Rom 12 | XteSC | STEP | Ne kayapu, mali kunupa tep, Allahdi adipapu tali wenepra poptapsetu dinin, ila di bicau teneserure. Bicau teneseredi, pio telep kupra melimserure. Ange tep nengeda, pumun taru Allah er si eremna tep gam keca popra kareramitopu, ‘Sun kange dipru cap, nong cap yumada, Allah tep karepmumdi, dumsisipu kunkamrum’ tenen, puto di pepsene. Ukunkamrum ngeda, tali upu deikipu peptapra, nong bol deiki utopu kuna gum dinin, sun kange dipru neitamaida, tek sisa pio dumsisipu kumumdi, ‘Allah er pel dopra, er sipu eremkamep’ tenen, kunkamrume. Ukupra kupmum pangeda, Allahdi kange derinkamsere.

Romans 12

“Sun kange dipru cap, sun nong yuma capda, adipapu Allah tep karenkamrume,” pepu upu

1 Ne kayapu, mali kunupa tep, Allahdi adipapu tali wenepra poptapsetu dinin, ila di bicau teneserure. Bicau teneseredi, pio telep kupra melimserure. Ange tep nengeda, pumun taru Allah er si eremna tep gam keca popra kareramitopu, ‘Sun kange dipru cap, nong cap yumada, Allah tep karepmumdi, dumsisipu kunkamrum’ tenen, puto di pepsene. Ukunkamrum ngeda, tali upu deikipu peptapra, nong bol deiki utopu kuna gum dinin, sun kange dipru neitamaida, tek sisa pio dumsisipu kumumdi, ‘Allah er pel dopra, er sipu eremkamep’ tenen, kunkamrume. Ukupra kupmum pangeda, Allahdi kange derinkamsere.

2 Tonda, sun teka men tenenge nesaladi kuramenga utopu, tupa men kunkamrum dinin, Allahdi sun mali kange tenenange yuma tamupseredi, dipru ukupunge punupra kareserya deiki di, sun kun keca yumada, teleppu kunkamrume. Sun kange dipru ukupungepu konum kapsere pangeda, Allahdi, ‘Ukunkamenge,’ tenesere kecapu, moupra kael kemkamrume. Ada, ‘E, tek sisi telep kun kecada ake. Ukupmepepa, Allahdi kange derisere keca ake. Mali keca tenpu pe men kuredi, dumsisi kun keca ake, kael kemkamrum’ tenen, pepsene.

3 Uda, ne kayapu sun yuma tep, aupu ton pepsene. Allah bicau tenepneudi, er kange dipapu meliamneua deiki di pepsene. Ware nesala do yuma, sundi sun pe kange dipapu eremdidanada mali tep, ukuna meme. ‘Neda ila ngebo,’ tenena gum dinin, sundi Allah tep teka tenepmumpa, erdi teka tenena deiyo keca tapakra kareamseua utopu, sun kangeda amutara bukmumdi, moupra yuk-yuk tenedankamrume.

4 Uda, ukupmanto upu ton pepkusene. Nun yumada, nong tenpupu kapseu dinin, yan cap, buru cap, giso cap akeca-keca yuma yuk-yuk akapseua deiki di, pel yala yuk-yuk talepra donupe. 5 Ange utopu, Kristus cap dipru dukdongopra kikiman kunup nesalada, yuk-yuk yala nesala weik kunup dinin, Kristus er nong tenpu utopu dukdongopseupa, kunupe. Dipru wilipra yuk-yuk men kunup dinin, nong tenpu dukdongopra amsepu kunupe.

6 Allah bicau tenepseudi, er kange dipapu, ‘Angeboda apel donkamnere, angeboda yuk yala pel donkamnere,’ teneamseutopu, er Lek Sambaladi pel dona deiyo keca ^{▼▼pel dona deiyo keca – Allah er Lek Sambaladi kareserur pel dona deiyo keca kael kemna tep nengeda, Efesus 4:11-13, tonda 1 Korintus 12:4-11 epra kael kemkamrume.} yala yuk-yuk karepseupa, pel yuk-yuk talepra donupa cadi, Allahdi ton ngebo tep, “Amenda kupkamre keca cap, ne pene upu cap, lap pena cap tep, aupu peipkenepa, lap penkamrume,” pepra, apel dona deiyo keca karepyopda, angebodi er teka teneretopu, ‘Allah er upu lap pena cap, amenda kupkamre keca lap pena cap tep, apelpu talepra donkamre’ tenen, wepra derirure.

7 Allahdi yuk ngebo tep, nimi makuna tep, melimna deiyo keca karepyopda, angebodi yuk nesala sun putan keca tep, makupra pel doredi kunkamre. Allahdi er upu peteremna deiyo keca karere ngebodi, Allah upu peteremna pelpu talepra donkamre. 8 Allahdi yuk ngebo tep, yuk nesala sun dipru kwa dimna deiyo keca karepyopda, angebodi yuk neng tep, sun ikin kunkameng taruda, erdi sun dipru kwa dimnapu kunkamre. Allahdi yuk ngebo tep, ‘Yuk nesala sun putan keca tep melipra karenkamre’ tenen, akeca-keca weika di angebo kareprepa, erdi adeiyo keca dopyopda, angebodi yuk neng tep, kange deipra sun putan keca weika di makupra karenkamre.

Uda, Allahdi yuk ngebo tep, nimi deiyo ngebo kunkamra tep, ‘Nimi deiyo talepra kunkamre’ tenen, nimi deiyo neng kepra talepra kuna deiyo keca kareprepa, angebodi tamna pio gum di, nimi deiyo pelpu talepra, telep kupra donkamre. Utopu, Allahdi yuk ngebo tep, ‘Angeboda, yuk neng mali kupmenga peda, adipapu men wenepkamre dinin, kaukepredi bouna di melimkamre,’ tenepredi dipru boun kuna deiyo keca kareprepa, kange deiprap, apelpu talepra doredi, yuk nesala tep bicau tenepra dipru kwa dinkamre.

“Yuk nesala tep, bicau tenepra makunkamrume,” pepu upu

9 Uda, sundi, ‘Yuk nesala yuma tep, bicau tenepra makunkamepe,’ pepra mawa di tali upu peptapra, men kunkamrum dinin, tek sisipu yuk nesala tep pio bicau tenepra melimkamrume. Tonda, mali kun keca yala-yala yuma tep, ‘Angeda pio nun songe’ tenen, tamkamrume. Mali keca tenpu peda talepra men kunkamrume. Telep kun keca yala-yala yuma tep, akecapu talepmumdi kange deipra dumsisipu kunkamrume.

10 Sundi, yuk nesala yuma tep, ‘Ne weit yapu utopu kununge’ tenen, dipru karedamumdi, kunkamrume. Pio men tamdankamrume. Yuk neng tep, ‘E, sunda mambul weik dinin, nepuda yambul mambul ngebo kunune,’ tenemumdi, yuk nesala sun amutara kumumdi, anesala tep erepra deipmumdi, gispal donkamrume. Sun yumadi, sun kayapu nesala yuma tep, kange deipra gispal dodankamrume. 11 Ataru-ataru yumada, ‘Dabal kunerya tep, dakwapye’ tenen, tali kange doupra men kunkamrume. Ange pio gum dinin, sun kunkamrum taru neitamai yumada, ‘Adonkamne pelda, ne Deiyo Ngebo Yesus tepapu donkamne. Neda er pel melimna ngebo kunune,’ tenepra er pelpu donkamrume. Ukumumdi, Yesus er amutarapu dombamumdi, er pelpu kange deipra pio donkamrume.

12 ‘Allahdi melimkamner’ tenen, ketenepra dinapu kunkamrum taru yumada, kange deipra pingpingapu kunkamrume. Ikin kupserepa, kange mun kange doupmum taru yumada, ‘Uo, angeda adipapu menmena gum kupnetue,’ tenena gum dipapu, ‘Akapmanera peda, teleppu kunkamne,’ tenepra, bouna dipu kunkamrume. Allah morona yala-yala yuma tep nengeda, tamna gum di, pio Allah moronapu kunkamrume. 13 Tonda, Allah tep teka tenengedi, er nyapu kunge nesala yuma tep, sun putare keca gum kuprepa, ikin kange doupra kungopda, sun talemum keca neitamai di bokra, anesala tep melipra karenkamrume. Tonda, nimi bo neng yuma cap, sun kapu nesala yuma cap tep, sun ati buplan pakeipmumdi, “Telepe,” pepra namdonkamrume. Ange utopu, sun kunkamrum mutu neitamai yana kunkameng nimi bo nesala yuma peda, telep kupra makunkamrume.

14 Yuk nengdi sun teka teneprum nesala tep, ‘Nun songe’ tenen, sun nong deiki ikin keca deipsengedi, mali upu pepsenga peda, sundi ka tamupra mali upu pena gume. Sundi aneng tep, ‘Allahdi telep kudinkamsere’ tenen, “Allah moronkamsepe,” pepra, telep upupu tamupra penkamrume. Sundi aneng tep, ‘Allahdi sun tep mali kweiptue’ tenen, sun nong deiki mali upu pepra, men derinkamrume. 15 Sun kange deipra pingpinga di kunge nesala tep nengeda, sun cap kikiman kange deiprap kunkamrume. Sun kange mun kange doupra engenge nesala tep nengeda, sun cap kikiman engepra kunkamrume. 16 Sun cap, dipru dukdongopra tenpu kange doupra, sun kikimanpu kange deipra bouna di kunkamrume. ‘Neda ila ngebo kunune’ tenen, sun pe kange erepdamumdi, gemenapu men kunkamrume. Ange gum dinin, tali kankan kunge nesala cap, mambul gum neng cap, dipru bouna di telep kupra kikiman kunkamrume. ‘Neda pio mambul ngebo’ tenen, sun pedi, sun pe tep kange men eremdankamrume.

17 Yuk nengdi, sun tep, ikin keca sun nong deiki deipmengedi, mali kupsenga peda, sundi aneng tep tamupra kwang men dangkamrume. Aneng tep tamupra mali men kudinkamrume. Yuk nesala yumadi, ‘E, pio telep kunada ake,’ teneramengtopu sun pedi, ‘E, adumsisi kun kecada, nun peda talepra kunkamepe’ tenen, kange moupra kunkamrume. Kange douna gum di, tali lupra kumumdi, mali kuna meme. 18 Yuk nengdi, sun tep, ‘Nun cap, sun cap kikiman telep kupra men kunkamepe’ tenen, mali kweipsengopda, sun deiyo pua. Angeda aneng sun deiki akapkamre dinino, sun teka tenerum nesala, sun pe deiki akapkamrenge yumada, ‘Gume, deremdana cap, podana cap gum dipapu, nun cap, yuk nesala yuma cap, dipru dukdongopra bouna di, telep kupra kikimanpu kunkamepe’ tenen, pio pe deipra pirirpetenkamrume.

19 Ne kayapu nedi sun tep pio bicau tenesenune. Yuk nesaladi sun tep mali kweipsenga peda, sundi anesala tep, tamupra kwang dangna meme. Ange gum dinin, ‘Allahdi anesala tep wenepredi upu lepsisikra bokeipkamre’ tenen, go tamkamrume. Sundi tamupra kwang dangnapu men kunkamrume. Deiyoda, ake. Ada Allah er upu neitamaida, aupu sekami.
‘Allahdi upepu. “Sun dipapu tamupra kwang dangna meme. Ne dipapu amali neng tep wenepra upu lepsisikra bokeipkamna cadi, neda Kwang Dangna Deiyo Ngebo kunune,” pepu.’ (Ulangan 32:35)

20 Atep sundi kwang men dangkamrum dinin, Allah er upu neitamai sekitopu kunkamrume. Aupuda ake.
‘Yuk nesaladi sun tep, ‘Nun songe’ tenen, poramsenge nesala tep, sun jen keca putapyopda, sundi melipra karenkamrume. Utopu, sun anesala me putapyopda, sundi me gwepra karenkamrume.
Ukupmumnyopda, ange kupmumya deiki di, anengda, ‘Uo, nundi mali kweipmap ngeda yapmatepe. Tek sisi nun dipu mali kweipmape,’ tenepmengedi, ali dangkamenge.’ (Amsal 25:21-22)

21 Atep, yuk nengdi nun tep bisbisa kapra mali kweipsengopda, nundi tamupra, ‘Kwang daktepedi, anesala tep mali kweiptepe,’ tenena meme. Kwang dangna gum dipapu, kange moupra teleppu kunkamrume. Sun telep kunkamrum keca deiki di, mali kun keca yuma tep bisbisa kamkamrume.