gum di, pio dimpeprappu kunkamrume. Deiyoda, ‘Nun pel kunumna tep menenga keca karepkamsere ngeda, yuk nesaladi upula dopropsengepa, atelep keca gum kupserur’ tenen, pio kange moupra kunkamrume. 12Mali kun keca tep, ‘Nun song’ tenen, bisbisa kamenge nesala tep nengeda, pio telep kweipnepa, puto weik kungedi, dimpeprap pio teleppu kunkamenge. Ada, ne nai er si eremna ati, ila domi atida, er ayumna co pio dimpeprap tengamutopu, anesala sun kange dipru yuma puto keipnepa, pio dimpeprap, teleppu kunkamenge. Allah er kuryai im deikida, bengedi tapra men benkamenge. Er cap kikiman pio kunkamenge.

Sundi mali kun keca tep, bisbisa kamenge nesala tep nengeda, nedi ukupu si weneri si pepra, sun aso deiki sekeipkamsene. Tenpu ngeda, ne nai Allah er si sun aso deiki sekeipkamsene. Si butene ngeda, Allah er kunkamrai Yerusalem Baru si cap, tonda, weneri ngeda, ne ukupu si cap, anesala sun aso deiki sekeipkamsene. Allahdi ila ati arum er sida Yerusalem Baru keteneipseredi, im deiki di dokoteprepa, kwerepkamre.

13Atep, amul akapserepa, apepmasen upu tep, ‘Deiyo ake’ tenen, gekepmanto kurum nesalada, Allah er Lek Sambaladi, sun teka tenerum nesala yuma tep pesere upuda, moupra gekenkamrume. Nimi Mi Sisa Utopu Ngebodi, ne Yohanes tep, upepneu.

Allahdi Laodikia mutu teka tenerami nesala tep, pepu upu

14Nimi Mi Sisa Utopu Ngebodi upepneu. “Yohanes, kandi Laodikia mutu teka tenenge nesala, sun melimna malaikat tep, aupu sekra dokoteprume. Dokotepkurum upuda, ake.”

Aupu pepsene ngeboda, ne tenene keca yuma nong konum kupkamra tep, ‘Amin,’ pene ngebo kunune. Neda, tamna pio gum dipapu, Allah er upu tupa tek sisipu penune. Allahdi ketekeipra deiamu keca yumada, ne talenedi, ila deiyo ngebo kunune. 15Sun Laodikia mutu kurumu nesalada, sun kumum kecada, ne konum kael keamsisi. Sunda, uku bu jeredi, bupu weik kuramretopu kutumtoda, sundi ne tep weika di teka tenepra domyanetume. Dinin ange men kurume. Tonda, melum sangredi, bul weik kuramretopu kutumopda, sundi ne tep, “Nun songe,” pepra, tali lupra tapnetume Ne kangeda, ‘Telep ngeda bul utopu nesala kuptenge. Agum dingeda, bupu utopu nesala kuptenge,’ tenenune.

16Dinino, sunpuda, bupu gum, bul gum men kuruma cadi, tali kange doupra, ‘Tek do, telel do?’ tenen, tenimtonapu kuneruma tep nengeda, nimidi matang keca jepetepmengedi, adipapu dungtamamengtopu, nedi sun tep, ‘Anesalada ne song, sun tep ne dabale’ tenen, adipapu tapkamsene.

17Sun pedi sun pe tep upedarume. “Gume, nunda akeca-keca yala-yala yuma weika di bulupra konum deiamupka tep, nunda isomka nesala konum kunupe. Ware keca do yuma men putaserure,” pepra gemenapu kurume. Utenepra pedarum dinin, tek sisi sundi kumum kecada moupra men tenedarume. Allahdi sun tep er kangeda, ‘Gume, anesalada pio mali-malipu kununga cadi, yuk neng yumadi sun tep, uo, sunda bicaue,’ tenenkamenge. Sunda tali kankan kunge nesala cap, asuru pun nesala cap, kange douna gum di, tali nong dempu embange nesala cap utopu kurume. Allahdi sun tep, ‘Sun Laodikia nesalada, ne dabale,’ teneserure.

18Atep nengeda, nedi sun tep upepsene. Emas keca dopropnedi, ‘Mali keca yuma gum kupkur’ tenen, uku dongopnepa, mali keca yuma uku jeproprepa, pio telep kupre ngeda, sundi ne damai kunumyakankamrume. Akeca kunuprumnyopda, tek sisi isomka nesala utopu kunkamrume. Ne damai yana pio lek kurun opkal kunuprumnyopda, sun tali nong dempu embaramrumu nesalada, sun nong bol lelimna tep, lek kurun opkal kenekmumdi, telep kunkamrume. Tonda, ne damai yana asuru lingne obat, kweten keca kunupmum dingeda, sun asuru likdamumpa, telep kupseryopda, telep kupra dinkamrume. Ukutaruda, sundi malipu kurumu ngeda, moupra men didarume.

19“Nedi bicau tenepra melimnun nesalada, mali kupmengopda, wenepnedi lepsikra peteremnune. Atep, tali kange doupra, ‘Dakwapye’ tenen, mok upu tali pertamna gum dinin, tek sisi sun mali kurumu keca yuma tapra, amnyo karikromumnyopda, dumsisi bisipu bankamrume.

20Neda sun damaito konum yanmasene. Sun ati buplan dam teknedi, ‘Buplan pakeipkuneng do?’ tenen, gogo pesenune. Ware nesala do yuma, ne upu gekepnengedi, sun buplan pakeipnengopda, ne adipapu sun ati weknedi, sun cap, ne cap jen jepra kikiman kunkamepe.”

21“Mali kun keca yuma tep, ‘Nun song’ tenen, bisbisa kamenge nesala tep nengeda, ila nimi deiyo keca karepnepa, ne ila deiyo ngebo bungna keca deikida, ne cap, sun cap, kikiman bungkamepe. Angeda, nedi mali kun keca yuma tep bisbisa kapsidi, ne nai bo Allah, er deiyo ngebo kurura tep bungrurai deiki, er cap kikiman bungnume. Sundi mali kun keca yuma taprumudi, dumsisipu kupmumnyopda, ne nai cap kikiman bungnumtopu, sun cap, ne cap, kikiman bungkamtepe, pepsene.

22Amul akapserepa, apepmasen upu, ‘Deiyo ake’ tenen, gekepmanto kurum nesalada, Allah er Lek Sambaladi sun teka tenerum nesala yuma tep pesere upuda, moupra gekenkamrume. Aupu pepra deipsene.” Nimi Mi Sisa Utopu Ngebodi, ne Yohanes tep, upepneu. Angebodi peipneutopu, ne Yohanesdi sekra pepsene.