Rom 5 | XteSC | STEP | Ange tep nengeda, teka tenepmupka deiki, Allahdi nun mali keca daepseudi, lyepseue. Lyepseudi dumsisi kupra deipseue. Nun Deiyo Ngebo Yesus Kristus pel dopseua deiki di, nun cap, Allah cap antaipseupa, kwar dangna gum dipapu, kange deipra er cap dipru dukdongopra kikiman kunupe.

Romans 5

“Yesus Kristus pel dopseua deiki di, nun cap, Allah cap antaipseupa, kange deipra, dipru dukdongopra kikiman kunupe,” pepu upu

1 Ange tep nengeda, teka tenepmupka deiki, Allahdi nun mali keca daepseudi, lyepseue. Lyepseudi dumsisi kupra deipseue. Nun Deiyo Ngebo Yesus Kristus pel dopseua deiki di, nun cap, Allah cap antaipseupa, kwar dangna gum dipapu, kange deipra er cap dipru dukdongopra kikiman kunupe. 2 Tonda, Kristus er pel dopseua deiki di, Allah bicau teneseredi, er kange dipapu melipra lyemserepa, lyemna keca dopropmepedi, kange bongtona gum dipapu, pio dimpeprappu kunupe. Yesusdi lyepseuada, gum men kupsetue. Ange peda, Yesus teka tenenupa deiki di kunupe. Tonda, ‘Allahdi er pio telep kure keca yuma, karepserepa, nun peda pio teleppu kunkamepe’ tenen, keteneipmepedi, kange deipra dinapu kunkamepe. 3 Angepu gum dinin, nun ikin keca kuserya peda kange deipra kunupe. Deiyoda ake. Ada, ikin keca kupseryopda, angedi kurpeteramserepane, amenda taruda tamna gum di, pio pe deipra, puto di pel dopmanto nesala kemdiserure. Ada ikin kusere keca deiki di, puto kemdiserura tep, ikin keca kuserya peda, kange deipra kunkamepe pepsene.

4 Aikin keca kusere taru yuma peda, tamna gum di, pio pe deipra pel donupa deiki di, nun kange dipru wisiserepa, telep kupra kun keca kun neng kemdiserure. Dipru wisipsere pangeda, ‘Allah melimseredi, amenda taru tek sisi lyepropkamser’ tenen, ketenepra dinapu kunupe. Angeda kange bongtona gum dipapu, tek tenenupe. 5 Uda, Allahdi er Lek ^{▼▼Lek Sambala “Lek Sambala” penup ngeda, ada ‘Kurun sambala kurure’ tenena tep gume. Allah er Sambalada, mali kun keca tenpunge peda, pio men kurura tep, pio teleppu kurure. Atep, “Lek” Sambala penupe. Indonesia upu deiki di, Roh Khudus penunge.} Sambala weika di karepseupa, melimserya deiki, Allahdi nun tep bicau teneserenge yuma, weika di kael kepbapepa, nun dipru neitamai weika di dekpepra dinikbaserure. Allahdi dipru kareserya tep nengeda, ‘Allahdi tek sisi melimseredi, lyepropkamsere’ tenen, ketenepra dinapu kunupada, tali tep men kunupe. Allahdi tek sisi lyepkamsera cadi, amenda taruda, ‘Uo,’ tenen, mali kange doupra men kunkamepe.

6 Sun ton kael kepso. Nun yumada, puto pio gum nesala kuramepu taru, Allah er kure keca yuma tep yanipra malipu kuramepudi, Allah er damai pio men kuramepu. Dinino, ataru neitamaida Allahdi, ‘Yesus er depkamre taru, pio telep taru adano,’ teneamutopu, nun mali kuramepu keca yo pununa tep, Yesusdi nun tep depu. Nun mali kuramepunge wenemna tep tali poptapsetu dinin, Kristusdi nun pununa tep depseu.

7 Nimi tuai nesaladi, yuk neng pununa tep, ton men denunge. Tenpu-tenpu taru ton, pio telep kure ngebo tep, ‘Popkup’ tenen, keteneipmengepane, atelep ngebo er pununa tep, yuk ngebo ton balila deiprapredi, “Gume, angebo pona gume. Erda tapmumdi ne teppu popneso,” peptue. Dinino, ange utopu ngeda, weika di ton ukungepa, pio men gekenupe. Nimidi yuk neng pununa tep, men denunga tep pepsene. 8 Dinino, nun yumada pio tupa malipu kupyaramupka neitamai, Kristusdi nun pununa tep depu. Allahdi Kristus karepupa, Yesus depseua deiki di, konum katuai kupra deipseupa kael kemnupe. Adeiki di, ‘Allah ila di bicau teneserure’ tenen, kael kemnupe.

9 Ukutaruda, nun kaele. Kristus popipa, er yapi embeua deiki di, nun mali kun keca yuma daepseupa, Allahdi, “Yesus apel dopka deiki di anesalada dumsisi nesala kupra deipsene,” pepra telep kupra deipseue. Ange tep nengeda, nun kaele. Yesus cap, dipru dukdongopra kunupa deiki, Allahdi mali kun nesala yuma tep, yu kuprepa, sun tep wenepra, upu lepsisikra bokeipredi, amali kun nesala popra gawal dakamre taruda, Kristusdi nun teka tenenup nesala tep loptapra lyepkamsere.

10 Angeda tali men pepsene. Gume, nun nimi yumadi, ‘Allah tep nun song’ tenen, pio malipu kuramepu taru neitamai di, Allah er Mi Sisa Yesus karepseupa, nun pununa tep depka deiki di, Allah cap, nun cap telep kupra antaipseudi, ukutaruda Allah cap nun cap kikiman kutepe. Ukupseua tep, nun kange men boktopsetue.

Pio tek sisi tenepra kael kemnupe. Kristusdi Allah cap, nun cap, antaipseudi, konum telep kupra deipseua tep, Kristus pio gam kunkamra deiki di, er cap dipru dukdongopra kunupa deiki di lyemkamsere. Amenda taru Allahdi men tapkamsere. Er cap kikiman pio tep kunkamepe. 11 Tonda, angepu gume. Pumun taruda, nun cap, Allah cap kikiman men kupmanto nesala kuramepu dinin, Yesus Kristus depka deiki di nun cap, Allah cap antaipseupa, Allah cap kikiman pio kunkamepe. Ukutaruda, nun Deiyo Ngebo Yesus cap kikiman dipru dukdongopra kunkamep taru neitamai yumada, nun nai bo Allah tep kange derinupe.

“Nimi dena deiyo kecada, Adamdi beneipupa sakroseu dinin, gam kuna deiyo kecada, Kristusdi kareserure,” pepu upu

12 Uda, yuk upu ton dukdongopra pepkusene. Mali kuna tep deiyo kecada, tenpu ngebodi gonga kepudi, nimi tuai nesala yuma beneipupa, sakroseu. Sakroseudi, ukutaru nimi ban-ban yumada, dipru mali kuserura cadi, malipu kunupe. Tonda, angebo mali kamnga deiki di, nimi dena deiyo keca ton yaue. Nimi ban-ban yuma malipu kunupa cadi, ban-ban yuma kunup nesalada, denapu kunupe. 13 Allahdi, ‘Ange kunkamrume, angeda men kunkamrume,’ pepra deipupa, Musadi sekeiamseu upu kapul men peiamu taruda, nimi tuai nesaladi mali weik kurami. Dinino, Musadi amem upu kapul men sekamu taruda, ton nengdi yuk neng tep, “Sun mali kumumya deiki di, amem upu yanipmarume. Deiyo ake,” pepra men lap perami. Ada, ‘Mali kun kecada ake, telep ngeda ake,’ tenena tep, lap pen upu kapul men kwamu taruda, tuai nesaladi, ‘Yanipmarum upuda ake,’ pepra men lap perami.

14 Allahdi peiamupa, Musadi sekeiamseu upu kapul men kwamu taruda, nimidi, “Mali kupmenge ngeda deiyo ake. Mali kupmenga deiki di, aupu yaninunge,” pepra lepsiknedi, telep kupra men derirami. Dinino, menmena ngebo Adamdi dipra, dakupyakaramyanen, Musa kuramu taru neitamai yumada, nimi ban-ban yuma depyakanapu kurami. Tonda Allahdi Adam tep, ‘Ange men kunkamrume,’ pepra deipu upu katuai dipapu, lap pepu dinin, Adamdi aupu yaniptapu. Ukupupa, ataru dipdongopra daneitamai kurami nesala yumadi, mem upu sekra deiaminge ton, kapul men kwamnga cadi, ataru neitamai yumada, sundi, “Uo, sun mali kuprumnge di, mem upu yaniptapmarum ngeda, ake,” pepra, men lap pepmanto kurami. Dinino, sun peda mali kuramya deiki di depyakarami. Adamda, amenda taru doryankamu ngebo Yesus tep, ukupmanto ngebo kuramu.

15 Dinino, ne kayapu. Allah bicau teneseredi, er kange dipapu tali karesere kecada, yuk kurure. Tonda, Adam mali kupudi benepseupa, tuai nesala deiki yuma sakroseu ngeda, yuk kurure. Adamdi kupunge yuk, Allahdi tali kareserur keca yuk kurure. Angeda lap pepkusene. Tenpu ngebo Adamdi mali kupupa, nesala weika di depyakaramyanen, nun peda denupe. Dinino, pio telep ngeda, Allah bicau teneamseudi, er kange dipapu tenpu ngebo Yesus Kristus tali karepseua deiki di, nesala ban-ban yuma weika di telep kupra deipyakaramseupa, gam pio kunkamepe.

16 Ange utopu ton cap pepsene. Tenpu ngebo Adamdi mali kupupa, nimi yuma sun deiki dena deiyo keca sakroseunge cap, uda Allahdi tali karepseu kecada cap, utopu men kurure. Adamdi tenpu mali keca kupupa, Allahdi er wenemna tep upu bokeipudi, pepu. “Adam mali kupka deiki di tuai nesala yuma depkamenge,” pepra deipupa, nun yuma denupe. Dinino, Allah bicau teneamseudi, tali karepseu ngeda, yuk kurure. Angeda, tenpu ngebodi mali kuna gume. Nesala ban-ban yuma men nukmanto mali weik kuramipane, Allah bicau teneamseudi tali karepseunge deiki di, nun mali kun keca yuma gum kupra deipseudi, “Anesalada telep nesala kununge,” pepra, telep kupra deipseue. Adeiki di gam pio kunkamepe.

17 Uda, nun konum kael kepmupke. Tenpu ngebo, Adamdi mali kupupa, adeiki di nesala ban-ban yuma depyakaramyanen, tupa denupe. Dinino, pio telepnge peda, konum kael kemnupe. Ada, Allah ila di bicau teneamseudi, er kange dipapu tali karesere keca konum keteneiamseu. Ada Allahdi nun mali kun keca daepseredi, lyemserure. Er dipapu, “Sunda telep nesala kununge,” pepra, telep kupra kemdisere ngeda, konum keteneiamseu. Atep, adumsisi kuna deiyo keca keteneipseu ngeda, tek sisi teka tenepra dopropmenge nesalada, gam pio kunkamenge. Ada Yesus Kristus cap, dipru dukdongopra kikiman kunkamenga deiki di, er puto kareserya deiki di mali kun keca yuma bisbisa kamengedi, teleppu kunkamenge.

18 Ange tep nengeda, aupu ton pepkusene. Tenpu ngebo, Adamdi mali kupupa, Allahdi nesala ban-ban yuma tep, “Sunda denapu kunkamenge,” pepra deiamseu. Ange utopu, tenpu ngebo Yesus Kristusdi, pio dumsisi pel dopseua deiki di, nesala mali kun keca gum kupra derina cap, nimi lyemna cap, dumsisi kemdina deiyo keca cap, keteneiamseu. Apepmasen upu tep, teka tenepra dopropmenga deiki di, nesala ban-ban yuma neitamai di, teka tenenge nesala weika di, gam pio kunkamenge. 19 Ada, tenpu ngebo Adamdi mali kupka deiki, nun yuma benepseudi, mali kuna nesala kupra deipseua utopu, tenpu ngebo Kristusdi, er nai upu gekepra dumsisi kuramnga deiki di, nesala weika di dumsisi kun nesala kemdinkamsere. Ukuserya deiki di, Allahdi nesala weik tep, “Sunda telep nesala kununge,” pepra telep kupra derinkamsere.

20 Allahdi, ‘Ange kunkamrume, angeda men kunkamrume,’ peipupa, Musadi sekeiamseu mem upu karepseua deiyoda ake. Ada, ‘Amem upu gekepra kael kepmengedi, uo, nunda tek sisi pio mali nengpu kunupe,’ tenepmengedi, ‘Betapra kael kepkameng’ tenen, karepseue. Amem upu karepupa, nimi yuma kael keami dinin, mali keca weika di ton cap tapakrap tupa kupbarami. Tupa tapakra mali kupbarami dinino, Allah weika di ton cap bicau teneramseudi, er kange dipapu, ‘Tek sisi nimi lyemna keca tali karepkamsene,’ teneamseue. Mali kun kecada, yambul weik kupbaramu dinin, Allahdi bicau teneseredi lyemserur ngeda, pio weik kupbaredi, mali kuna deiyo keca yumada, bisbisa kapra bisipbarure.

21 Allahdi tuai nesala tep, weika di bicau teneramseua deiyoda pepkusene. Nesala ban-ban yuma mali kuramya deiki di denapu kupyakaramyanen, mali kuna cap, dena cap amutara kurami. Dinino, Allah bicau teneramseudi er kange dipapu, “Sunda telep nesala kununge,” pepra, telep kupra deriserure. Pumun taruda, mali kuna cap, dena cap puto weik kuramnga cadi, nimi yuma akeca amutara kurami. Ukutaruda, Yesus pio dumsisi kuramnga deiki di, gam kuna deiyo keca kareserura cadi, Allah er dipapu bicau teneseredi, tali melisere keca amutara kunupe. Nun Deiyo Ngebo Yesus Kristus dumsisipu kuramudi, mambul pel dopseua deiki, Allahdi, “Sunda telep nesala kununge,” pepra, dumsisipu kemdiserepa, pio gampu kunkamepe.