Rev 5 | XteSC | STEP | Akeca yuma epsi dingeda, apepkusen keca ton epsi. Allah er ila bungna keca deiki bukmaudi, er dumsisi buru deiki ila mambul buku doupmaupa, epsi. Abuku dana-dana tara yumada, sengna kecapu kupupa epsi. Tonda, abuku gum-gum bisi deikida, ‘Abuku tali nengdi lupra epnung’ tenen, urasinda co pe utopu dinin, buku gum-gum deiki palepdongomu keca kupupa, epsi.

Revelation of John 5

Yohanesdi mambul buku cap, Domba Mi cap epunge tep, lap pepu upu

1 Akeca yuma epsi dingeda, apepkusen keca ton epsi. Allah er ila bungna keca deiki bukmaudi, er dumsisi buru deiki ila mambul buku doupmaupa, epsi. Abuku dana-dana tara yumada, sengna kecapu kupupa epsi. Tonda, abuku gum-gum bisi deikida, ‘Abuku tali nengdi lupra epnung’ tenen, urasinda co pe utopu dinin, buku gum-gum deiki palepdongomu keca kupupa, epsi. 2 Adinenda, ila puto weik malaikat tenpu yaupa, epsi. Amalaikat ila upu deiki di upepu. “Amambul buku paledongona tep co pe palepra deiamu kecada, ware ngebo pio telep dumsisipu kurya deiki di akeca dakraptudi, abuku tepra deipsetu do?” penmau. 3 Malaikatdi upenmaupane, im deiki kunmai nesala yuma cap, tuai mutu kunmai nesala yuma cap, tuai mutu iriamu tara kunmai neng yuma cap tep, ‘Amambul buku co pe palepra deiamu keca daktudi tepra deipsetu do?’ tenen, dipetepi dinin, pio dumsisi kure ngebo tenpu peda men kupka cadi, abuku dirterena cap, tepra derina cap tep kupmanto ngebo men kwamupa, men epi.

4 Weikanun mesumpu acapu kupmapkanen, abuku tepra deipmanto ngebo men epya tep, ne Yohanesdi weika di engenmasi. Deiyoda, pio dumsisi kure ngebo tenpu peda men kupka cadi, amambul buku tepra deipmanto ngebo ton men epya tep pio engenmasi. 5 Engenapu kunmasipane, sun 24 wisi deiyo neng kan-kan di, tenpu ngebodi ne tep upepneu. “Engena yaprume. Moupra dinkurume. Tenpu Yehuda yala ngeboda, ila puto weik kuredi, akeca yuma talerura tep, er sida, ‘Yehuda yala ngebo puto weik singa pus utopu ngebo kurure,’ pepra si sipenunge. Angeboda, Yahudi yala nesala, sun apke ila mambul ngebo, Raja Dauddi deipupa, dadeipdanen yakaramyanen, deipi ngebo akurure. Er tenpupuda, pio dumsisi kurya deiki di, abuku paledongon co pe yoneitam bari daktapra, abuku tepra deipsetue,” upepra pepneu.

6 Upepneupa dipetepsidi, ayanmau ngebo epsi. Angeboda er nong urasinda, Domba Mi ^{▼▼Domba Mi utopu pepkada, Yesus tep pepu. Pumun taruda Allahdi Israel nesala, sun mali kun keca kaukemna tep, “Pio telep domba mi popra karenkamnerume,” peramupa, domba mi kareramipane, Allahdi sun mali kun keca tep kaukemamu. Atep nengeda, Yesusdi nesala ban-ban yuma tep depseuada, erda nun Domba Mi Utopu Ngebo kuramseu. Er depka deiki di, Allahdi nun mali kun keca yuma gum kupra deipseudi, er nyapu keipseue. Atep, Yesusda, nun Domba Mi Utopu Ngebo kuserure. Tonda, Wahyu 7:14 cap, Yohanes 1:29 cap dirume.} utopu kupmau. Domba Mi utopu kupmau dinin, konum poptaminge utopu kupu. Erda, aila mambul bungna keca deiki tara tekmaupa, sun dumbari gam kunmai keca cap, sun 24 wisi deiyo neng cap yuma bulupmaiya neitamai tekmaupa, sundi dana-dana tara yuma tekra ongomgenem pepra, tekmaipa epsi. Domba Mi utopu ngebo domba bisam utopu, abolyakot er giso deiki tekamupa, epsi. Er asuruda, yoneitam bari kupu. Ayoneitam bari asuru sun, ‘Nong neitamai deiyo tenepra kael kepkameng’ tenen, kwamu ngeda ake. Ada, Allah erdi dokotemupa, yoneitam bari sambaladi tuai mutu ban-ban yuma melipra embanunge tep, kwamupa epsi.

7 Domba Mi utopu ngebo yanmaudi, ila bungna keca deiki bukmau ngebo Allah, er dumsisi buru di dopmau buku, dopropu. 8 Domba Mi utopu ngebodi abuku dopra doupu pangeda, sun dumbari gam kunmai keca cap, sun 24 wisi deiyo neng cap, ‘Gisal dopkup’ tenen, Domba Mi utopu ngebo, er urasin tara gutam tu dipdongopra bukmai. Sun 24 wisi deiyo neng yumadi yuk-yuk doupmai kecada, ake. Tenpu ngeda, bung-bung pena gitar utopu keca, er sida kecapi cap, bon karu mau urasin utopu dinin, emas di ketekeipinge ton doupmai. Amau pumbonda, nintong telep keca dongopra uku sekmaiya di ket welenmau. Aket welenmaua, ‘Nong neitamai deiyo tenepra kael kepkameng’ tenen, kwamu ngeda ake. Ada Allahdi weamupa, er tep teka tenenge nesaladi, Allah tep moronung upu di Allah er damai weleramrenge tep kwamupa, epsi.

9 Sun 24 wisi deiyo nengdi, Domba Mi Utopu Ngebo er si eremna tep, ukupu mut penmaipa, gekepsi. Sundi mut penmai upuda, ake.

Kanda pio dumsisipu kumemya deiki di, kan tenpu dipu amambul buku dopra, er paledongona co pe utopu keca dakra, buku tepra deipsetume. Deiyoda, sun popkeipa, kan yapi embeua deiki di, nimi yala-yala kan-kan yumadi, ‘Allah er mawa nesala kunkameng’ tenen, nimi weika di kunupmume. Konum kunupra lyepmum nesalada, mutu ban-ban yuma cap, nimi yala-yala yuma cap, upu yala-yala yuma cap, negara-negara yuma cap neitamai di, nesala weik kunupra lyepmuma tep, kan dipu abuku tepra deipsetume.

10 Kandi kunupra lyepmum nesala yumada, “Nun nai Allah er amutara bukra, er tep pel donga deiki di, yuk nesala ban-ban yuma, ‘Allah er upu gekenkameng’ tenen, telep kupra deipmume. Telep kweipmumpa, Allahdi, ‘Sunda ne mawa nesala’ tenen, anesala yuma talerure. Taleredi, sun dopra, ‘Ila nimi deiyo neng kunkameng’ tenen, nimi deiyo kuna tep deiyo keca karepmumpa, tuai mutu ban-ban yuma talepra kunkamenge,” pepra mut penmaipa, gekepsi.

11 Ayuma gekepsi dingeda, adipapu yuk upu ton gekepsi. Gekepsidi, dipetepsipa, malaikat-malaikat ila gung denge weik, men nukmanto pio weike beribu-ribu kunmai. Sun dengeda, 10 ribu kali 10 ribu, 100.000 utopu pio weike kunmai. Ila nimi deiyo ngebo bungna keca dana-dana yuma ongomgenem pepra tekmai. Sun tekmaiya neitamaida, sun dumbari gam kunge keca cap, sun 24 wisi deiyo neng cap, tekmaipa, sun malaikat yuma mut deiki di aupu penmai.

12 Ila upu deiki di penmai mutda, ake. “Domba Mi Utopunge popi ngeboda, pio teleppu kurura cadi, akeca-keca yuma dopredi talenkamrada, pio telepe pua. Ware nesala do, ware gam kun keca do yumadi, er tenpu tep gispal dopra, er si ila di eremkamenge. Sun yumadi er tep, ‘Kan tenpupuda ila puto weik keca yuma cap, ila kael kemna deiyo keca yuma cap, isomka keca kunumna weik keca yuma cap, kan deikipu kunkamkere. Kanda, si eremna keca yumada, kan deikipu kunkamkere.’ Kanda pio telepe,” pepra, er si eremaipa, gekepsi.

13 Amut gekepsi dingeda, adipapu tenpu mut ton penmaipa, gekepsi. Ada gam kure keca yala-yala yuma, im deiki kurenge cap, tuai mutu kurenge cap, laut mokon deikinge cap, laut mokon pumbon kurenge cap, tuai mutu amutara kurenge cap, tenpu peda tamna gum, sun yumadi amut penmaipa, gekepsi. Amut penmai upuda, ake.
“Ila nimi deiyo ngebo bungna keca deiki bungre ngebo Allah cap, Domba Mi Utopu Ngebo cap tep, nun gam kupe keca yumadi, sun butene tep, ‘Sunda pio telepe,’ pepra, gispal dopra sun si pio eremkamepe.
Si eremna keca yuma cap, ila puto weik kure keca yuma capda, sun deikipu pio kunkamre. Ange yumada, ukutaru di dipra, doryankamre taru neitamai yumada, sun deikipu apio kunkamre,” pepra mut penmaipa gekepsi.

14 Sundi amut penmai pangeda, sun dumbari gam kunge keca di, “Nundi, ‘Angeda tek kunkamre’ tenen, ‘Amin,’ pepmepe,” pepipa, sun 24 wisi ila deiyo nengdi gutam tu dipdongopra bukmaidi, Allah cap, Domba Mi Utopu Ngebo cap tep, gispal dopra sun si eremaipa, gekepra epsi.