Rev 8 | XteSC | STEP | Aupu yuma lap pepneupa, gekepsi pangeda, Domba Mi Utopu Ngebodi abuku paledongona tep, co pe utopu keca yoneitam baringe daktapupa, epsi kecada pepkusene. Co pe utopu keca daktapupa, im deiki mutu neitamai yumada, tenpu keteng neitamai utopu (setengah jam) kupu taruda, tenpu keca lelim peda, men gekepsi. Akeca yuma pio dimpepnapu kupi.

Revelation of John 8

Abuku paledongona tep, co pe utopu keca, yoneitam baringe daktapupa, epu keca tep, pepu upu

1 Aupu yuma lap pepneupa, gekepsi pangeda, Domba Mi Utopu Ngebodi abuku paledongona tep, co pe utopu keca yoneitam baringe daktapupa, epsi kecada pepkusene. Co pe utopu keca daktapupa, im deiki mutu neitamai yumada, tenpu keteng neitamai utopu (setengah jam) kupu taruda, tenpu keca lelim peda, men gekepsi. Akeca yuma pio dimpepnapu kupi.

2 Adinenda, Allah er bungrurai urasin tara pio tengmenge malaikat yoneitam bari yanmaipa, ila bung-bung pena utopu keca, er sida terompet, bokra yuk-yuk karepupa, dopra doupmai. 3 Terompet doupmaipa, yuk malaikat tenpu ngebodi, me mau utopu keca, urasinda bukmau utopu dinin, emas di ketekeipinge dopra, Allah er gispal dona tep, telep keca karenungai damai yau. Nintong telep keca uku dongonung keca doupmaua di, Allah er gispal dona tep karenungai, ameja damai tengyanmau. Ameja peda emas di ketekeiami ngeda, Allah er ila bungna keca, urasin tara kupupa epsi.

Amalaikat yaupa, ‘Buk mau pumbon jeramu uku neitamai dongopkur’ tenen, nintong telep keca weika di karepipa, dopropu. Tonda, Allahdi wepra deiamupa, er nyapu kunge nesaladi, Allah tep moronung upu ton dopra amalaikat karepipa, amalaikatdi aupu cap, anintong telep keca cap tapakra deipudi, emas meja deiki deipu.

4 Nintong telep keca dopra, er buru di doupmau mau pumbon uku jeramnga neitamai di dongopupa, ket welepu. Aket welepmaunge cap, Allah er nyapudi mororameng upu cap, amalaikat er buru di karepupa, Allah dinmauaipu tapakra kikiman welenmaupa, Allahdi gekenmaudi, dinmau. 5 Ukupupa, amalaikatdi, Allah er gispal dona tep, nintong telep keca uku dongomengai, emas meja deiki jeramu uku dopra, er doupmau bukmau pumbon dongopupa, diniku. Er bukmau diniku pangeda, akeca yuma puto di im deiki di, tuai mutu dokotepu. Auku dopra tuai mutu deiki dokotepu pangeda, kulmana cap, perenglang pena cap, ila lelim cap, ila mutu longna cap kupupa gekepra epsi.

Yoneitam bari malaikatdi, terompet yoneitam bari talepidi lelim pepya tep, pepu upu

6 Uda, akeca yuma konum kupupa, sun yoneitam bari malaikatdi, sun tep karepmai bung-bung pena er sida terompet, ‘Lelim pepkup’ tenen, ketenepi. 7 Menmena malaikatdi, er doupmau terompet lelim pepka deiki di, adipapu uku bu cap, yapi cap, mul duduya cap, katuai kupupa, akeca-keca yuma tapakra doupudi, im deiki di tuai mutu puto di dokotepu. Dokotepupa, tuai mutu sakua deiki di, tuai mutu ban-ban yuma bokra weneri kupu dinin, butene tara tapu dinin, tenpu tara ngeda, uku jepropka deiki di gum kupu. Ange utopu, co palpal yuma bokra weneri deipu dinin, co palpal butene tapu dinin, tenpu ngeda uku jepropka deiki di gum kupu. Tuai mutu betei cap, mutmuta cap yumada, uku jepropka deiki di gum kupu.

8 Malaikat butene ngebodi, er terompet pepka deiki di lelim pepu pangeda, ila mutu urasin utopu kecada, ila uku jenmaua katuai kupu. Ukupupa, amutu dopropudi, im deiki di tuai mutu laut mokon neitamai puto di dokotepupa, tuai mutu laut mokon yuma bokra weneri deipu dinin, wilipra butene tara deipunge taprapudi, tenpu tarada yapi mokon dau. 9 Ange utopu, laut mokon neitamai kuredi, embaramre keca yala-yala yuma, neitamai gung weneri bokra deipu dinin, gung butene tapupa, gam tupa kurami dinin, tenpu bokra deipu ngeda, adipapu depropi. Ange utopu laut mokon deiki embanmai gapung co, ^{▼▼Gapung co di mokon deiki bana tep, lap pena upu nomor 33 dirume. Gambarda Matias 8:27 dirume.} er sida kapal laut, yuma dopra weneri bokrapudi, gung butene tapu dinin, tenpu kapal laut gungda, poptapupa, laut mokon jepropka deiki di gum kupu.

10 Malaikat weneri ngebodi, er terompet pepka deiki lelim pepu pangeda, im neitamai uku bu ila di jenmau kuru ila ngeda, tuai mutu embaramu me cap, me bungnai cap, adeiki saku. Me yuma akapu dinin, weneri bokra deipudi, butenenge tapupa teleppu kupu dinin, bokra tenpu ngeda mali kupra deipu.

11 Im neitamai di saku kuru er sida, Sukurura cadi, tuai mutu embaramu me cap, me bungnai cap yuma dinin, weneri bokra deipudi, butenenge tapra, tenpu ngeda su weik kupupa, men jepmanto kupu. Ame yuma su pio weik kupupa, tuai nesala ame gwepra mangkau di jepnedi, su deiki di pu jeramupa, tuai nesala weika di depbarami.

12 Malaikat dumbari ngebodi, er terompet pepka deiki lelim pepu pangeda, adipapu keteng cap, war cap, kuru cap mali kweipupa, kunuku. Ada keteng cap, war capda, nong tenpu-tenpu dinin, aneitamai bokrapudi, yambul tara kunuku dinin, weik tarada tupa telep kupu. Kuruda, denge weik kwamu dinin, weneri utopu bokrapudi, yambul tara kunukudi, weik tarada tupa telep kupu. Keteng cap, war cap, kuru cap bokra, yambul tara kunukua deiki di, keteng komuni pe, lukunda peda, yambul taruda dirin men kupudi, pio kunuku. Ton taruda, dirin tupa kupu.

13 Akeca yuma ukunmaupa, dinmasi taruda, tenpu Seng-seng Pena madi im neitamai lakra embanmaudi, aupu penmaue. Erdi penmau upuda ake. “Sun yuk malaikat weneri nengdi, sun terompet deiki lelim pepmengepa, sun tuai mutu kurum nesala yumada, ila kange mun keca weneri ton cap yankamasera tep, sunda bicaue. Uo, sun bicaue, bicaue, bicaue,” peprapudi, lakra banmaupa, gekepsi.