Rom 8 | XteSC | STEP | Uda, ne kayapu, ila mambul upuda pepkusene. Ware nesala do yuma, Yesus Kristus tep teka tenepmengedi, er cap dipru dukdongopra kikiman kunge nesala yuma tep nengeda, Allahdi, “Sunda mali kurume,” pepra men wenepkamsere. Yesus cap dipru dukdongopra kunge nesala yuma tep nengeda, Allahdi, men tapkamsere.

Romans 8

Allah er Lek Sambaladi nun dipru taleserya puto kareserepa, er cap kikiman kunupa tep, pepu upu

1 Uda, ne kayapu, ila mambul upuda pepkusene. Ware nesala do yuma, Yesus Kristus tep teka tenepmengedi, er cap dipru dukdongopra kikiman kunge nesala yuma tep nengeda, Allahdi, “Sunda mali kurume,” pepra men wenepkamsere. Yesus cap dipru dukdongopra kunge nesala yuma tep nengeda, Allahdi, men tapkamsere. 2 Allahdi wenepra men poptapkamsere pepmasenada, tali tep men pepmasene. Ange deiyoda pepkusene. Ada, Yesus Kristus pel dopseua deiki di, Allah er Lek Sambala kareserepa, er melimserya deiki di, dena cap, mali kuna cap, deiyo keca di, ateng kouamseua neitamai di, lortamserure. Atep, amendada er cap bokra yuk-yuk men kunkamepe. Men depkamep dinin, er cap kikiman pio gampu kunkamepe.

3 Uda, Allahdi, “Angeda kunkamrume, angeda men kunkamrume,” peipupa, Musadi sekeiamseu ^{▼▼Musa sengamu upu lap pena upuda, nomor 35 dirume.} mem upu akapseu dinin, nun tuai nesala yuma, nun kange dipru neitamai mali kuna deiyo keca akapserepa, nun puto nesala gum tep, amem upu talepra dumsisipu kupmanto men kunupe. Aupu talepra men dorbetepe. Tonda, nun pedi, men lyepdatepi. Nun pedipapu men lyepdanmanto dinino, Allah er kange dipu er Mi Sisa dokotepseupa, nimi nong utopu kupra yau.

Allah er Mi Sisa dokotepseua deiyoda, ‘Nimi sun mali kunge keca tep lyepredi, gum kupra deipkamre’ tenen, dokotepseu. Nun mali kunup keca tep, tali lupra wenepsetudi, poptapsetu dinin, nun yo pununa tep, Allahdi Yesus karepseupa, yu nengdi popi. Kristus popipa er depka deiki, Allahdi nesala yuma, nun mali kuna deiyo keca yuma wenepra poptapna utopu kupseu. Yesus depka deiki di, mali kuna deiyo kecada konum bisbisa kapu. Yesus tep teka tenepmepyopda, mali kuna deiyo keca di, ateng men koupsetue. Yesus depka deiki di, mali kuna deiyo keca konum bisbisa kapua tep pepsene.

4 Yesus depka deiki di, mali kuna deiyo keca konum bisbisa kapua deiyoda pepkusene. Ada, Allah er kangeda, ‘Tuai nesala yumadi pio dumsisipu kunkamenge, teneamsi ngeda, men kupmanto kununga cadi, Yesus pio dumsisipu kunmaryanen, amenda taru mali nengdi popmengepa, dekamra deiki di, tuai nesala sun mali kuna deiyo keca yuma adipapu wenepnedi, gum kupra deipkamne,’ teneamu. Nun mali kunange tep, nun pedipapu men bisbisa kuptepe.

Atep, Yesus pel dopseua deiki di, mali kuna deiyo keca gum kupra derina pel konum gawal dakseue. Allahdi nun lyemna tep, ange yuma pel dopseua deiyoda pepkusene. Ada, Allahdi, ‘Nimi kange dipru neitamai mali kuna deiyo keca di talerepa, men kunkameng dinin, ne Lek Sambala er puto deiki melimrepa, sunda dumsisipu kunkamenge,’ teneamseue. Uteneamseua deiki di, Kristus karepseupa, lyepseue. Atep ukutaru nun teka tenenup nesalada, nun dipru neitamai mali kun keca akapserya peda, ange deiki di men kunupe. Nunda Allah er Lek Sambala puto deiki di melimserepa, teleppu kunupe.

5 Ware nesala do yuma, sun dipru neitamai mali kuna deiyo keca tupa akaprepa, amali kun kecapu tenepra, mali-malipu kununge. Anesalada, amali keca tep, tenenapu kungedi, mali kun kecapu putarepa, pio mali kununge. Anesala ukunung dinino, ware nesala do yuma, Allah er Lek Sambaladi, nun dipru neitamai kuseredi peserengepu, gekepmepedi telep kupra kunup nesalada, Allah er Lek Sambaladi tenesere keca tep, tenenapu kunupe. Ukupra tenepedi, dumsisi kecapu, talepra telep kun kecapu kunupe. 6 Ware nesala do yuma, Allah er Lek Sambaladi sun kange dipru taleprepa, er putaretopu tenepra kunge nesalada, kange deipra teleppu kuramenganen, amenda taru depmenga peda, Allah cap kikiman gam pio kunkamenge. Dinino, sun mali kecapu talepra kunge nesalada, amali kun kecapu tenepra kuramenganen, amenda depmengopda, Allah cap kikiman pio men kunkamenge.

7 Sun mali kecapu tenepra, mali kunge nesalada, sun kange tenenange neitamai di, Allah er kure keca yuma tep, yanipmengedi, tamnapu kununga tep pepsene. Anesalada, Allahdi nimi tep, “Telep kupra kun kecapu kunkamrume,” pepra lap pesere upu yumada, men gekepmengedi, er pesere upu amutara men kununge. Mali kecapu tenenung nesalada, Allah er upu men gekepmanto kununge. Anesalada, Allah er amutara bukra men dombenmanto kununge. 8 Angepu gum dinin, ware nesala do yuma, mali kuna deiyo keca di, sun kange dipru talerepa, malipu kunge nesalada, Allahdi kange derirur keca, men kupmanto kununge. Atep, anesalada Allahdi men kange derinkamre.

9 Sun mali kecapu tenepra kunge nesalada, ukunung dinino, sun Roma mutu neitamai kumumdi konum teka tenerum nesalada, ange utopu men kurume. Deiyoda, Allah er Lek Sambaladi, sun kange dipru neitamai konum wekseupa, dipru dukdongopra kurum nesalada, Allah er Sambaladi sun dipru taleserepa, kurume. Nun peda utopu kunupe. Allah er dipapu taleserepa kunupa cadi, nun dipru neitamai mali kuna deiyo keca akapserya peda, akeca di nun kange dipru men taleserure. Dinino, ware nesala do yuma, Kristus er Sambala cap kikiman sun dipru dukdongopra men kunge nesalada, tek sisi Kristus er nyapu men kununge. Sunda, tali nengpu kununge.

10 Dinino, ware nesala do yuma, Kristus cap dipru dukdongopra kunup nesala yumada, Allahdi nun tep, “Sunda dumsisi kun nesala,” pepra konum telep kupra deipseua tep, nun sambalada gam pio kunkamsere. Nun nongda mali kuna deiyo keca kapseua tep nengeda, depkamep dinin, nun sambalapuda, gam pio akunkamsere.

11 Tonda, Yesus depupa, er tep gam bukra deipu ngebo Allah, er Lek Sambaladi sun dipru neitamai kusere nesalada, amenda taru sun depmumnya peda, Allahdi gam bukeipkamsere. Ada, Yesus depupa, gam bukra deipu ngebo, Allahdi sun teka tenerum nesala peda, amenda taru gam bukra deipserepa, gam pio kunkamrume. Sun gam bukeipkamserada, sun dipru neitamai kusere ngebo, Allah er Lek Sambala meliamserya deiki di, gam bukra deipkamsere.

12 Ange tep nengeda, ne kayapu, nun kange dipru neitamai mali kuna deiyo keca akapkamser dinino, amali kun keca di taleserepa, mali kecapu tenepra men kunkamepe. 13 Angeda tali tep men pepsene. Deiyoda ake. Ada, nun kange dipru mali kudina deiyo keca di taleserepa, mali kun kecapu talepra kupbapyopda, tek sisi amenda taru depkamepe. Dinino, Allah er Lek Sambala melimserya deiki di, mali kun keca yala-yala yuma tep, ‘Nun song,’ tenepra tapmepyopda, gam pio kunkamepe. Ada mali kun keca potamna utopu kunkamepa tep pepsene.

14 “Gam kunkamepe,” pepmasenada deiyo ake. Ada, Allah er Lek Sambaladi, sun dipru neitamai kuseredi, “Ukunkamrum, ukunkamrum,” peseretopu angepu tenepmengedi, er upupu gekepra talepmengedi dombanung nesalada, tek sisi Allah er nyapu kununga tep gam pio kunkamenge. 15 “Allah er nyapu kurume,” pepmasenada, mesum tep men pepsene. Deiyoda ake. Allahdi er Lek Sambala karepseupa, sun dipru neitamai konum wekra kuserura tep, sunda er nyapu sisa konum kurume pepsene. Tali pel melipra don nengdi sun deiyo neng tep, kware weik kuramengtopu, Allahdi er Lek Sambala karepseuada, ‘Anengda, ne tep kware weik kunkamneng’ tenen, men karepseue. Ange gum dinin, er Lek Sambala karepseupa wekseua deiki di, Allah er nyapu kupra deipseue. Er nyapu kupra deipseupa, er Lek Sambala pel doserya deiki, nundi Allah tep, “Nun naie,” penupe.

16 Allah er Lek Sambaladi, nun kange dipru neitamai upu pediserya deiki di, nun kange bongtona gum dipapu, ‘Nunda, tek sisi Allah er nyapu tek sisi kunupe,’ tenepra kael kemnupe. 17 Ange tep nengeda, aupu ton pepsene. Nunda, Allah er nyapu sisa kunupa cadi, er teneamseutopu, er talere keca bokra karenkamsere. Allahdi er talerur keca bokra er Mi Sisa Kristus tep karenkamretopu, nun peda utopu ton cap, bokra karenkamsere. Mali nengdi Kristus tep, ‘Nun song’ tenen, er nong deiki ikin keca deriramitopu, nun nong deiki ikin keca derisenunge. Atep, Kristus ikin kuramutopu, nun peda utopu ikin kunupa cadi, ukutaru Kristus ila mambul ngebo pio telep kupra kuretopu, amenda taru nun peda telep kupra deipserepa, er cap kikiman utopu, mambul weik pio telep neng kunkamepe. Paulusdi sun Roma mutu nesala tep pepu.

“Allahdi amenda taru pio telep kweipserepa, kange deipra kunkamepe,” pepu upu

18 Uda, yuk upu ton pepkusene. Ukutaruda, mali nengdi nun tep, ‘Nun song’ tenen, nun nong deiki ikin keca weik derisengepa, kange mun kange doupra kunupe. Dinino, ne kangeda, Allahdi amenda taru nun tep erepra deipseredi, pio telep kunkamepa tep, ukutaru ikin kusere ngeda, yambul mambul pua. 19 Allahdi ketekepra deiamu keca yala-yala yumada, ‘Uo’ tenen, mambul kange doupra ketenepra deiya dinapu kununge. Ada, ‘Uo, Allah er nyapu sisa katuai kupra deipredi, ereiprepa, pio telep kupra kunkameng taruda, dan taru kuprepa epkamep do?’ tenen, kange deipra ketenepra dinapu kununge.

20 Pio menop taru, gonga keamu taruda, akeca-keca yuma cap, dena cap, lyuna cap, mali kuna cap, men kwamu. Dinino, ukutaruda, tuai mutu kure keca yala-yala yumada, dena cap, lyuna cap, mali kuna cap neitamaipu kurure. Tuai mutu kure keca yumada, talipu kurure. Nong men kupkamre kecapu kurure. Ukurura deiyoda, Allahdi tuai kure keca yuma wenemna tep, mali upu pepra wipupa, talipu kurure.

21 Ukutaruda, akeca-keca yuma dena cap, lyuna cap kupra talipu kurur dinin, Allahdi ketekeiamu keca yumadi, ‘Uo, mali keca di ateng kouamseua neitamai di, dena cap, lyuna cap kunupa neitamaida, Allahdi dan taru loptapra lyepserdi, telep kupra deipkamser do?’ tenen, kange deipra ketenepra deiya dinapu kununge. Ataruda, Allahdi er nyapu yuma tep, loptapra lyepredi, pio telep kupra deipkamretopu, erdi ketekeiamu keca yala-yala yuma cap, mali kuna neitamai loptapra, kange di ton cap telep kupra deipkamre.

22 Uda, ukupmanto upu ton pepkusene. Ada nerapu, mundu douamenganen, mi deipkamange taru deiyo pu weik jeramrepane, ‘Uo, ne mi adipapu deiptene’ tenen, mali kange doupra douramengtopu, Allahdi ketekeiamu keca yumada, ‘Uo, Allah loptapra lyepseredi, telep kupra deipkamser taruda, dan taru do?’ tenen, mi deiyo doramenga utopu kununge. Ada, ‘Uo, adipapu Allah kange di ton cap telep kupra deipsetue,’ tenen, kununge. 23 Tali akwapu kecapu gum dinin, nun teka konum tenepmupupa, Allah er Lek Sambala kareamseupa, nun dipru taleserepa, kunup nesala peda, mali kange doupra mi deiyo doramengtopu, kunupe.

Ada Allahdi er Lek Sambala menmena kareamseu nesala kupedi, nundi, mambul kange doupra, ‘Uo, Allahdi er nyapu kuna tep gwanaipseu nesala gawal dangnada, dan taru di kupkamser do? Nun nimi nong yo pununa tep, im deiki nong pio telepnge karepkamserada, dan taru di karepkamser do?’ tenen, kange deiya ketenepra dinapu kunupe. 24 Allah lyepseu taru di dipra, ukutaru aneitamai taru yumada, ‘Allahdi nun tuai nong yo punupseredi, im deiki pio telepngepu karepkamsere’ tenen, kange deipra dinapu kunupe. Dinino, ‘Ukunkamsere’ tenen, ketenepra dinapu kunmapyanen, amenda taru akeca konum karepserepa epmepyopda, konuma.

Ataru di dipra doryankamre taruda, ‘Dan taru kupkamser do?’ tenen, dinapu men kunkamepe. Konum dopropmepe keca tep nengeda, ‘Uo, dan taru di doproptene do?’ tenen, diramengtopu men kunupe. Ware ngebo do yuma, ‘Uo angeda ne doproptene,’ tenen, putarepa, dinapu kure ngeboda, konum dopropre dingeda, ‘Dan taru do?’ tenen, dinapu pio kunkamre do? Gume.

25 Dinino, nun kapul men dopropmupu keca tep, ‘Dan taru karepkamser do?’ tenen, ketenepra dinapu kunkamep taru neitamai yumada, kange bongtona cap, ‘Uo,’ tenena cap gum dipapu, telep kange doupra, dimpeprappu kunkamepe. 26 Ikin kupserya peda, kange deipra dinapu kuramepetopu, nun puto boun kuserepa, mambul kange doupra kunup taru neitamai yumada, Allah er Lek Sambaladi melimserure. Ikin kusere taru, ‘Allah moronada, telepnge ake’ tenen, moupra tenepmepedi, men kael kemnup dinino, nun makuna tep, Allah er Lek Sambaladi melipra Allah moroserure. Erdi nun melimna tep, kange mun kange doupra morosere ngeda, nimi upu deiki di lap men peptepe. Nun melimna tep nimi men pepmanto upu deiki di, telep kupra moroserure.

27 Nun teka tenenup nesala yuma tep, Allah er Lek Sambaladi nun makuna tep, melipra Allah moroserure. Allah er Lek Sambaladi nun melimna tep Allah moroserurada, Allahdi, ‘Ukupra kunkamenge,’ teneseretopu, tenpupu tenepra moroserura cadi, Allah er Lek Sambala tenerur keca yumada, Allah er peda kaele kemrure. Ange utopu, nun kange dipru neitamai tenepe keca yuma peda, Allahdi kael kemserure.

Kristus bicau teneseredi, melimserya deiki di, nunda mali kun keca yuma bisbisa kamna nengpu kunupa tep, pepu upu

28 Ne kayapu, nun kaele. Nundi Allah tep teka tenepra, nun kange er deikipu derinup nesala yuma tep nengeda, ware kun keca do yuma, ikin kuserenge pe, kanam kuserenge peda, Allahdi akusere keca yuma dopra, nun tep telep kemdiserure. Ikin keca kusere taru pe, kanam kusere taru peda, ataru-ataru yumada, Allahdi pel dopra melimserya deiki di telep kemdiserure. Ukupra melimsere nengda, tali neng tep gum dinin, Allahdi ‘Ne nyapu kupmengedi, ne teneamsi pel telep kupra donkamenge’ tenen, kongpeseredi wepra derisere nesala tep pepsene.

29 Aupuda tali tep men pepsene. Deiyoda ake. Ada, menop taru Allahdi konum tenepra kael keamseudi, ‘Sunda, ne nyapu kunkamenga cadi, anesala telep kweipnepa, ne Mi Sisa er telep kupra kuretopu, sun peda utopu kunkamenge’ tenen, konum wepra deiamseue. ‘Ukunkamenge’ tenen, wepra deiamseua deiyoda ake. Ada, Allahdi, ‘Ne Mi Sisa Yesus Kristusda, menmena weni mi utopu ngebo kuryopda, er weit yapuda, neitam nyapu utopu kupra tapakbangedi, weik kupbankamenge,’ teneamseudi, wepra deiamseua tep pepsene.

30 Tonda, menop taru di konum wepra deiamseu nesala tep, ‘Ne damai yarume,’ pepra, nun dipru neitamai kongpepseu. Allahdi kongpepseu nesalada, nun mali kun keca daepseudi, “Sunda dumsisi kun nesalapu konum keipsene,” pepra, telep kupra deipseupa, er nyapu sisa kunupe. Dumsisi telep nesala konum telep keipseu nengda, amenda sirya taru pio telep kweipseryopda, ila di erepra deipkamsere.

31 Arup taru, “Allahdi konum telep kupra deipseu keca ake,” pepra lap pepmasen upu tep nengeda, ware upu ton tapakra peptepe do? Gume, Allahdi konum bicau teneamseudi, nun tep wepra deipseudi, melipra pel doserura cadi, ware ngebo cap, ware ikin keca capdi, bisbisa kapsetu do? Akeca yumada, bisbisa men kapsetue. 32 Sun ton tenepetepso. Allahda, er Mi Sisa tenpupu kurur dinin, ‘Ne mida tenpu ngebo cadi, ne mawa men karepkune,’ tenena gum dipapu, nun lyemna tep, karepseu. Atep, er Mi Sisa dopra, nun lyemna tep konum karepseua cadi, wareto keca do yuma, nun putaserur keca yuma bicau teneseredi, er kange deiprap, talipu men karenkamser do? Gume, nun putasere keca yumada talipu karenkamsere.

33 Tonda, Allahdi nun tep, “Sunda pio dumsisi nesala keipne,” pepra konum telep kweipseua cadi, nunda Allahdi konum weiamseu nesala kunupe. Atep nengeda, ware nengdi nun tep, “Sunda mali nesala,” pepra, upu lepsisikra bokeipsetenge do? Gume. Allahdi, nun tep, ‘Ne cap kikiman telep kupra kunkameng’ tenen, “Dumsisi nesala kurume,” pepra telep kupra deipseu. 34 Ange utopu, ware ngebodi, nun tep wenepra poptapkamser do? Gume. Yesus Kristusdi nun lyemna tep depu. Yesus depseuada akapmar dinin, ila mambul ngeda, Yesus depupane, Allahdi tamupra gam bukeipupa, Yesusda Allah er dumsisi tara bungbeu. Allah er damai bungbeudi, Yesus nun makuna tep, melipra Allah tep moroserure. Ange tep nengeda, wareto nengdi, nun tep, “Sun mali kumumnge tep, Allah ila di wenepkamsera tep, er cap kikiman pio men kunkamrume,” pepra wenepsetengedi, upu lepsisikra bokeipsetenge do? Gume, angeda men pepsetenge.

35 Tonda, ware ikin keca kupsetupa, Kristus bicau teneseredi dipru kareseryada, upu seksetudi, wilipra yuk-yuk deipsetu do? Ikin kuserenge cap, kange mun kuserenge cap yumada, Yesus teka tenenupa tep, yuk nengdi nun nong deiki ikin keca derisenunga cap, jen keca yuma gum kuprepa si tepra kuna cap, opkal kenengamep keca yuma gum kuprepa, tali nong bananga kuna cap, popmanto keca yuma cap, mali nengdi yu tenesengedi, ‘Ya di popkupe,’ tenesenge nge cap, ayuma akapmaserya peda, Kristusdi bicau tenepra melimsere ngeda, upu men sekmanto cadi, angeda men bisipmanto. Yesusdi pio bicau tenenkamsere. 36 Kange mun kusere keca tenena tep, pumun taru Mazmur upu neitamai sekami upu pepkusene. Aupuda ake.
‘Allah kan mawa nesala kunupa cadi, mali nengdi ‘Nun song’ tenen, tupa-tupa popmanto kusenunge. Ada nimidi tali domba bisam tep, ‘Domba bisamda tali kecapu kurura cadi, tali lupra poptepe,’ tenengetopu, sun mali nengdi, nun tep utopu tenesenunge.’ (Mazmur 44:22)

37 Dinino, ne kayapu, Yesus Kristusdi nun tep bicau teneamseudi, dipru kareserya deiki di melimserura cadi, ikin keca cap, kange mun keca cap akapserya peda, er puto kareserya deiki di bisbisa kamna nesalapu kunupe. Akeca-keca yumadi nun tep, men bisbisa kapsetue. 38 Angeda tali tep men pepsene. Ne kaele, kange tenimtona pio gum dipapu kunkamepe. Allahdi nun tep dipru kareramseudi, bicau tenesere ngeda, nun Deiyo Ngebo Yesus Kristus cap, dipru dukdongopra kunupa deiki di pio kuserure.

Angeda, men gum kupsetue. Ware ikin keca do yumadi, nun cap Kristus cap wilipra yuk-yuk men deipsetue. Dena cap, gam kunup taru ikin kuserenge cap, im deiki melimna neng cap, isok-isok cap, ukutaru mambul kuserenge cap, amenda taru kupkamserenge cap, yuma tep puto kepra kunkamepe. 39 Puto kure keca yala-yala yumada, im deiki tara kurenge cap, tuai mutu amutara kurenge cap, uda, Allahdi ketekeiamu keca neitamai kure keca yuma cap, ange yuma akapmar dinin, ange yumadi, Kristus bicau tenesere ngeda, gum kupra men deipsetenge. Tonda, Yesus cap, nun cap wilipra yuk-yuk men deipsetenge.