Rom 6 | XteSC | STEP | Uda, ne kayapu. Ton nengda upenunge. “Gume, nun mali kuramupupa, Allahdi bicau tenepseudi, er kange dipapu lyepseua cadi, weika di ton cap dipru kareserepa, melimkamsere. Atep nengeda, nunda ton cap tapakra malipu kunkamepe,” penunge. Upenung dinino, angeda kunkamep do?

Romans 6

“Nun cap Kristus dukdongopra kunup nengda, tupa mali men kunkamepe,” pepu upu

1 Uda, ne kayapu. Ton nengda upenunge. “Gume, nun mali kuramupupa, Allahdi bicau tenepseudi, er kange dipapu lyepseua cadi, weika di ton cap dipru kareserepa, melimkamsere. Atep nengeda, nunda ton cap tapakra malipu kunkamepe,” penunge. Upenung dinino, angeda kunkamep do? 2 Gume. Ange pio men kunkamepe. Konum deamenge nesaladi, akeca-keca yuma putarepa men kuramengtopu, nun peda utopu mali kun keca yuma tep nengeda, konum tapmupka cadi, mali kun kecada ton cap pio men tenenkamepe. Atep ware keca tep ton cap tali lupra mali kuptepe do? Gume, nunda ukupu dipru keipseu nesala cadi, ange men kuptepe.

3 Ne kayapu sun ton moupra men kael keamrum do? Nun yuma teka tenepmupupa, Yesus Kristus er si deiki di me dongopseiya deiki di, Kristus cap dipru dukdongopseue. Kristus cap dipru dukdongopseua deiki di, erdi nun mali kuramepu keca yo pununa tep depunge peda, nun cap dukdongopseupa, nun peda utopu depmepu. Ukupseua cadi, mali kun keca tep nengeda, konum deamenge nesaladi sun taleamenge keca ka tamupra men doryakaramengtopu, amali keca putaserepa ton cap pio men kunkamepe.

4 Me dongopseiya deiki di nun tep Allah er kangeda, nun tep, ‘Anesalada, Yesus depupa tu palipya utopu, kupmenge,’ teneserure. ‘Tonda, sun Yesus tep teka tenenge nesala yuma peda, konum deamipa tu paliami nesala utopu kununge,’ teneserure. Atep, ‘Ukupra kunkamenge,’ teneserea deiyoda pepkusene. Ada, Kristus depupane, er nai bo Allah, er ila puto deiki di gam bukra deiputopu, ‘Sun peda pumun taru mali kuraminge yuma tapra, ukupu nesala utopu kupmengedi, dumsisipu kunkameng’ tenen, Yesus depka deiki di, Yesus cap dipru dukdongopseupa, nun cap depmepu. Ada, Allah er kange dipapu uteneserur keca tep lap pepsene.

5 Ange tep nengeda, nun konum kaele. Allahdi Yesus depunge cap, depmaupane ka tamupra gam bukunge cap, adeiki di nun cap tenpu dukdongopseue. Tonda, Yesus depmaupane, Allahdi gam bukra deipupa pio gam kuretopu, adeiki di nun cap tenpu dukdongopseu. Atep, ukutaru Yesus gam kuretopu, amenda taru nun peda gam bukra deipserepa, er cap gam pio kunkamepe. 6 Konum kael kemnupe. Pumun taruda nun kange tenenange cap, dipru cap, pio malipu kwamseu dinin, Yesus sengdin co deiki popipa depka deiki, Allahdi Yesus cap nun cap dukdongopseua deiki di, nun men di mali kwamseunge yuma gum kupra deipseue. Ada, Allahdi nun mali kwamseunge yuma dopra, Yesus deiki deipka tep, nun peda konum deami nesala utopu kupra deipseue.

Ukupseua deiyoda ake. Ada, Allahdi nun tep, ‘Gume, sun kange dipru yumadi, mali kun keca tep puto weik kwamu ngeda, nedi bisbisa kapra lyepnedi loptapkamne. Anesala sun mali kuraminge neitamai di loptapnyopda, amenda taru teleppu kunkamenge. Ada, mali kuna deiyo keca di, sun tep ateng koupra deiprepa, mali kun keca amutara ton pio men kunkamenge. Teleppu kunkamenge,’ teneamseu. Atep, Allahdi Yesus depka deiki di, nun cap dukdongopseue.

7 Mali kun keca neitamai di loptapra lyepseue pepmasenada, tali tep men pepne. Deiyoda, ake. Konum deamenge nesaladi, mali keca putarepa, men kununga cadi, nunda konum deamenge nesala utopu kupra deipseua tep, mali kuna deiyo keca di, ateng koupra deipserepa, mali kun keca puto kuramunge amutara ton cap men kunkamepe. Yesus depka deiki di, loptapseua cadi, amenda taruda teleppu kunkamepe.

8 Uda, angepu gume. Nun kaele. Kristus depu taruda, Allahdi nun cap, Yesus cap dukdongopseua tep, Yesus depu taruda, nun cap depmupke. Kristus cap, nun cap kikiman depmupka cadi, nun kaele, Kristus pio gam kunkamretopu, nun peda Kristus cap dipru dukdongopra pio gampu kunkamepe. 9 Aupu pepmasenada, tali men pepsene. Deiyoda, ake. Nun kaele, Kristus depu dinin, Allahdi konum gam bukra deipupa, pio gam kunkamra cadi, amenda taru kange di ton cap men depkamre. Nimi dena deiyo kecada, Kristus tep men bisbisa kaptue. Atep, nun kaele, Kristus pio gam kunkamretopu, nun peda Kristus cap dipru dukdongopra pio gam kunkamepe. 10 Yesus Kristus depu ngeda, nun mali kun keca cap, mali kuna deiyo keca cap tep, gum kupra derina tep, ue tenpu tarupu depu. Dinino, Allahdi Yesus gam bukra deipupa, ukutaru gam kuredi, Allah er gispal dona cap, er si eremna cap tep, pio kunkamre.

11 Kristusdi ukuretopu, sun teka tenerum nesala peda, utopu tenepra kunkamrume. Ada, ‘Nunda mali kun keca yuma tep nengeda, konum deamenge nesala utopu kunupa cadi, ange ton cap putapserepa, pio men kunkamepe. Ange gum dinin, nun gam kunkamep taru yumada, Yesus cap, nun cap dipru dukdongopseua deiki di, Allah er sipu erepra, er gispal dopra kunkamepe.’ Angepu tenepra kunkamrume.

12 Ange tep nengeda, ukunkamrume. ‘Mali kuna deiyo keca bisbisa kapseredi, nun kange dipru taleseredi gidoserepa, mali kun kecapu putaserya deiki di, mali kunup’ tenen, kange moupmumdi, mali kun keca yuma tapraprumudi, teleppu kunkamrume. Mali kun keca yuma, kange di ton cap pio men kunkamrume. 13 Tonda, sun kange tenenange cap, sun buru cap, sun nong yuma capdi, mali kun keca yala-yala yuma talepra men kunkamrume. Ange gum dinino, ‘Allah dipapu talenkamsere’ tenen, sun kange dipru cap, nong yuma cap, Allah tep karenkamrume. Ada sundi sun pe tep, ‘Gume, nunda konum deamupupane, Allahdi gam bukra deipseudi, ukupu nesala utopu kupra, konum telep kupra deipseue’ tenen, sun nong yumada, Allah tep karepmumpa, Allahdi sun tep melimserya deiki di, dumsisipu kunkamrume.

14 Ukunkamruma deiyoda pepkusene. Ukutaruda, Allahdi, “Angeda ukunkamrume, angeda men kunkamrume,” peipupa, Musadi sekeiamseu mem upu amutara tupa men kurume. Ukutaruda, Allah bicau teneseredi, er kange dipapu er puto kareseredi, melimserepa, er amutarapu kurume. Atep nengeda, mali kuna deiyo keca di, sun tep bisbisa men kapkamser dinin, teleppu kunkamrume.

“Dumsisi kun kecapu pio tenepra kunkamrume,” pepu upu

15 Uda ne kayapu, yuk upu ton pepkusene. Ton nengda upenunge, “Gume, Musadi sekeiamseu mem upu talepra, ange amutara ton men kunupe. Allah bicau teneseredi, er kange dipapu melimserya deikipu kunupe. Atep nengeda, tali kange doupra mali kun keca yuma, tali lupra kutepe,” penunge. Utenepra penung dinin, aupu pengetopu kunkamep do? Gume, angeda pio men kunkamepe. 16 Ware keca deiyo tep, sun walwal tupa kurum do? Nedi pepkusen upuda, sun ton moupra tenipetepso. Aupuda men kael kepmaruma cadi, men tenerum do? Ukupmanto ngeda pepkusene. Ware nesala do yuma, sundi yuk neng tep, ‘Aneng sun penge upu gekepmepedi, sun amutarapu kunkamepe,’ tenepmenge nesalapu, aneng dipapu nimi deiyo talepra, sun deiki tara kungedi, sundi anesala talengedi, sun tenepmenge pelpu dimengepa, sun amutara kungedi apelpu donunge.

Ange utopu ton, mali kun kecapu tenepra putasere pangeda, amali kuna deiyo ngebodi ateng koupseredi, sun kange dipru taleserepa, malipu kupbaramumya deiki di, amenda taru tek sisi depkamrume. Agum dingeda, Allahdi peseretopu, aupupu gekepra dombamumyopda, Allah er dipapu taleseredi, dumsisi nesala kemdinkamsere. Atep, mali kun kecapu talepmepyopda, tek sisi depkamepe. Allahdi peseretopu telep kecapu talepmepyopda, gam pio kunkamepe.

17 Dinino, nedi sun tep tenipnedi, Allah tep, “Telepe,” pepra er si eremnune. Ukununa deiyoda ake. Ada, pumun taru sun Roma mutu nesalada, mali kuna deiyo ngebodi ateng kouamseupa, er amutarapu kuramrumdi, pio malipu kuramrume. Dinino, ukutaruda, nundi Allah er upu peteremamseputopu, kange bongtona gum di, sun kange dipru yumadi, atek sisi upu talepra dumsisipu kurume. Ukutaruda, Allah er dipapu sun kange dipru neitamai taleserepa, er amutarapu bukra kurume. 18 Pumun taru mali kuna deiyo ngebo Kain Jen Ngebodi ateng koupra deiamseupa, mali kun kecapu kuramruma neitamai, Allahdi lyepra konum loptapseue. Ukupseua tep, ukutaruda, er amutara bukra, dumsisi kecapu talepra, teleppu kurume. Atep, Allah morokune taru yumada, nedi sun tep tenepnedi, ‘Telepe,’ penune.

19 Uda, ukupmanto upu cap, katuai gekepmanto upu cap deiki di pepmasenada, sun kange dipru yuma kapul men wisipupa, tali nengdi teneramengtopu tupa tenerume. ‘Deiyo dan do?’ tenen, tenipetepmumdi, ‘Deiyonge moupra men kael keprum’ tenen, katuai dipu pepsene. Pumun taruda, sun nong cap, dipru kange yuma capda, mali kuna deiyo ngebo tep kareramrumpa, ateng kouamseua cadi, er amutarapu bukra kuramrumdi, mali kun keca yala-yala yuma weika di talepra kupbaramrume. Pumun taruda, mali kun kecapu talepra kupbaramrume. Dinino, ukutaruda telep kupra kun kecapu talepra kunkamrume.

Ada, sun nong cap, kange dipru yuma capda, Allah tepapu karepmumdi, er amutarapu bukra dombamumpa, erdi talenkamserya deiki di, dumsisi kupra kun kecapu talepra kunkamrume. Ukupmumnyopda, sun mali kun keca yuma gum kupra deipbaserepa, telep nengpu kupbankamrume. Tonda, ‘Erdi dumsisi nesala keipseredi, telep kupra deipkamser ja’ tenen, telep kun kecapu talepra kupbankamrume.

20 Pumun taruda, Kain Jen Ngebodi ateng kouamseupa, er amutarapu kuramrumdi mali pelpu doramrume. Ukuramrumdi Allah er amutara buknedi, dumsisi kun keca ton talepra men kupmanto kuramrume. Allahdi sun dipru men taleamseu. 21 Ataru kuramrum keca yumada, kange di ton cap tenepetepso. Amali kun keca yala-yala yuma kuramruma deiki di, sun kange dipru cap, sun kun keca yuma cap, telep kemdiramseu do, gum do? Ukutaruda, sun pumun kuramrum keca tenepmumyopda, ali dangrume. Akeca yuma talepra kupbaramepyanen, sirya taru depmepyopda, Allah cap kikiman men kutepe. Mali kecapu pio talepra kupmumyopda, tek sisi depkamrume. Mali kecapu talepra kunge nesalada, sirya taru, Allah cap kikiman men kunkamenge. Sun yukpu kunkamenge.

22 Dinino, Kain Jen Ngebodi ateng kouamseupa, er amutarapu kuramrumdi, mali kun kecapu talepra kuramruma neitamai, Allahdi konum lyepra loptapseupa, ukutaruda er amutara bukra kumumpa, er dipapu sun kange dipru taleserure. Allah er taleserya deiki di, telep kudisere ngeda pepkusene. Ada dumsisi telep kupra kun keca kupbaramepyanen, amenda sirya taruda, Allah cap kikiman gam pio kunkamepe.

23 Angeda tali men pepsene. Deiyoda pepkusene. Ada, nundi menenga keca dorona tep, pel dopmepepa, sun pel deiyo nengdi menenga keca, co bo karesenungtopu, mali kun kecapu tenepra, pio malipu kupbaramepyopda, sirya taruda depkamepe. Depmepyopda, Allah cap kikiman pio men kunkamepe.

Dinino, Allah bicau teneseredi, er kange dipu tali karesere kecada, pepkusene. Ada, nun Deiyo Ngebo Yesus Kristus cap, dipru dukdongopseua deiki di, sirya taruda gam bukra deipserepa, Allah cap pio gam kunkamepe.