Rom 3 | XteSC | STEP | Uda, nedi, “Ne peda Yahudi yala ngebo kununa cadi, ne den bam bol deiki tara ngeda seknei,” peptenya peda, angeda telep do, gum do?

Romans 3

Paulusdi, “Allahda, pio dumsisi kurur ngebo,” pepu upu

1 Uda, nedi, “Ne peda Yahudi yala ngebo kununa cadi, ne den bam bol deiki tara ngeda seknei,” peptenya peda, angeda telep do, gum do? 2 Ne kangeda, ayumada telepe pua. Tenpu ngeda, Allahdi kael keamseudi, er upu dopra menmena lape peipseudi kareamseu nesalada, Yahudi yala nesala tepa.

3 Yahudi yala nesala neitamai di bokra, ton nengda teka tenepra men kuramidi, Allah er upu moupra men talerami. Dinino, ukuramya deiki di, “Allahdi weiamu nesala neitamai di, ton nengda mali kuramya tep, Allah peda mali kurure. Allahdi pediramseutopu men kunkamsere. Talipu peramseue,” pepra peptepe do? 4 Gume, ange men peptepe. Allahdi pesere upu yumada, tek sisipu kurura cadi, erdi peramutopu tek sisi nong kupkamre. Dinino, tuai kunge nesala yumada mok upu tali petamnunge. Allah upu neitamaida, aupu ton sekami.
‘Allah kandi pesemem upu yumada, tek sisi nong kupkamra cadi, nesala yumadi, ‘Tek upu peipseu’ tenen, kael kemkameng ja. Nimidi Allah tep, “Er mali kupu kecada ake,” pepra tali peptaptenga peda, nong men kuptue. Upenge nesala yuma tep, Allahdi bisbisa kapredi, wenepra upu lepsisikra bokeipkamre.’ (Mazmur 51:4)

5 Dinino, ton neng dingeda mok upu deiki di upenunge. “Gume, nun nimidi mali kupmepya peda, Allahdi bicau teneseredi kaukepseryopda, adeiki di, Allah er pio dumsisi kure keca yumada, pio katuaipu kurepa, nesala yumadi moupra kael kepmanto kununge. Atep, nun mali kupmepepa, Allahdi nun mali kun keca tep wenepseryopda, angeda mali kuserure,” penunge. Aupu utopu kupra pepsengopda, nundi ware upu tamupra peptepe do? (Sun teka tenena gum, tali nengdi penge upu utopu pepsene.) 6 Gume, ne kayapu. Aupu utopu pepsengopda, nundi tamupra peptepe upuda, pepkusene. Aupuda ake. “Sunda tali upupu penmarume. Allah erda pio dumsisi ngebo men kuramtuopda, nesala ban-ban yuma ware keca deiyo tep upu lepsisikra bokeipsetu do? Gume, erda Upu Lepsisikra Bongdina Deiyo Ngebo kurura cadi, sundi tali upupu perume,” penkamepe.

7 Arup pepmasentopu, ton nengdi aupu penunge. “Gume, ne mok upu penya deiki yuk nesala yumadi, ‘Allahda tek sisi upupu perure’ tenen, moupra kael keptenge. Sundi, ‘Allahda pio tek sisi ngebo’ tenen, kael kepmenge dingeda, Allah er si weika di ton cap ila di eremkamenge. Atep nengeda, nedi mok upu pepnedi, pio mali kupnyopda ware keca deiyo tep Allah wenepkamner do?” upepra mali kunge nengdi tali-tali penunge. 8 Ton nengda, ne peteremnun upu moupra men kael kemnunga cadi, sundi ne Paulus tep amok upu penenunge. Sundi, “Nun yuma tali lupra mali kupmepyopda, adeiki di amenda taru telep kun keca katuai kuprepa, nong kupkamre. Paulusdi upepra peteremrure.” Sun mok upu pen nengdi, upepra pedinenunge. Upenenunga tep nengeda, Allahdi amok upu penge neng tep, wenepra ponkamre.

“Nesala ban-ban yumada, dumsisi men kungedi, mali kun kecapu kununge,” pepu upu

9 Uda, aupu yuma akapmar dinin, siryada ware teneptepe do? ‘Nun Yahudi yala neng kunup nesalada, ila mambul kunup dinin, yuk yala nesala yumada mambul gume’ tenepra, men peptepe. Gume, ne kayapu, aupu konum lap pepmasene. Yahudi yala nesala pe, Yahudi yala gum nesala yuma peda utopu, mali kunupe. Amali kuramepu keca deiki di, ateng kouramseupa, nun kange dipru yuma malipu kuserure. 10 Allah upu neitamai sengamitopu kunupe. Aupuda ake.
‘Tuai mutu ban-ban yuma kunge nesala kan-kan neitamai di dumsisipu kure ngebo tenpu peda ton men kurure.
11 Sun yuma Allah er kure keca tep, pio moupra men kael kemengedi, walwalpu kununge. Tenpu ngebo peda, ‘Uo, ne cap, Allah cap kikiman kuteneme’ tenen, putarepa men kael kemnunge.
12 Nesala ban-ban yumadi, Allah tep tapra, amnyo karikra, yuk bisi konum bangedi, pio malipu kununge. Sun kan-kan neitamai di tenpu ngebo peda, telep kun keca ton men kurure. Sun yumada, pio malipu kununge.’ (Mazmur 14:1-3)
13 ‘Nimi depmengepa, tu palipra tu pumbon dongopmange dinin, deiki tara moupra tu men singipdongopmangepa, atu pumbon di tong ila di beleramretopu, kununge. q1 Ada, tuai mutu kunge neng yuma, sun sipyal deiki di pio mali-mali upu pepra bangedi, mok upu weika di petamnunge.’ (Mazmur 5:9)
‘Tonda, nimi pon bal inipra mapmarya di, si topseredi, yu ul kipdongopserepa, nimi deramengtopu, nesala yuma sun mali upu penunga deiki di, nimi weik popra bangepa denunge.’ (Mazmur 140:3)
14 ‘Nesala yumadi yuk neng tep mali upu sun nong deiki pepra deipmenga deiki di, pangdana cap, yu kudana cap, song tenena cap, weik belerure.’ (Mazmur 10:7)
15 ‘Sun yumadi yuk nesala tep, yu kuprepa, tenimterena gum di, menmena di tali lupra porbanunge.
16 Sun kuramenge keca neitamai yumada, mali kudidana cap, kange mun kange doupra ikin kemdidana cap, weik kurure. Ada dan cei do, sun embange mutu yumada angepu kununge.
17 Dipru boun kupredi, yuk nesala cap, telep kupra kikiman kun kecada, sun asuru konum pupdongopupa, pio walwalpu kununge.’ (Yesaya 59:7-8)
18 ‘Nesala ban-ban yumadi, ‘Uo, Allahdi wenepkamser do? Ware kupkamser do?’ tenepra, Allah tep kware men kununge. Sun yumadi tali lupra malipu kununge.’ (Mazmur 36:1)

19 Uda, nun yuma konum kael keamupke. Allahdi er mem upu pepra kareamupa, Yahudi yala nesala dopropidi, aupupu talepra, aupu amutara kununge. Aupu neitamai pesere keca yumada, sun tep peserura cadi, sun kan-kan neitamai di, tenpu ngebo peda, “Neda mali men kunune,” men peptue. Yahudi yala nesalapu gum dinin, nesala ban-ban yuma utopu, mali nengpu kunupa cadi, Allahdi upu bokeipseredi, wenepkamsera tep, nundi er tep upu ton tamupra men peptepe. Allah tep tamupra upu pena gum di, dimpepnapu kunkamepe.

20 Ange tep nengeda, ware nesala do yuma tep, Allahdi, “Ange kunkamrume, angeda men kunkamrume,” pepra, mem upu kareamseupa, aupu talepra dombapedi, dumsisipu kupmepyopda, adeiki Allahdi nun tep, ‘Sunda telep neng,’ men tenenkamsere. Nun pe puto deiki di, dumsisipu men kuptepya tep pepne. Ange gum dinin, Allah er upu gekepra kael kemnupa deiki di, ‘Uo, nunda tek sisi dipru mali nengpu kunupe’ tenen, moupra kael kemnupe.

Nundi Allah tep, teka tenenupa deiki di, Allahdi, “Sunda telep neng,” pepra, dumsisipu kemdiserura tep, pepu upu

21 Uda, nun pedipapu dumsisi men kweipdatepe dinin, Allahdi pumun taru men lap peramseu keca ukutaru konum katuai keipsere. Allahdi nesala yuma tep, nun mali kuramepe keca daepseredi, dumsisi kepra derisere ngeda, Musa sekamu mem upu talepra dombanupa deiki di men kurure. Deiyoda pio yuke. Dumsisi kemdisere ngebo, Allahdi Musa tep peiamupa lap pesere upu cap, Allah er upu lap perami neng, nabi-nabi capdi, aupu tep lap perami dinin, moupra men teneramepu.

22 Ukutaru dumsisi kemdisere ngeda, ake. Ada ware mutu nesala do yuma utopu, Yesus Kristus tep teka tenepmepya deiki di, Allah er kange dipapu nun mali kun keca daepseredi, dumsisi nesalapu kemdiserure. Nimi yala yuk-yuk men wilimdiserure. Yesus tep teka tenenge nesala yuma tep nengeda, Allahdi utopu teneseredi, ‘Sunda dumsisi nesala kununge,’ pepra teneseredi, er dipapu telep kemdiserure. 23 Nesala ban-ban yumada utotopu kunupe. Allah er tenpupuda mali keca tenpu pe men kuredi, pio dumsisipu kuretopu men kunupe. Nunda er upu yaniptapmepedi malipu kunupe. Allah pio telep kupra kuretopu, men kunupe. Nunda dumsisi men kupmanto nesala kunupe. Atep tuai mutu kupe nesala yumada kikiman utopu lyemserure.

24 Ada, nun mali keca ateng kouamseua neitamai di, Yesus Kristus kunupseudi, loptapra lyepseue. Ukupseua deiki, Allahdi bicau teneseredi, er kange dipu, “Sunda dumsisi neng,” pepra, tali karena utopu telep kemdiserure. ^{▼▼telep kemdiserure – Nun pedipapu men telep keipdatepi dinino, Yesus tep teka tenepmepyopda, Allah er kange dipapu, telep kupra deriserure. Nun mali kupra kunup dinin, Yesusdi nun tep depseua deiki di, yo punupseua cadi, Allah er diseredi, er kange deiki dipapu, ‘Anengda telepe pua,’ teneseredi, er nyapu kemdiserure.} 25 Allahdi Kristus tep uteneamu. ‘Yesus Kristus popmengepa, er yapi embenkamra deiki di, nimi tuai nesala sun mali kuramenge keca yuma gum kupra deipkamre. Nimi tuai nesala, sun yo pununa tep depkamre. Yesus popmengepa depkamra deiki di, teka tenepmengopda, tuai nesala sun mali kunge keca yo pununa tep lyepkamre,’ Allahdi teneamu.

Pumun taruda, nimi yumadi malipu kuramipa, Allahdi, ‘Dakwapye’ tenen, kaukemamu. Dinino, Allahdi, tuai nesala yuma tep, ‘Allahda pio dumsisipu kurure,’ tenen, ‘Moupra kael kepkameng,’ tenepudi, Yesus Kristus tuai mutu dokotepseue. Ada, tuai nesala yumadi, ‘Gume, Allah erda, mali kuramenge keca tep men taptue. Mali kuramenge keca yuma tep, upu bokeipredi wenemrure,’ tenepmengedi, ‘Moupra kael kepkamneng’ tenen, nun pununa tep, Allahdi Yesus Kristus tuai mutu dokotepseue.

26 Allahdi Yesus dokotepseupa, nun mali kun keca tep yana depseua deiki di, ukutaru Allah er pio dumsisipu kure kecada, konum katuai kupra deipseue. Ada, Allah, pio dumsisi kure ngebo. Ware ngebo do yuma, Yesus tep teka tenepre ngeboda, Allahdi angebo tep, “Kanda telep ngebo,” pepra dumsisi ngebo kemdirure. Atep, nundi kael kemnupe.

27 Uda, Allah er kange dipapu nun nimi tep dumsisi kemdiserur ngebo cadi, nimidi, “E, nun telep kuramupka deiki di lyepseue,” pepra gemeptepe do? Gume, ange utopu pio men peptepe. Ada deiyo men kwapmara tepa. Uda, Musa sekeiamu upu yuma pio dumsisikrap dombanunga deiki di, gemena upu peptenge do? Gume, angeda pio men kupmanto. Teka tenepmepya deiki dipapu, Allahdi lyemseredi, dumsisi nesala kemdiserure. 28 Apepmasenada, deiyo ake. Nundi aupu pepra peteremnupe. “Gume, Musa sekeiamu upu talepra dombanupa deiki di gum dinin, Yesus tep teka tenepmepya deiki dipapu, Allahdi nun tep, ‘Sunda telep neng,’ pepra, dumsisi kemdiserure. Yuk deiyo ton men kurure.”

29 Uda, sun ton tenipetepso. Allahda, Yahudi yala nesalapu lyepra talerur do? Yahudi yala gum nesala peda, lyepredi men talerur do? Gume, Yahudi yala nesala pe, Yahudi yala gum nesala peda, lyepredi talerure.

30 Apepmasen upu deiyoda ake. Akeca-keca yuma talepra deiki tara kurur ngeboda, Allah er tenpu kurure. Allah er tenpu kuredi, den bam bol deiki tarange sengmenge nesala, sun Yahudi yala nesala pe, uda den ban bol sengna gum nesala, Yahudi yala gum nesala peda lyemserure. Ukuserya deiyoda tenpu pua, yuk ton gume. Ada Yesus tep teka tenenupa deiki dipu lyemserure. Den bam bol sengna pel cap, yuk pel cap donupa deiki di, pio men lyemserure.

31 Ange tep nengeda, ton nengdi upepsetenge do? “Gume sunda, ‘Allahdi lyemserura deiyoda, teka tenena deiki dipu lyemserure,’ perume. Uperuma cadi, apemumnya deiki di, ‘Musa sekamu mem upuda mambul gume. Nong men kupkamre upupu kurure,’ pepra yanitamna utopu kurume,” pepra deipsetenge do? Gume aupuda tek sisi men pepsetenge. Allahdi dumsisi kemdiserur nesaladi, er upu yanitamna gum di, Yesus tep teka tenenupa deiki, ‘Allahdi, “Angeda ukunkamrume, angeda men kunkamrume,” pepra deiamseu upuda mambul’ tenen, gispal dopedi dumsisipu kunkamepe.