Rev 7 | XteSC | STEP | Ange yuma epsi dingeda, amenda epsi keca ton pepkusene. Ada malaikat dumbari di, tuai mutu kwererbei. Ton malaikatda, mutu sirik im sirik dinin, keteng yakan tara tengbeu. Ton ngeboda keteng wengbare tara tengbeu. Ton ngebo utara, ton ngebo itara dinin, mutu sirik im sirik tengberei. Sun dumbari malaikatdi, dana-dana tara yumadi yakare kumanya tep, talepra kalengbei. Ada, kumanya di tuai mutu deiki cap, co palpal neitamai cap, laut mokon tara yuma cap, ‘Men putue’ tenen, kumanya kalengbei.

Revelation of John 7

Allahdi, ‘Israel nesala ne mawa kunkameng’ tenen, denge weik 144.000 nesala sun nong deiki peten kemdina keca deipu upu

1 Ange yuma epsi dingeda, amenda epsi keca ton pepkusene. Ada malaikat dumbari di, tuai mutu kwererbei. Ton malaikatda, mutu sirik im sirik dinin, keteng yakan tara tengbeu. Ton ngeboda keteng wengbare tara tengbeu. Ton ngebo utara, ton ngebo itara dinin, mutu sirik im sirik tengberei. Sun dumbari malaikatdi, dana-dana tara yumadi yakare kumanya tep, talepra kalengbei. Ada, kumanya di tuai mutu deiki cap, co palpal neitamai cap, laut mokon tara yuma cap, ‘Men putue’ tenen, kumanya kalengbei.

2 Tenpu malaikat ton keteng yakan tara di yanmaupa, epsi. Amalaikatdi, peten kemdin keca dopra yanmau. Erdi doupmau kecada, Allahdi, ‘Anesala ne mawa nesala kunkameng’ tenen, peten kepra derin keca doupmau. Amalaikatdi, Allah er nyapu peten kemdina deiyo keca doupmaudi, sun yuk malaikat dana-dana tara tekmai malaikat tep, ila upu deiki di aupu pepu. “Tuai mutu yuma cap, laut mokon yuma cap, mali kemdina deiyo puto konum karepseu dinin, kapula.”

3 “Ukutaruda, tuai mutu yuma cap, co palpal yuma cap, laut mokon yuma cap tep, kapul mali men kweipkurume. Nun nai Allah, er amutara bukra er teppu kange deipra, er pelpu donge nesala yuma tep nengeda, peten kemdina keca, sun aso deiki palepra deipkupe. Sun tep, konum peten keipmepyopda, amendada, nundi peten kemdin keca, men paleipmepe ngeda, sun mali kudina pel donkamrume,” pepu.

4 Upepupa, ‘Anesala Allah er mawa nesala’ tenen, sun aso deiki palepra deipu nesala, sun gung sida gekepsi. Ada, Israel nesala yala-yala yuma neitamai di bokra, nesala ila denge weik 144.000 nesala peten kemna keca palepra deipu. Anesalada Israel nesala dinin, sun yala si cap, sun nomor denge cap, yuk-yuk pepkune, ake.

5 Yehuda yala nesala neitamai di, denge weik 12.000 neng wepra, sun aso deiki peten kemdina keca palepra deipu. Ruben yala nesala neitamai di, denge weik 12.000 neng wepra, sun aso deiki peten kemdina keca deipu. Gad yala nesala neitamai di, denge weik 12.000 neng wepra, sun aso deiki peten kemdina keca deipu.

6 Asyer yala nesala neitamai di, denge weik 12.000 neng wepra, sun aso deiki peten kemdina keca deipu. Naftali yala nesala neitamai di, denge weik 12.000 neng wepra, sun aso deiki peten kemdina keca deipu. Manase yala nesala neitamai di, denge weik 12.000 neng wepra, sun aso deiki peten kemdina keca deipu.

7 Simeon yala nesala neitamai di, denge weik 12.000 neng wepra, sun aso deiki peten kemdina keca deipu. Lewi yala nesala neitamai di, denge weik 12.000 neng wepra, sun aso deiki peten kemdina keca deipu. Isakar yala nesala neitamai di, denge weik 12.000 neng wepra, sun aso deiki peten kemdina keca deipu.

8 Zebulon yala nesala neitamai di, denge weik 12.000 neng wepra, sun aso deiki peten kemdina keca deipu. Yusup yala nesala neitamai di, denge weik 12.000 neng wepra, sun aso deiki peten kemdina keca deipu. Benyamin yala nesala neitamai di, denge weik 12.000 neng wepra, sun aso deiki peten kemdina keca deipu.

9 Ange yuma konum kupupa, epsi dingeda amenda epsi keca ton pepkune. Ada, nesala pio ila denge weik, nimidi men nukmanto nesala bulupmaipa, epsi. Anesalada, tuai mutu ban-ban yuma neitamai di, adi ton, adi ton dopra bulupra wengmaipa epsi. Ada nimi yala-yala yuma cap, nimi upu yala-yala yuma cap, negara-negara yuma cap, neitamai di bokra wepra deipmaipa, bulupra kunmai. Sun yumada, Ila Nimi Deiyo Ngebo bungna keca deiki bukmau ngebo cap, Domba Mi Utopu Ngebo cap, sun urasin tara tekmai. Pio kurun opkal kenekra tekmaidi, ‘Nun nai bo gispal dopkup’ tenen, sun buru di kelapa bo doupmaidi, gwentonmaidi, gispal donmaipa, epsi.

10 Ukunmaidi, ila upu deiki di upenmai.
“Ila Nimi Deiyo Ngebo bungna keca deiki bungrur ngebo, nun nai bo Allah cap, Domba Mi Utopu Ngebo cap, sun buteneda Nimi Lyemna Deiyo neng kurerunge. Sun dipu lyemsererunge.”

11 Aupu penmai taruda, sun malaikat yumada sirikai ongomgenem pepra tekmaipa, aneitamaida sun 24 wisi deiyo neng cap, sun dumbari gam kunge keca cap tekmaipa, aneitamaida Allah er ila bungna keca deiki bungmaupa epsi. Epsi taruda sun yumadi, ‘Nun nai bo Allah gispal dopra, er si ereipkup’ tenen, er bungna keca urasin tara gutam tu dipdongopra bukmaidi, aupu penmai. 12 Sun penmai upuda ake.

“Nun penkup keca yuma, ‘Tek sisi nong kupkamre’ tenen, “Amin,” pepmepe. Nun nai bo Allah tep nengeda, si eremna keca yuma cap, ila puto weik kure keca yuma cap, ila kael kemna deiyo keca yuma cap, telepe pena upu yuma cap, ayumada, kan deikipu pio kunkamkere. Kanda pio telepe, kan sipu pio ereipkepe. Apenmap keca yumada, ukutaru di dipra, doryankamre taru neitamai yumada, ‘Apio kunkamker’ tenen, “Amin,” pepmepe.” Upepra er si eremaipa, gekepsi.

13 Adinenda, sun 24 wisi ila deiyo neng kan-kan tenpu ngebodi ne Yohanes tep asipetepneue. “Sun kurun opkal kenekra akunmang nesalada, ‘Aneng ake, sun mutu ake’ tenen, moupra kael kepmarem do, gum do?” pepra asipetepneu. 14 Asipetepneupa, nedi, “Ne walwal dinin, kan kaele,” pepsi. Upepsipa, angebodi aupu pepra lape pepneu. “Gume, anesalada tali neng gume. Sirya taru neitamaida, mali nengdi, Allah er nyapu yuma tep, ‘Nun song’ tenen, ikin keca pio weika di, sun nong deiki deriramipa, kange mun kange weik douami dinin, Allah pio men tamami. Dim peprapu teka tenerami.

Domba Mi Utopu Ngebo popipa, er yapi embeua deiki di, sun mali kun keca yuma gum kupra deipudi, pio dumsisipu keipu. Ukupseua tep nengeda, sun yumadi pio lek kurun opkal kenekmange,” pepneu. 15 Ange tep nengeda, anesala tep aupu ton lape pepneu.
“Dumsisipu konum keipu nesalada, Allah er damai neitamai tupa-tupa kununge. Er bungya damai kungedi, keteng komuni pe, lukunda peda, er amutara bukra er pelpu donunge. Allahdi sun tep, pio kalekra melimkamre.
16 Allahdi anesala tep, pio melimamrepane, ataru di dipra amenda doryankamre taru yumada, jen cap, me cap, pio men putankamre. Keteng bupu di, sun nong deiki pio men teng-teng penkamre. Ange utopu, yuk ila bupu keca yumadi, sun tep bupu kurepa, pu men jenkamre.
17 Angeda tali tep gume. Deiyoda, Ila Nimi Deiyo Ngebo bungna keca neitamai kure ngebo, Domba Mi Utopu Ngebodi, sun deiyo ngebo pio kunkamre.
Ada, domba pein nengdi, sun domba bicau tenepra pio telep kupra peiramengtopu, erdi sun tep bouna di melipra kunkamre. Erdi menmena menepra barepa, sun amenda er amnyo tara dombangepa, Gam Kuna deiyo me bungna damai dubankamsere.
Anesala sun mambul kange doupra, asi me sangamre ngeda, Allahdi aneng tep engena deiyo keca gum kupra deipkamsere.
Gum kupra deipredi, asi me kalaipkamre nesalada, kange di ton cap pio men engenkamenge.” Angebodi upepra lap pepneu. Ne Yohanesdi pepsene.