Rut 4 | XteSC | STEP | Uda, amutuda sun akati arum dana-danada, lyom beilya wipra ongopdongomidi, bisi buplan tenpu potokra deiami. Boasda amutu nimi bisi antamdanai, abuplan damai bena bukmau. Bena bukmaudi dinmaupane, ‘Elimelek yala ngebo, Rut dopredi er kange mun keca tep lyepra melimkamre do?’ tenepmau ngebo, er tara ngebo, yakaupa, epudi, “Ne kabo aca yan bukurume,” pepupa yan buku.

Ruth 4

Boasdi Rut dopu upu

1 Uda, amutuda sun akati arum dana-danada, lyom beilya wipra ongopdongomidi, bisi buplan tenpu potokra deiami. Boasda amutu nimi bisi antamdanai, abuplan damai bena bukmau. Bena bukmaudi dinmaupane, ‘Elimelek yala ngebo, Rut dopredi er kange mun keca tep lyepra melimkamre do?’ tenepmau ngebo, er tara ngebo, yakaupa, epudi, “Ne kabo aca yan bukurume,” pepupa yan buku. 2 Ukupu pangeda, Boasdi, ‘Nun upu sisikamep ngeda, sun ton gekenkamang’ tenen, amutu nesala talepra kurami wisi neng, sepuluh neng wepra deipudi pepu. “Sun yuma gekepmumdi, bungyankurume,” pepupa, sun peda ayana buki.

3 Buki pangeda, Boasdi er yala mening dam ngebo, Rut lyeptudi, menmena dopmanto ngebo tep pepu. “Moab mutu di tamupra yau ner, Naomidi tu kunupkamre. ^{▼▼Tu kunupkamre pepkada, ada domona upu utopu pepu. Deiyoda, ‘Naomidi, Elimelek taleamu tu kunupkamre ngeboda, akaber ner Rut ton dopkamre. Atep aner dopmanto ngebo erterenmare’ tenen, aupu pepu.} Atuda, nun yala ngebo Elimelek, er taleamu tu, anerdi kunupkamara tep pepsene.

4 Ange tep utenepsi. Kanda moupra tenepkurume. Ne kangeda, anerdi atu kunupkamre ngeda, ‘Kan ton kael keptum’ tenen, lape pepkene. Atep kandi, ‘Atu kunupra dopropkun,’ tenepmemnyopda, sun awekmang neng kan-kan, katuai di pepkurume. Anengda, nun mutu deiyo kepra kununga tep pepkene. Tonda, atu men kunupra dopropkumemnyopda, kandi, ‘Men kunupra dopropkune,’ pepkurume. Ange tep nengeda, ange deiyoda, atu kunupra dopropmanto deiyo nengda, nun butenepu akunume.

Dinino, kanda nun yala pio mening damai, menmena ngebo kureme. Neda, kan amutara ngebo kunune. Atep, kandi atu men dopropmemnyopda, ne amenda dopropkamne. Atep, ‘Nedi dopropkune,’ tenepmemnyopda, ataru dipu pepkunerume.” Boasdi pepu. Upepupa, er kabodi, “Telepe nedi atu kunupkune,” pepu.

5 Upepu dinino, Boasdi pepu. “Telepe teneprem dingeda, Naomi cap, Moab ner Rut cap, sun melimna tep, sun damai di atu dopropkamrem dinin, atu kunupkumem tumi dipu, tonda nun yala ngebo Elimelek, er mi Malon depka cadi, Malon er solu ner Rut peda dopkamrume. ‘Dopkamrume,’ pepmaken deiyoda, ake. Ada, ukupmemya deiki di, nun yala ngebo Elimelek, er taleamu tu tep nengeda, er yala nengdi, ‘Elimelek, er taleamu tu ace. Erdi deipupa dadeipdanen, baramenganen, deipkameng nesala tupa talenunge. Er yala ngebodi, er doamu ner doprepa, anerdi menmena mi deipkamre ngeda, atu tupa talenkamre. Nun yala nengdi atu talepbankamenge,’ penkamenga tep pepkene.” Boasdi er yala ngebo tep pepu.

6 Uda, aupu pepka tep, atu menmena kunupra dopropmanto deiyo ngebodi tamupra pepu. “Teka atu cap, asolu ner cap, ‘Ange yumada adipapu kunupra dopropkamrume,’ pepneremada, tek pepreme. Dinino, atep nengeda, atu men kunupra dopropkune. Nedi men kuptene. Deiyoda, ‘Nedi deipnepa, dadeipdanen bankameng nyapu, sundi kunupra dopropkamenge ngeda, metek kupserur’ ^{▼▼‘Metek kupserur’ tenen, pepkada deiyoda ake. Ada, angebodi Rut doptupa, Rutdi mi deiptuopda, amenda taru, ‘Amidi ne taleamsi keca yuma dopropkamre’ tenen, angebodi aupu pepke.} tenen, pepkene. Atep, kan Boas dipapu atu kunupra dopropkurume. Nedi men kuptene,” pepu.

7 (Uda menop taru Israel nesala kurami ngeda, ake. Ada tu do, yuk ila keca do, kunupkunge taruda, kunupra dopropkunge keca taleamnya deiyo ngebodi, er kemamre yan kepra emban keca, er sida sandal kwiriprap, kunupkure ngebo karerami. Ukurami ngeda, deiyo ake. ‘Akunupra dopropmarem ngeda, tek sisi konum kunupmarema cadi, angeda kan keca konum kupkere. Akonuma, sah konum kurure,’ pena tep, sandal kwiriprap karerami. Mambul keca kunupra dopropkure ngebodi, sandal kwiripra kareramya deiki di, Israel nesala kunumaminge yumada, tek sisi ‘sah’ peramengtopu kurami).

8 Sun Israel nesala ukuramya tep nengeda, ange yambul utopu, aner Rut menmena dopmanto ngebodi, Boas tep, pepu. “Neda asolu ner Naomi damai di, nedi er tu men kunupkamna cadi, kan dipapu Naomi er akengebo taleamu tu kunupmemdi, asolu ner Rut peda dopkamreme,” peprapudi, er kemamu sandal kwiripra, Boas tep karepu.

9 Ange konum kupu pangeda, Boasdi amutu taleami deiyo neng cap, yuk neng aca wekmai neng cap tep, upepu. “Sun awekmarum neng yumadi epra gekeprumdi, kael keprume. Angebodi er sandal kwiripra karepmanera deiki di, konuma, nun yala depu ngebo Elimelek cap, er nyapu butene neng, sun si Kilyon cap, Malon cap taleami tu yumada, Naomi damai di konum kunupmane,” Boasdi pepu.

10 Upepudi aupu ton dukdongopra pepu. “Tonda, Malon doamu ner, Moab mutu ner Rutda, ‘Ne ner kunkamner’ tenen, konum dopropne. Neda deamu ngebo Elimelek yala ngebo kununa cadi, ukupmana deiki di, Elimelek taleamu tuda, erdi deiamupa, dadeipdanen yakanunge neng cap, er yala nengdi derinkameng neng capdi, atu tupa talenkamenge. Ada, aner cap nundi derinkamnem nyapuda, men di deamu ngebo er yala nengda, ne yala neng cadi, ne nyapu ayala kan-kanpu kunkamenge.

Tonda, akati damaipu kunkamenge. Tonda nun mutu sengnup buku neitamai, Elimelek er si tupa kapkamre. Ada nun co puna nengdi, nun apu yapu deipipa, dadeipdanen yakanung neng kupyakarami keca cap, sengnup buku tep pepne. Uda, ne kayapu neng, atumida sun yuma gekepmarumdi, ange yuma epra kael kepmarume. Atep, tupa tenenkamrume.” Boasdi pepu.

11 Upepu pangeda, sun amutu deiyo talepra kurami neng cap, akati arum ban bisi damai beilya buplan dam wekmai neng capdi pepi. “Teka, nundi konum epkepe. ‘Allah er si Yahwehdi telep kupra melimkamker’ tenen, nundi moronkamkepe. Ada, kandi dopmarem ner Rutda, pumun kuramrei nerapu Rahel cap, Lea capdi, nyapu weik deriramreipane, ‘Israel nesala weik kepbarami utopu, kunkamkere’ tenen, moronkamkepe. Tonda, Allahdi melimkerepa, Efrata tara neitamaida, kanda ila isomka ngebo kunkamreme. Tonda Betlehem mutu neitamai kunge nesala yumadi, ‘Kan si kael kepmengedi, erda ila mambul ngebo tenenkamkeng’ tenen, moronkamkepe,” pepi.

12 “Tonda, Rutdi derinkamker nyapuda, telep-teleppu, ila mambul neng kunkamenge. Ukupmengepa kan yala ngeboda, Yehuda, er ner Tamardi deiamu mi Peresdi deipupa, dadeipdanen yakarami neng, telep kupra ila mambul neng kuramitopu, kan yala peda, ‘Ila mambul neng kunkamenge’ tenen, Allah tep moronkamkepe,” pepi.

Boas cap, Rut capdi, sun mi Obed deiprei upu

13 Ataruda, Boasdi Rut dopu. Kikiman dakuramreianen, Allah er si Yahwehdi melipka deiki di, Rut mundu douamnganen, sal mi tenpu deipu. 14 Ukupupa, amutu kurami nerapudi Naomi tep pepi. “Allah er si Yahweh tep, ‘Pio telepe,’ pepmepe. Ada, ukutaruda, Allahdi melipkeupa, kan yamal nerdi sal mi deipmakere. Ami nepyopda, kan putapkamker keca tep, pio melimkamkere. Tonda, amida Israel nesala yumadi kael kepmengedi, ‘Erda ila mambul ngebo, penkamemeng’ tenen, Allah moronkamepe.

15 Tonda, kan yamal ner Rutda, kan tep ila bicau tenekerure. Kandi sal nyapu yoneitam bari neng deiamtumpa, yambula di telep kupra melipkamketenge dinin, aner Rut dingeda, pio ila weika di melimkamkere. Rutdi sal mi deipmaker ngeda, amidi wisi deipmem taru, pio melimkamkere. Atep, kan kange pio deipkurume,” pepi.

16 Upepi pangeda, Naomidi asal mi tep bicau teneprapudi, er kail deiki deipra iriprapudi, ataru dipdongopra dortaru yuma, ami pio melimamu. 17 Amutu nerapudi Naomi tep pepi. “Ange mi er sida, Obed,” pepra deipi. Deipidi, “Naomida er sal mi utopu, mi tenpu konum dopropmare,” pepi. Dakuramyane, amenda taruda, Obeddi deipu mi, er sida, Isai pepra deipu. Tonda, Isaidi deipu mi er sida, Daud pepra deipu. Amenda taruda angebo Raja Daud kuramu.
18 Uda, Boas er co puna ngebo sida ake Peres. Peresdi deipupa deipdanen, barami neng sun sida ake. Peresdi deipu mi sida Hesron.
19 Hesrondi deipu mi sida Ram. Ramdi deipu mi sida Aminadab.
20 Aminadabdi deipu mi sida Nason. Nasondi deipu mi sida Salmon.
21 Salmon deipu mi sida, Boas. Boasdi deipu mi sida, Obed.
22 Obeddi deipu mi sida Isai. Isai deipu mi sida, Daud.

Angebo Daudda, Israel nesala sun ila nimi deiyo ngebo Raja kuramu.