Rom 16 | XteSC | STEP | Uda ne kayapu, yuk upu ton pepkusene. Tenpu ner er sida Febe konum teka tenepka cadi, Yesus cap dipru dukdongopra kunupa tep, anerda nun weit ner sisa utopu kuredi, mutu si Kengkeria mutu ati arum dopra kunge mutu neitamai teka tenepra kunge nesala tep, Allah upu ati talepra melimna deiyo ner utopu kuredi, melimrure.

Romans 16

Paulusdi er kayapu neng tep, “Telepe, peipkamnerume,” pepu upu

1 Uda ne kayapu, yuk upu ton pepkusene. Tenpu ner er sida Febe konum teka tenepka cadi, Yesus cap dipru dukdongopra kunupa tep, anerda nun weit ner sisa utopu kuredi, mutu si Kengkeria mutu ati arum dopra kunge mutu neitamai teka tenepra kunge nesala tep, Allah upu ati talepra melimna deiyo ner utopu kuredi, melimrure. ^{▼▼Allah upu ati melimna ner – Ataruda, nerapu pe, nimi pe Allah upu peteremna ati cap, tonda nimi bulupra Allah si eremna ati cap tep, majelis nengdi dorami pel tep, anerapudi sun aneng tep melimami.} 2 Nun ka ner er si Febe pepmasena deiyoda ake. Ada, ‘Sun Roma mutu nesaladi aner tep, pio telep kupra buru karepmumdi, “Telepe,” pepra er putan keca yuma tep, melimkamrum’ tenen, pepsene.

Ukupkamruma deiyoda, ake. Anerda teka tenepupa, nun Deiyo Ngebo Yesus cap, dipru dukdongopra kurura cadi, Allah er nyapu yuma, sun putan keca tep, telep kupra melimameptopu, aner pe tep utopu er putare keca karepra melimkamrume. Tonda, aner Febeda, yuk teka tenenge nesala cap, ne cap nun yuma tep, weika di meliamseua tep, erdi sun mutu yaryopda, ‘Er putapre keca yuma tep, melipra karepkamrum’ tenen, aner er si pepsene.

3 Ne kayapu neng, sun butene, Piskila cap, er nenge Akwila cap tep, “Paulusdi telepe peipseu,” pepra peipkamrume. Ne cap, sun butene cap Yesus Kristus er upu peteremna tep, kikiman pel doramepu neng butene tep peipne. 4 Angepu gum dinino, ne popmanto kuramnei taruda, ‘Paulus melipra loptapkunem’ tenen, makupnereiya deiki di, sun peda yu nengdi popmanto kupi. Atep, nedi sun butene tep, “Telepe,” pepne dinin, nedipu gume. Sun Yahudi yala gum nesaladi, Allah tep teka tenenge nesala yumadi sundi ne meliamnereinge tep, “Telepe,” penunge.

5 Tonda, sun Roma mutu teka tenerum nesaladi, Periskila cap, Akwila cap, sun ati pumbon, ‘Allah upu gekenkamep’ tenen, bulumenge nesala, sun teka tenenung nesala tep, “Paulusdi telepe pepseu,” pepra lap peipkamnerume. Ton ngebo er sida, Epenetus, erda Asia tara neitamai kunge nesala kan-kan di, menmena gonga kepra teka teneamu ngebo cadi, erda ne dipru ngebo kurure. Er tep, “Paulusdi telepe peipmakere,” pepra peipkamnerume.

6 Ton ner er sida Maria, sun Roma mutu kurum nesala makuna tep, pio pe deipra weika di pel doramseue. Er tep, “Paulusdi telepe peipmakere,” pepra peipkamnerume. 7 Tonda, neda Yahudi yala ngebo kunetopu, ne kayapu butene sun sida, Andronikus cap, Yunias cap, yu nengdi, ne cap aneng butene cap, ateng koupra wenemna ati dongopseipa, nun kikiman kuramepu. Abutene neng tep, “Paulusdi telepe peipmasere,” pepra peipkamnerume. Yesusdi wepra deiamu Rasul neng, sun 12 nengdi abutene neng tep, gispal dorami. Tonda, sun abutene nengda, ne kapul men teka tenemsi taruda, sundi menmena Kristus tep konum teka teneamrei.

8 Ton ngebo er sida Amfilatus, erdi nun Deiyo Ngebo Yesus tep teka tenepka cadi, ne kabo sisa kurure. Er tep, “Paulusdi telepe peipkeue,” pepra peipkamnerume. 9 Ton ngebo er sida Urbanus, er peda nun cap, er cap, Kristus er pelpu kikiman donupe. Tonda ne kabo sisa ton, er sida Stakhis cap, sun butene tep, “Paulusdi telepe peipseu,” pepra peipkamnerume.

10 Ton ngebo er sida Apeles, er peda er nong deiki ikin keca akwamu dinin, ‘Ikin kunernyada ne songe’ tenen, pel tamna gum dipapu, Kristus tep tupa teka teneredi, er pelpu palepra dorura cadi, Allahdi angebo tep kange derirure. Tonda Aristobulus cap, er nyapu cap, er ati kikiman kunge nesala yuma cap, Apeles cap sun yuma tep, “Paulusdi telepe peipseu,” pepra peipkamnerume. 11 Ton ngebo er sida Herodion, er peda, ne Yahudi yala ngebo kunetopu kurure. Er tep, “Paulusdi telepe peipkeu,” pepra lap peipkamnerume. Tonda, Narkisus cap, er ati kikiman kunge nesala kan-kan di, teka tenenung nesala yuma cap tep, “Paulusdi telepe peipseu,” pepra peipkamnerume.

12 Tonda, nerapu butene Trifena cap, Trifosa cap tep, “Paulusdi telepe peipseu,” pepra peipkamnurume. Sun abutene nerapudi, nun Deiyo Ngebo Yesus tep, puto di pel dorunge. Utopu, ne ka ner sisa, Persis tep ton, “Paulusdi telepe peipkeu,” pepra peipkamnerume. Er peda Yesus tep puto di pel dorur ner tep pepne. 13 Tonda, nun Deiyo Ngebo Yesusdi wepra deiamupa, Yesus er pel tep pio telep kupra pel dorur ngebo Rufus cap, er nin cap, sun butene tep, “Paulusdi telepe peipseu,” pepra peipkamnerume. Rufus er ninda, nanin sisa utopu kuramneudi, ne tep telep kupra melimamneu.

14 Tonda, nun kayapu neng sun sida, Asinkritus cap, Felegon cap, Hermes cap, Patrobas cap, Hermas cap, uda nun kayapu nesala, aneng cap kungedi, teka tenenge nesala yuma cap tep, “Paulusdi telepe peipseu,” pepra peipkamnerume. 15 Tonda, Filologus cap, Yulia cap, Nereus cap, er weit ner cap, Olimpas cap, uda, Allah teka tenengedi, aneng cap kikiman kunge nesala yuma tep, “Paulusdi telepe peipseu,” pepra peipkamnerume.

16 Ange utopu, tamna gum di, sun Roma mutu teka tenerum nesala yumadi, antamdankamrum taru yuma peda, bicau tenepra, “Telepe,” pedankamrume. Sun Roma nesala tep nengeda, yuk mutu kungedi, Kristus tep teka tenepra, er cap dipru dukdongopra kunge nesala yumadi sun tep, “Telepe,” pesenunge.

‘Moupra tenepmengedi kunkameng’ tenen, pepu upu

17 Ne kayapu, ukuda yuk upu ton pepkusene. Uda, nundi Yesus er tek sisi upu peterepsepupa, kael keamruma utopu keca gum dinin, yuk neng sun mali kuramenga deiki di, atek sisi upu yanipmengedi, sun Roma mutu teka tenerumu nesala neitamaida, dipru wilimdidanapu kusenunge. Sundi mali kweipsengepa, Yesus er dumsisi bisi telep kupra men betume. Ukupra kunge neng tep, moupra kael kepmumdi, memdonkamrume. Sun cap kikiman kuna meme. 18 “Amali neng tep memdonkamrume,” pepmasena deiyoda pepkune.

Ada, sun pe kun kecapu tenepra kunge nengda, nun Deiyo Ngebo Yesus Kristus tep, teka tenepra er amutara kungedi, tek sisi er pel men donunge. Ange gum dinin, sun pe kange dipapu tenengedi, sun pe putan kecapu tenepra, mali kudisenunga tep pepmasene. Anengdi yuk neng tep, “Uo, kanda pio telepe,” pepra mawa di dipru gidona tep, boun upu penunge cap, mok upu tali pertamnung nge cap deiki di, sun kange moupra tenena gum, yambul walwal kunge nengdi, ‘E, angeda tek pepmaseng do?’ tenen, amok upupu teka tenenunge. Ukupra mok upupu pesenunga tep, aneng sun damai di tapra, yukai memdonkamrume.

19 Dinino, ne kayapu, sun Roma mutu kumum nesalada, Allah er upu peseretopu, teka tenepra, dumsisipu kumum pangeda, yuk mutu neng yumadi epra kael kemsengedi, lap pengepa, nun ton gekenupe. Atep nedi sun tep kange derisenune. Nedi sun tep, ‘Uo, ukupra kunkameng’ tenen, putanere. Angeda pepkusene. Tenpu ngeda, ‘Ila di kael kepmengopda, telep kun kecapu kunkamenge,’ tenesenune. Butene ngeda, ‘Mali kun keca yala-yala yuma tep nengeda, men kunkamenge,’ tenenune. Tonda, ‘Amali kun kecapu kael kepmengedi, mali men kunkameng’ tenen, putanerure. Ada, ‘Mali kun keca tenpunge peda men kunkameng’ tenen, putanerure.

20 Ne pepmasentopu kuramumpane, amenda taruda, Allahdi Kain Jen Ngebo dopra, sun amutara deipredi, wenepkamre. Allahdi podana cap, pangdana cap, ikin kange douna cap deiyo keca yuma gum kupra deriseredi, tali kange doupra telep kuna tep deiyo keca kareserur ngebo kurure. Allahdi Kain Jen Ngebo dopra, sun amutara deipredi, wenepkamre. Angeda menmena di kupkamre. Ne Paulusdi sun Roma mutu kumum nesala yuma tep, ‘Nun Deiyo Ngebo Yesus bicau teneseredi, er kange dipapu melimser kecada, pio karenkamser’ tenen, nedi sun tep Allah morosenune.

21 Tonda, ne cap kikiman pel donum ngebo Timotiusdi, sun Roma mutu nesala tep, “Telepe,” peipsere. Ange utopu, ne yala neng sisa, sun sida, Lukius cap, Yason cap, Sosipater cap, sun yumadi sun Roma mutu nesala yuma tep, “Telepe,” peipmasenge.

22 Uda Paulusdi peipmanerpa, ne si Teretius buru di asurat sekeipmasene. Neda, nun deiyo Ngebo Yesus er si deiki di “Telepe,” peipmasene.

23 Tonda, Gaiusdi ne Teretius cap, Paulus cap, amutu teka tenenge nesala yuma cap tep, er ati buplan pakeipra, namdoseredi, nun putan keca yuma tep melipra karesere ngebodi, sun tep, “Telepe,” peipsere. Ton ngebo, er sida Erastus, amutu kunge nesaladi co bo bulupra deringepa, aco bo talepra kalengna cap, erdi bokra karena cap tep, talepra pel dore deiyo ngebodi, sun tep, “Telepe,” peipmasere. Tonda, teka tenepudi, nun weit utopu kure bo, er si Kwartusdi, sun tep “Telepe,” peipmasere. 24 Uda, nedi sun yuma tep, Allah morosenuna deiyoda pepkusene. Ada, ‘Nun Deiyo Ngebo Yesus Kristus, er kange dipapu bicau teneseredi, melipra karesere keca yumada, weika di karenkamser’ tenen, nedi sun tep Allah morosenune. ‘Ukunkamser’ tenen, Amin pepne. ^{▼▼Pumun taru ton nengdi buku Roma sengaminge neitamaida, ayat 24 men seki. Ton nengdi seki.}

Asurat gawal dangna tep, pepu upu

25 Allah er sipu ila di eremkamepe. Ne Paulusdi, Yesus Kristus nimi lyemna tep er kai telep upu dopra peteremsenune. Apeteremsene upu deiki di, teka tenepmumnyopda, Allahdi sun kange dipru puto kemdiserepa, pio dimpeprappu kunkamrume. Allah er dipapu puto kemdiserure. Puto kemdiserepa, pumun taru di dipra, daneitam taru yumada, Allahdi nimi lyemna tep, Yesus er upuda iniamupa nimidi men gekepmanto kurami. Dinino, ukutaruda aupu katuai keipupa, peteremsenupe.

26 Nimi lyemna upuda, pumun taru Allahdi iniamu dinino, ukutaruda konum katuai kupra deipseu. Ada, pumun taru di dipra doryankamre taru yuma kunkamre ngebo Allahdi er upu lap pena deiyo neng nabi-nabi neng tep “Ukupkurume,” pediramupa, sundi sekra derirami upupu nundi dopra, peteremnupa deiki di, katuai kurure.

Allahdi katuai kupra deipseua deiyoda ake. ‘Nesala ban-ban yumadi, Yesus Kristus er kai telep upu, nimi lyemna upu gekepmengedi, teka tenepmengopda, er upupu talepra dombankameng’ tenen, lap pediramseue.

27 Ange tep nengeda, nun deiyo ngebo Yesus Kristus melimserya deiki di er cap, nun yuma cap, dipru dukdongopra kunkamep taru neitamai yumada, nun nai bo Allah, pio ila Kael Kemna Deiyo Ngebo tep, er si ila di erepra gispal donkamepe. ‘Tek sisi ukunkamepe’ tenen, Amin, pepsene.

Ne Paulusdi sun Roma mutu kurumu nesala yuma tep, “Telepe,” pepsenedi, acapu deipne.