Rut 3 | XteSC | STEP | Rut cap, er yamal ner Naomi cap, kikiman dakuramreipane, tenpu taruda Naomidi pepu. “‘Nedi kan tep nimi dopmempa, pio melimkerepa, telepaipu kunkamrem’ tenen, pio pe deipra enkamne. Nimi dopmempa, kan putapkere keca yuma tep, melimkerepa, telepaipu pio kunkamreme. Angeda, mambul weik cadi, enkamkene. Atep moupra tenepkamrume.

Ruth 3

Rut cap, Boas cap antapdareidi upu sisikrei upu

1 Rut cap, er yamal ner Naomi cap, kikiman dakuramreipane, tenpu taruda Naomidi pepu. “‘Nedi kan tep nimi dopmempa, pio melimkerepa, telepaipu kunkamrem’ tenen, pio pe deipra enkamne. Nimi dopmempa, kan putapkere keca yuma tep, melimkerepa, telepaipu pio kunkamreme. Angeda, mambul weik cadi, enkamkene. Atep moupra tenepkamrume.

2 Tonda, gandum wa pel donmangu nerapuda, ada Boas er gandum wai cap, er jelai wai cap, pel don nerapu cadi, kan cap tonpa pel donmarume. Uda, Boasda ne doamsi ngebo, er yala ngebo kurura cadi, er dipapu dopkeredi, melimkamker do, gum do? Alukunda neitamaida, er wai dam kunmardi, roti deiyo keca gandum dopra gege peprepa, askal sakre pangeda, du dopra mauwa derinkamre.

3 Atep, me gakmem dingeda, nintong telep me kan nong deiki likeipmemdi, opkal telepnge kenekurume. Ukupmem dingeda, Boas pel donkamarai benkurume. Benkurum dinin, ‘Ne yanmane,’ men pepkurume. Dinin, gandum askal pel konum gawal dakyopda, pena telepe. Jen cap, me cap, konum jepre pangeda, ‘Ne yanmane,’ pepkurume.

4 Ukupkurume, moupra tenepmemdi, ‘Er marbenkuraida dan do?’ tenen, dinmamempane, konum marbereaida, epmemdi acapu marbenkurume. Selimut getepdongopra mapmaryai damai, er yan deipmare tara marbenkurume. Ukupmemnyopda, selimut getepmarya yan dam tara di dangapropkurume. Ukupmem dingeda, nun amutu kurameptopu, ‘Erdi epneredi, er ner kuna tep, ne doupra melimkamner’ tenen, kurameptopu, er yan damai mapkurume. ^{▼▼Er yan damai mapkurume Naomidi pepu ngeda, ada mali kuna cap, ‘Nyadankurerum’ tenen, kikiman mana cap tep pio gume. Pumun taru, sun Israel nerapudi, ‘Angebodi, ne dopropneryopda, er ner kunkamne’ tenen, petenkemna tep ukurami. Ada ‘kebiasan kebudayaan,’ peramengtopu kuna tep ukurami.} Ukupmem pangeda, amenda erdi, ‘Ukupkurume,’ pepra, lape pepkamakere.” Naomidi Rut tep pepu. 5 Upepu pangeda, Rutdi tamupra pepu. “Nino kan pepmanerem upu yuma tenepmana tep, angepu kupkamane,” pepu.

6 Aupu konum pepra sengpepkopda, Rut adipapu gandum wa peamya sekrap, gandum gege pepmaidi, askal pel donmaiyai beu. Beu dingeda, er yamal ner pepra deipmautopu, ange yuma kupu. 7 Amendada, Boas jen cap, me cap jepupa, er puto kupudi kange telep kupka tep, gandum du telepnge wepra derinmaiyai, orsirik tara marbeu. Marbeu taruda, Rutda upu pena gum, dimpeprappudi, Boas er selimut getepdongopra mapmauai, er yan dam tara bena, Boas er yan getepdongopmauai dangapra, er yan damaipu bena mapu. Ada, mali kuna gum dinin, pumun taru sun Israel nerapu kuramitopu kupke.

8 Ukupra mapmaupane, alukunda neitamai, lelim ton dato-dato di pepupa, Boas gekepudi, Boasda, ‘Ne nong tamupronkun’ tenen, kemdenkapudi, er yan deipmauai talepra embandeupa, ner tenpu er yan damai mapmaupa, Boas epudi lukdau. 9 Lukdau dingeda, erdi asipetepu. “Kao kanda ware ner do?” pepu. Upepupa Rutdi tamupra, “Neda kan pel don ner Rut yanmane. Naio kanda ne yamal ner doamu ngebo, er yala neng kuruma tep, nun ikin kusere ngeda, men kaukepra tapkamsereme. Lyepsememdi, nun tep pio talepra melimkamserume. Kan adipapu talepra makunkamnereme.

Ange tep nengeda, amutu nesalada, sun ukuruma utopu, ‘Kan selimut sirikai ne nong singipdongopkunerem’ tenen, ^{▼▼Selimut di, ne nong singipdongopkunerem pepkada, ada domon upu deiki di pepu. Aupu deiyoda, ‘Kandi ne dopropnememnyopda, kan ner keipnememdi, kikiman kunkamteneme’ tenen, moropu.} moropkene.” Rutdi Boas tep pepu.

10 Upepu pangeda, Boasdi Rut tep pepu. “Ka nero, ‘Nun nai bo Allah Yahwehdi melimkamkere’ tenen, moronkamkene. Ada menmena taru, kan yamal ner tep, pel melipra doramum ngeda, telep kuramum dinin, ukutaru aupu pepnerem ngeda, pio ila telepnge pepnereme. Tonda tek sisi kanda kaber neng dopmanto ner kurem dinin, kankan kunge neng pe, isomka neng peda, ‘Kaber neng dopnetenge’ tenen, sun damai men erbenmareme. Ange men kupmarem dinin, ne wisi deipsi ngebo teppu, telepe pepra moropmanerema tep pepkene.

11 Ange tep nengeda, kandi pepmanerem upu yumada, nedi gekepra kupkamkena tep, Rut kandi tenimtona cap, kwar cap kuna gume. Tonda, amutu kunge neng yumadi kan tep, ‘Konuma, erda pio telep ner. Dumsisipu kurure,’ tenekenunge.

12 Kandi, ‘Ne yamal ner doamu ngebo, er tara neng kurume,’ pepmanerem ngeda, tek pepmarem dinin, Naomi doamu ngebo, er tamna ngebo pio tek sisi mening damai ngebo tenpu ton akurure. Kan kunkamrem keca yuma, nedi melipketene dinin, angeboda Naomi doamu ngebo er yala ngebo, mening damai ngebo kurura tep nengeda, er dipu tek sisi menmena dopketudi, kan ikin kukere keca melipmanto ngebo kurure.

13 Angebodi menmena dopketue. Atep, ‘Er dipapu melimkamker do, gum do?’ tenen, asipetepkamne. Atep nengeda, alukunda neitamaida akunmamempane, berekre pangeda, apepmaken ngebodi, ‘Aner dopra melimkamne,’ pepyopda, er dipu dopkeredi, er ner kunkamreme. Dinino, angebodi, ‘Ne gume,’ pepyopda, nedipu dopkenedi, kan putan keca tep, ne dipapu melimkamkene. Angeda tali men pepkene. Pio gam kure ngebo Allah, er si Yahweh deiki di pepkene. Tek sisi apepmakentopu melimkamkene. Atep ukutaruda, mapmamemnya berekyopda, apepmaken keca yumada, gawal dakra deipkamane,” Boasdi Rut tep pepu.

14 Upepka tep nengeda, Rutda Boas yan damaipu mapmaupane bereku. Dinin, Boasdi pepu, “Kapul men berekapre taru dipapu, bukda pepra benkurume. Ada, nimi yuk nengdi, ‘E, gandum du gege penupaida, aner yanmaua, mali kupmau do?’ tenen, tenepkenunga tep, kapul men epkenge taru dipapu benkurume,” pepu. Boasdi apepunge deiyoda, Rut lukunda yana mapmau ngeda, yuk nengdi, ‘Rutda Boas yan damai mapmau, pepnenung’ tenen, pepu.

15 Berekou taruda, Boasdi Rut tep pepu. “Kan giso getedongomna opkal kwiripra deipmempa, nedi gandum du akeca deiki dikipkukene,” pepu. Upepkopda, Rutdi apeputopu kupupa, Boasdi gandum du dikdongopu. Dipdongopunge ikinda, 13 kilo cap ton tapakra metekanun ton karepu. Ukupu pangeda, Boas ange dopropudi, Rut dangol deiki deipupa, topra beu. Ukupu taru, Boasda tamupra, gandum pel dopmaiyai tapra, er pe ati tamupra beu.

16 Ange konum kupkopda, aner Rut tamupra, er yamal ner Naomi koripu beu. Beu pangeda, Naomidi Rut tep asipetepu. “Ne ner mio, Boasdi kan tep ware kupmakeu do?” pepra asipetepupa, Rutdi Boas kupmaunge cap, pepmaunge cap yuma, bena nukra deipu. 17 Tonda, Rutdi aupu dukdongopra pepu. “Boasdi ange yuma konum pepneu dingeda, gandum du 13 kilo cap, tonda metekanun ton cap tapakra kipdongopra karepmaneue. Karepnu dingeda, erdi peipneu. ‘Kao kanda tali buru banangapu kan yamal ner damai men benkurume,’ pepmanere,” pepu.

18 Upepra sengpepkopda, Naomidi pepu. “Ukupkeua tep nengeda, ‘Ne doamsi tara ngebo Boasdi, erda ware kunkamner do?’ tenen, ukutaruda dimpepra dinapu kunkamrume. Angebodi, atumi ange yuma men gawal dakmare taru dipapu, beipye peingna gum di, apepmaker keca yuma kupra gawal dakamare. Atep pio dinapu kunkamrume,” Naomidi Rut tep pepu.