Rev 9 | XteSC | STEP | Amendada, malaikat pamu ngebodi, er terompet deiki lelim pepupa, im neitamai di tenpu ila kuru ton, tuai mutu sakupa, epsi. Akuru sakapudi, malaikat utopu daupa, Allahdi buplan pangna keca, er sida kunci karepu. Akunci karepkada, tuai mutu neitamai tu pumbon ila kaurye kwamu bon, er deiki tara buplan dekdongomunge pangna tep, akunci karepu.

Revelation of John 9

Malaikat pamu ngebo cap, ngantan bari ngebo capdi, sun terompet deiki lelim pepreipa, kupu keca tep, pepu upu

1 Amendada, malaikat pamu ngebodi, er terompet deiki lelim pepupa, im neitamai di tenpu ila kuru ton, tuai mutu sakupa, epsi. Akuru sakapudi, malaikat utopu daupa, Allahdi buplan pangna keca, er sida kunci karepu. Akunci karepkada, tuai mutu neitamai tu pumbon ila kaurye kwamu bon, er deiki tara buplan dekdongomunge pangna tep, akunci karepu. 2 Kuru dinin, malaikat dau ngebodi, ila kaurye kwamu bon deiki tara buplan paktapupa, abon pumbon di kete pio weike welepu. Aketda, wa demengadi, ila imna ipmengepa, ket ila di weleramretopu kupudi, welepupa, keteng cap, im neitamai dana-dana yuma cap kunuku.

3 Ila kaurye tu pumbon kwamnga neitamai di, ket weika di welenmau taruda, aket welenmaua neitamai di, sul po weik ket kan-kan di welenmaiyanen, ka tamupra tuai mutu kwereryai. Allahdi, asul po tep pu jena deiyo keca karepu. Ada, ‘Nimi sul podi topyopda, nimi tanga di topserepa, pu jeramsertopu, pu weika di jenkamre’ tenen, pu deiyo keca karepu.

4 Tonda asul po tep upepu. “Tuai mutu kure betei cap, mutmuta cap, co palpal cap, bolokredi, paramre keca yuma capda, bo men jenkamrume. Akeca yuma bo jena gum, mali men keipkamrume. Dinino, Allah er peten kemdin keca sun aso deiki men kwamre nesalada, weika di si tonkamrume. Dinino, Allahdi, ‘Anesalada ne mawa neng’ tenen, peten kemdin keca sun aso deiki sekra deipi nesala tep nengeda, si tona meme. Dinino, Allah er peten kemdin keca, sun aso deiki men kwamre nesalada, weika di si tonkamrume.

5 Sun sul podi, si tonkamrum neng peda, si tonkamrum dinin, men poptapkamrume. Ware pamubari deiki di, si toramrumupane, pu weika di anesala jeramrepane, ila di mali peramengedi, donkamenge,” pepu. Anesala tep pu jenkamrada, tanga di topserepa, pu weika di jeramseretopu kunkamre. 6 Sul po si toramrepa, tuai nesala pu weik jenkamre taruda, sun tali tuai nesala yumadi, ‘Uo, ware keca di poptapsetupa, menmena deptepe do?’ tenen, dena keca pio er petenkameng dinin, men epkamenge. Gampu kungedi, pio engepra dounkamenge.

7 Asul po, sun urasinda, jen talen nengdi, ‘Nun kuda deiki di bukrap, mali neng porbenkup’ tenen, sun kuda ketenemamengtopu kupipa, epsi. Asul po sun urasinda, nimi urasin utopu kupu. Sun giso deikida, emas utopu keca, er sida mahkota utopunge koupdongopipa epsi. 8 Sun giso potongda kulyang nerapu lyom weik potong utopu kupu. Sun sida, ila yu pus, er sida singa pus, ila lyom si kuretopu kupu. 9 Sun taram tara keneki kecada, teng utopu dinin, besi keca kupu. Sun sul po lakra banmai taruda, sun pol lelimda, me onmaredi, me lelim dung-dung peramretopu kupupa, gekepsi. Tonda, jen talen nengdi, sun kuda bali deiki bukmengedi, sun tu deiki embaramre keca, er sida kereta kuda, ^{▼▼kereta kuda – Tu deiki embarami keca lap pena upuda, nomor 24 dirume. Gambarda, Rasul 8:37 dirume.} baramengpa, lelim weik peramretopu kupupa gekepsi.

10 Sun amngeda, tanga amnge utopu kupupa, nimi topyopda, ila pu weik jerure. Sun amnge di nimi tuai nesala topyopda, ware pamu deiki di, ila pu jeramrepane, engepmengedi weika di dounkamenge. 11 Asul po sun deiyo ngeboda, ila kaurye tu pumbon malaikat kurure. Ibrani nesala upu deiki di er sida Abadon penunge. Yunani upu penge nesaladi, er si tep Apolion penunge. Asi butenenge penunga deiyoda, angebo erda Nimi Portamna Deiyo Ngebo kurura tep, asi sipenunge. ^{▼▼Nimi Pona Deiyo Ngebo er si butene peramenge ngeda, Yawa Popra Bululuk Singina Deiyo Ngebo penunge.}

12 Akeca yuma epsa deiki di kael kepsi. Arup taru Seng-seng Pena ma lakra embanmaudi, “Bicaue, bicaue, bicaue,” penmau kecada, ila kange mun keca ‘Tenpu ngeda, konum kupmaupa, epmane’ tenen, kael kepsi. Dinino, “Bicaue,” pepmau keca, ‘Ila kange mun keca butene ton cap amenda taru yankamare’ tenepra kael kepsi.

13 Ange tenepsi taruda, malaikat ngantan bari ngebodi, er terompet lelim pepupa, nimi upu utopu upu gekepsi. Ada, Allah er bungrurai urasin tara deipmai emas meja deiki di, takke keca dana-dana belemu neitamai di aupu pepu. 14 “Ukutaruda, sun malaikat dumbari ateng kouprapmupudi, ila embaramre me, er sida Efrat me damai ateng koupra deipmupu dumbari malaikatda, loptaprume,” pepu.

15 Upepupa, ngantan bari malaikat, terompet penmau ngebo gekepka deiki di, Efrat me damai ateng koupra deipi malaikat dumbari loptapu. Amalaikat dumbari loptapunge deiyoda, tuai mutu kunge nesala yuma dopra, weneri gung bokrapmengedi, gung butene tapra, ‘Gung tenpu ngeda, anesala yumada poptapkamang’ tenen, loptapu. Tonda, tali tarupu gum dinin, Allahdi, ‘Ne teneamsi taru, awar cap, atumi neitamai, aketeng cap deiki dipu, tuai mutu neitamai mali nesala ponkamenge,’ teneramutopu, ataru dipu, amalaikat dumbari loptapupa, nimi pon pel gonga kepbankamenge.

16 Amalaikat dumbari, sun melimna tep, jen talen neng denge pio weik kunmaiyada, men nukmanto kunmaipa, epsi. Ada amalaikat cap, ajen talen neng capdi, tuai mutu kunge nesala ila gung tenpu poptapkaminge tep pepne. Ajen talen neng, sun kuda bali deiki bukra ketenepra bulupmaiyada pio weike. Nomor nukra deipipa, gekepsi ngeda dua ratus juta, atau 20 ribu laksa pasukan ^{▼▼Pasukan penungada, denge weik beribu-ribuan tep penunga cadi, tenpu pasukanda, ada denge weik sepuluh ribu (10.000) jen talen neng tep penunge. Atep, acada Yohanesdi denge pio weik, dua ratus ribu (200.000) jen talen neng epka tep pepu.} kupipa epsi.

17 Ataruda, ken deiki dirameptopu epsi kecada pepkune. Sun kuda deiki bukra ketenepmai nesala, sun urasin lape pepkune. Sun taram deiki teng utopu keca keneki ngeda, yapi bi cap, mirin cap, poron cap kupu. Sun kuda bisamda, sun nongda kuda ^{▼▼Kuda Kuda bisam, er urasinda, sapi bisam nong yambul utopu kurur keca dinin, er yanda lyom weike. Tonda, sapi bisam giso deiki takke weik kuramre keca, er sida abolyakot tengamra utopu kecada, kuda bisam er giso deiki men kurure. Sapi bisam bali deikida, nimi bukra men banunge. Dinino, kuda bisam puda, er bali deiki nimi bukmengepa embarure. Gambar dina tep, Yakobus 3:3 dirume.} bisam utopu kupu dinin, akuda gisoda, ila yu pus er sida singa pus, er urasin utopu kupupa, epsi. Akuda yuma sun sipyal pumbon di, uku bu cap, ket cap, gel lyein bupu pio weiknge cap, belepupa epsi. Akeca yuma ukupka deiki di, siken tong utopu ila di penmaupa, gekepsi.

18 Tuai nesala yuma bokra deipupa, gung buteneda tapi dinin, tenpu gungda, anesala yuma poptapi. Ada tali keca di nimi popi ngeda gume. Sun kuda sipyal pumbon di uku bu cap, ket cap, gel lyein bupu pio weiknge cap belepudi, tuai mutu kunge nesala weika di jepropupa, epsi. 19 Akudadi, nimi popya deiyo kecada butene kupu. Tenpu ngeda, sun sipyal pumbon di belepra yau keca di nimi popi. Butene ngeda, sun amuda, nimi ton bal giso utopu kupka cadi, sun amu di nimi tuai nesala weika di si topipa, nimi weik depi.

20 Uda, tuai nesala gung weneri bokra deipupa, tenpu gungda konum poptapi dinin, tuai nesala gung butene tupa gam kunmai. Sun gam kunmai nesaladi, sun pe buru deiki di mali-mali kuraminge cap, isok-isok si eremaminge cap, kunumna weik keca dopra, nimi urasin utopu petupra, ‘Nun nai bo’ tenen, ketekepra deipnedi, gispal doraminge cap, ayuma tep nengeda, sundi, ‘Uo, nun mali kuramupke’ tenen, men tapi. Amali keca talepra tupa kunmaipa epsi.

Nimi urasin utopu keca petupra deiamidi, si eremami ngeda, kunumna weik keca emas cap, perak cap, besi keca cap, urasin telep gel cap, co cap deiki di petupra deiami dinin, akeca-keca yumada, gam men kuramu keca cadi, bisi bana cap, asuru dina cap, upu gekena cap, upu pena cap pio men kuramu. ‘Nun nai bo ake’ tenen, petupra deiami keca yumada, talipu kurami.

21 Amalaikat cap, sun melimna jen talen neng capdi men popi nesalada, sundi yuk nesala portamaminge cap, ker doraminge cap, bousi poraminge cap, nerapu tali upula nyangdaraminge cap, yuk neng bunga upula dororaminge cap tep, “Uo, nun mali kunupe,” pepra men tapi. Balila deipra pio malipu kupi. Ange yuma epsitopu, ne Yohanesdi pepsene.