Rom 1 | XteSC | STEP | Telepe, ne kayapu. Ne Paulusdi, sun Roma mutu teka tenerum nesala tep, telepe pepra, asurat sekeipsene. Ne Paulusda, Yesus Kristus er amutara bukra, er pel melipra don ngebo kunune. Allahdi ne tep, ‘Paulusda, ne kai telep upu, nimi lyemna upu dopra peterembenkamre,’ tenen, wepra deipneudi, er kai telep upu dopra peterembana tep, gonga kemna deiyo ngebo, Rasul keipneue. Atep, er dipapu wepra deipneupa, apelpu donune.

Romans 1

Paulusdi gonga kepra, ‘Telepe’ pena tep, pepu upu

1 Telepe, ne kayapu. Ne Paulusdi, sun Roma mutu teka tenerum nesala tep, telepe pepra, asurat sekeipsene. Ne Paulusda, Yesus Kristus er amutara bukra, er pel melipra don ngebo kunune. Allahdi ne tep, ‘Paulusda, ne kai telep upu, nimi lyemna upu dopra peterembenkamre,’ tenen, wepra deipneudi, er kai telep upu dopra peterembana tep, gonga kemna deiyo ngebo, Rasul keipneue. Atep, er dipapu wepra deipneupa, apelpu donune. 2 Menop taruda, Allahdi, “Ne Mi Sisa pel donkamra deiki, nimi pio weika di lyepkamna cadi, ne kai telep upu karepkamsene,” pediramseue. Aupu pediramseuada, Allah er upu lap perami neng, nabi-nabi ^{▼▼Nabi-nabi neng, Allah er upu lap pena neng – Allah er upu lap pena nengda, Allahdi, ‘Nimi gekepkameng’ tenen, erdi wepra deiamu neng tep, erdi amenda kupkamunge cap, er tek sisi upu cap, lap pepu pangeda, aneng gekeramidi, yuk nesala yuma tep, lap perbarami. Anengda, ‘Nabi neng’ penupe. Nabi neng, sun lap pena upuda, nomor 25 dirume.} nengdi aupu sekra derirami. Aupu, Allah er pio telep Lengna Upu ^{▼▼Lengna Upu penupada, Allah er pio telep upu tep penupe. Allahdi aupu karepseua tep, aupuda pio teleppu kurure. Aupu neitamaida, mali keca tenpunge peda, pio men kurure. Aupu yumada, tek sisi upu kurura cadi, ‘Lengna Upu,’ penupe. Indonesia upu deiki di, “Kitab Suci” penunge. ‘Lek upu, tonda, Lengna Upu,’ penup ngeda, ada “suci” tep penupe.} deiki di pediramseue.

3 Sun sengami upu neitamaida, Allah er Mi Sisa tep lap perami. Allah er Mi Sisa Yesusda, pumun taru kuramu ngebo Dauddi deipupa, dadeipdanen yakaramyanen, Daud er yala nengdi Yesus yana deipi. 4 Yesus Kristusda konum depmau dinin, Allahdi Yesus tep tamupra gam bukeipka deiki di katuai kupra deipseue. Ada Allah er Lek Sambala ^{▼▼Lek Sambala – Aupu ‘Lek,’ penupa deiyoda ake. Ada, Allah er Sambala ‘Kurun sambala kurure,’ tenena gume. Erdi mali kun keca tenpu peda men kuredi, pio dumsisipu kurure. Pio teleppu kurura cadi, asambala er si tep ‘Lek Sambala,’ penupe. Indonesia upu deiki di ‘Roh Khudus,’ atau ‘Roh Suci,’ penunge.} puto deiki di upeipseu. “Yesusda Allah er Mi Sisa kurure. Allah er mali kuna gum dipapu, pio dumsisi ngebo kuretopu, er Mi Sisa Yesus peda, mali kun keca tenpu peda men kuredi, pio dumsisipu kurure. Erda pio puto weik kunkamre,” pepra, katuai kupra, aupu lap pepseu. Katuai kupra deipseu ngeboda, yuk ngebo gume. Erda, nun Deiyo Ngebo Yesus Kristus er tenpu kurure.

5 Ne Paulusdi pepsene. Allahdi peipupa, Yesus Kristus er pel dopneua deiki di, ‘Paulusda, ne upu peteremna tep, gonga kemna deiyo ngebo kunkamre,’ teneamneudi, wepra deipneue. Wepra deipneudi, er pe kange dipapu bicau tenepneudi, er upu peteremna tep, pel dona deiyo keca karepneue. Ukupneua deiyoda ake. Ada, Paulusdi ne upu dopra, peterep embenkamra deiki di, Yahudi yala gum nesala kunge mutu, ban-ban yuma neitamai di, nesala weik ne upu gekepmengedi, teka tenepnengopda, nepu talepra domyakankamnenge. Ukupmenge dingeda, Yesus Kristus er si ila di eremkamenge. Atep, Allahdi, ‘Yahudi yala gum nesala, ne tep teka tenepmenga deiki di, ne upu moupra talengedi, dumsisipu kunkameng’ tenen, ne Paulus tep wepra deipneue. Ada, ‘Paulusdi ne upu dopra peterembenkamre’ tenen, Allahdi wepra deipneue.

6 Uda, Allahdi, ‘Yahudi yala gum nesala kan-kan di, upupnepa teka tenepmengopda, Yesus Kristus er nyapu keipnepa, er dipapu anesala yuma talenkamre’ tenen, peipseu nesalada, sun Roma mutu kumum nesala peda kurume.

7 Atep ne kayapu, sun Roma mutu kurum nesala kan-kan di, Allah bicau tenepseudi, ‘Ne nyapu kunkameng’ tenen, wepra deiamseu nesala, sun yuma tep asurat sekeipsene. Nun nai Allah cap, nun Deiyo Ngebo Yesus Kristus cap, ‘Sun butene di bicau teneserengedi, sun kange dipu melimserenge keca ^{▼▼Allahdi bicau teneseredi, er kange dipapu melimserenge deiyoda ake. Ada, nun pel donupnge cap, telep kupra kunupnge cap, deiki di gume. Ware keca do yuma, akeca yuma talepra kunupa deiki, Allahdi men lyemserure. Dinino, Allah er kange dipapu bicau teneseredi lyemserure. Tonda, amenda taru er dipapu dopropseredi im deiki dubeserepa, er cap kikiman pio gampu kunkamepe. Tonda, tuai mutu neitamai tupa kunkamep taru yumada, akeca-keca yumada, Allah er dipapu melipra karenkamsere. Ange yumada, nun pel donupa deiki di, men doproptepe. Allah er dipapu nun tep tali kareserure. Ayuma tep nengeda, Indonesia upu deiki di ‘kasih karunia’ penunge.} karenkamsereng’ tenen, Allah morosenune. Tonda, nun nai Allah cap, nun Deiyo Ngebo Yesus Kristus capdi, sun tep melimserenga deiki di, podana cap, pangdana cap, ikin kange douna cap yuma, gum kuprepa, ‘Sun yuma kange deipra, bouna di kikiman kunkameng’ tenen, sun Roma mutu kurumudi, teka tenerum nesala yuma tep, Allah morosenune. Ne Paulusdi pepsene.

Paulusdi, ‘Uo, Roma mutu kungedi teka tenepmenge nesala, sun damai betenepa, kikiman kutepe’ tenen, putaramupa, pepu upu

8 Nedi sun Roma mutu teka tenemum nesala tep, tupa tenesenedi, ne nai Allah tep, “Telepe,” penune. Yesus Kristusdi er pel dopseua deiki di, telep kupra deipseua tep, er cap dipru dukdongopra kununa deiki di, sun tep tenenedi, nun nai Allah tep, “Telepe,” pepra moronune. Tonda, sun Roma nesaladi Allah tep, ila di teka tenemum ngeda, yuk nesala ton epmengedi ban-ban yuma dakunge nesala damai lap perbangepa, aupu gekengedi, nun damai yana lap pedisengepa gekenupe. Atep nedi sun Roma nesala tep tenepnedi, Allah tep, “Telepe,” penune.

9 Ne kange bongtona gum di, pio pe deipra, puto di peterep embanune. Ada, ne kange dipru, Yesus er deikipu deipsa deiki di, Allah er Mi Sisa Yesus, er kai telep upu, nimi lyemna upu dopra, puto di peterep embanune. ‘Allah er Mi Sisa Yesus, er amutara kunedi, er pelpu donkamne,’ tenenune. Allah erdi dinmanera cadi, ne tali upu men pepsene. Allah moronun taru yumada, sun Roma mutu kumum nesala tep pio tenepnedi, Allah morosenune.

10 Allah moronun taru neitamai yumada, ange ton moronune. Ada pumun taru di, men kupmanto kuramsi dinin, ukutaruda Allahdi, ‘Roma mutu benkamre’ tenen, go karepnetudi, buplan pakeipnetupa, “Sun Roma mutu kunge nesala damai dirbenkamne,” pepra, Allah pio moronune.

11 Tonda, ‘Uo, sun Roma mutu kunge nesala cap epdatepe’ tenen, putanerenge deiyoda akapmanere. Ada, Allah er Lek Sambala puto deiki di karesere pel dona deiyo keca, nedi Roma mutu kurum nesala tep melipra karepsetenepa, ‘Sun kange dipru puto kupra kunkamrum’ tenen, putanerure. 12 Ukupsetenyopda, sun teka teneruma deiki di, ne tep dipru kwa dinkamnerume. Ange utopu, ne teka tenenuna deiki di, sun Roma mutu kurum nesala tep, dipru kwa dipsetene. Ukupdatepyopda, nun yuma Yesus tep teka tenenupa deiki di, ‘Nun dipru kwa didatepedi, kange deipra kikiman dukdongopdana kutepe’ tenen, pepsene.

13 Uda, ne weit yapu utopu nesalao, ‘Aupu men gekepmumyopda, moupra men kael keprum’ tenen, lap pepsene. Pumun taru di dipra, ataru neitamai yumada, sun tep tupa teneramsisi. Ada, ‘Uo, Roma mutu nesala uruna tep, sun damai benkune,’ teneramsisi. Sun mutu neitamai di, Allah upu petereptenepa, gekepmenga deiki di, du moupredi nong kupkamre. Tonda, yuk mutu neitamai, Yahudi yala gum nesala peteremamsipa, teka teneramya deiki di, du weik mouramutopu, ‘Roma nesala peda, teka tenepmengopda, du weik moupkamre,’ teneramsi. Uteneramsidi, ‘Roma mutu benkamne’ tenen, keteneiamsi dinin, ikin keca ne damai kwamupa, men yanmanto kuramsi. Ada, ne bisi banai sengdongon keca kuramretopu kamnga cadi, sekdongomneupa, sun damai men yasi.

14 Uda, nimi lyemna upuda, ‘Nimi yala-yala yuma gekepmengedi, teka tenepra kael kepkameng’ tenen, Allah er kai telep upuda, adipapu dopra peterembanapu kunune. Tonda, tenpu yala nesala peda, ‘Dakwapye,’ tenepra men taptene. Ada, Yunani yala nesala pe, Yunani yala gum nesala peda, ila kael neng pe, tupa walwal kunge nesala peda, adipapu peterembanune. 15 Adeiyo tep nengeda, nedi sun Roma mutu kumum nesala tep, ‘Allah er kai telep upu, nimi lyemna upu peterepnepa, kael kepkameng’ tenen, pio putanerepa, ne kange derisenune.

“Allah er upuda puto upu kurure,” pepu upu

16 Uda, ware mutu nesala do yuma, yuk nengdi Allah er kai telep upu, nimi lyemna upu peteremengepa, gekepmengedi teka tenepmengopda, Allah er puto deiki di anesala lyepredi, telep kupra derirure. Allah er upu tep tupa-tupa teka tenenge nesalada, Allahdi anesala tep lyemrure. Menmena ngeda, Yahudi yala nesala lyemrure. Amenda taruda, Yunani yala nesala peda, er upu gekepmengedi, teka tenepmengopda lyemrure. Ange tep nengeda, ‘Allah er kai telep upu, nimi lyemna upu dopra peteremkamne do, gum do?’ tenen, ali men dangnune. Tenimtona gum dipapu, kange deipnedi, pio pe deipra peteremnapu kunune.

17 Apepmasen upuda, tali tep gume. Deiyoda, pumun taru Allah upu deiki di, aupu ton sekami.
‘Allahdi er dumsisipu kuretopu, erdi dumsisi kupra derirur nesalada, sun teka tenenunga deiki dipapu, gam pio kunkamenge.’ (Habakuk 2:4)

Habakukdi aupu sekra deiamutopu, Allahdi dumsisi kuna deiyo keca, keteneipseuada, er kai telep upu, nimi lyemna upu neitamai di, katuai lap peserure. Adumsisi kuna deiyo keca kareserur ngeda, gonga kemna taru di dipra, doryankamre taru yumada, teka tenenupa deiki dipu kareserure.

Allahdi nesala yuma, sun mali kuramenge keca tep, yu kuprepa wenepkamserenge tep, pepu upu

18 Ware nesala do yuma, Allah erdi, ‘Ukunkamrume, angeda men kunkamrume,’ pepra pesere upu yuma tapra, pio mali-mali kunge nesaladi kunge kecada, lap pepkusene. Ada, yuk nesala Allah er tek sisi upu gekepmanto nesala kunung dinin, amali kunge nesaladi, sun mali kunga deiki di, upu sengdongonunge. Ukununga deiki di, Allah er tek sisi upu yanirtamnunge. Ukununga deiki di, yuk nesala peda, Allah er upu moupra men kael kemnunge. Atep, amali kunge nesala yuma tep nengeda, Allah im deiki kuredi, yu kuprepa, konum gonga kepra, anesala tep wenemre ngeda, konum katuai kupbaserure. 19 Allahdi amali kunge nesala tep, yu kuprepa wenemrurada, tali tep gume. Deiyoda, Allah er kuramu keca cap, er kure keca, nimidi kael kepmantonge yumada, Allahdi, ‘Nesala ban-ban yuma kael kepkameng’ tenen, katuai kupra deiamupa, konum kael keamtenge dinin, sundi, ‘Nun song’ tenen, tamnunge.

20 Allahdi mali kunge nesala tep wenemre ngeda, ‘Konum katuai kupra deriserure,’ pepmasen ngeda, lap pepkusene. Deiyoda ake. Allah er pio mambul kure kecada, konum katuai kupra deiamseue. Allah er pio mambul kure kecada, pepkusene. Ada pumun taru pe, dorkupbankamre taru pe, ataru-ataru yumada, er ila puto kurenge cap, er im deiki ngebo kuredi pio telep kurenge cap, Allah er pe kure keca yumada, tali nimi asuru di men eptepe dinin, Allah er pio telep kure deiyo ngeda, katuai kupra deiamseue. Ada, ban-ban yuma ketekepra deiamu taru di dipra, ataru neitamai yumada, Allahdi ketekeipseu keca yumada, pio telep kurura cadi, erdi ketekeipseu keca dinupa deiki di, Allah er kure keca deiyo ngeda katuai kuprepa, epra kael kemnupe. Atep nimi ban-ban yumadi, “Gume, Allah er kure kecada, nun walwal di kuramupka cadi, Allah tep teka men tenepmupke,” pepmengedi, ‘Allah men wenepsetue’ tenen, upu men peptenge. Allah er dumsisi kure keca deiyo ngeda, konum moupra kael kemnung dinin, dabale tep tupa tamnunga cadi, Allahdi tuai mutu kunup nesala yuma tep wenepkamsere. Ne Paulusdi pepsene.

21 Aupuda, tali tep men pepsene. Aupu deiyo ton lap pepkusene. Ada ban-ban yuma kunge nesala neitamaida, malipu kununge. Mali kungedi, ‘Allah erda akurure’ tenen, konum kael keami dinino, sun yumadi er tep, ‘Nun nai Allah, erda pio mambul ngebo,’ tenena gum tep, er si men eremami. Tonda, tenpu taru peda, er tep ton, “Telepe,” pepra men kurami. Ange yuma gum dinin, sun kange tenenange yumada, malipu kupbaramipa, ‘Tek sisi nong kupkamre kecada ake’ tenen, moupra men tenipmanto kurami. Tali-tali kecapu tenerami. Tonda, sun kange dipru neitamaida, walwalpu kupbaramya deiki di, pio kunukupa, malipu kurami.

22 Nesala ban-ban yumadi, “Gume, nunda tek sisi ila kael neng kunupe,” perami dinino, tek sisi walwal nesalapu kupbarami.

23 Ukupra malipu kupbaramya deiki di, Allah men depmanto ngebo, pio Gam Kuna Deiyo Ngebo tep, ‘Erda pio mambul ngebo kutua peda, erda nun song,’ tenepra, tamamidi, tali kecapu petupra deriramidi, atali keca sipu eremami. Sun petupra derirami kecada, ake. Nimi urasin utopunge cap, ma cap, bisam yala-yala yuma cap, bal yala yuma cap, akeca urasin utopu petupra deriramidi, “Nun nai bo,” pepra, atali keca tep si eremami.

24 Ukupra pio malipu kuramya tep nengeda, Allahdi tuai mutu neitamai kurami nesala ban-ban yuma tep, “Sun dipru neitamai pio mali kun kecapu putaserepa, amali kecapu tenepra kunge nesala cadi, nedi tapsene. Sun kange dipru neitamai di mali kecapu putarepa, angepu tenepra dakunkamenge,” pepra tamseu. Ukuamseua tep nengeda, tuai mutu kurami nesala, sun dipru neitamai di mali kecapu putaramupa, tali-tali nyangdaramya deiki di, sun nong neitamai yumada mali kudidarami.

25 Allah er tek sisi kure keca cap, er tek sisi upu cap tep, yanirtamamidi mok kecapu talepra dombarami. Tonda, Allahdi ketekepra deiamupa, tali akapu keca tep, ‘Akecada nun deiyo ngebo cadi, er amutarapu kupedi, er sipu eremepedi kunkamepe’ tenen, tali akwamu keca tep si eremami. Ukuramidi, tek sisi akeca-keca yuma ketekepra deiamu deiyo ngebo, Allah tep tamami. Akeca-keca yuma ketekepra deiamu ngebo Allah tep, “Uo, kanda ila mambul kuruma cadi, kan tep pio telepe pekenupe,” pepra, er si eramtenge dinino, tuai nesaladi tali akwamu keca tep si eremami. Ukurami dinino, ukutaruda, nundi, nun nai bo Allah tep, ataru pe doryankamre taru pe, er sipu pio eremkamepe. Ne Paulusdi pepsene. ‘Angepu pio kunkamep’ tenen, Amin pepne.

26 Tuai nesala yumadi tali akwamu keca tep, si eremamya deiki di, pio mali-malipu kurami. Ukuramya tep nengeda, Allahdi anesala yuma tapupa, sun kange dipru neitamaida, pio mali keca putaramnga deiki di, ateng koupra deiamu. Sun dipru pio mali kuramya deiki di, sun nerapu peda, nimi cap kikiman men marami dinin, ange tapra, nerapudi yuk nerapu cap, nyangdaramidi mali kurami.

27 Ange utopu, sun nimi yuma peda, nerapu cap kikiman maramtenge dinin, ange tapra, nimidi yuk nimi tep, ila di putaramupa nimidi, nimipu nyangdarami. Nimidi men tenepmanto keca, pio mali-mali kun keca cap, yuk nimi nyangdana cap, weika di pio mali-mali kuramipane, sun ila di mali kuramitopu, Allahdi wenemna keca weika di kareamupa, sun nong cap, sun tenenange cap, sun dipru neitamai kwamunge cap yumada, malipu kupbarami. Ada, pio men kupmanto keca mali weik kuramidi, tali-tali nyangdaraminge tep, Allahdi anesala tep ila di wenemamu.

28 Angepu gum dinin, amali kurami nesaladi, ‘Allah cap, er kure keca yuma cap tep, ton cap men tenenkamepe. Akeca yumada, nong men kupkamre. Allah er kure keca yala-yala yumada, tupa men tenenkamepe. Erda nun dabale,’ teneamya tep, Allahdi anesala yuma tep, dabal kupupa, ‘Sun anesala dakuramenganen, depkamenge’ tenen, tapupa, sun pio mali tenerami keca deiki di ateng koupdongomupa kurami. Ukuramipa, Allahdi, “Ukuna meme,” pesere keca yuma talepra kurami dipapu, pio malipu kupbarami.

29 Anesaladi pio malipu kuramitopu, ukutaru peda anesala utopu kunge nesaladi tupa malipu kununge. Ware mali kun keca do yuma, mali kun keca yala-yala yuma talepra kununge. Sun kange dipru neitamai yumada, mali kecapu dinikupa, nimi men kupmanto keca, pio mali kun keca weika di kununge.

Tonda yuk mali kunge kecada ake. Ware bung keca do yuma, sundi akeca-keca yuma tep, ‘Uo, nun dipu akeca yala-yala yuma weika di doproptepe’ tenen, dipru engeprepa kununge. Tonda, yuk nengdi talenung keca tep, ‘Uo nun dipu taleptepe’ tenen, dipru engena cap, yu kuprepa nimi portamna cap, pangdana cap, mawa di mok upu pertamna cap, tulum kuprepa yuk nesala tep mali kudina cap, yuk nengdi kunge keca tep, mali upu pepra mur-mur pena cap, akunge nge yumada, malipu kununge.

30 Tonda anengdi yuk nesala tep, sun nong deiki mali upu pepra luludinunge. Ada, sun kayapu nengdi mali men kurami dinin, yuk nengdi, ‘Anengda mali neng, tenenkameng’ tenen, mok upu pepra, luludina upu penunge. Sundi Allah tep, ‘Nun songe’ tenen, tamnunge. Sundi yuk nesala yuma tep, kika deipra mali upu tali pertamnunge. Tonda sun pe kange ereipdangedi, “Sunda mali nesala kurum dinin, nunda telep neng kunupe,” pepra, sun pe dipru eremengedi, gemenunge. Ukungedi sunda, ‘Ware mali kun keca do yuma, ukupunge ton tapakra kuptepe do?’ tenen, pio tenenapu kununge. Sundi sun nai yapu cap, sun nin yapu cap tep, dabal kuprepa, sun upu yaniptapmengedi, men gekengedi yanitamnunge.

31 Amali kun nesaladi telep kun keca tep, moupra men tenipmanto kungedi, sun kange wang-wang penapu kurure. Sundi, “Tek sisi ukupkamepe,” pepra, yuk neng tep pedirameng upuda, talipu peptapmengedi, tek sisi men kununge. Mok upupu penunge. Sundi yuk nesala yuma tep, sun pe yala neng cap, sun pe nyapsilip cap, yuk tali nesala yuma cap, aneng yuma tep, dipru men karepmanto kuprepa, ‘Nun song,’ tenenunge. Tonda, yuk nesala ikin keca kuptua peda, sun mali kunge nesaladi, bicau tenepra melipmanto keca men kungedi, yuk nesala tep tali kaukemnunge. Tonda, Allah tep teka pio men tenenunge. Tonda, yuk nesala tep, bicau tenena pio gum dipapu, tali lupra ponunge. Yuk nesala sun nong deiki ikin keca weik derinunge taruda, ‘Uo, sunda pio bicaue,’ pio men tenenunge.

32 Allahdi amali kun keca talepra kunge nesala yuma tep uperamu. “Anesala utopu nesala yumada, ila di wenepra popkamne. Ukupnyopda, ne cap kikiman pio men kunkamepe. Tapnepa, sun yuk dadepkamenge. Anesalada, ila di wenepkamne,” pepra deiamseu upuda, konum kael keami dinino, ‘Angeda pio mambule,’ tenena gum dipapu, tupa-tupa tali lupra pio malipu kununge. Ukungedi, sundi pio mali kuramitopu, akecapu talepra kungedi, mali nesala tep, sundi, “Anengda telepe pua,” pepra, gispal dodangedi eremdidanunge.