Song 1 | XteSC | STEP | Nimi cap, nerapu cap, kange deridana tep mutda, yuk mut ton weik akapmar dinin, amut tenpuda pio telepnge kurure. Yuk mut yumada yambul telep dinin, angeda pio telepnge kurure. Salomo cap, erdi dopkamu ner cap, pio bicau tenedaramreia tep, tenpu ngebodi, ange tenepudi, akange deridana mutda, sekra deipu. Kaber nerda, mut deiki di pepu upu

Song of Solomon 1

Raja Salomo ^{▼▼Salomo – Tek sisi ngeda, amut seku deiyo ngeboda, nun walwale. Dinino, Ibrani upu ila kael keami nengdi tenemi ngeda, ake. ‘Ada, yuk ngebodi, Raja Salomo, er gispal dona cap, karena cap tep, amut upu pepra seku. Ada, Salomo cap, erdi dopkamu ner tenpu cap, sunda pio kange deipdareidi, pio bicau tenedaramreinge tep, aupu seku ngebo tenepudi, amut upu seku,’ tenenunge. Dinino, yuk ila kael nengdi, ‘Gume, ada Raja Salomo gume. Yuk tali dakuramu ngebodi, tenpu kaber ngebo cap, er dopkamu ner cap, upu pepdareinge tep, amut seku,’ tenenunge. Aupuda, pio menop taru di sekunge tep, nun ataru kunup nesalada, yambul walwale kuserure. Ataru kunup nesaladi, aupu utopu tupa men penupe.} er cap, er domkamu ner capdi, kange deridanapu kuramreiya tep, bon ton di, pio telep upu deiki di, amut sekra deipu.

1 Nimi cap, nerapu cap, kange deridana tep mutda, yuk mut ton weik akapmar dinin, amut tenpuda pio telepnge kurure. Yuk mut yumada yambul telep dinin, angeda pio telepnge kurure. Salomo cap, erdi dopkamu ner cap, pio bicau tenedaramreia tep, tenpu ngebodi, ange tenepudi, akange deridana mutda, sekra deipu.

Kaber nerdi, ‘Ne tep kange derinerur ngebopu dopnetupa, kikiman kuteneme’ tenen, mut deiki di pepu upu

Kaber nerda, mut deiki di pepu upu

2 Uo, nedi kan tep bicau tenekenung ngebo, cadi, kan si bambol di ne sipyal damai mutupnetume!
Deiyoda, kange yawaramre me dopra jepnyopda, tau penerepa, yambulanun telep kange doupra kunune.
Dinino, kandi ne tep, ila di bicau teneneruma tep, ange tenepnedi, ne kange dipru neitamai yumada, pio telep kuneredi, pingping kange doupra kunune. Ange tep nengeda, kandi ne mutupneo ne kabo!
3 Ne dopkamnerem ngebo, kan si kael kepkenedi tenepkenyopda, ukupmantoda, nintong pio telep minyak me dopra, kan nong bol deiki likeipmempa, nintong pio telep perepa gekekenune.
Ange utopu ton, amutu nesala yumada, kan tep konum kael keamkeiya tep, kan si gekepmengedi, ‘Angeboda pio telep ngebo kurure,’ tenekenunge.
Ange tep nengeda, amutu neitamai kunge kaber nerapu yuma peda, kan tep kange derikenunge.
4 Ne dopkamnerem ngebo, kanda pio sika di kuna gum dinin, kandi ne buru menmena talepra dopropnememdi, kan cap, ne cap menmena di sepdaro, kan man ati bena kikiman kunkamaneme.
Uda, ne ila nimi deiyo ngebodi, ne dopra, er mana ati konum dubena deipmanere.
Uo ne dopkamnerem ngebo, kandi pio telep kupra bicau teneneruma cadi, nun kikiman kuneme taruda, pio telep kange doupra kunkamaneme.
Kange yawaramre anggur me jerameng nesaladi, ange jepmengopda, kange deipra kunung dinino, kan cap, ne cap kikiman kupnemnyopda, nun buteneda, tek sisi pio pingping kange doupra kunkamneme.
Kanda, ila di bicau teneneruma cadi, yuk kaber nerapu yumadi ange tenepmengopda, sundi, ‘Uo, erda tek sisi pio telep ngebo kurure,’ tenekenunge.

Kaber nerdi, sun Yerusalem mutu kurami nesala yuma tep pepu upu

5 Uo, sun Yerusalem ila ati arum neitamai kurumu kaber nerapu yumada, sun tep pepsene.
Tek sisi, ne nong bolda, pio mirin ner kunune. Dinino, ne urasin cap, ne nong cap yumada, pio kamo telep ner kunune.
Teka, Kedar mutu kunge nengdi, pio mirin opkal dopmengedi, sun keana dodin tenda ati, pio mirin bol di wipmengedi, dodin ati tep, sun keana tenda bol ati, pio mirinnge di doramengtopu, ne nong bol peda, pio mirin kunerure.
Tonda, Raja Salomodi, urasin pio telep opkal dopropudi, Allah er si eremna ati pumbon kamkotemamunge utopu, ne urasin kamo peda, pio teleppu kunerure.
6 Ange tep nengeda, sun Yerusalem ila ati arum neitamai kurumu kaber nerapudi, ne tep, epnemumdi, “Uo, anerda, er nong bol yumada, pio miripke,” pepra, mali men penkamnerume.
Gume, ne nong bol miripneua deiyoda, bura tara wa pena ner kuramsa tep, keteng bupu di, ne nong bol miripneua tepa.
Na nin sisadi deiamu neng, ne duyapu sisada, ne tep tulum kupneiya tep, “Kanda, nun anggur wa tu damaipu bena kumemdi, nun wa pen pel donkamserume,” pepra, wa tu kalengna ner kepra deipneipa, ukuramsa tepa.
Sun anggur wa tep, kalengna pelpu doramsi dinin, ne pe anggur wada, ^{▼▼anggur wa – Aupu, ‘anggur wa’ pepra seku ngeda, domona upu utopu pepu. Aupu deiyoda, anerdi, er pe nong bol, ‘Keteng bupu di, miripkamnere,’ pio men teneramnga tep pepu.} telep kupra men kalengamsi.

Kaber nerdi, er dopkamu ngebo tep, pepu upu

7 Uo, ne pio mun penedi, ila di bicau tenekenun ngeboda, kan dancei kurum do? Kandi ange lap pepneo!
Kandi peirum domba bisam yumada, dan mutu neitamai dubena deipmempa, betei batu jenung do? Tonda, keteng dukduk taruda, kan domba bisam dopra, dan mutu dubemempa, bukra beipye peinung do?
Ne dopkamnerem ngebo, kan kayapu nengdi ton, sun domba bisam peda dubena, amutu neitamaipu dinin, kan damaipu dubena peinunge.
Ange tep nengeda, ‘Anengdi, ne urasin epra kael kepnengedi, mali pepnenung’ tenen, ware keca tep lyom opkal dopropnedi, ne urasin cap, giso cap getepnedi, inipra embankaman do?

Kaber ngebodi er dopkamu ner tep pepu

8 Uo, ne ka nero, urasin yambul telep nerapu ton akunung dinin, kanda tek sisi, urasin pio telep ner kurume. Ne domba bisam, sun jen keca tep, dubena derinun mutu kapul men kael kepmemnyopda, kandi, ‘Uo, ware kupkaman do?’ tenena gume.
Domba bisamdi tu yanipra embanungai epmem dingeda, abisipu embanmamemyanen, ne kayapu nengdi, sun opkal bol di, dodin tenda ati dopra derinung mutupu, sun domba bisam peinunga cadi, kan domba bisam nyapu peda, aceipu deipmempa, betei batu jenkamenge.
9 Ne dopkamne nero, nedi kan tep ila di bicau tenekenedi, kange derikenune. Kanda urasin pio telep ner kuruma cadi, ukupmanto upu ton pepkukene.
Ada, Mesir mutu ila nimi deiyo ngebo, Firaun, erdi er kereta perang gipra dubana tep peirur kuda bisam ner ngeda, kamo pio telep kuramretopu, kan peda, urasin pio telep ner kurume.
10 Kandi, kunumna weik gel, urasin pio telepnge dopra, kan urasin damai telep kuna tep garangkoterum kweirya keca cap, kan katum dam capda, urasin pio teleppu kurure.
Ange utopu, kan kum damai kamkotemrum kunumna weik keca er sida pate duda, urasin pio telep kunumna weik gel, er si permata capda, pio urasin teleppu kurure.
11 Ange tep nengeda, nedi pepnepa, ila kael keami nengdi, kweirya keca ton, urasin pio telepnge ketekepra karepkamakenge.
Ada kunumna weik keca, er si emas dopropmengedi, urasin pio telep kweirya keca petupra deipmengedi, akeca deiki kunumna weik keca, er sida perak dopra, palepra deipkamenge. Ukupmengopda, kan tep karepkamkene.

Kaber ner er pe kange neitamai tenepudi pepu upu

12 Ne kange derinun ngeboda, ila nimi deiyo ngebo utopu kunerure. Erda er man ason deiki mapmau taruda, nintong telep keca gekepu.
Ada, ne nong bol deiki likeipsi nintong telep keca, er sida narwastuku, pio telep nintong embanmaupa, ne dopkamner ngebo gekepu.
13 Ukupmaupa, nedi ukupmantonge ton tenepmasi. Nintong pio telep keca, er sida mur, getepnedi, ne taram deiki dinin, ne moum neitamai deipnyopda, nintong pio telepnge embaramrepa, kange derinuntopu, ne dopkamner ngebo tep, ila di bicau tenenune.
Ada, ne kange derinun ngebo tep tenepnyopda, pio telep kange doupra kunune.
14 Teka, mutu si En-Gedi, amutu neitamaida, nimidi wa penungaida, pio nintong telep keca, er sida henna tali paramredi, er kait popyopda, nintong pio telep perure.
Akecadi nintong pio telep peramrepa, nimi yumadi ange gekepmengedi kange deriramengtopu, ne tep ila di bicau tenenerur ngeboda, ne damai yaryopda, pio pingpinga kupnerepa, ne kange derinune.

Kaber ngebodi pepu upu

15 Uo, ne dopkamne nero! Nedi kan tep, tek sisi ila di bicau tenekenune.
Kanda tek sisi urasin pio telep ner kurume. Tek sisi pepkene, kanda urasin pio telep ner kurume.
Kan asuru duda, yal ma asuru pio telep kuramretopu kukerure.

Kaber nerdi pepu upu

16 Uo, ne dopkamnerem ngebo! Nedi kan tep, tek sisi ila di bicau tenekenune.
Kanda tek sisi urasin pio telep ngebo kurume. Angeda, tali tep men pepkene. Kanda urasin pio telep ngebo kurume.
Nun buteneda, bura tara keana dopnumu ati mapmanemaida, urasin pio telepai kurure.
Akati dana-dana tarada, tali paramre keca cap, betei deiki amapmanemai capda, pio telep embek co bo utopu kurure.
17 Keana taru kuna tep ati ayumnya ikra dopnemu coda, urasin pio telep gat co, er sida aras co di ikra dopnemupa, pio telep kurure.
Tonda, akati deiki tara kawai bungna tep, lyom co er sida, cemara co tengrure. Ange yuma peda, pio teleppu kurure.

Kaber nerdi pepu upu