Rom 13 | XteSC | STEP | Uda, ne kayapu, yuk upu ton pepkusene. Tuai mutu nimi deiyo neng kepra kunge nesala yumada, Allahdi nimi deiyo neng erepra derirepa, kununga tep, ware neng do, sun yumada, nimi deiyo neng sun amutara kumumdi, aneng sun penge upupu gekepra dombankamrume. Nimi deiyo neng kemnada, Allah er dipu bokra karerura tep, nimi deiyo neng yumada, Allah erdi erepra derirura deiki di talesenunge.

Romans 13

Nimi deiyo nengdi penge upu gekepra, sun amutara kuna tep pepu upu

1 Uda, ne kayapu, yuk upu ton pepkusene. Tuai mutu nimi deiyo neng kepra kunge nesala yumada, Allahdi nimi deiyo neng erepra derirepa, kununga tep, ware neng do, sun yumada, nimi deiyo neng sun amutara kumumdi, aneng sun penge upupu gekepra dombankamrume. Nimi deiyo neng kemnada, Allah er dipu bokra karerura tep, nimi deiyo neng yumada, Allah erdi erepra derirura deiki di talesenunge. 2 Ange tep nengeda, ware ngebo do yuma, nimi deiyo nengdi pesenge upu tep moupra men gekepredi, ‘Bisbisa kapkun’ tenen, sun upu yanitamre ngeboda, er ukurya deiki, Allahdi erepra derirur keca tep yanirure. Atep, nimi deiyo neng upu tep yanitamenge nesalada, sun kunge keca deiki di, mali kudidanunge. Atep, anesala yumada, sun pedi, sun pe nong deikipu wenemna keca deridanunge.

3 Ange tep nengeda, sun telep kun kecapu talepra kunge nesalada, ‘Nimi deiyo nengdi wenepra popsenung’ tenen, kware men kununge. Dinino, mali-mali kunge nesalapuda, nimi deiyo neng tep, ‘Uo, anengdi wenepra popsenung’ tenen, kware kununge. Ada, ‘Uo, ne kwar dangna gum di, telep kange doupra kutene’ tenen, putarur nesala yumada, adipapu tek sisi telep kun kecapu kunkamrume. Ukumumyopda, nimi deiyo nengdi sun tep, ‘Sunda telep nengpu kununge,’ tenepsengedi, kange deipra gispal donkamsenge.

4 Aupu pepmasena deiyoda ake. Allahdi nimi deiyo neng yuma tep, ‘Sun adeiyo nengdi nesala yuma tep, moupra telep kudinkameng’ tenen, erepra derirura tep, pepmasene. Ange tep nengeda, sun mali kupmumyopda, tek sisi kware kunkamsere. Sun nimi deiyo nengdi, mali kunung nesala tep wenepra ponunge. Ukupra sun apel dona deiyo neng kununga cadi, tali sun pedipapu tenepra men kununge. Tali tep men kununge. Aupu pepmasena deiyoda ake. Allahdi nimi deiyo neng yuma tep uteneamu. ‘Nimidi mali kupmengepa, ne yu kupneryopda, nimi deiyo nengda, ne melimna neng kungedi, mali kun nesala yuma tep, wenepra ponkamenge’ tenen, erepra derirure.

5 Ange tep nengeda, sun yumadi nimi deiyo neng sun amutara kumumdi, sun upupu moupra gekemumdi, kunkamrume pepsene. Ukunkamruma deiyoda, ‘E, mali kupnyopda, wenepra popnenung,’ tenena tep gume. Adeiyoda akapmar dinin, ton deiyoda, sun kange dipru neitamai di, ‘Nimi deiyo neng amutara kunada telepe,’ tenenange yumada, sundi konum moupra kael keamruma tep, ukupra kunkamrume pepsene.

6 Ange utopu ngeda, pemerintah deiyo nengdi, “Pajak tep co bo karenkamserume,” pepra morosenungada, gekepra karenkamrume. Ada tali tep gume. Animi deiyo nengda, Allah er amutara nimi melimna neng utopu kungedi, sun pel don taru yumada, nesala yuma tep talengedi, nimi deiyo neng pelpu donunge. Yuk yala pel ton talepra men donunge. 7 Ware deiyo nesala do yuma tep, sundi, “Amutu kuna tep, nesala yumadi karenung pajak umum ngeda, karepseso,” pepmengopda, adipapu karenkamrume. Sundi, “Abunga dorona tep, pajak tapangna co bo ton karepseso,” pepmengopda karenapu kunkamrume. Ange utopu, nimi deiyo neng yuma akungetopu, ‘Sunda mambule’ tenen, sun amutara kumumdi, sun tep pio moupra gispal donkamrume.

“Yesus Kristusdi doryankamser tumida, damai kupsera tep, bicau tenedamumdi, makudanapu kunkamrume,” pepu upu

8 Sundi yuk neng tep moropmumpa, sun keca co bo do, yuk keca do, karepsengopda, sunda, “Nedi tamupra karepkamken ja,” pepra, tali pertamna gume. ‘Dakwapye, amenda taru pua’ tenen, men kaukemkamrume. Tek sisi sundi karesengetopu, adipapu tamupra pununapu kunkamrume. Tenpu keca ton dipru dakra bouna di, ‘Ne kabo sisa tep, tali gawal daknedi karepkune’ tenen, men karedankamrume. Angeda, nundi yuk nesala yuma tep, pio bicau tenepra, dipru karedanapu kunkamepe. Ada tali tep men pepsene. Allahdi, “Angeda ukunkamrume, angeda men kunkamrume,” peipupa, Musadi sekamu mem upu weik akapmar dinin, aupu yuma deiyo keca mumupra gawal dangna tep nengeda, sundi yuk neng tep, bicau tenepra makunapu kunkamrume. Ukupmumnyopda, mambul upu gawal dangna utopu kunmarume.

9 Allahdi, “Angeda ukunkamrume, angeda pio men kunkamrume,” peipupa, Musadi sekeiamseu mem upuda, yala-yala yuma weik akurur dinino, aupu yuma deiyo kecada, ila mambulnge tenpu kuserure. Ada dipru karedana cap, makudana cap pepu. Uda, “Yuk neng domenge nerapu, tali nyangdana pio meme. Yuk neng, sun talenge keca tep, ‘Uo, angeda, nepu taleptene’ tenen, dipru putaserepa, engena meme,” aupu yuma pepra deiamseu dinin, aupu yuma ila deiyo ngeda pepkusene. Ada, Allah upu neitamai sengamitopu kurure. Aupuda ake.
‘Allahdi upepu, “Sundi sun pe tep kange deipra melimdarumnya utopu, sundi yuk nesala tep, bicau tenepra makudanapu kunkamrume.” Allahdi pepu.’ (Imamat 19:18)

10 Ware ngebo do yuma, yuk nesala tep bicau tenepra makure ngebodi, yuk neng tep mali men kudinkamre. Atep nengeda, aupu pepsene. Musadi sekeiamseu upu weik akapu dinin, aupu yuma deiyo ngeda, nimi tep bicau tenepra makudana kuna keca tep pepsene. Ange yuma talepra kumumdi, telep kupra kumumnyopda, Musadi sekeiamu mem upu yala-yala yuma tep nengeda, gawal dangna utopu konum kunmarume.

11 Yuk nesala yuma tep, dipru karepserepa, makudanapu kunkamrum taru neitamai yumada, ukutaru mambul kusere ngeda, pio tenenkamrume. Ada, nun gonga kepra teka teneamupu taruda, Yesusdi lyepra doryankamser taruda, yambul damai kwamu dinin, ukutaruda, pio damai kunmara tep, nimidi sun mangkau kange doupra, maramenga utopu kurumu nesala yumada, bukroso. 12 Ukutaruda domon upu ton pepkusene. Ada, lukunda ipmarepa, nimi mapmanga berengamretopu, konum kunmara tep, kunungna neitamai di mali-mali kuramenge keca yumada, tapmepedi, dirin kecapu talepra dumsisipu kupbapya deiki di, teng kenengamengtopu kupra kupedi, pio kalengnapu kunkamepe.

13 Ukupmepe dingeda, keteng komuni deiki di telep kuramengtopu, ‘Tali lupra kupkune,’ tenena gum di, dumsisipu kunkamepe. Ada, nimi cap, nerapu cap, gung weik bulupmengedi, tali nyangdaramenge nge cap, nimidi kange yawaramne me jengepa, kange yawaramamre kuna cap, ner upula tali-tali nyangdaramenge nge cap, pio mali-mali kecapu, tali lupra kuramenge nge yala-yala yuma cap, dipru wilimdangedi, kange tenepra, yuk-yuk bongdodange nge cap, yuk neng sun keca tep, ‘Uo, neda angepu kuptene’ tenen, dipru engerenge cap, ayumada men kunkamepe.

14 Amali kun keca yumada, pio men kunkamep dinino, nunda, nimidi ukupu opkal kenengamengtopu, nun Deiyo Ngebo Yesus Kristus cap, kikiman dipru dukdongopra kumum dingeda, Yesus er kuramretopu kunkamrume. Tonda, kapul teka men teneamepu taru di, nun kange dipru neitamai mali keca putaramseu ngeda, kange di ton cap putapserepa tenemumnya peda, pio men kunkamrume. Amali kun keca tep, tupa tenepra men kunkamrume.