Rom 15 | XteSC | STEP | Nun tek sisi ila di teka tenepmepupa, nun kange dipru wisipseupa, dimpeprap kunup nesala yumadi, sun puto boun kunge nesalada, yambula dipu teka tenepmenge dinin, ‘Ange kutepe do, gum do?’ tenen, kange tenimtonapu kunge nesala tep makunkamepe. Ada, nundi anesala tep menmena deremdana gum dinin, bouna dipapu melipra kunkamepe. Tonda, nundi nun pe tep kange deipra putaserur kecapu, nun pe tepapu tenepra kange tenepra men kunkamep dinin, sun yambula di teka tenenge nesala tep, nundi, ‘Ware kuptepya deiki di, anesala tep, telep kupra makuptepepa, sun kange derinkameng do?’ tenen, moupra kunkamepe.

Romans 15

“Nundi yuk teka tenena nesala yuma tep, ‘Ware kuptepya deiki di, sun tep telep kupra makuptepe do?’ tenen, kunkamepe,” pepu upu

1 Nun tek sisi ila di teka tenepmepupa, nun kange dipru wisipseupa, dimpeprap kunup nesala yumadi, sun puto boun kunge nesalada, yambula dipu teka tenepmenge dinin, ‘Ange kutepe do, gum do?’ tenen, kange tenimtonapu kunge nesala tep makunkamepe. Ada, nundi anesala tep menmena deremdana gum dinin, bouna dipapu melipra kunkamepe. Tonda, nundi nun pe tep kange deipra putaserur kecapu, nun pe tepapu tenepra kange tenepra men kunkamep dinin, sun yambula di teka tenenge nesala tep, nundi, ‘Ware kuptepya deiki di, anesala tep, telep kupra makuptepepa, sun kange derinkameng do?’ tenen, moupra kunkamepe.

2 Nun yumadi, yuk teka tenenge nesala tep, ‘Sun kange dipru wisiprepa, ila di teka tenenkameng’ tenen, sun telep kange derin keca, kupmepya deiki di, kange deipra teleppu kunkamenge. Atep, nundi, yuk teka tenenge nesala yuma tep, ‘Ware kuptepya deiki di, sun tep telep kupra makuptepe do?’ tenen, kunkamepe.

3 Ukunkamepa deiyoda, pepkusene. Ada, Kristus er peda, ‘Ne pe kange derinerur kecapu kunkamne,’ tenepra, men kuramnga cadi, nun peda Kristus er kuramutopu kunkamepe. Kristus, er kuramu ngeda, er pe tepapu men kuramu dinin, Allah upu deiki sekamitopu kuramu. Aupuda ake.
‘Mali nengdi Allah kan tep, mali upu pepra, kan nong deiki derikenge upupu, ne nong deiki peda mali upu pepra derinenunge.’ (Mazmur 69:9)

Aupu sekeiamutopu, Kristus kuramu. 4 Sun menop taru sengami upu yumada, nun kael kemna cap, peteremna cap tep sengami. Ada, Allahdi nun tep, ‘Ukupra kunkamenge,’ teneamseue. ‘Allah upu yuma gekepmenga deiki di, sun dipru kwa diprepa, sundi, ‘Ikin kupmaserya peda, Allah tek sisi lyepra melimkamsere’ tenen, tamna gum, pio pe deipra kunkamenge. Ne Allah tepra men kunkamnenge,’ teneamseudi, er upu pediramupa sengami.

5 Uda, ikin keca kapserya peda, tamna gum di, pio pe deipra pel dona deiyo keca cap, dipru kwa dimna deiyo keca cap, kareserya deiyo ngeboda, Allah er pua. Sun tep tenepnedi, Allah tep morosenun kecada pepkusene. Ada, ‘Allahdi sun Roma mutu kungedi teka tenenung nesala yuma tep, Allahdi sun kange dipru neitamai, pel dopredi, sun kange tenenange dukdongoprepa, sundi Kristus er upu gekepra, er tepapu dombankameng taru yumada, telep kupra kikimanpu kunkameng’ tenen, ne Paulusdi, sun tep Allah morosenune.

6 ‘Allahdi sun kange tenena tenpu karenkamsere,’ tenen, putanerura deiyoda ake. Ada, ‘Sun dipru dukdongopmengedi, tenpu kange doupra kikiman utopu kupra kungedi, nun Deiyo Ngebo Yesus Kristus, er nai bo Allah tep, ila di gispal dongedi, er sipu eremkamenge’ tenen, ne Paulusdi sun Roma mutu kurumu nesala tep Allah morosenune. Ne Paulusdi pepsene.

7 Ange tep nengeda, aupu ton pepsene. Kristusdi, sun Roma mutu teka tenemum nesala yuma tep, dipru karepseudi, ‘Anesalada ne nyapu sisa kunkameng’ tenen, dopropseu. Ukupseua tep, sundi sun kikiman kumum nesala yuma tep, ‘Nun kayapu’ tenen, dipru karepserepa, kange deipdamumdi kunkamrume. Ukunkamruma deiyoda, ake. Ada, ‘Nun yuma dipru karepserepa makudapepa, yuk neng epsengedi, nun nai Allah tep, gispal dopra er sipu eremkameng’ tenen, kunkamepe pepsene.

8 Apepmasen ngeda, dukdongopra lap pepkusene. Ada, Kristus tuai mutu yana kuramudi, nun Yahudi yala nesala meliamseua deiki di, katuai kupseu kecada pepkusene. Ada, Allahdi Yahudi yala nesala, sun pumun taru kurami nesala, nun apu yapu tep, “Ukunkamsene,” pediramu upu yuma konum kupu. Akuramunge deiyoda, ake. Allahdi, Yahudi yala nesala tep, “Ukunkamsene,” pepra pedina upu peserenge yumada, ‘Tek sisipu kurure, tenenkamenge’ tenen, Yesus Kristus tuai mutu yaudi, nun Yahudi yala nesala tep weika di meliamseu.

9 Tonda, Kristus tuai mutu yana kuramunge deiyoda, ake. Ada, sun Yahudi yala gum nesaladi, “Uo, Allah tali lupra wenepsetudi poptapsetu dinin, bicau teneamseudi, lyemna keca konum keteneiamseu,” pepra, ‘Yahudi yala gum nesala yumadi, Allah er sipu eremkameng’ tenen, Kristus yaue. Kristusdi, Yahudi yala gum nesala tep tenepra, pel doramu ngeda, menop taru Allah er upu neitamai sengami upu utopu kurure. Aupuda ake.
‘“Ne nai Allah, Yahudi yala gum nesala kankan kunkamne taru neitamai yumada, nedi Allah kan si tep, pio eremkamne. ^{▼▼eremkamne – Yesus kapul men yau taru, pumun taru nabi Samueldi aupu peamu dinin, Paulusdi aupu dopra Yesus tep lap pepu. Ada, ‘Yesusdi Yahudi yala gum nesala kankan kuramu taru neitamai yumadi, Allah er si eremamnga deiki di, sun Yahudi yala gum nesala, yuk nesala yala-yala yumadi Allah tep kael kemami,’ tenepudi pepu.} Kan si eremna tep, mut penkamne,” pepu.’ (2 Samuel 22:50)
10 Tonda, Allah er upu neitamai di aupu ton seki.
‘Sun Yahudi yala gum nesala cap, Allahdi, ‘Ne nyapu sisa kunkameng’ tenen, konum weamu nesala, Yahudi yala nesala cap, kikimanpu kange deipra kunkamrume,’ pepu. (Ulangan 32:43)
11 Tonda, yuk Allah upu neitamai aupu ton sekami.
‘Sun Yahudi yala gum nesaladi, Allah Yahweh er si tep, eremengedi er tepapu gispal dopra er si eremkamrume. Sun nesala ban-ban yumadi, Allah tep, er si eremumdi pio mut penkamrume.’ (Mazmur 117:1)

12 Ange utopu, nabi Yesaya er sekeiamu buku neitamai di aupu pepu.
‘Yesayadi pepu, “Nun apu bo Isaidi deipupa, dadeipdanen yakarami nesaladi deiki di deipmengepa, co gapu youramretopu kupkamre ngebodi sun kan-kan yana tekamre.
Nun damai yana tekre dingeda, nesala ban-ban yuma tep, Ila Nimi Deiyo Ngebo kepredi, sun yuma talenkamre. Ukuprepa, sun Yahudi yala gum nesaladi er tepapu, ‘Erdi nun lyemdonkamsere’ tenen, ketenepra dinapu kunkamenge,” pepu.’ (Yesaya 11:10)

13 Uda, ne Paulusdi sun Roma mutu neitamai teka tenepra kurumu nesala yuma tep pepsene. Allah er melimserya deiki di, nundi er tep, ‘Tek sisi telep kupra deipseredi, lyepseryopda, pio melimkamser’ tenen, ketenepra dinapu kunupe. Sun Roma mutu nesala tep, Allah morosenun kecada pepkusene. Ada, sundi sun kange dipru er deikipu deiprumudi, teka tenemum pangeda, ataru Allahdi sun tep, mambul kange douna gum di, kange deipra telep kuna deiyo keca cap, pingping kuna deiyo keca cap, ‘Weika di kareserepa, sun dipru neitamai diningkamser’ tenen, ne Paulusdi sun Roma mutu kurum nesala tep Allah morosenune.

Tonda, apepmasen kecada, Allahdi er Lek Sambala kareserepa, er puto deiki di melimserepa, sun Roma mutu nesala yumada, ‘Tek sisi Allah er dipapu, telep kupra deipseredi, lyepseryopda, pio tep melimkamsere’ tenemumdi, ‘Ketenepra dinapu kunkamrum’ tenen, Allah morosenune. Ne Paulusdi pepsene.

Paulusdi, “Neda, Yahudi yala gum nesala tep, nimi lyemna upu dopra peterembanune,” pepu upu

14 Uda ne kayapu, yuk upu ton pepkusene. Ne kaele, sun Roma mutu kurum nesalada, telep kupra kurume. Sunda, weika di konum kael kemamrumdi, sun pe mutu nesala tep, telep kupra peteremdarume. Yesusdi peteremamseu keca yumada, sundi moupra kael keamruma cadi, sun kael kemna kecada, men sukmasere.

15 Asurat neitamai bokra sekeipsisi upuda, ‘Lape pepnepa, sundi kange di ton cap tenepkameng’ tenen, kwar dangna gum di, kika deipra sekeipmasene. Ukupmasena deiyoda ake. Allahdi ne tep bicau teneamneudi, er pe kange dipapu apel dona deiyo keca karepneua cadi, aupu puto di pepmasene. 16 Allahdi bicau teneamneudi ne tep, ‘Apel donkamre’ tenen, wepra deiamneudi pel dona deiyo keca kareamneu ngeda, lap pepkusene. Ada, ‘Paulusda, Kristus er pel melimna ngebo kuredi, Allah er si eremna ati pumbon talepra pel dona deiyo neng, imamdi Allah er upu peteremengetopu, Paulus peda nimi lyemna tep, Allah er kai telep nimi lyemna upu dopra, Yahudi yala gum nesala kunge mutu peterembenkamre’ tenen, Allahdi wepra deipneue.

Yahudi yala gum nesala kunge mutu neitamai dokotepneua deiyoda, ake. Ada, ‘Allah er Lek Sambaladi, Yahudi yala nesala gum dinin, teka tenenkameng nesala yuma tep, telep kweipredi, Allah er mawa nesala kunkameng’ tenena tep, wepra deipkamre. ‘Anesala wepra derinkamra deiki, Allahdi sun tep kange derinkamre’ tenen, Allahdi ne Paulus tep wepra deipneu. Uda, pumun taru Allah er gispal dona tep, gam keca popra Allah tep kareramipa, Allahdi anesala tep kange deriramutopu, Allah er Sambaladi, Yahudi yala gum nesala tep, wepredi konum telep keipre pangeda, Allahdi sun Yahudi yala gum nesala tep, er kange derinkamre.

17 Ange tep nengeda, neda Yesus Kristusdi talenerepa, Allah er pel don ngebo kunedi ne kange pio derinune. Nedi ne pe tep nengeda, ‘Neda ila mambul ngebo,’ men tenenun dinin, ‘Yesus Kristus erda ila mambul weik ngebo kurure’ tenen, erdi karepneu pelpu donune. 18 Yuk upu ton cap men penkamne. Ne penkamne upuda, ake. Ada, ne kuramsi keca cap, peteremamsi keca cap yumada, Kristusdi pel doramupa, sun Yahudi yala gum nesaladi Allah tep, teka teneramidi, er upupu tupa gekepra dombanunge.

19 Angeda, ne puto deiki di gume. Allah er Lek Sambala puto deiki di meliamneupa, amambul pel yuma doramsi. Ada, anesala yumadi, ‘Allah er dipapu apel doserure,’ tenepra, ‘Teka tenenkameng’ tenen, kunupsek pen pel cap, nimi men kupmanto pel cap, doramsidi peteremamsipa, sun Yahudi yala gum nesaladi, Allah tep teka teneramidi, er upu gekepra dombanunge.

Ukupra apel doramsa ngeda, keteng wengbarame tara, ila ati arum doramyai, Yerusalem mutu di dipdongopra adinen, keteng yakan tara, mutu si Ilirikum mutu tara neitamai yumada, Kristus er kai telep upu, nimi lyemna upu dopra peterembaramsi. Er upuda tenpunge pe men tamamsi.

20 Pumun taru di dipdongopra, ukutaru neitamai yuma peda, tenpu kecapu tenepra putaramneue. Ada, ‘Kristus er si men gekerami nesala, sun kunge mutu neitamaipu peterembenkamne’ tenen, putaramneu. Ukupra kuramsa deiyoda, ake. Ukupmantonge teneramsi upu deiyoda ake. ‘Yuk nengdi, sun ati ayumnya co men di ikra domengaipu, men dopkamne,’ tenenune. Aupu nongda, ‘Yuk nengdi, Allah upu men di konum peteremami mutu neitamaida, nedi men peterembenkamne. Allah er si cap, er upu cap, kapul men gekerami mutu neitamaipu peterembenkamne,’ teneramsidi, apelpu dopra kuramsi.

21 Yuk nengdi pel gonga kepra doramyai bena, pel dona gum dinin, Allah er upu neitamai sekeiamitopu, Allah upu men gekerami nesala kunge mutupu benamsi. Allah er upuda ake.
‘Allah er upu nimidi moupra men lap peramipa, men gekerami mutu neitamai kunge nesala yumada, gekenkamenge. Pumun taru di aupu men gekerami nesalada, amenda taru pio moupra gekenkamenge, pepu.’ (Yesaya 52:15)

22 Allah upu men gekerami nesala, sun kurami mutu menmena peterembaramsa tep, ukutaruda, ‘Roma mutu neitamai betene,’ teneramsi dinin, go ton pio men kwamneua tep, sun damaida men yanamsi. Paulusdi Roma mutu nesala tep pepu.

Paulusdi, “Ne Roma mutu yankamne,” pepu upu

23 Ne kayapu, pumun taru sun kurumu mutu men yanamsi dinino, ukutaruda, ne peteremamsi mutu neitamaida, ukupu mutu ton men kwapmara cadi, ton bena men petereptene. Tonda keteng tamun denge pio weik deiki di, ‘Uo, sun Roma mutu neitamai kumumdi teka tenerum nesala tep dirbetene’ tenen, pio putaramneu. 24 Neda sun tep putaramnerepa, tupa tenesenuna cadi, ‘Mutu si Spanyol tara peterembenkamne’ tenen, bisi neitamai benkamne taruda, sun Roma mutu neitamai ton diryankamsene. Ada ne bisi benkamne taru, sun mutu keana ton yanepa, uruna mapmapyanen, sun cap ne cap kange pio deipdapedi, amenda taru Spanyol mutu benkamne. Ukupkamne taruda, sundi ne melipra doproipkamnerume. 25 Ukupkamne dinino, ukutaruda, Yerusalem mutu teka tenenung nesala, sun makun keca dopra benkamane. Ada, ‘Yuk mutu nesaladi Yerusalem mutu kunge nesala sun makuna tep karerami co bo, nedi dopra, karerbenkaman’ tenen, Yerusalem mutu benkamane.

26 Yerusalem mutu benkamnada tali tep gume. Deiyoda, sun Makedonia tara teka tenenge nesala cap, tonda Akaya tara kungedi, teka tenenge nesala cap yumadi, ‘Yerusalem mutu teka tenepra kunge nesala kan-kan neitamai di, pio kankan kunge nesala sun makunkamepe’ tenen, sun co bo bulupra derirami. 27 Sun yumadi kange deipra co bo bulupra derirami dinin, ne kangeda, ‘Ito bulupra derinungada, angeda pio telepe,’ tenepsi. Ada sun Yahudi yala nesala, sun teka tenerami nesaladi, Allah upu dopra, sun Yahudi yala gum nesala kunge mutu bena peteremami. Makedonia mutu nesala cap, Akaya mutu nesala cap, sun yumada Yahudi yala gum nesala dinin, apeteremami upu gekeramidi, teka tenerami. Atep, sun Yahudi yala gum nesaladi, Yahudi yala teka tenerami nesala kan-kan dinin, Yerusalem mutu kunge kankan kunge nesala makuna tep, co bo bulupra derirami. Abulupra derirami ngeda, ito derirami. Ukutaru aco bo karepkameng ngeda, telepe pepne. Ukupra kunkamenga tep, ne kange deipne.

28 Sun co bo bulupra deriraminge dopra karepnengepa, Yerusalem mutu kunge kankan kunge nesala tep karerbenkamna cadi, apel konum dopra gawal daknyopda, Spanyol mutu benkamne. Spanyol mutu benkamne taruda, bisi neitamaida, sun Roma mutu kurum nesala tep diryankamsene. 29 Ne kaele. Sun mutu Roma yankamne taruda, Kristus weika di telep kweipnerepa, teleppu kunedi sun damai diryankamsene. Ne kange dipru neitamaida, telep kun keca men sukamnera cadi, ne cap sun cap kikiman kunkamepa deiki di, Allahdi sun Roma mutu kurumu nesala tep pio telep kudinkamsere.

30 Uda, ne kayapu. Nun Deiyo Ngebo Yesus Kristus er si deiki cap, uda, Allah er Lek Sambaladi melimserepa, bicau tenedanupa deiki capdi, aupuda puto di pepsene. Sundi ne tep Allah moronemumnya deiki di, ne cap, sun cap, pio pe deipra kikiman pel donapu kunkamepe. 31 Ne tep Allah moronkamnerum kecada pepkusene. Ada, Yerusalem mutu benkamne mutuda, Yudea tara neitamai kungedi, ‘Teka men tenenge nesaladi, ne nong deiki ikin keca deipnengedi, popnenung’ tenena tep, ‘Allahdi Paulus lyepkamre’ tenen, Allah moronkamnerume. Tonda, Makedonia tara cap, Akaya tara cap kungedi teka tenenge nesaladi, bulupra derirami co bo karepnei ngeda, ‘Yerusalem mutu teka tenenge nesala tep karepnepa, dopropmengopda, kange deipra kunkameng’ tenen, Allah moronkamnerume.

32 Tonda, ‘Paulusda Allahdi teneramutopu, erdi melipra uruna tep, nun mutu, Roma yarepa, er cap, nun cap, kange deipra kikiman kunkamepa deiki di, er dipru cap, nun dipru cap kwa dipdankamepe’ tenen, Allah moronkamnerume. 33 Nedi sun tep Allah morosenun kecada, tenpunge ton cap pepkusene. Ada, ‘Pangdana cap, podana cap, mambul kange douna cap yuma gum di, kange deipra telep kuna tep, deiyo keca kareserya deiyo ngeboda, Allah kurura cadi, er cap, sun yuma cap, dipru dukdongopra kikimanpu kumumnyopda, teleppu kunkamrum’ tenen, Allah morosenune. Ne Paulusdi, sun Roma mutu kumum nesala tep pepsene.