Rev 6 | XteSC | STEP | Domba Mi Utopu Ngebodi, Allah buru deiki doupmau buku dopra, abuku denepdongomu co pe utopu keca, yoneitam bari akwamu dinin, tenpunge daktapupa, epsi kecada pepkune. Menmena co pe utopu keca daku pangeda, sun dumbari gam kunge keca tenpu ngedi, ila upu deiki di, “Yarume,” pepu. Er upu pepkada, kulman ila di lelim peramretopu kupupa, gekepsi.

Revelation of John 6

Domba Mi Utopu Ngebodi abuku co pe utopu palepdongomunge dakra, buku tepra deipka tep, pepu upu

1 Domba Mi Utopu Ngebodi, Allah buru deiki doupmau buku dopra, abuku denepdongomu co pe utopu keca, yoneitam bari akwamu dinin, tenpunge daktapupa, epsi kecada pepkune. Menmena co pe utopu keca daku pangeda, sun dumbari gam kunge keca tenpu ngedi, ila upu deiki di, “Yarume,” pepu. Er upu pepkada, kulman ila di lelim peramretopu kupupa, gekepsi. 2 “Yarume,” pepupa, ameneng damai dinmasipa, kuda ^{▼▼Kuda, ada sapi bisam nong yambul utopu kurur keca dinin, er yanda lyom weike. Tonda, sapi bisam giso deiki takke weik kuramre keca, er sida abolyakot tengamra utopu kecada, kuda bisam er giso deiki men kurure. Sapi bisam bali deikida, nimi bukra men banunge. Dinino, kuda bisam puda, er bali deiki nimi bukmengepa embarure. Gambar dina tep, Yakobus 3:3 dirume.} bisam kurun nge yaupa, epsi. Akurun kuda bali deiki bukmau ngeboda, jen talepmaue. Allahdi ila nimi deiyo neng, sun giso deiki galurameng keca, er sida mahkota karepupa, er giso deiki galupdongopudi, akurun kuda deiki bukra sepra beu. Er sepra beuada, sun jen talena deiyo nengdi, ‘Mali nesala poptapmepedi, bisbisa kapkup’ tenen, balila deipra barameng utopu kupra, kuda deiki bukra sepdaro beu.

3 Domba Mi Utopu Ngebodi, abuku co pe utopunge butenenge daktapupa, sun dumbari gam kunge keca butene ngedi, “Yarume,” pepupa, epsi keca pepkune. 4 Aupu pepupa, tenpu ngebo ton cap, kuda bisam bali deiki bukra yau. Er kuda urasinda, yapi bi utopu dinin, uku bu bi laramretopu kupu. Allahdi angebo tep, ila parang ya karepu. Tonda, nimi ban-ban yuma pangdana cap, podana cap gum di, ‘Kange deipra telep kupra kikiman kuna deiyo keca dalupra dopropkamre’ tenen, deiyo keca karepu. Adeiyo keca karepu deiyoda, ‘Nimi ban-ban yumadi yu kuprepa, podanapu kunkameng’ tenen, yu kudina deiyo keca karepupa, abi kuda deiki bukmau ngebodi, akeca dopra beu. Beupa ange ton epsi.

5 Domba Mi Utopu Ngebodi, abuku co pe utopunge, weneringe daktapupa, sun dumbari gam kunge keca weneri ngebodi, “Yarume,” pepupa, epsi kecada pepkune. Aupu pepupa, kuda bisam tenpu ton, mirin nge yau. Mirin kuda deiki bukmau ngebo, er buru deiki doupmau kecada, ‘Ikin do, kanam do?’ tenena tep erempeten keca, er sida timbangan doupmaupa, epsi. 6 Atarupuda, sun dumbari gam kunge keca neitamai di, nimi upu perameng utopu upu deiki di penmaipa, aupu gekepsi.

“Ukutaruda, tenpu tumi yuma deiki di, ikin pel donmangepane, kunumna keca karenkamenge deiki di, jen keca meteka dipu kunumkamenge. Ada, tenpu tumi yuma ikin pel dopmenga di dopropkameng kunumna keca deiki di, roti dana deiyo keca, bute utopunge, er sida terigu, tenpu literpu kunupkamenge. Agum dingeda, yambul telepnge jagung utopu ngeda, 3 literpu kunupkamenge. Dinino, ara co du taikmengepa, bisam kop utopu me gweramenge cap, anggur me jeramenge capda, dakwapye. Kandi akeca butene tep mali kudina gum, ara co palpal cap, uda anggur tapu wa capda teleppu kunkamre,” pepupa, gekepsi.

7 Uda, Domba Mi Utopu Ngebodi abuku co pe utopunge dumbaringe daktapupa, sun dumbari gam kure keca, dumbari ngebodi, “Yarume,” pepupa, gekepsi. Ataru epsi kecada pepkune. 8 Dipetepsipa, tenpu kuda bisam ton cap yanmaupa, er urasinda, bol ekramu kuda bisam kunmaupa, epsi. Akuda deiki bukmau ngebo, er sida Nimi Dena Deiyo Ngebo kupu. Er men epra banmaupa, er amnyo meneng damai yakanmau ngeda, konum demami nesala kunungai talepra, kurya deiyo ngebo yakanmau.

Ayakanmarei neng buteneda, Allahdi, nimi dena deiyo keca karepupa, doproprei. Ada tuai mutu ban-ban yuma kunge nesala neitamai dinin, ayuma dopra gung dumbari wilipra deiprengedi, gung weneri tapra, ‘Tuai nesala tenpu ila gungda poptapkamreng’ tenen, dena deiyo keca karepupa, doproprei.

Dena deiyo keca dopropreidi, sun puto deiki pel doprengopda, nimi weika di depkamengada, ake. Ton tara nengdi, ton tara neng tep, ya cap, jen capdi pio podankamenga deiki di, nimi weik denkamenge. Tonda, jen keca yala-yala yuma gum kupbarepane, jen putaprepa, jen jena gum deiki di, nimi weik denkamenge. Tonda, ila kange mun pu weika di jeramrepane, nesala weik ton cap sangdare pangeda, nimi weika di denkamenge. Ton ngeda, nimi men kunungai bura mutu neitamai gam kure keca yumadi, yu weik kuprepa, nesala weik poryakankamenge. ^{▼▼Gam kure kecada, yu bisam do, yu kam do, bal do, sanip do, ila yu pus do, ayu weik kure keca yumadi, tuai nesala weika di ponkamenge.}

9 Domba Mi Utopu Ngebodi, mambul buku paledongona co pe utopunge pamunge daktapupa, epsi kecada pepkune. Allah er gispal dona tep, gam keca popra, ameja deiki deriramenga urasin utopu keca epsi. Ameja amutarada, nimi sambala weik akunmaipa epsi. Anesalada, pumun taru Allah upu dopra peterep embaramipane, yu nengdi, ‘Nun song’ tenen, ikin keca weik, sun nong deiki derirami dinin, tamna pio gum di, teka tenenapu kuramidi, katuaipu peteremamipa, mali nengdi anesala portamami. Portamami nesala, sun sambala ameja amutara bukmaidi, aupu ila di penmai.

10 “Uo, nun Deiyo Ngebo, akeca-keca yuma talepra deiki tara kumemdi, kandi tenerumtopu apu kurume. Mali keca tenpu peda men kukerure. Kanda pio tek upupu pememdi, dumsisipu kurume. Menop taru tuai mutu mali kurami nesaladi portamamseiya tep nengeda, dan taru di aneng tep kwang dakamserum do? Sundi pomseiya tep, dan taru di upu lepsisikra bokeipmemdi, amali neng tep wenepra poptapkamrum do?” pepra, mali penmaipa, gekepsi.

11 Aupu penmaipa, sun yuma tep, pio telep kurun opkal yuk-yuk bokra karepupa, dopra keneki. Kenekipa, aupu ton tamupra sun tep pepu. “Gume, dakuramrumupane, ataru neitamai sun tuai mali nengdi, weika di ton cap, sun kayapu ton tapakra ponkamenge. Ada pumun taru sun mali nengdi sun tep portamamseitopu, amenda taru peda teka tenengedi, Allah er pelpu donge nesala ton cap portamamengepane, nedi, ‘Ukupra nesala poptapkamenge,’ teneamsitopu konum poptapmengopda, amali neng tep upu lepsisikra bokeipnedi, wenepra poptapkamne,” Domba Mi Utopu Ngebodi peipupa, gekepsi.

12 Upepudi, Domba Mi Utopu Ngebodi abuku paledongona co pe utopu keca ngantan baringe daktapupa, epsi kecada pepkune. Buku paledongona co pe daktapu pangeda, adipapu ila mutu longna kupu. Mutu-mutu yuma puto weika di lokupa, ketengda pio miripudi, kunuku. Miripkada, pio mirin kambing potong utopu kupu. Warda, yapi bi utopu bi kupu. 13 War yapi bi utopu bi kupupa, im deiki neitamai tengamre kuru weika di tuai mutu saku. Ada ila mungna mukredi, konum kouluamre co bo sangamretopu, kuru weika di tuai mutu sakupa, epsi. 14 Im neitamai yumada, ason getedoramengtopu kupupa, mutu buma yuma cap, laut mokon di sangdongoramre mutu buma cap, er sida pulau, ayuma cap, ila di longmau.

15 Ange yuma ukupu pangeda, tuai mutu ila nimi deiyo neng, raja-raja neng yuma cap, sun amutara deiyo talepra kunge neng cap, jen talen neng sun deiki tara deiyo neng cap, isomka nesala yuma cap, ila puto neng yuma cap, kunumna keca dorona gum di tali pel melimna nesala cap, tali dakunge nesala yala-yala yuma cap, uda, tuai mutu nesala yuma kware pio weik kupupa, giso talenga beu.

Kware weik kupupa, bura mutu sepra beidi, ‘Ikin keca di popserur’ tenen, gel imir pumbon cap, ila gel deiyo cap, inimbei. 16 Inimbeidi, pio kware weik kupupa, upenmai. “Uo, nun mambul weik kupsere. ‘Sun mutu gon cap, ila gel yuma cap, nun nong deiki saka singidongopsemumdi, popsetum’ tenen, moropsepe.

Ada tali tep gume. Deiyoda, Ila Nimi Deiyo Ngebo bungna keca deiki bungrur ngebo Allahdi epseredi wenepserur tenena tep, nun menmena singipsetume,” pepra moropsepe. Tonda, ‘Domba Mi Utopu Ngebo yu weik kuprepa, weika di wenepra ponkamsere,’ tenena tep nengeda, “Saka popserumdi, nun menmena singipsetume,” pepra moropsepe. 17 “Tali men penmape. Yu pio weik kuprepa, sun butene di nun tuai mali kunup nesala yuma tep, weika di wenepra popkusereng tumi, ila kange mun tumi konum damai yanmasera tep, ikin pio weik kupmaserepa, weika di dounkamepa tep, mutu gon cap, gel cap sakmumdi, singipra popsetume,” pepra mali penmaidi, engenmaipa, gekepsi.