Romans 7

‘Musa sekamu mem upu amutara tupa men kunupe, tenepra kael kepkameng’ tenen, ukupmanto tep pepu upu

1Ukuda ne kayapu, yuk upu ton pepkusene. Asurat dopropkurum nesalada, Musa sekeiamu upu yuma gekepra kael kemamrume. Angeda ne kaele. Atep, apepkusen upu yumada, sun kaele. Allahdi, ‘Ange kunkamrume, angeda men kunkamrume,’ peipupa, Musadi sekeiamseu mem upu amutara bukra kuramenge nesalada, sun gam tupa kunge tarupu aupu talepra kunkamenge. Depmengopda, aupu tupa men tenenkamenga cadi, aupu amutara pio men kunkamenge. 2Ukupmanto upu ton pepkusene. Musa sekeiamu upu peseretopu, tenpu ngebodi er ner dopyopda, angebo gam kunkamre taru yumada, aner er amutarapu bukra kikiman pio kunkamrenge. Musa sekeiamu upu peseretopu, anerdi angebo tapra yuk ngebo ton men doproptue. Dinino, aner domre ngebo konum depyopda, anerda kange di ton cap kaber ner utopu kurura cadi, yuk nengdi, aner doptenge. Ada, mem upu peseretopu, ‘Nimi yuk neng ton cap dona meme,’ perur upu amutara tupa men kurure.

3Ange tep nengeda, aner er nenge tupa gam kure taru neitamai di, angebo tapra yuk ngebo dopyopda, yuk nesaladi aner tep, “Anerda, mali ner kurure. Er nenge tapra, yuk ngebo dopka cadi, upula nyangmenge ner utopu kurure,” penunge. Dinino, aner er nenge konum depyopda, amem upu amutara tupa men kurura tep, anerdi yuk ngebo doptua peda, yuk nesaladi er tep, “Upula nyangameng ner utopu kurure,” men peptenge. Er nenge men di domu ngebo konum depka cadi, aupu men peptenge. Aupuda ukupmantonge tep pepsene.

4Ange tep nengeda, ne kayapu, arup pepmasentopu, Kristus er nong depka deiki, Allahdi sun cap Yesus cap dipru dukdongopseua tep, adeiki di, sun peda deprume. Kristus depu taru di Musa sekamu mem upu amutara tupa men kuretopu, Kristus cap dukdongopseua deiki di, sun peda amem upu amutara tupa men kurume. Allahdi ukupseua deiyoda pepkusene. Allahdi uteneramseu. Ada ‘Nedi peipsipa, Musadi sekeiamu upu talepra kurami dinin, ukutaruda, er depupa nedi gam bukra deipsi ngebo, Yesus Kristus, er dipu sun talerepa, er amutarapu kunkamenge. Ukungedi dumsisipu kupra kungedi, ne Allah tep, gispal dopra ne si eremkamnenge,’ Allahdi teneramseue.

5Nun kapul teka men teneramupu taru neitamai di, nun kange dipru yumada, pio malipu kuramseua cadi, Musa sekeiamu upu deiki, “Ukuna meme,” peipseu upu gekeramupka deiki di, mali kun kecapu putaramseu. Ada, ‘E amali kun keca tep nengeda, Allahdi, ‘Ukuna meme,’ peipseu dinin, angeda pio kunkamepe’ tenen, putaramseu. ‘Akupe kecada, mali kurure’ tenen, moupra teneramupu dinin, akecapu putaramseupa, malipu kuramepu. Ukuramupka deiki di, nong kupseu ngeda, dena deiyo pua. Ukupra malipu kunupa deiki di nun yuma denapu kunupe.

6Dinino, pumun taru Musadi sekamu mem upu amutarapu kuramupudi, malipu kuramupka neitamai di, ukutaru Allahdi nun tep ukutaru konum lyepra loptapseue. Ada Kristus depu taruda, nun nai Allahdi Yesus cap, nun cap dipru dukdongopseua deiki di, konum loptapseupa, Musa sekamu mem upu amutara tupa men kunupe. Atep nengeda, ukutaruda, Musa sekra deiamu upupu talepra men dombanup dinino, Allah er Lek Sambaladi er puto kareseredi, melimserya deiki di, Allah er ukupu bisipu banupe. Ukupra konum loptapseupa, ukutaru, Allah er Lek Sambala puto deiki di, Allah er telep pelpu nundi talepra donupe.

Nun kange dipru neitamaida, ‘Mali kupkun do, telep kupkun do?’ tenen, kange bongtoserepa, ikin kuserenge tep, pepu upu

7Yuk nengdi, “Musa sekamu mem upu taleamupka deiki di mali kun neng kupra deipseua tep, Allahdi mem upu peipseu ngeda, mali upu kurure,” peptenge do? Gume, ange men pepsetenge. Allahdi “Angeda ukunkamrume, angeda pio men kunkamrume,” peipupa, Musadi sekeiamseu mem upu, men kwamtu teptoda, ware upu deiki di, ‘Mali kun keca deiyo ngeda ake,’ tenepra gekeptepedi, kael keptepe do? Musadi sekamu mem upu deiki di, ‘Mali kun kecada ake,’ tenen, kael keamepu. Ukupmantoda, Musa sekeiamu upu neitamai di aupu ton akurure.
‘Yuk neng sun talenge keca cap, sun kunge keca cap tep, ‘Uo, nedipu taleptene’ tenen, putaserepa dipru engena pio meme.’ (Keluaran 20:17)

Dinino, aupu men kwamtuopda, ware keca deiki di, ‘Angeda mali’ tenen, kael keamtepe do? Gume, ange yuma peda men kael keamtepe. 8Mem upu deiyonge men kwamtuopda, nundi, ‘Angeda mali’ tenen, moupra men kael keptepedi, tali mankau kange doupra kuramtepe. ‘Ange mali kupmepu’ tenepra, men kael keamtepe. Dinino, Musadi, “Yuk neng sun keca tep, dipru engena meme,” pepra sekeiamu upu deiki di kael konum kepsopda, konuma, ange konum kael kepsi. Ange utopu, Musa sekeiamu upu kael keamsa deiki di, adipapu ne dipru neitamai pio malipu kuramneua cadi, ‘Uo, mali kun keca yala-yala yuma kuptene’ tenen, dipru engeramneudi, putaramneunge yumada, katuai kupupa, ange yuma kael keamsi. Mem upu pio men kwamtu teptoda, ange yuma men kael keamtene. 9Pumun taru Musa sekamu mem upu men kael keamsi taruda, tali mankau kange doupra, talipu kuramsi dinin, amem upu yuma peteremamneipa, gekepra kael keamsa deiki di, ne mali kuramsinge yuma moupra teneramsidi, ‘Uo, ne mali kuramsa deiki di, tek sisi Allahdi wenepra popnerepa, depkamne ja’ tenen, moupra kael keamsi.

10Ataruda, ‘Musadi sekamu mem upu talepra dombanyopda, gam kunkamne,’ teneramsi dinin, aupu talepra, men dombenmanto kupsopda, ‘Gume, aupu men kupmanto kunerura tep, ne malipu kununa cadi, Allahdi wenepra popnerepa, tek sisi depkamne ja’ tenen, amem upu deiki di kael keamsi. 11Ne kange dipru pio mali kuramneudi, ne dipru gidoramneupa, mok kecapu talepra teka teneramsi. Ada, ‘Musadi sekamu mem upu peretopu, ayuma talepnedi, dumsisipu kunkamne’ tenen, kuramsi dinin, Musa er upu deiki, ne mali kuramsinge yuma katuai keipneupa, ‘Uo, ne tek sisi malipu kununa cadi, Allahdi wenepra popnerepa, ne depkamne ja’ tenen, kael keamsi. Musa sekamu mem upuda telep upu kurur dinin, aupu kael keamsa deiki di, ‘Uo, ne tek sisi depkamne ja,’ tenen, kael keamsi. 12Ange tep nengeda, Musadi sekamu mem upu tep nengeda, “Aupuda mali upu pua,” men peptene. Gume, aupuda, tek sisi pio telep upu, dumsisi lek upupu kurure.

13Musadi sekamu mem upu telep upu kurur dinin, neda, “Depkamne,” pepmasenada, Musa sekeiamu upu kael keamsa deiki di, mali kweipneua tep, “Depkamne ja,” pepmasen do? Angeda gum dinino, atelep upu kael keamsa deiki di, ‘Mali kun kecada, tek sisi ake’ tenen, moupra kael keamsi. Kael keamsidi, ‘Uo, ne tek sisi pio mali ngebo kunune,’ teneamsi. Tonda, ‘Tek sisi depkamne ja’ tenen, kael keamsi. Allahdi peiamseu mem upuda, telep upu kurur dinin, ne dipru mali weik kunerura cadi, atelep upu gekeramsa deiki di, ‘Uo, ne tek sisi depkamne ja,’ tenen, kael keamsi.

14Uda, nun yuma kaele. Allahdi, “Angeda ukunkamrume, angeda pio men kunkamrume,” peipupa, Musadi sekeiamseu mem upuda, er kange dipapu men sekamu. Allahdi peiamupa, Musadi sengamua tep, aupuda tek sisi telep upupu kurure. Dinino, neda tali tuai ngebo kunedi, ne kange dipru yumada, malipu kunerure. Mali kuna deiyo ngebodi, ateng koudongoneredi, talenerepa, er amutarapu kunune. Ne pe puto deiki di telep men kuptene. 15Tupa-tupa akecapu kunya deiki di, ne kange pio wang-wang penerure. Angeda lape pepkusene. Ada, ne kange dipru neitamai di, ‘Uo, atelep kun kecapu kunkamne’ tenen, putanerur dinino, tek sisi telep ngeda, tupa-tupa men kunune. Ne dipru neitamai di, ‘Angeda mali kun keca tep ne songe,’ tenenun kecapu, tupa mali kupbanune. 16Ada, nedi, ‘Akunun keca yuma tep, tek sisi mali kun kecapu kurure,’ tenenune. ‘Ange yumada ne song,’ tenenun dinin, akecapu tupa kunyopda, adeiki di konum katuai kunerure. Musadi sekamu mem upuda, telepngepu kurure. Deiyoda, ‘Amali keca kupnung’ tenen, “Meme,” pepra, upu sengserura cadi, aupuda teleppu kurur dinin, nepuda dipru mali ngebo kunune.

17Ne tali kange doupra, mali men kunun dinino, ne kange dipru neitamai yumada, mali kun kecapu kunerura cadi, mali kun kecapu putanerya deiki di, mali-mali weik kupra derinerepa, malipu kunune. Angeda ne pedipapu men melipdatene. 18Ne konum kael keamsi. Neda, tali tuai ngebo kununa cadi, ne kange dipru neitamai yumada, dumsisi kuna deiyo keca tenpunge peda men kunerure. Aupu pepmasena deiyoda ake. Ada, ne kange tenenuna deiki di, ‘E, dumsisi kun kecapu talepra kunkamne’ tenen, putanerur dinino, tek sisi ngeda ne puto deiki dipu telep kun kecada men kuptene.

19Angeda tali tep men pepsene. ‘Teleppu kupra kunkamne’ tenen, putanere ngeda akapmar dinino, telepnge men kunune. Ange gum dinin, ne kange dipru neitamai yumadi, ‘Angeda mali kun keca tep, ne songe,’ tenenun kecapu, tupa-tupa talepra mali kunune. 20‘Angeda mali kun keca tep, ne songe’ tenenun keca dinin, pio malipu kunune. Ukupra kunun keca yumada, deiyo akupmarenge tepapu kunune. Angeda tali men kunune. Gume, deiyoda, ne kange dipru neitamai yumada, malipu kunerya deiki di, mali kun kecapu tupa-tupa kunune.

21Ukunerya tep, ne kange dipru neitamai yumada, podana utopu kunurure. Atep nedi, ‘Telep kecapu talepra kunkamne’ tenen, pio putanere taru yumada, mali kun keca tep putanange yuma peda kikiman kunerure. Telep kunange cap, mali kunange cap, ne dipru neitamai podana utopu kunurure. 22Atep, tali men pepsene. Deiyoda ton pepkusene. Ne kange dipru neitamaida, Allahdi pesere upu yuma tep, ‘Angeda pio telepe’ tenen, kange derinune. 23Angeda akupmarya peda, ne kange dipru neitamai kunere kecada, deiyo yuknge ton kunerure. Angeda ada mali kuna deiyo keca tep pepsene. Dumsisi tenenange cap, mali kunange capdi, ne kange dipru neitamai yumada, pedana cap, podana cap utopu kunerure. Podanerenge pangeda, mali kuna deiyongedi ateng koudongonerepa, mali kun keca amutara utopu tupa kunune. Ne pe puto deiki di ange yuma pio men loptapdatene.

24Ukununa tep, neda pio ila kange mun kange doupra kunune. Neda ila mali kuna ngeboda nepu kunune. Ne tali tuai mutu kunun taruda yopu kunkamne. Ukunmanyanen, amenda taru tek sisi depkamna cadi, ware ngebodi loptapra lyepropnetu do? Ange utopu, ware ngebodi, telep keipnetu do? 25Gume, ne kayapu, ne kaele. Ne kange dipru neitamai tenenun nge yumada, Allah erdi peipu upu, dumsisingepu putanerepa, er upupu talepra, er amutarapu kunune. Ukunun dinino, neda tali tuai ngebo kununa cadi, ne kange dipru neitamaida, mali kuna deiyo keca dipapu talenerepa, amali kun keca er amutarapu tupa kunedi, mali kunune.

Dinino, Nun Deiyo Ngebo Yesus Kristus cap, nun cap dipru dukdongoseua deiki di, nun nai Allah erdi konum loptapra lyemserure. Atep, nedi nun nai bo Allah tep, “Kanda pio telepe,” penune. Ne Paulusdi pepsene.