Rev 4 | XteSC | STEP | Aupu-aupu yuma peipneupa, gekepsi dingeda, alau tara dipetepsipa, ne urasin tara dinin, im neitamaida, tenpu buplan paktapmaunge neitamai di, im deiki katuai kupmaupa, epsi. Ukupupa, adipapu arup gekenmasipa, upu penmau ngebo, ila bung-bung pena terompet utopu upu pepmau ngebo dipu, aupu ton peipneu. “Kanda ne damai weleryayo. Welepmem pangeda, amenda kupkamre keca yuma benbenepkenepa, dinkureme,” peipneu.

Revelation of John 4

Im deiki wisi deiyo neng 24 neng cap, im deiki gam kunge keca dumbari cap tep, pepu upu

1 Aupu-aupu yuma peipneupa, gekepsi dingeda, alau tara dipetepsipa, ne urasin tara dinin, im neitamaida, tenpu buplan paktapmaunge neitamai di, im deiki katuai kupmaupa, epsi. Ukupupa, adipapu arup gekenmasipa, upu penmau ngebo, ila bung-bung pena terompet utopu upu pepmau ngebo dipu, aupu ton peipneu. “Kanda ne damai weleryayo. Welepmem pangeda, amenda kupkamre keca yuma benbenepkenepa, dinkureme,” peipneu.

2 Upeipneupa, adipapu Allah er Lek Sambaladi ne kange dipru cap, ne nong cap talepneua deiki di, akeca yuma epsi. Im deiki dinin, ne urasin tarada, ila deiyo ngebo bungna keca er sida tahkta kwamupa, adeiki di tenpu ila ngebo bukmaupa, epsi. 3 Abungna keca er sida tahkta deiki bukmau ngebo, er urasin cap, er nong capda, kunumna weik gel, bi cap, mirin cap turuku gel er sida yaspis cap, tonda sardis gel cap utopu kupmaupa, epsi. Er bukmauai dana-dana tara yumada, ambuka utopu keca deipmauai er urasinda, co bo embek ekayongoramretopu kupudi, sukup-sukup pepupa, epsi.

4 Apio mambul ngebo bukmauai, dana-dana tara yumada, im deiki nimi deiyo neng bungna keca ton, denge weike 24 kupupa, epsi. Abungna keca deikida, sun dipru wisiamupa, Allah men tapmanto neng, ila deiyo neng, 24 neng bukmaipa, epsi. Adeiyo neng yumada, pio telep kurun opkal kenekmaipa, sun giso deikida kunumna weik keca er sida emas di petupra deiami keca, er sida mahkota, galupdongomipa, epsi.

5 Abungna keca neitamaida, akeca-keca yuma talepra ila deiyo ngebo bungamngai di, dirine weik cap, perenglang pena cap, kulman cap, weik kunmaupa epsi. Er bukmauai urasin tarada, weica derin keca yoneitam bari ketenepra deipmaiya deiki di, weica yoneitam deiki di, uku bu jenmaudi, dirine weik kupmaupa epsi. Ayoneitam bari weica epsada, sun nongda, Allah er pel melimna im deiki sambala yoneitam bari kununge.

6 Tonda, ila mambul ngebo bukmauai urasin tarada, ila pala weik mokon ton bukamu. Ada laut mokon urasin utopu buku. Dinino, amokon urasinda, buya gum, pio yo me kupmaupa, epsi.

Akeca-keca yuma neitamaida, ila mambul ngebo bukmauai dana-dana tarada, gam kun keca dumbari tekmaupa, epsi. Agam kun keca sun urasinda pio yuke. Sun nong yumada, urasin tara pe, bali tara peda, asuru pio weik dana-dana kwamupa epsi. 7 Agam kure keca menmenange tenpuda, er nongda ila yu pus, er sida singa pus utopu kupu. Butene ngeda, sapi bisam nong utopu kupu. Weneri ngeda, er urasinda nimi urasin utopu kupu. Dumbari ngeda, er nong seng-seng pena ma lakra embaramretopu kupu.

8 Agam kunge keca dumbari yuma, sun yuk-yuk dinin, sun poleda ngantan bari kupu. Sun nong bol deikida, asuru pio weik kupu. Sun pol amutara peda asuru weik kupu. Sun nong cap, urasin cap, apepmasentopu kupmaupa epsi. Lukunda pe, keteng komuni peda, tamna pio gum di, tupa-tupa aupu pio penunge.
“Menop taru kuramnganen, ukutaru tupa kuredi, amenda sirya taru yankamre ngeboda, akeca-keca yuma bisbisa kapra, akeca yuma deiki tara kuredi, puto weik ila eremna ngebo kurure.
Erda nun Ila Deiyo Ngebo kurure. Erda mali kun keca tenpu peda men kurura tep, pio lengnapu kurure, pio lengnapu kurure, pio lengnapu kurure,” penunge.

9 Dan taru do yuma, sun agam kunge keca dumbari di, aila mambul ngebo bungna keca deiki bungre ngebo Allah tep, “Uo, kanda pio teleppu kurume. Telepe pepkepe,” pepra, er tep gispal domengedi, er si ereipmengopda, sun dipru wisiamupa, Allah men tapmanto deiyo neng 24 nengdi ukununge. 10 Sun yumadi Allah er urasin tara dinin, er gispal dona tep, tu deiki gutam tu dipdongopmengedi, er si ila di eremnunge. Amambul bungna keca deiki bungre ngebo Allahda, pio gampu kunkamre. Er pio men gum kupkamre. Sun 24 deiyo nengdi, sun giso deiki koupdongomi emas keca kwiripra er bungna damai tu deiki deipmengedi, aupu penunge.
11 “Uo, nun nai Allah, kanda nun Ila Deiyo Ngebo kuserume. Akeca-keca yumada, kandi, ‘Ukupra, ukupra ketekepra deipkamne,’ teneamumtopu, adipapu ketekepra deamumpa, akeca yuma tupa akurure.
Ange tep nengeda, kan tenpuda pio teleppu kurume. Telepe pena upu cap, si eremna upu cap, gispal dona keca cap, puto kemdina upu cap, ayumada, kan deikipu derinupe. Kan dipu akeca yuma talepra pio kunkamrume.”

Sun 24 wisi deiyo nengdi Allah tep tupa-tupa penunge. Ne Yohanesdi pepsene.