Ruth 2

Rut cap, Boas cap antaprei upu

1Naomi doamu ngebo Elimelek, er tamna nengdi deiami ngebo tenpu ton, erda ila ngebo, ton ila isomka kuramu. Amutu nengdi er kuramu keca yuma epra kael kemamidi, er tep, ‘Erda ila mambul ngebo kurure,’ tenerami. Angebo er sida Boas. 2Naomi cap, Rut cap, Betlehem mutu kikiman kuramrei taru, tenpu tumi ton Moab mutu ner Rutdi Naomi tep pepu. “Nanino, kandi telepe pepnemempa, neda gandum kirbenkune,” pepra yan moropu. “Ada yuk neng gandum wa damai benepa, ne tep bicau tenepnere ngebodi, ‘Aca kiptume, pepnetupa, kiptene’ tenen, pepne. Telepe pepnerepa, sun gandum wa peiamenga kingepa, ‘Tuai tali sakrenge bumkon’ tenen, yanpepne,” pepu. Upepupa, Naomidi, “Yo, ne ner mio, dakirberume,” pepupa beu.

3Rut adipapu gandum kin neng kirbei pangeda, amenda melipra kirbeu. Melipupa, sun tonpa gandum wai dam beidi, yatunmaipa, sangmaunge amenda bupbanmau. Rutdi bumau wa tep nengeda, ‘Awai deiyo ngeboda, Boas wa akurure,’ men tenepmau dinin, tek sisi ada Elimelek yala ngebo Boas, er wa neitamai gandum du bumau.

4Ataruda, sun anesala wai dam bena kinmaipane, Boas Betlehem mutu di tamupra er wai dam yau. Yaudi, er gandum du kinmai nesala tep, “Ne kayapu sun yuma telepe. ‘Allah er si Yahwehdi sun cap kikiman kuredi, pio telep kweipkamsere’ tenen, Allah moronkamsene,” pepu. Upepupa, anesala sun yumadi tamupra, “Nun nai kan peda, ‘Yahwehdi bicau tenepkeredi, pio telep kweipkamker’ tenen, moronkamkepe,” pepi.

5Ange konum pepdai dingeda, Boasdi Rut epudi er gandum du kina deiyo ngebo tep, “Anerda, ware ner do?” pepra asipetepu.

6Asipunge tep, er angebodi, “Anerda Moab mutu nere. Naomi melipupa, sun tonpa Moab mutu di yanmareng nere. 7Tonda, ne damai yanmaudi, ‘Neda gandum wa dakbangepa, amenda melipnedi, sangrenge bupra deipbankamane,’ pepra yan moropupa, nedi, ‘Telepe ukunmayo,’ pepmanpa, ipna beipye peingna gum di, apel donmara. Ukutaruda, beipye peingne taru keprepa, dodin ati damai bena bukra beipye peikmange,” pepu. Boas er gandum wa deiyo ngebodi, Boas tep lap pepu.

8Upepu pangeda, Boasdi Rut tep pepu. “Ne ka nero, ne kange deipkene. Apepkuken ngeda, betapra gekepkurume. Kanda yuk-yuk neng gandum du kinmanga damai bupembana gume. Tonda, aca di tapra yukai bana gume. Apu kunkamrume. Tonda, ne pel melimna nerapu cap, tonpa kunkamrume. Kan ka nerapu pel donmangaipu bena pel donkurume. Sun damai di tapra yukai bana gume.

9Tonda, kandi dinmamempane, ne pel don neng gandum wa kirbangepane, kan ka nerapu, sun kirbenkamengaipu, kan cap kirbankurume. Sun wai dam bena gandum du bumenge pangeda, kan peda sun kungetopu, amenda bena pepra melimkamrume. Tonda, ne gandum wai talepra pel donung neng tep, ‘Aner sun melimsere pangeda, er damai ton men dumkamrume. Er nong talena gume. Sun goupra yukai kunkamrume,’ pepra konum deipmane. Tonda, kan me putapkeryopda, ne wa pen nengdi gwepra deipmange me maupu, gwepra jenkamrume. Ataru-ataru yumada, ne pel don nerapu cap melipra kunkamrume,” Boasdi Rut tep pepu.

10Upepupa, Rut konum gekepudi, nong geneprapudi, tuai dinmaudi, Boas tep gispal dopu. Rutdi tamupra Boas tep pepu. “Naio, neda tali nere cadi, kandi kange telepa di, ukupra men pepnetum nere. Neda yuk mutu ner, nimi bo ner kununa cadi, kandi apepnerem utopu men pepnetum dinin, telep upu pepmanereme,” pepu. 11Rutdi upepupa, Boasdi ton cap tamupra pepu.

“Yuk nesaladi kan tep pekengepa, konum kael kepkesi. Ada, kan doamumpa depu ngebo konum depupa, kan yamal ner tep, pio telep kange lon pel doramumanen, ukutara dopyakamem ngeda, gekepsi. Tonda, kan nai cap, kan nin cap, kan mutu cap yuma tapra, nun mutu yamume. Ukupmumdi, kan men kael keamum nesala cap, tonpa antapra pel dorumnya tep, ange yuma yuk nengdi lap pepkeipa kael kepkesi.

12Ange tep nengeda, kan kange lon pel dopyakaramumnge yuma tep nengeda, Allah er si Yahweh dipapu maton don keca karepkamkere. Ayam nyapuda, kware kuprepa, ‘Nun nin kalengkamser’ tenen, er damai yangepa, ner ayamdi er nyapu er pol amutara iridongoramretopu, kanda, ‘Allahdi kalekra melimkamner’ tenen, amutu yanmareme. Ada, ‘Israel nesala sun nai bo Allah, er si Yahwehdi melipra kalengkamnere’ tenen, amutu yanmarema cadi, ‘Allahdi maton don keca weika di karenkamker’ tenen, pepkene,” Boasdi pepu.

13Upepupa, Rutdi tamupra pepu. “Uo naio, kanda pio tek sisi ne tep telepe tenepmanereme. Ne putapnere ngeda, kandi ne tep, ‘Erda telep ner,’ tenenkamnereme. Neda kan tali pel donkenge nerapu utopu ner guma. Neda sun iriamu tara, pio mali ner utopu kunun dinin, kandi telep upu pepnerema deiki di, ne kange deipne. Ikin kupneunge tep, ne dipru kwa deipmaneruma deiki di, kandi ne tep melipmanerempa, ne kange telep kupmana tep, pepne,” pepu.

14Amenda taru, aneng yuma sun jen keteng konum kupu pangeda, Boasdi Rut tep pepu. “Ne ka nero, acapu yarume. Jen keca keteneipmakene, yan jepo. Aroti jen keca dopra, anggur me mau pumbon bupra jepkurume,” pepu. Upepupa, Rut yaudi Boas gandum pel don neng bukmaiyaipu yan bukupa, Boasdi, ukudi dapmau gandum dopra, Rut tep karepu. Karepupa, Rut putaputopu jemaupane, konum boupu. Boupkopda, agandum keca gawal tupa tapu. Jen keca ton tupa akapu.

15Ataru Rut konum jen jepropudi, gandum dang beu taruda, Boasdi er gandum pel don neng tep pepu. “Sundi gandum koupra deipmamumnge damai kapmarenge doropreya peda, ‘Ange dorona gume,’ pepra men upu sengkamrume. Ada, ‘Aner ali daredi kwar kuprur’ tenen, pepsene.

16Ange gum dinin, gandum dangmum taruda, yuma koupra derina gume. Ton ngeda er tep aboktapmumpa, er ton dorona telepe. Ukupredi, gandum telepnge ton bupra kinkamre. Tonda er tep wenemna pio gume. Er tep mali kudina gume,” pepra Boasdi upu karepu. 17Boasdi upepka tep nengeda, atumida Rut ipna di gandum du bumaupane, sintara kepu. Ukunmauanen, gandum du buprapudi, gege penmaupane, du sakungepu bupra derinmaunge yumada, ikinda dangol di ukupu. Ikineda, 13 kilo utopu, tonda 22 liter utopu kupu.

18Rutdi ukupmau ngeda doupra, er ati tamupra beu taruda, er yamal ner damai beudi, er dopropmau keca bena jenek pepupa, Naomi epu. Tonda ataruda, er keteng dukduk di jenmauanen boupupa, gawal kipmaunge peda, er yamal ner bena karepu.

19Ukupmaupa, er yamal ner Naomidi asipetepu. “Ange yumada, dantoi di doupra yanmarum do? Tonda, atumida ware ngebo gandum wai dam kunmamum do? Akunmamum wa deiyo ngebo epmakerdi melipmakera tep, angeboda, ‘Allahdi pio er tep tupa melimkamemere’ tenen, moropkune,” pepu. Upepu pangeda, Rutdi er yamal ner tep, atumi pel dopmauai cap, awa talena ila deiyo ngebo cap, ange yuma tep nukra deipu. Tonda, Rutdi pepu. “Ne gandum du burbenmanu wai deiyo ngeboda, er si Boas,” pepu.

20Ange konum gekepu dingeda, Naomidi er yamal ner tep, “‘Angeboda, Yahwehdi weika di melimkamemere’ tenen, moropne. Nun nai bo Allahdi bicau tupa teneseredi, melimserure. Nun gam kunup nesala pe, konum depi nesala peda, tupa teneseredi, telep kudiserure. Tonda, kan pepmamum ngeboda, ada ne doamsi ngebo Elimelek, er tamna ngebo kurure. Boasda, Elimelek tara ngebo kurura tep nengeda, erdi kange deipsetudi, nun ikin kuser ngeda, melipsetua cadi, nun tep, ‘Telepe,’ tenepsetuopda, tamna gum di, pio talepra melimsetue. Ne kangeda erdi lyepkamser ja. Dinino, dinapu kunkamneme,” Naomidi pepu.

21Upepupa, Moab mutu ner Rutdi, er yamal ner tep pepu. “Nanine, tonda er angebo dipapu, ‘Kanda ne gandum dangna neng cappu kumumdi, sun dangmengepa gandum du sakrenge tupa bumkamrume. Ne gandum wa yuma kinkamenga tep, ukuramrumyanen, gawal dakamrume,’ pepneu,” pepu.

22Upepupa, Naomidi tamupra Rut tep pepu. “Angeda pio telepe. Boas er gandum wa pel don nerapu cap, sun pel donmangaipu melipra kinkamrume. Apepken ngeda, kandi yuk neng gandum wai dam bena pel domem pangeda, ‘Yuk nengdi kan damai yakenunge. Yuk tali nengdi mali kweipkenung’ tenen, pepkene,” pepu. 23Ange tep nengeda, Naomi peputopu, Rutda er ka nerapu cap, tonpa Boas er gandum wa cap, er jelai wa cap, acapu pel doramnganen, konum yuma gawal dakra kipropi. Ada menmena taru di gandum du cap, jelai du cap kipyakaramyanen, sirya gawal dakra kipropi. Ataru yuma Rutda, er yamal ner cappu kuramrei.