Romans 14

Ila di teka tenenge nesala cap, yambula dipapu teka tenenge nesala cap tep, pepu upu

1Uda, yuk upu ton pepkusene. Meteka dipapu teka tenepre ngebo tep nengeda, “Telepe,” pepra, kikimanpu kunkamrume. Angebodi, ‘Uo, angeda ukupra kunyopda, Allahdi wenepkamner do, gum do?’ tenen, tenimtonapu kunung dinin, akeca tep nengeda, nun yumadi tenpu kange tenpu doupra, amsepu men kunupa cadi, akeca yuma tep deremdana cap, upu deiki pangdana cap kunada pio gume. Ayala keca utopunge ton pepkusene. 2Ada, tenpu ngebo er teka tenerya deiki di, jen keca yala-yala yuma tali lupra jeredi, ‘Uo, neda pio mali kupman do, gum do?’ tenen, er kange men tenimtorure. Dinino, yuk ngeboda, er teka tenerur ngeda, puto yambulpu kurura cadi, er kange di, ‘Gume, nepuda, malilya yala yuma jeptene dinin, tu keca yala yumada men jeptene. Tu keca jenada mali kupnune,’ tenerure.

3Utenerur dinino, telep kecapu jerur ngebodi, malilyapu jere ngebo tep, ‘Bicaue, angeboda, melo mi utopu ngebo kurure,’ men tenenkamre. Ange utopu, malilyapu jere ngebodi, tu keca yala-yala yuma cap, akeca-keca yuma cap, jere ngebo tep, ‘Uo, angeboda tu keca yala yuma jerura tep, erda pio mali kurure,’ men tenenkamre. Deiyoda, tu keca jerur ngebo pe, malilya jerur ngebo peda, Allah erdi kange deipudi, konum lyepka tep pepsene. ‘Nimidi jerameng kecada mambul weik kurure,’ tenena gume.

4Atep, sunda ware keca deiyo tep, yuk ngebo er pel melimna ngebo tep, wenepra upu lepsisikra bokeiptum do? Gume, apel melimna ngebo er deiyo ngebo dipapu, “Angeboda pio telepe, angeboda mali,” pepra, upu lepsisikra bokeiptue. Sun tali nengdi upu lepsisikra bongderinada pio gume. Atep, akeca-keca yuma jere ngebo pe, malilya yala jere ngebo peda, teka teneprengedi, dimpepra kikiman dukdongopra kunkamrenge. Angeda nun Deiyo Ngebo Allah, er puto deiki di, melimserya tep, teleppu kupra kunkamrenge.

5Ange utopu, ton ngebodi er tenerya tep, ‘Gume, atumida pio ila mambul dinin, yuk tumida mambul gume,’ tenerure. Dinino, yuk ngebo dingeda, ‘Gume, tumi-tumi yumada mambul gume. Yuk tumi yumada utopu tumi kurure,’ tenerure. Ukunup dinin, ware neng do yuma, sun pe kange dipru neitamai di, ‘Angeda kuptene do, angeda men kuptene do?’ tenen, akeca yuma tep, ‘Telep ngeda ake, mali ngeda ake’ tenen, tenipetepra konum tenepmengopda, konuma, kange di ton cap pio men tenimtonkamenge.

6Uda, tenpu ngebodi, ‘Atumida mambul,’ tenere ngeboda, ‘Ange ukupnepa Allahdi ne tep, kange deipkamner’ tenen, kurure. Tu keca jere ngebodi, tu keca jepkure taruda Allah tep, “Telepe,” pepra mororura cadi, erda, ‘Ukupnyopda, Allahdi kange deipkamnere’ tenen, tu keca jerure. Ange utopu, tu keca men jere ngebo peda, ‘Allahdi kange deipkamner’ tenen, tu keca yala-yala yuma men jeredi, Allah tep, “Telepe,” pepra mororure. Akeca men jere ngebo pe, akeca jere ngebo peda, sun abutene neng yumadi Allah er gispal dopra kururunge.

7Ware nesala do yumadi, nun pe kange deridana tep men gam kunupe. Tonda, nun pe yuk men denupe. 8Aneng yumada, Allah er mawa nesalapu kupepa, er dipapu taleserura cadi, gam kunkamep taru pe, depkamep taru peda, ‘Ukupnepa, Allahdi kange deipkamner’ tenen, kunupe. Tonda, ‘Ne kune keca yuma deiki di er sipu eremkamne’ tenen, pio pe deipra pirinupe. Atep nun yumada, gam kupe taru pe, depkamep taru yuma peda, er dipu taleserya deiki di, er mawa nesalapu kunupe.

9Uda, er mawa nesalapu kunupe pepmasen deiyoda, tali tep men pepsene. Kristus depu dinin, kange di tamupra gam buku. Ada, ‘Konum deramenge nesala pe, gam tupa kunge nesala peda, sun yumada, nedipu talenedi, sun Ila Nimi Deiyo Ngebo erepra kunkamne’ tenen, depu dinin, tamupra gampu kurure. 10Ange tep nengeda, sundi yuk teka tenenge nesala yuma tep, ware keca deiyo tep, “Sunda mali kununge,” pepra wenepmumdi, upu lepsisikra bongdirum do? Tonda, ware keca deiyo tep, sun teka tenepidi kunung nesala, sun weit yapu utopu neng tep, ‘Gume, anengda, nun kunup keca utopu men kununga cadi, nunda ila mambul neng kunup dinin, sunda mambul gum neng kununge,’ tenerum do?

Gume, ne kayapu, Allahdi nesala ban-ban yuma tep, upu lepsisikra bokeipkamser taruda, er Upu Lepsisikra Bongdina Deiyo Ngebo, er telep bungna keca deiki bukrepa, nun yuma acapu yana tekmepedi, nun kuramnup keca tep lap pepmepepa, erdi, “Ange telepe, angeda mali,” pepra, upu lepsisikra bokeipkamsera tep pepsene.

11Allah upu neitamai nabi Yesayadi sekeiamu upu ton lap pepkusene. Aupuda ake.
‘Allahdi pepu, “Ne tek sisi kunetopu, apepkusen upuda amenda taru tek sisi kupkamre. Amenda taru ware mutu nesala do, sun yumadi ne gispal dona cap, ne amutara kunge nesala yuma cap tep, gutam tu dipdongopra ne sipu eremkamnenge. Sun yuma ukungedi, ne tep, upenkamenge. ‘Tek sisi angeboda, Allah kurure. Nun yumada mali nengpu kunupe,’ pepra, ne si eremkamnenge.” Allahdi pepu.’ (Yesaya 49:18; 45:23)

12Apepu upuda, akapseua cadi, aupu deiki di kael kemnupe. Nun tuai nesala yumadi kuramupu keca yuma tep, lap pepmepepa, Allahdi, “Ange telepe, angeda mali,” pepra upu lepsisikra bokeipkamsere.

13Ukupkamsera tep nengeda, nun pedipapu, nun kayapu neng yuma tep, “Kanda telep ngebo, kanda mali ngebo,” pepra, upu lepsisikra men bongdidankamepe. Ange gum dinin, pio moupra tenenkamrume. Ada, ‘Uo, ne kabodi ne kune keca epnerya deiki di, er dipru gidorepa, mali kuprur’ tenen, kange moupmumdi, dumsisipu kunkamrume. Mali kun keca tenpunge peda pio men kunkamrume. 14Ne Paulusda, nun Deiyo Ngebo Yesus cap, dipru dukdongopra kununa tep, aupuda pepsene. Ada tek sisi ne kaele. Ada, ne kange pio ton men bongtonerure. Ware yala jen keca do yumada, teleppu kurure. Akeca-keca yuma dopra jemepya peda, Allahdi, ‘Angeda mali,’ men teneserure.

Ange pepmasen dinino, ware ngebo do yuma, er kange dipru neitamai di, ‘Ajen kecada, mali kecapu kurura tep men jeptene,’ tenepyopda, angebodi ukupra tenerura cadi, er dipu akeca men jeptue. Er tep nengeda, ajen kecada, mali keca utopu kurure. 15Dinino, sundi jen keca tenpu yalangepu jepmengepa, sun kayapudi, ‘Uo, angeda men jepmatenge’ tenen, sun kayapu neng dipru pu jerure. Atep nengeda, ‘Allah erdi derepserure’ tenen, mali kange doupmenga deiki di, pio bicau tenen, moupra men makudarume. Sundi jen keca yala-yala yuma jemumnya deiki di, yuk neng sun teka tenepra kunge nengda, sun weit yapu utopu neng kununga cadi, sun kange dipru mali kudina meme. Sun weit yapu utopu nesalada, tali nesala gume. Ada Kristusdi, ‘Anesala yumada lyepkamne’ tenen, depka cadi, sunda ila mambul nesala kununge. Atep sun weit yapu utopu nesala tep, sundi mali kudina pio meme pepsene.

16Sundi, ‘Ajen keca yuma tali lupra jena telepe,’ tenerum dinin, sun ukupmumya deiki di, yuk neng epsengedi, mali kupmengopda, yuk nengdi sun tep, “Mali kudina deiyo nengda, sun ca,” pepra, pesenunge. Atep, ‘Nun deiki aupu pepsenung’ tenen, kange pio moupra kunkamrume. 17Aupu pepmasena deiyoda ake. Teka tenepmepepa, Allahdi nun kange dipru taleserepa, er upu gekepra dombanupa neitamai di, ila mambul kusere ngeda, jen keca cap, me cap, tali lupra jena gume. Angeda gum dinin, ila mambul ngeda, Allah er Lek Sambala melimserya deiki di, dumsisi kuna cap, nimi yuk neng tep, bicau tenena cap, tonda nimi tep pingpinga di kange deipra bouna di kikiman kuna cap, ayumada ila mambule.

18Ware nesala do yuma, arup taru pepmasentopu, kupmengedi, Kristus er amutara kupra, er tep pel doramenge pangeda, Allahdi sun tep kange derinkamsere. Tonda, yuk neng yumadi sun tep, “Sun kunge keca yumada, telep pua,” pepra, gispal donkamsenge. Atep nengeda, Allah er Lek Sambala melimserya deiki di, dumsisi kuna cap, yuk neng cap kange deipra bouna di dukdongopra kikiman kuna cap, pingping kange deipra makudana cap, ayumada ila mambule pepmasene.

19Apepmasen upu yuma tep nengeda, aupu ton pepkusene. Tumi-tumi nun yumadi, ‘Ware telep keca kutepepa, nun teka tenenup neng yumadi, kange deipra bouna di kikiman kunkamep do?’ tenen, pio pe deipra piripetenkamrume. Tonda, sun yumadi, ‘Teleppu kupedi, nun dipru kwa dipdapepa, nun kange dipru cap, nong cap yumada, wisipkamser’ tenen, piripetenkamrume.

20Allahdi yuk neng, sun dipru neitam telep pel konum domu ngeda, sundi akeca-keca yuma tali lupra jemumnya deiki di, mali men kupra derirume. Ada, yuk nengdi, ‘Ange jepmepyopda, Allah derepserure,’ tenenung dinin, sundi, ‘Gume, ayuma peda, tali lupra jena telepe’ tenen, jemumnya deiki di, aneng sun kange tenenange yuma mali kweipmumpa, sun mali kupmengopda, ada pio mali kurume pepsene.

Allah er kangeda, ‘Nimida jen keca yala-yala yuma, tali lupra jena telepe,’ tenerure. Dinino, yuk nengdi, ‘Ajen kecada malinge,’ tenepmenge dinin, sundi tali lupra jemumnya deiki di, sun kange dipru neitamai mali kweipmumpa, sundi mali kupmengopda, ada mali kuruma tep pepsene.

21Telep ngeda, bisam tu jena do, nimi kange yawaramne me, anggur me mokon jena do, ware kun keca yala-yala yuma, ukupmepya deiki di, sun teka tenenge nesala epsengedi, ‘Mali kange doupmengedi, anesala sun mali kupnung’ tenen, pio kange moupra teleppu kumumdi, angepu talepra kunkamrume. 22Sun yumadi, Allah tep konum teka tenepmumdi, yuk-yuk moromumya deiki di, ‘Angeda jena telepe, angeda jena mali,’ tenenkamrume. Konum moupra tenepmum dingeda, tali kange doupra dimpeprappu kunkamrume. Allahdi nun tenenup keca yuma, er dipu konum kael kemserura cadi, yuk nesala tep, “Neda, ukununa cadi, sunda ukunkamrume,” pepra lap pena cap, peteremna cap pio men kunkamrume.

Ware nesala do yumadi, sun dipru kange neitamai di, ‘Ange jena telepe, angeda jena meme,’ teneramengtopu, angepu kupmengedi men tapmengopda, sun dipru kange neitamai tenenange yumada, ‘Uo, ne mali kupmane’ tenen, mali kange men dounkamenge. ‘Angeda telepe’ tenen, teka teneramengtopu, telepngepu kununga cadi, anengdi sun mali men kudidanunge. Angepu kange deipra teleppu kunkamenge.

23Dinino, sun dipru kange neitamai di, ‘Ajen keca jepnyopda, Allahdi wenepkamner do, gum do?’ tenen, kange bongtonapu kuserur dinin, tali lupra jepmumnyopda, malipu kunkamrume. Deiyoda ake. Sundi, ‘Ajen kecada telepe’ tenen, teka teneptumdi, akeca dopra jepmumnyopda, telep kunkamrum dinin, kange boktopserepa, ‘Dakwapye, malinge peda, tali lupra jepkune’ tenen, tali lupra jepmumnyopda, mali kunkamrume. Ange utopu, ware kun keca do yuma tep, nun kange dipru neitamai di, ‘Angeda tek sisi telep’ tenen, teka men tenepmepedi, ‘Mali kuptepya peda, tali lupra dakwapye,’ tenenada, malipu kunkamrume. Atep ukunada meme pepsene. Ne Paulusdi pepsene.