Rom 9 | XteSC | STEP

Romans 9

Akeca-keca deiki tara kunga deiyo ngebo, Allah men di teneamutopu, Israel nesala wepra deiamu

1 – 2 Ne kayapu, ne yala nesala sun Israel neng tep tenepnedi, ‘Uo’ tenen, tupa-tupa mambul kange doupra, dipru pu jenerure. Ne Paulusda, Kristus cap, dipru dukdongopra kununa deiki di, pio tek sisi upu pesenune. Ne kange dipru neitamai yumada, Allah er Lek Sambala kuneredi “Tek sisi penmareme,” pepra peneretopu, tek sisi upupu pesenune. Mok upu men penune. 3 Ne yala neng sisa, nun Israel yala nesala tep, kange mun kange dounune. Kange mun kange doununa deiyoda, pepkusene. Ada, ne yala nesala sun Israel neng yuma tep, ‘Nun nai bo Allahdi lyeptue’ tenen, pio putanerure. Israel yala nesala yuma lyemna tep nengeda, ‘Allahdi ne Paulus tep, tapnetudi, Kristus cap, ne cap wilipra yuk-yuk deipnetupa, adeiki di Israel nesala yuma lyeptue’ tenen, putanerure. Ada, ‘Uo, ne yala neng sisa, Israel nesala yuma lyeptue’ tenen, putanerepa, pepsene.

4 Israel nesalada, tali nesala gume. Deiyoda ake. Tenpu ngeda, Allahdi Israel ^{▼▼Israel nesala penge ngeda deiyo ake. Ada, pumun taru Yahudi nesala sun co puna ngebo Abrahamdi er mi Isak deipu. Isakdi er mi Yakub deipu. Amenda taru, Yakubda, Allahdi ukupu si karepudi, “Kan sida Yakub peramkei dinin, kan si ton Israel penkamkenge,” pepu. Atep, Yakubdi deipupa dadeipdanen yakaramyanen, derinung nesala yumada, ukutaru Israel nesala penunge. Tonda anesalapu dinin, si butenenge tep, Yahudi yala nesala penunge, tonda Israel nesala penunge. Tonda, lap pena upu nomor 20 dinkamrume.} nesala tep, ‘Ne nyapu kunkameng’ tenen, “Gwanamkamsene,” pepra pediramu. Tonda, Allah er puto cap, pio telep kurenge cap, sun tep benbenemamu. Tonda, Allahdi, nimi mali kun keca kaukemna tep, “Ukunkamrume,” pepra deriramu pedina upuda, sun Israel nesala tep pediramu. Tonda, Allahdi Musa tep, ‘Angeda ukunkamrume, angeda men kunkamrume,’ pepra deriramu mem upu pediramu ngeda, Israel nesala tep pepra deriramu. Tonda, Allahdi, “Ne si ukupra eremkamnerume,” peprapudi, er si eremna tep, akati pumbon kunkaminge yuma cap, tonda Allahdi “Ukupra melimkamsene,” pepra pediramu upu cap, aupu yumada, Allahdi sun Israel nesala tep, kareramu.

5 Tonda, nun apu yapuda, ^{▼▼Yahudi yala neng, sun apu yapu tep, lap pena upu nomor 20 dirume.} Israel yala nesaladi deriramipa dadeipdanen, yakarami nengda, ila mambul neng kurami. Tonda, nimi lyemna tep, Allahdi wepra dokotepseu ngebo Kristus, er deiamrei neng butene peda, sun apu yapuda Israel yala nesalapu kurami. Ayuma tep nengeda, sun Israel nesalada, tali nesala men kununge, pepmasene. Ange utopu Kristus peda, tali ngebo men kurure. Erda, akeca-keca yuma talepra deiki tara Ila Deiyo Ngebo kupra kurure. Erda, tek sisi Allah kurure. ‘Er sida, pio eremnapu kunkamepe’ tenen, Amin pepsene.

6 Dinino, pumun taru Allahdi, “Ne nyapu sisa, Israel nesalada, weik kupbankamenge,” pepra pediramu upuda, tek sisi men suktalepmare. Allah er nyapuda weika di ton tupa kununge. Dinino, Israel yala nesaladi deriramenge nyapu yumada, nong bol deiki tep, Israel nesala kunung dinin, sun kange dipru neitamaida, Allah er nyapu sisa men kununge. 7 Ange utopu, Abrahamdi deipupa, dadeipdanen, yakarami nengdi deriramipa kunge nesalada, nimi yala cap, nong bol deiki cap tep nengeda, sun apu bo Abraham kuramu dinin, sun kange dipru neitamaida, Abraham er nyapu sisa utopu men kununge. Ange gum dinin, Allahdi Abraham tep peiamu upuda ake.
‘Allahdi pepu. “Kandi deipkamrem mi, er sida Isak, erdi deiprepa, dadeipdanen bankameng neng tep, ‘Anengda, Abraham er nyapu sisa kununge,’ pepra penkamsene,” Allahdi pepu.’ (Kejadian 21:12)

8 Uda, Allahdi aupu pepka deiki di, kael kemnupe. Tali dopdareidi, deiprei mida, amidi deipupa, dadeipdanen yakarami nyapu yuma tep, “Allah er nyapu sisa utopu kununge,” men peptepe. Ange gum dinin, Allahdi Abraham tep, “Kan mi deipkamreme,” pepra, pediramu upu cap, nimi men kupmanto keca, kunupsek pen pel dopka deiki, Saradi deipu mi Isakdi, deipupa, dadeipdanen, yakarami nesalada, “Abraham er nyapu sisa kununge,” peptepe. Atep, ‘Nimi tuai nesala sun pedipapu dopdangedi, sun dipapu derinung nyapuda, Allah er nyapu sisa men kununge. Dinino, Allah er pediramre upu deiki di, er nyapu sisa kemdiserure’ tenen, kael kemnupe. 9 Angeda tali men pepsene. Deiyoda ake. Allahdi Abraham tep upepu.
‘Allahdi pepu, “Ne tenepsi taru konum kuprepa, tamupra yanyopda, Saradi sal mi deipkamre,” Allahdi pepu.’ (Kejadian 18:10, 14)

Aupu pepu taruda, Abrahamdi Ismael konum men taru di deiamu dinin, Allahdi pediramu ngeda, ami Ismael tep men pepu. 10 Aupu deiki di kael kemnupe. Allahdi wepra derirur nesalapu, er nyapu sisa kununge. Tonda, Allahdi Isak weamutopu, apepkusen upu ton akurure. Isakdi er ner Ribka dopudi, amenda taru anerdi kwa nyapu butene deipu. Anyapu buteneda, sun nai boda tenpu, Isak kuramu. Isakda, Israel nesala nun apu bo tep pepsene.

11 – 12 Ribkadi akwa nyapu butene kapul men deipu taruda, Allahdi ‘Pumun taru nedi, anyapu butene tep, teneamsitopu kunkamreng’ tenen, aner Ribka tep aupu pepu.
‘Allahdi, “Kwa nyapu butene deipkamremada, menmena deipkotepkamrem mida, amenda deipkotepkamrem mi, er amutarapu pio kunkamre. Amenda deipkamrem mida, deiyo keca talepra ila ngebo kunkamre. Er du boda, weit ngebo er amutarapu kunkamre,” Allahdi pepu.’ (Kejadian 25:23)

Allahdi Ribka tep, aupu peipu taruda, akwa nyapu kapul men deipka tep, sundi telep kuna cap, mali kuna cap, kapul men kuprei. Dinino, Allahdi teneamutopu pepu. Tenpu keca peda kapul men kuprei dinino, Allahdi, ‘Ukunkamne,’ teneamutopu, Yakub tep wepra deipu. Ukutaru peda, Allahdi wepra deriramretopu, angepu kunkamre. Tonda, nimidi sun kurameng keca deiki di gum dinin, kongpepseredi wediserya deiyo ngebo, Allahdi teneseretopu kunkamre. ‘Ayumada ne teneamsitopu kunkamre’ tenen, Allahdi aupu peipu.

13 Aupu peiputopu, Allah upu yuk buku neitamai, Allahdi peipupa, amenda kupkamu keca tep, Allah er upu lap pena ngebo nabi Yesayadi aupu ton seku.
‘Allahdi pepu, “Ribkadi amenda deipkwetepu mi Yakubda, ne kange deipsi dinin, weni deipkwetepu ngebo Esauda, ne songe tenenune,” Allahdi pepu.’ (Maleaki 1:2-3)

14 Uda, ne kayapu. Arup pepmasen upu akapseua tep nengeda, nundi ware upu peptepe do? Nun tuai nengdi, “Uo, Allahdi teneretopu, ton neng tep kange derirur dinin, yuk nengda tamrure. Atep nundi Allah tep, mali kurure,” pepra, mali peptepe do? Gume, Allahdi mali men kupmanto ngebo cadi, ange men peptepe. 15 Nundi, “Allah mali kurure,” pepra Allah tep, er nong deiki, mali upu men peptepe pepmasena deiyoda ake. Ada, Allahdi Musa tep pepu upu ake.
‘Allahdi, “Gume, tuai mutu neitamai kunge nesala yumada, tali poptaptene dinin, ton nengda sun mali kunge keca tep kaukepnedi, gum kupra derinune. Ton nengda, wenepra portamnune. Ange utopu, ne tenenetopu, ton nesala tep, bicau tenepra melimnune. Tonda, ban-ban yuma kunge nesala neitamai di, gume, ton nesalada wepnedi upu lepsisikra bongdina deiyo ngebo ne pua,” Allahdi Musa tep pepu.’ (Keluaran 33:19)

16 Allahdi, aupu pepka deiki di kael kemnupe. Allah er dipapu bokra wediseryada, er dipapu, ‘Anesala men poptapkamne’ tenen, bicau tenepra, nun mali keca kaukemserya deiki dipu wediserure. Nimi sun kange dipu putarepa, pel dopetepmenga deiki di epseredi men wediserure. Allah dipapu bicau teneserya deiki di, wepra lyemdoserure. 17 Aupu pepmasentopu, ukupmantonge ton kuramu. Ada, menop taru Mesir mutu taleamu ngebo er si Firaun, erdi Israel nesala taleamudi, yanipra mali kuramupa, Allahdi er tep peipu upuda, Musadi sekeiamu. Aupuda ake.
‘Allahdi pepu. “Firaun kanda, nedi erepra deipkesa deiyoda, pepkukene. Ada, ‘Ne puto weik ngebo kununa deiki di, kan tep popbisipkenyopda, nesala ban-ban yuma gekepmengedi, kwar kuprepa, ne Allah si tep, pio eremkamnenge’ tenen, kan wepra ereipkesi,” Allahdi Firaun tep pepu.’ (Keluaran 9:16)

18 Allahdi aupu pepka tep nengeda, nun kaele. Allah er kange dipapu teneseretopu, ton nesalada, portamna gum di, bicau tenepredi, melipra lyemdorure. Dinino, er teneretopu yuk nesalada, ‘Sun kange dipru gat kunkamre’ tenen, kunungna deiyo keca kareredi, ‘Anesala sun dipru gat kunkamre’ tenen, kunungna keca kareredi, anesala sun dipru gat kemdirure.

Allah er yu di wenepra poserurnge cap, bicau tenepra lyemdoserurnge cap tep pepu upu

19 Uda, ‘Allahdi ton nesala lyemrur dinin, ton nesalada portamrure,’ pepmasen upuda, ikin deiki di gekenupa cadi, tenpu ngebodi, ne Paulus tep pepnetue. “Gume, Allah er dipapu, ‘Aneng lyepkamne, anengda wenepra popkamne,’ teneseretopu, upu bokra wediserure. Atep ngeda nun mali kun keca tep, ware atep tupa upu bongdiseredi wenemserur do? Er teneretopu pio kurur ngebo cadi, tuai mutu neitamaida ware nengdi, er upu sektepe do?” pepra asipetepnetume. 20 Ange asipetepnetum dinino, sun tep tamupra pepsene. “Gume, sunda tali tuai nesala kuruma cadi, Allah tep ware kuprap, asipeteptumdi, er tep wenemna upu peptum do?” Nabi Yesayadi sekeiamutopu, aupu dopra, sun tep pepsene. Erdi seku upuda ake,
‘Allahdi ketekeipupa, tali akure keca yala-yala yumadi, akeca-keca yuma ketekepra deiamnga Deiyo Ngebo Allah tep, “Kanda warya tep, ne kunetopu ketekepra deipnemum do?” pepra, wenepmemetu do? Gume, angeda men kupmanto.’ (Yesaya 29:16)

21 Ange utopu, ne Paulusdi ukupmanto upu ton pepkusene. Kerah tu telemna deiyo ngebodi, tenpu tu dopropredi, bokra ton tara ngeda, urasin pio telep mambul keca kumupra telep kupra deipredi, uku dongoprepa kalapredi, gat kurure. Dinin, atu telepropapu neitamai bokra ton tarada, tali kecapu telepra kumudirure. Utopu atu neitamaipu ton tara ngeda, tamrure. Erda, tu kumudina deiyo ngebodi teneretopu kurure. Atu telemna cap, apel dona cap, deiyo ngebo kurura cadi, er teneretopu kurure.

22 Uda, Allahdi teneramutopu, ‘Nimi yuma, ne yu kunerenge cap, ne puto weik kunerenge cap, ne kune keca yuma cap kael kemkamneng’ tenen, mali kun keca cap, mali kun nesala cap tep, mali kange douamtudi, er ila puto deiki di, adipapu portamamtue. Konum poptamtu dinin, Allahdi, ‘Menmena wenepra men poptapkun’ tenen, bouna di kaukepra dinapu kuramu. Ukupra kuramnga tep nengeda, tuai nesala kan-kan di, ware ngebodi Allah tep weneptu do? 23 Gume. Nun tuai kunup nesala yuma tep, adipapu poptamsetu dinin, menop taruda, ‘Anesala tep, sun mali keca kaukepnedi, bouna di kunkamne. Ukunyopda, ne pio telep ngebo kunenge, epra kael kemkamnenge. Sirya taruda, anesala ereipnedi, pio telep kweipnepa, sun cap ne cap kikiman kunkamepe,’ teneamseu. Uteneamseua tep, adipapu wenepra men poptamseue.

24 “Ereipnedi, telep kweipnepa, sun cap, ne cap kikiman kunkamepe,” pepra, Allahdi kongpepseu nesalada, nun Israel nesala kan-kan cap, uda sun Roma mutu kurum nesala, Yahudi yala gum nesala kan-kan cap tep pepsene. Ada Allahdi konum kongpepseu nesala kuruma tep pepsene. 25 Allahdi, ‘Ne nyapu kunkameng’ tenen, sun Roma mutu kurumu nesala tep kongpepseuada, amenda kupkamu keca lap peramu ngebo, nabi Hoseadi menop taru sun tep, aupu sekeiamseu. Aupuda ake.
Allahdi pepu. “Ne nyapu sisa men kunung nesala dinin, amenda taru anesala tep, ‘Sunda, ne yala nesala sisa kunkamrume,’ penkamne. Tonda, anesala tep, kapul dipu men karenerdi, bicau men tenesenun nesala dinin, amenda taru, nedi sun tep ‘Dipru karepnerepa, bicau tenesenune,’ penkamsene,” Allahdi peipu. (Hosea 2:23)

26 Ange utopu, nabi Hoseadi aupu ton sekamu.
‘Allahdi pepu. Apepkusen kecada tek sisi nong kupkamre. Ton nengdi, yuk mutu nesala tep, “Sunda, Allah er nyapu sisa men kurume,” perami nesalada, amenda taru amutu nesala tep, “Ukutaru sunda, Gam Kuna Deiyo Ngebo Allah, er nyapu sisa kurume,” penkamenge.’ (Hosea 1:10)

27 Uda, yuk ngebo, Allah er upu lap peramu ngebo, nabi Yesayadi Israel nesala tep, aupu sekamu.
‘Laut mokon pirman gel wenenga denge pio weik kurepa, nimidi men nukmanto kuramretopu, Israel nesaladi deriramipa dadeipdanen yakarami nyapuda, denge weik kunung dinin, anesala neitamai Allahdi nimi yambulanunpu wepra lyepkamre. 28 Angeda tali men pepsene. Ada, Allahdi tuai nesala ban-ban yuma tep, menmena wenepra upu bokeipseredi gawal dakamsere. Atep, Israel nesala kan-kan neitamai di, nesala metekanunpu wepra lyepkamre.’ (Yesaya 10:22-23)

29 Uda, nabi Yesayadi pumun taru pediramutopu, konum kupsere. Erdi pepu upuda ake.
“Akeca-keca yuma talepra deiki tara ila puto weik kure ngebo Allahdi, nun yala nesala meteka di bokra, ‘Ne mawa’ tenen, men deiamsetu teptoda, nun yalada konum gum kuptue.
Nunda, Sodom mutu nesala cap, Gomora mutu nesala cap yuma, ila di wenepudi, popra gawal dakamutopu, konum popra gawal dakamsetu dinin, nun yala nesalada, yambula di mawa deiamseue.” (Yesaya 1:9)

Israel nesaladi Yesus tep, teka men teneraminge tep, pepu upu

30 Ne kayapu. Arup pepmasen upu yuma tep nengeda, ware peptepe do? Gume. Sun Yahudi yala gum nesalada, ‘Allah er dumsisi kuretopu, nun peda dumsisi kun nesala kunkamepe,’ men tenerami dinin, Allahdi sun tep, dumsisi nesala konum keipupa, er nyapu sisa kununge. Dumsisi kuna deiyo keca dopropi ngeda, ada sundi telep kupra kuramya deiki di men dopropi dinino, Allah tep, teka teneamya deiki, er kange dipapu sun tep dumsisi kuna deiyo keca karepudi, sun tep telep nesala kepra deipu. 31 Dinino, sun Yahudi yala nesalada, ‘Nundi Musa sekeiamseu upu talepra kupedi, moupra dombepya deiki, Allahdi dumsisi nesala keipkamsere’ tenen, pio pirirpeterami dinin, men kupmanto kuramya tep, dumsisi kuna deiyo keca men dororamya tep, ukutaru peda talipu kununge.

32 Sun Yahudi yala nesalada, ware keca deiyo tep, dumsisi kuna deiyo keca men dororami do? Gume. Sunda, ‘Nun dipapu pio pe deipra, telep pel weika di domepya deiki, Allahdi dumsisi nesala keipkamsere,’ tenerami. Sun Israel nesalada, ‘Teka tenepmepya deiki di, dumsisi nesala keipkamsere,’ men tenerami. Allah upu neitamai domon upu deiki di Yesus tep, “Yan giso dungne gel utopu kurure,” peipu ngeda, aupu peiputopu, “Yahudi yala nesala, sun yan gel giso dukupa, kot saka popu,” pepsene. Aupu nongda, sun Yahudi yala nesaladi Yesus tep, teka men teneramya tep pepmasene.

33 Nabi Yesayadi sekeiamu upuda ake.
‘Allahdi domona upu deiki pepu. Sun moupra dipetepso. Sion mutu bana tep bisi neitamaida, yan giso dungne gel deipne. Nimidi tali lupra bandenkapmengedi, agel deiki, sun yan giso dukrepa, kot sakamenge.
Dinino, abisi neitamai deipkamne ngeboda, pio tek ngebo kunkamra cadi, er tep teka tenepmenge nesala yumada, ne Allahdi tek sisi lyepkamna tep, ali pio men dangkamenge.
Angeda nong kupkamra cadi, sundi ne tep teka tenepmengopda, amenda taru, ‘Uo, nunda tali kecapu teka teneramupu’ tenen, sun dipru pio boktopredi men pu jenkamre. Tek sisi ne Allahdi anesala lyemdonkamne. Atep, anesalada ali pio men dangkamenge.’ (Yesaya 28:16)