Rom 10 | XteSC | STEP | Ne kayapu, ne Paulusdi ne yala neng, Israel yala nesala tep tenepnedi, Allah pio moronun kecada pepkusene. Ada, ‘Allahdi Israel nesala lyepkamre’ tenen, putanerepa Allah morosenune.

Romans 10

“Teka tenepmepya deiki dipu, Allah er kange dipapu, ‘Sunda dumsisi nesala kununge,’ pepra telep kemdiserure,” pepu upu

1 Ne kayapu, ne Paulusdi ne yala neng, Israel yala nesala tep tenepnedi, Allah pio moronun kecada pepkusene. Ada, ‘Allahdi Israel nesala lyepkamre’ tenen, putanerepa Allah morosenune. 2 Sun kunge kecada ne kaele cadi, nedi lap pepsetene. Sun Israel nesalada, ‘Allah cap dipru dukdongopra kunkamepe’ tenen, pio pe deiprap, pel weik donung dinin, angeda pio puto weik pirirtereramenga peda, ila kael kemna deiki men kununge. Tali walwal di kununge. 3 Allahdi nimi lyemna tep, “Sunda telep nesala kununge,” pepra, dumsisi kemdiserya deiyo kecada, moupra men kael keamya cadi, sundi, ‘Nun dumsisi kemdina tep, nun pedipapu piripetepmepedi, pel weik donkamepe’ tenen, tali pel weik dororami. Ukupra piripeteramya deiki di, dumsisi kuna deiyo keca, Allahdi konum keteneipseu ngeda, yanitamamidi talipu kurami. Adeiki di, Allah er amutara men kuramya tep, er kange dipapu dumsisi kuna deiyo keca karesere ngeda, men dororami.

4 Allahdi utenemseue. ‘Kristus depkamra deiki di, Musa sekamu mem upu neitamai pere keca yumada, Yesus Kristusdi gum kupra deipredi gawal dakamre. Kristusdi apel dopredi konum gawal dakyopda, ware nesala do yuma, Kristus tep teka tenepmenga deiki di, “Sunda dumsisi nesala kununge,” pepra telep kupra deipkamsene,’ Allahdi teneamseue.

“Mutu ban-ban yuma kunge nesala neitamai dadi, Allahdi nesala weika di lyemdoserure,” pepra pepu upu

5 Pumun taru Musadi, upepu.
‘Allahdi, “Angeda ukunkamrume, angeda men kunkamrume,” pepra karepseu mem upu moupra gekepredi dombare ngeboda, gam pio kunkamre. Ware ngebo do yuma, amem upu moupra taleredi dombarya deiki, Allahdi angebo tep, “Erda dumsisi kurure,” pepra telep kudinkamre, Musadi pepu.’ (Imamat 18:5)

6 – 7 Musadi upepu dinin, ware nesala do yuma, ‘Kristus tep teka tenepmepya deiki dipu, Allahdi dumsisi nesala keipkamsere’ tenen, teka tenenup nesalada, Allah upu neitamai seki upu peseretopu penupe. Aupuda ake.
‘Sun kange dipru neitamaida, aupu pena meme. Ware ngebodi im deiki welerbetu do? Ware ngebodi tuai neitamai kwereptu do? Aupuda pena meme.’ (Ulangan 30:12-13)

Im deiki welerbana ngeda, ‘Kristusdi lyemna keca karepsetu’ tenen, Kristus dopra tuai mutu duyakana tep pepsene. Tonda, tuai mutu neitamai kwererbana ngeda, ada sun konum deami nesala kan-kan di, Kristus gam bukeipnedi, er dopra tu deiki ka tamupra duyakana tep, ne Paulusdi pepsene.

8 Aupu buteneda, pio men penkamep dinino, teka tenepmupka deiki, Allahdi nun tep, “Sunda dumsisi nesala kununge,” tenepra telep kupra deipseu nesalada, aupu penupe. Ada,
‘Allahdi nimi lyemna tep peserur upuda, konum damai kuserure. Aupuda, sun dipru neitamai konum kurure. Sun pe upu dipu, “Nun nai bo Allah lyepseo,” pepra moroptume.’ (Ulangan 30:14)

Aupu penupe. Upenupa deiki, “Sun pe upu dipu peptume,” pepmasen upuda, yuk upu gume. Ada, nundi peteremnup upu, “Yesus tep teka tenepmepya deiki, Allahdi lyemdoserure,” pepra, peteremnup upu tep pepmasene. 9 Aupuda, pepkusene. Ada, sun pe upu deiki cap, sun pe sipyal deiki cap dipapu, “Yesusda tek sisi nun Ila Deiyo Ngebo kurure,” pepra, tenimtona gum dipapu, katuai di pepmum dinin, sun kange dipru neitamai di, ‘Yesus konum depu dinin, Allahdi Yesus tep tek sisi ka tamupra gam bukra deipu’ tenen, teka tenepmumnyopda, konuma, tek sisi Allahdi lyepkamsere.

10 Angeda tali tep men pepsene. Gume. Deiyoda ake. Ada, sun kange dipru neitamai teka tenepmumnyopda, Allahdi sun tep, “Sunda dumsisi nesala kununge,” pepra, er kange dipapu telep kemdiserure. Tonda, sun pe upu deiki cap, sun pe sipyal deiki capdi, “Yesusda nun Deiyo Ngebo kuserure,” pepra nimi gekenai di, katuai pepmumnyopda, Allahdi lyemdoserure. 11 Angeda, Allah er upu neitamai, nabi Yesayadi sekamutopu, tek sisi kurure. Aupuda ake.
‘Erda pio tek sisi ngebo kurura cadi, er tep teka tenepmenge nesala yumada, ne Allahdi tek sisi lyepkamne. Angeda nong kupkamra cadi, sundi teka tenepmengopda, amenda taru, ‘Uo, nun tali kecapu teka teneramupu’ tenen, sun dipru pu pio men jenkamsere. Tek sisi Allahdi anesala lyepkamre. Atep, ‘Uo, tali kecapu teka tenepmupke’ tenen, ali pio men dangkamenge.’ (Yesaya 28:16)

12 Aupu neitamai di, “Ware nesala do yuma,” pepkada tali tep men pepu. Gume, nun Yahudi yala nesala pe, sun Yahudi yala gum nesala peda utopu teneserure. Nun Ila Deiyo Ngebo Allah, erda tenpu ngebo pua. Nesala ban-ban yuma utopu, ‘Erdi melipra lyemdonkamser’ tenen, er sipu pepra, er tep moronung nesala yumada, telep kupra weika di melimserure. 13 Ukuserya deiyoda, akapmare. Pumun taru nabi Yoeldi aupu sekamu.
‘Ware nesala do yuma, ‘Allah erdi lyepkamsere’ tenen, nun Deiyo Ngebo er sipu pepra, er tep moronung nesala yumada, tek sisi Allahdi lyemdonkamre.’ (Yoel 2:32)

14 Ange tep nengeda, mambul upu ton pepsene. Nesala ban-ban yuma utopu kununge. Angebo Yesus tep kapul men teka tenepmengopda, ware kupra, ‘Erdi lyepkamser’ tenen, er si pepra moroptenge do? Gume. Tonda, yuk nengdi, anesala tep, Yesus er si cap, er upu cap kapul men peterepmengepa, men gekepmenge taruda, ware kupra er tep teka teneptenge do? Tonda, yuk nengdi, er upu kapul dopra men peterep embange taruda, Yesusdi nimi lyemna tep, er kai telep upuda ware kupra gekeptenge do? 15 Tonda, sun peterembana deiyo neng tep, yuk nengdi, ‘Sun peterep embankameng’ tenen, aneng sun melimna keca cap, melipra men doproipmengedi, aneng dopra men dokotepmengopda, ware kupra peterep embetenge do? Gume, ange yuma men kuptenge. Allah upu neitamai sekeipseitopu,
‘Allahdi nimi lyemna tep, er kai telep upu peteremna tep, aupu dopra duyasenge nengda, sun yan peda urasin pio telep kurure, tenenupe.’ (Yesaya 52:7)

16 Uda, Allahdi nimi lyemna tep, er kai telep upu dopra peterep embarami dinin, Israel nesala yumada, aupu tep teka tenepra men dororami. Angeda, nabi Yesayadi sekeiamu upu deiki kael kemnupe. Aupuda ake.
‘Yesayadi, “Uo naie, kan upuda nundi dopra peteremamepupane, nesala meteka dipu teka tenenunge.” Yesayadi pepu.’ (Yesaya 53:1)

17 Ange tep nengeda, nun kaele. Allah er kai telep upu, nimi lyemna tep pesere upuda, peteremna nengdi peteremsengepa, gekemepya deiki di, teka tenena deiyo keca tenepra kael kemnupe. Allahdi nimi lyemna tep peserur upuda, Kristus er upu peteremsengepa, gekenupa deiki di, moupra kael kemepedi teka tenenupe. 18 Ange pepmasen dinino, aupu ton asipetepsene. Sun Israel nesalada, Allahdi nimi lyemna tep pesere upu, men gekerami do? Gume, tek sisi yuk nengdi peteremamipa, gekerami. Angeda apepkusen upu deiki di kael kemnupe.
‘Sun peterep embanung neng, sun upuda mutu ban-ban yuma peterep embarami. ^{▼▼peterep embanunge Mazmur 19:4 – Mazmur upu neitamaida, Dauddi, im neitamai kure keca tep pepu. Ada, im neitamai kure keca yumada, tuai nesaladi akeca yuma epmenga deiki di, ‘Allah er pio telep kure keca kael kemnunge’ tenen, pepu. Dinino, Paulusdi, abuku Roma neitamaida, Allah upu peteremenge nesala tep teneamudi, Mazmur upu dopra peterepu.} Sun upuda, ‘Mutu sirik, im sirik kunge nesala yuma gekenkameng’ tenen, konum peterep embanunge.’ (Mazmur 19:4)

19 Ton cap asipetepsene. Sun Israel nesalada, Allah upu gekerami dinin, ‘Deiyo ake’ tenen, moupra men tenerami do? Gume, gekerami dinin, Allah upu neitamaida, apepkusen upu ton akapmare. Menmena ngeda, Musadi aupu sekamu.
‘Sun Israel yala nesaladi, yuk bura tara utopu, karen mutu utopu kunge nesala tep, ‘Sunda tali neng pua,’ tenepra perum dinino, nedi anesala tep telep kweipnyopda, sun Israel yala nesaladi, ange epmumnyopda, sundi, ‘Uo, yuk yala nesalada, ware atep telep kweipre do?
Gume, nunpuda telep kweipsetudi, lyepsetue’ tenen, mali kange doupra, sun yuk mutu nesala tep, yu tenepra dipru wilipra kunkamrume. Ange utopu, ne Allah kune keca moupra kapul men gekenung nesala dinin, nedi anesala tep telep kweipnyopda, sun Israel nesaladi, ‘Uo, ware keca deiyo tep do?’ tenen, sun yuk mutu nesala tep yu kuprepa, mali kange dounkamrume. Ne Allahdi pepsene.’ (Ulangan 32:21)

20 Tonda, nabi Yesayadi sun Israel yala gum nesala tep, sekeipu upuda ake.
‘Allahdi pepu. ‘Nun cap, Allah cap, dipru dukdongopra kikiman kutepe’ tenen, putaramupa, men er peteramnei nesala kunung dinin, ukutaruda, anesala ne upu kael kepnengopda, ne nyapu sisa konum kununge. Tonda, sundi, ‘Uo Allahdi melipra lyepsetue’ tenen, men mororamnei nesala kurami dinin, ‘Anesaladi ne kune keca kael kepkamneng’ tenen, ne pedi konum katuai keipdasipa, sun anesaladi ukutaru ne tep konum moupra kael kemnenunge. Ne Allahdi pepne.’ (Yesaya 65:1)

21 Dinino, nabi Yesayadi Israel yala nesala tep, aupu sekeipu.
“Ne Allahdi sun Israel nesala tep pepsene. ‘Anesalada ne nyapu kungepa, nedi melimkamne’ teneramsidi, ‘Ne damai yankameng’ tenen, ne buru sun damai yangdisenun dinino, sunda balila weik nesala kumumdi, ne upu gekena gum di, ne tep yanitamnapu kunerume.” Allahdi pepu. (Yesaya 65:2)

Ange tep, ne Paulusdi pepsene. Israel nesaladi Allah er upu gekenung dinin, tupa-tupa balila kupmengedi, yanitamnapu kununge.