Rom 2 | XteSC | STEP | Uda ware neng do yuma, sundi yuk neng tep, “Sun mali kurum kecada ake-ake,” pepra, yap-yap pepra wenemrum nesala yumada, Allahdi sun peda telep nesala cadi, ‘Dakwapye’ tenen, men kaukepkamsere. Sundi yuk neng tep, “Sunda mali kurum nesala,” pepra upu bongdiruma deiki di, sun pedi sun pe tep upu lepsisikra bokeipdanmarume. Deiyoda, sundi yuk neng tep, “Mali kupmarum ngeda adano,” perum dinino, amali kun kecada, sun peda utopu kupra kuruma cadi, sun pe tep wenepra upu lepsisikra bongdidarume.

Romans 2

“Allahdi nesala ban-ban yuma, sun yuk-yuk kunge keca tep, lepsisikra upu bokeipkamsere,” pepu upu

1 Uda ware neng do yuma, sundi yuk neng tep, “Sun mali kurum kecada ake-ake,” pepra, yap-yap pepra wenemrum nesala yumada, Allahdi sun peda telep nesala cadi, ‘Dakwapye’ tenen, men kaukepkamsere. Sundi yuk neng tep, “Sunda mali kurum nesala,” pepra upu bongdiruma deiki di, sun pedi sun pe tep upu lepsisikra bokeipdanmarume. Deiyoda, sundi yuk neng tep, “Mali kupmarum ngeda adano,” perum dinino, amali kun kecada, sun peda utopu kupra kuruma cadi, sun pe tep wenepra upu lepsisikra bongdidarume. 2 Uda, nun yuma kaele. Mali kun keca yala-yala yuma talepra kunge nesala tep, Allahdi upu lepsisikra bongderedi, amali kunge nesala wenemkamre ngebo, Allah erda, pio dumsisipu kurure. Atep, upu lepsisikra bongdinkamsernge yumada dumsisipu kunkamre. Erdi nun tuai mutu kunup nesala yuma tep, peiamseutopu, ‘Ne pemsi upu perurtopu, telep kunung do, mali kunung do?’ tenen, dipeteseredi, er tek sisi upu deiki di wenemserure.

3 Ange tep nengeda, sunda tali tuai nesala dinin, yuk neng tep, “Sunda mali kurume,” pepra upu bokeipmumdi wenemrum dinin, sun peda amali kun kecapu talepra kumumnya deiki di ware tenerum do? Allahdi nun kupe keca tep, ‘Dakwapye’ tenen, ‘Kaukepseredi, men wenepkamsere,’ tenepra kurum do? Gume. Allahdi nesala ban-ban yuma tep, wenepra upu lepsisikra bokeipkamser taruda, sunda loptapra men benkamrume. Allahdi sun mali kurum keca yuma tep wenepkamsere.

4 Uda, Allahdi sun yuma tep, ‘Uo, sun mali kun keca tapkameng do?’ tenen, bicau teneseredi, adipapu menmena wenepra men poserure. Ange gum dinin, ke taru tepapu kaukemserya deiyoda pepkusene. Ada, Allahdi nun tuai kunup nesala yuma tep, ‘Uo, ne bouna di telep kupra melimsenepa, go tupa akapyopda, adeiki di sun mali kunge keca moupra tenepmengedi tapmengopda, tamupra ne tara kepronkamneng do?’ tenen, kalekra diserure. Ukuserur dinino, sun dano? Ange, moupra men tenerumdi, ‘Tali lupra mali kun kecapu talepra kunkamepe’ tenen, kurum do? Sundi, ange tenerum do? ‘Allah bicau teneseredi, adipapu wenepra men poserur ngeda, erdi, ‘Go karepnepa, sun mali kun keca tapkamenge’ tenen, putarepa kaukemseryada, mambul gum tep, dakwapye,’ tenemumdi mali tupa kurum do?

5 Dinino, ne kayapu. Sundi, sun mali kumum keca yuma tep, tapmumnyopda, Allahdi kaukepseredi, men wenepkamsere. Dinino, sun balila deipra, sun dipru gat kuprepa, sun mali keca men tapmumnyopda, mali kecapu tupa kumumya deiki di, Allah weika di ton cap tapakra wenepkamsere. Tupa-tupa mali kumumya deiki di, sun pedi sun pe tep, mali kudidarume. Nimidi sun mambul keca tep, ‘Ton cap weik kunkamser’ tenen, mawa deriramengtopu, sun mali-mali kurumnya deiki di, sun pedi, sun pe nong deiki ikin keca weik deridanmarume. Allah teneamu taru konum kupyopda, katuai dipapu nesala yuma tep, dumsisikra upu bokeipseredi, wenepkamsere. Ataruda, sun tupa mali kurum nesala tep, ila di wenepkamsere. Sun mali kun keca tamna gum di, dipru gat kupra, balila kuna cap, deiki di, mali kuruma tep nengeda, Allah ila di wenepkamsere. 6 Allah upu neitamai sekamitopu.
‘Allahdi tuai kunge nesala yuma tep, upu lepsisikra bokeipredi, wenepkamre taruda, Allahdi nesala ban-ban yuma, sun yuk-yuk kuramenge keca tep, moupra dipetepredi, sun kunge keca akapretopu, upu lepsisikra ^{▼▼upu bokeipkamsere – Ataruda, sun mali kecapu talepra kunge nesala tep ila di wenepkamre. Er upu peseretopu dumsisipu kunge nesala tep, menenga keca karenkamsere.} bokeipkamsere.’ (Mazmur 62:12)

7 Ange ton cap lap pepkusene. Ware nesala do yuma, sundi ‘Gume, Allahdi nun tep, pio telep kuna deiyo keca cap, gam pio kuna deiyo keca cap karepsetupa, er tep pio gispal donkamepe’ tenen, putarepa tamna gum di, pio pe deipra, telep kun kecapu talepra kunge nesala tep nengeda, Allahdi bol koptapra, pio gam kuna deiyo keca karepkamre. Akarepkamre nesalada gam pio kunkamenge.

8 Dinino, ware nesala do yuma, Allah er tek sisi upu tapmengedi, sun pe putan keca tepapu tenepra kungedi, mali kunge nesala tep, Allah er yu weik kuprepa anesala tep, ila di wenepkamre. Sun anesalada, gam pio men kunkamenge. Allahdi yu weik kuprepa, anesala tep ila di wenepkamre. Anesalada, gam pio men kunkamenge. 9 Mali kun kecapu talepra kunge nesala yuma tep nengeda, Allahdi ikin keca cap, kange mun keca cap weika di, sun nong deiki deiprepa, sunda ikin weik kunkamenge. Menmenada, Yahudi yala nesala dinin, sun mali kunge nesala tep wenepra upu lepsisikra bokeipkamre. Amendada, Yahudi yala gum nesala peda, mali kunge nesala tep, wenepredi upu lepsisikra bokeipkamre.

10 Dinino, telep kun kecapu talepra dumsisipu kunge nesala yuma tep nengeda, kange mun keca yuma gum kupra deipredi, pio telep kuna deiyo keca cap, er tep gispal don keca cap, Allah cap dukdongopra kikiman telep kuna tep, deiyo keca cap karepkamsere. Dumsisipu kunge nesala yumada, ereipredi telep kudinkamsere. Atelep kecada menmena Yahudi yala nesala tep atelep keca karenkamre. Amenda taruda, Yahudi yala gum nesala tep, atelep keca karenkamre. 11 Deiyoda, Allahdi nesala ban-ban yuma tep, ‘Angeboda ne kabo sisa cadi men wenepkune. Dinin, angeboda ne dabale tenenuna tep, angebopu wenepkamne’ tenen, dipru men wilimdiserure. Nimi tuai nesala yala-yala yumada, ‘Ne kabo sisa adano dinin, angeboda ne songe,’ tenena gum dipapu teneseredi, nun kurameptopu dipeteseredi, upu lepsisikra bokeipkamsere.

12 Yahudi yala gum nesalada, Musa sekeiamu upu, gekepra men kael keamya tep, amem upu amutara bukra men kununga cadi, Allahdi sun tep, “Sunda Musa sekeiamu upu kael kemamrum dipapu, aupu yaniptapra mali kuramrume. Ukuramruma deiki di, mali kuramrume,” pepra men wenepkamre. Dinino, sun pe kange dipu mali kuramenge nge tep, wenepra ponkamre. Dinino, sun Yahudi yala nesalada, Musa sekamu mem upu gekepra kael keamidi, amutara kunge dipapu aupu yanipra mali kununga cadi, Musa sekeiamu upu deiki di sun kunge keca yuma moupra dipterepredi, wenepra ponkamre.

13 Allahdi, ‘Angeda ukunkamrume, angeda men kunkamrume,’ peipupa, Musadi sekeiamseu upu deiki di, Yahudi yala nesala tep wenepkamra deiyoda ake. Ada, Allah er kangeda, ‘E, anesalada, Musa sekamu mem upuda, amul deikipu gekenunga cadi, sunda dumsisi nesala kununga tep, telep kupra deipkamsene,’ men tenerure. Ange gum dinin, Allah er kangeda, ‘Nedi peipsipa, Musa sekeiamu upu yuma upu gekepra, tek sisipu talepra dombange nesalada, “Sunda telepe,” pepra, dumsisi nesala keipkamsene,’ teneserure.

14 Uda, aupu ton cap tapakra lap pepkusene. Sun Yahudi yala gum nesalada, Musa sekamu mem upu dopra men gekerami dinin, sun pe kange dipapu aupu deiki deiyonge peseretopu, dumsisi kupra kungopda, ukunga deiki di katuai kuserure. Ada, sun pe kange dipru neitamaida, ‘Dumsisi kun keca ake,’ tenengedi, angepu talepra dombanunga deiki di, Musa sekeiamseu mem upu deiki di peiamutopu kurure. 15 Ada nun kaele, ukununga deiki di Musadi sekra deiamu upu nong men dororami dinin, aupu peretopu deiyo kecada, Allahdi sun kange dipru neitamai, “Ange telepe, ange mali,” pepra deiamnga cadi, sun tali mangkau kange doupra men kununge. Sun kunge taru neitamaida, telep keca cap, mali keca cap tapakra kupmengopda, sun dipru neitamai di, ‘E, angeda telep kupmap dinin, angeda mali kupmape’ tenen, bokra wenunge. Tuai nesala yumadi, sun kange dipru neitamaida, ‘Telep kun keca ake, mali kun keca ake’ tenen, moupra tenenunge. Tali mankau kange doupra men kununge.

16 Uda, Allahdi teneamu tumi konum kupyopda, tuai nesala ban-ban yuma tep, upu lepsisikra bokeipseredi wenepkamsere. Ada, Allahdi peprepa, Yesus Kristusdi nimi yuma tep, sun kange dipru neitamai di inipra teneramenge keca peda, yuma katuai kupra deipserepa, akeca yuma Allahdi dipetepredi, upu lepsisikra bokeipseredi wenepkamsere. Ton neng tep nengeda, “Sunda dumsisi kupra deipsene,” peipkamsere. Ton nengda, “Sunda mali kuramrume,” pepra tapkamsere. Akupkamserenge yumada, nedi Yesus er kai telep upu, nimi lyemna upu lap pesenuna deiki di peteremsenune.

Yahudi yala neng cap, Musa sekamu mem upu cap tep, pepu upu

17 Ukutaruda, yuk upu ton pepkusene. Sundi yuk neng tep peteremrumu nengda, sun pedi sun pe tep, men peteremdarum do? Ton neng dingeda upedarume. “Gume, nunda Yahudi yala neng kunupe,” pepra kurume. “Nunda Musa sekeiamseu upu talepra kunupa cadi, aupu telep kupra talenupa deiki, Allahdi lyepkamsere. Nunda, Allah cap telep kupra kikiman kunupa cadi, Allah er kange deriserure,” pepra, sun pe kange ereididamumdi gemerume. 18 Sundi, ‘Gume, Musa sekamu mem upu peteremsengepa, ila di kael kemnupa cadi, Allah erdi tenesere keca yumada, konum kael keamupudi, pio telep kun kecada ake-ake, tenen, moupra kael kemnupe,’ tenedamumdi, sun pe kange dipapu erepra kurume.

19 Tonda sundi utenerume. ‘Nunda Yahudi yala gum nesala yuma tep, “Allah er tek sisi bisida ake,” pepra petereptepe,’ tenedamumdi, sun pe kange di eremdidarume. ‘Bisi peteremdina deiyo nengdi asuru pun nesala talepra dubaramengtopu, nunda yuk nesala tep, ‘Telep bisi ake,’ pepra peteremna deiyo neng kunupe,’ tenerume. ‘Nunda, kunungna neitamai kunge nesala tep, dirin kemdina deiyo neng kunupe,’ tenedamumdi sun pe kange dipapu erepra gemerumudi kurume.

20 Tonda, sun Yahudi yala nengdi utenerume. ‘Sun yumada, pio walwal nesalapu kununge. Dinino, nunda ila peteremna deiyo neng kunupe,’ tenedarume. Yambul nyapudi deiyo keca yuma moupra men teneramengtopu, sunda walwal nesala kununga cadi, ‘Sun anengda, nundi Allah er upu dopra petereptepe,’ tenedamumdi, sun pe kange dipu erepra kurume. Ange yuma tep utenemumnya deiyoda pepkusene. Ada, sundi, ‘Gume, Musa sekeiamseu mem upu karepseua deikida, tek sisi upu cap, ila kael kemna keca deiyo cap yumada, konum akwapseu,’ tenedamumdi, sun pe kange erepra kuruma tep pepsene.

21 Uda, sundi yuk neng tep peteremrum dinin, sun pedi sun pe tep men peteremdarum do? Sun pedi, men kael kemrum do? Sundi yuk nesala tep, “Upula dona meme,” pepra peteremrum dinin, sun peda upula dorum do? Pio men dorum do? 22 Sunda yuk neng tep upeprume. “Yuk neng domenge nerapu cap, tali kuramenge nerapu cap, tali-tali nyangdana meme,” pepra peteremrum neng, sun peda yuk nerapu upula dopra nyangrum do, gum do? Ange utopu sundi upeprume. “Yuk nengdi Allah tapra tali keca teppu, ‘Nun nai bo’ tenen, si eremenge kecada, nun songe,” pepra peteremrum dinin, sun teka tenena gum nengdi, sun mem keca si eremna ati pumbon derirameng bung kecada, ‘Weika di upula doproptepe,’ tenepra dororum do? 23 Sunda, “Allahdi, ‘Angeda kunkamrume, angeda men kunkamrume,’ peiamupa, Musa sekeiamseu mem upuda, nun Yahudi yala nengdi talenupe,” petamrumdi, sun pe dipru kange erepra gemeramrum dinin, sun peda Allah er upu yanitamamrum do, gum do? Aupu yanimumnya deiki di, ‘Allah erda mambul gum cadi, er tep gispal men donkamepe’ tenen, er upu yanirum do? 24 Ukupra kumumnya tep nengeda, sun menop taru sekami upu peseretopu kurume. Aupuda ake.
‘Sun mali kumumnya tep nengeda, Yahudi yala gum nesala sun epmengedi, nun nai Allah, er si tep mali upu pepra derisenunge,’ Yesayadi pepu. (Yesaya 52:5; Yeheskiel 36:22)

25 Uda, Musa sekamu mem upu talepra, tek sisi dombaramtum teptoda, Allah er nyapu kuna tep, peten kemdin keca, den bam bol deikinge sengrumnyada, yambul telep kupsetu dinin, Allah er mem upu yanitamnapu kuprumnyopda, sun den bam bol deikinge seksetenga peda, ^{▼▼Den bam bol deikinge sengna deiyoda ake. Ada, pumun taru Allahdi Musa tep pepu. “Nesala ban-ban yumadi, ‘Israel nesalada, Allah er mawa nesala kununge, tenepra kael kemkamenge’ tenen, sun Israel yala nesaladi sal nyapu deipmumnyopda, mana ue ban bari konum mapmumnyopda, sun den bam bol deikinge sektapkamrume. Ada nedi Israel nesala wepra deipsa tep, peten kemdina tep, sun sal nyapu den bam bol deikinge sengkamrume,” pepra deipu. Allahdi pepra deipupa, ataru di dipra aneitam taru yuma peda, Yahudi yala nesaladi, sun sal nyapu yuma tep, den bam bol deikinge sengnunge. Tonda, lap pena upu nomor 19 dirume.} ‘Deiyo pio men kwapseua tepa,’ tenepra, sunda tali neng utopu kupra kurume. 26 Sun den bam bol deiki tarange sengna gum nesala dinin, Musa sekamu mem upu peseretopu dumsisipu kupmengopda, Allah er kangeda, ‘Sunda telep kun kecapu talepra kununga cadi, ne mawa nesala, den bam bol sengne nesala utopu kununge,’ tenenkamre. Ila mambul ngeda, Allah er tek sisi upu peseretopu moupra talepmepedi dombankamepe. Ila mambul ngeda, ange pua. Den bam bol deikinge sengnada, nong bol deiki kecapu kurura tep, angeda, pio mambul weik gume.

27 Ware nesala do yuma, sun den bam bol deikinge men sengnung dinin, Allahdi, ‘Angeda kunkamrume, angeda men kunkamrume,’ pepra deiamu mem upu gekepra dombangedi, dumsisi kun kecapu talepra kunge nesalada, Allahdi anesala tep, er kange deipredi dopropkamre. Dinino, sun Yahudi yala nesalada, Musa sekamu mem upu dopramrumdi, den bam bol sengdarum dinin, Allah er upuda yaniptamumnyopda, akeca-keca yuma akapserya peda, amenda taru Allahdi sun tep kange men deipkamsere. Sun tep wenepra ponkamsere.

28 Tek sisi ngeda, apepkusene. Yahudi yala nesaladi deipsetenga peda, ada nong bol deiki keca utopu keca pua. Allah er kangeda, ‘Adeiki Yahudi yala nengda, ne mawa nesala sisa kununge,’ men tenerure. Tonda, peten kemdin keca tep, den bam bol deiki tarange sektapsetenga peda, akecada nong bol deikipu kusere keca cadi, adeiki dipapu Allah er nyapu sisa pio men kunkamepe. 29 Nong bol deikingepu gum dinin, Allahdi, ‘Ne mawa ngebo kunkamre,’ tenere ngeda ake. ‘Tek sisi Yahudi yala ngeboda akurure,’ tenerur ngeboda, er dipru neitamaida telep kupra kun keca akurure. Dumsisi kurur ngebo tep, Allahdi, ‘Angeboda ne mawa ngebo cadi, ne Mi Sisa kurure,’ tenerure.

Tonda, Allahdi, ‘Ne nyapu sisa’ tenen, peten kemdin keca tek sisi ngeda, Allah er Lek Sambalada, nun dipru neitamai kuseredi, nun urasin yuk kudiseredi, telep kupra deriserure. Tali mem upu cap, nong bol deiki pel doramenge nge cap, ukununga deiki di, Allah er nyapu sisa men kunupe. Angeda gume. Allah er Lek ^{▼▼Lek Sambala penup ngeda, ada ‘Kurun sambala kurura’ tenen, men penupe. Angeda gume. Ada Allah er Sambala mali keca tenpunge peda pio men kurura cadi, “Lek” penupe. Ange utopu, “Erda Pio Telep Sambala kurure,” peptepe.} Sambaladi, nun dipru neitamai pel doseredi, nun kange dipru telep kupra deipserya deiki di, ukupu nesala utopu kemdiserure. Ukusere neng yuma tep, Allahdi kange deipredi ereipkamre. Dinino, tali kange doupra dakunge nesaladi, dumsisipu kunge nesala tep, gispal men donkamenge.