Song 2 | XteSC | STEP | Neda urasin pio telep ner kununa cadi, ukupmantoda, Saron mutu tali paramre kait keca, urasin pio telepnge utopu kunune. Teka, mutu buma iriamu tara dinin, ila pala ban neitamai paramre kait keca, urasin pio telep kait, er sida bunga bakung kuramretopu, ne peda urasin pio telep ner kunune. Kaber ngebodi pepu upu

Song of Solomon 2

1 Neda urasin pio telep ner kununa cadi, ukupmantoda, Saron mutu tali paramre kait keca, urasin pio telepnge utopu kunune.
Teka, mutu buma iriamu tara dinin, ila pala ban neitamai paramre kait keca, urasin pio telep kait, er sida bunga bakung kuramretopu, ne peda urasin pio telep ner kunune.

Kaber ngebodi pepu upu

2 Tek pepmareme. Yuk kaber nerapu ton, denge pio weik dakungedi, yambul telep kunung dinin, sun kankan neitamai kurumada, kanda pio telep ner kurume.
Ukupmantoda, bura tara ila takke keca weik paramya neitamaida, urasin pio telep kait keca tenpu bongopra tekredi, urasin pio telep kuramretopu, kanda urasin pio telep ner kurume.
Ada, yuk kaber nerapu yumada, yambul teleppu kunung dinin, kanda urasin pio telep ner kurume.

Kaber nerdi pepu upu

3 Uo, ne dopkamnerem ngebo! Kanda utopu ton, kaber neng denge pio weik dakunung dinin, sun yumada yambul telep kununge. Dinino, sun kankan neitamaida, kanda urasin pio telep ngebo kurume.
Ukupmantoda, bura tara tali tengamre co palpal neitamaida, pio telep du moramre co er sida, apel co tektudi pio telep kuramtu utopu, yuk kaber nengda yambul telep kunung dinin, kanda pio teleppu kurume.
Tonda, ukupmantoda, aco si Apel co damai kawai buktenepa, erdi lelipnetupa, keteng bupu di men jepnetupa, pio kange deipra kutene.
Ne dopkamnerem ngeboda, ange utopu, kan damai kune taru yumada, kan tep pio kange deipra kunune.
Apel co du jeptenepa, tau weik pepnetupa, kange deipra kuramtenetopu, kan cap kikiman kuneme taruda, pio kange deipra kunune.
4 Ne dopkamner ngebodi, ne dopra, ila kailya kalepra jerameng ati pumbon dubena deipneupa, kikiman kunmanemu.
Akati dubeneua deiyoda, ‘Pio bicau tenekenuna cadi, ne cap, kan cap, kikiman kunkamaneme’ tenen, dubena deipneupa, pio kange deipra kunmasi.
5 Uo, ne dopkamnerem ngebo! Kikiman kunmanemanen, pio kange deipdana kikiman kunmanema cadi, ne nong puto boun kupmanere.
Atep nengeda, ne nong puto kudina tep, pio tau peramre jen keca, anggur du kolupunge er sida kismis cap, tonda apel co du cap karepnetumpa, konum jepnyopda, ne nong putoda, ka di tamupra telep kweipkamnere.
6 Uo, ne putanere ngeda, ‘Ne dopkamner ngeboda, er tebalal tara buru di, ne giso amutara erepra talepnetue,’ tenenune.
Tonda, ‘Ne dopkamner ngeboda, er dumsisi tara buru di ne nong talepra iripnetupa, kange deipra kutene’ tenen, putanerure.
7 Uo, sun Yerusalem ila ati arum neitamai kurumu kaber nerapu yumada, moupra gekepkunerume. Ada, sundi ne tep, pedina upu deiki di pepkunerume.
Ada, tali pertamna gum dinin, bura tara gam kure keca, er sida rusa bisam cap, kijang bisam cap, sun si deiki di pedina upu pepkamnerume.
Ada, sundi upepkunerume, “Gume, kan cap, kandi kange derirum ngebo cap, kikiman kunkamrerum taru neitamai yumada, nundi sun damai dato-dato di, pio men yankamepe. Kikiman mapmarerumyanen, konum bukronmarerum taru puda, sun damai yankamepe,” pepra, pedina upu deiki di pepnerume, pepsene.

Bicau tenedana tep mut, butenenge pepu upu

Kaber nerdi pepu upu

8 Uo, ne bicau tenenun ngebo, erdi upu penmarpa gekenmane. Sun yuma peda, ormutu buma deiki dinkurume.
Ne dopkamner ngeboda, mutu buma deiki sepdaro yakanmarepa epmane.
Teka ne kange derinun ngeboda, lyom mutu dup deiki kirikra, ne damai yakana tep, sepdaro yakanmar adano!
9 Ne dopkamner ngeboda, pio puto di sepdaro yakarura cadi, erda kijang bisam pio sepdaro embaramretopu kupra, sepdaro embarure. Teka, bura tara gam kure keca, er sida rusa bisam mi sepdaro embaramretopu kupra, yakarure.
Sun ton ortara dirume. Ne bicau tenepnedi, pio kange derinun ngeboda, nun ati damai wipmupu beilya damai tekmardi, ne ati tarapu pio dirure.
Ada, ne ati dela neitamai potokami bon, er sida jendela bisi di dinerure. Tonda, ne ati dela geken bon bisi kwamnga neitamai di tekra, ‘Ne ner akati pumbon kunmar do?’ tenen, moupra dirure.
10 Ne bicau tenenedi, pio kange derinun ngebo, ne dopkamner ngebodi, ne ati damai yaredi, ne tep kong penerure.
Erdi, “Ne dopkamken nero, akati mapmarem dinin, ukutaruda, bukromemdi, yankurume! Kanda, urasin pio telep ner kuruma cadi, nedi kan tep ila di bicau tenekenedi, kange derikenune. Atep, ukutaruda bukropmemdi, kan cap, ne cap kikiman benkuneme,” pepra kong penerure.

Kaber ngebodi pepu upu

11 Dipterepo! Bul lida konum gawal dakmara cadi, mo weikanun ton, men cemkamre. Atep kan cap, ne cap kikiman embankamaneme.
12 Bul li konum gum kupbanmara tep, nun wa pepra kounum mutu neitamai yumada, urasin pio telep kait keca konum bolongredi parure.
Ange tep nengeda, nun mutu nesala yumadi, kange deipmengedi, kange lon mut penkamenge.
Tonda ukutaruda, dou mapkamra cadi, yal madi, er upu peprepa, nun mutu neitamai yumada, er upu gekenupe.
13 Tonda, nun mutu neitamai du mouramre co yumada, kange di du mounapu kunkamre. Ada kwarang co du utopu co, er sida ara co ton, er du moupkamre. Ange utopu, tonda anggur du moupkamrya tep, anggur tapu deikida, er kait konum porure.
Akait yumada, konum gonga kepra porura cadi, akait popredi nintong peramre telep kecada, konum embarepane, nintong telepnge konum gekenmape.
Ne dopkamne nero, kanda urasin pio telep ner kuruma cadi, nedi kan tep ila di bicau tenekenedi, kange derikenune. Atep, ukutaruda bukromemdi, kan cap, ne cap kikiman benkuneme,” pepra kong pepmanere.
14 Tonda ne dopkamner ngebodi upenerure. “Uo ne ka nero! ‘Kandi perum upuda, gekeptene’ tenen, putanerure. Tonda, ‘Kan pio telep urasinda ka di ton cap eptene’ tenen, putanerure.
Kandi perum upuda, pio telep cadi, ange gekepnyopda, kange derinune. Tonda, kan urasinda, pio telep kukerura cadi, ange ton epnyopda, pio kange deipra kunune.
Ukupmanto ngeda, kanda yalma ma utopu ner kurume. Ada, ila lyom mutu dupida, yalmadi, ‘Nimi epnenung’ tenen, kware kuprepa, gel imir pumbon inipra kurure. Dinino, amada upu pio teleppu perure. Tonda, yal mada, urasin pio telep ma kurura cadi, ama iniptua peda, konum epmepyopda, nundi kange deipra kunupe.
Ange utopu, nedi kan tep epkenyopda, kange deipra kununa cadi, kanda yalma ma utopu ner kurume pepkene.
15 Ne dopkamne nero! Ukutaruda, nun anggur tapu yumada, konum kait ponmarpa katuai kunmara cadi, nun anggur wa damai dirbenkuneme.
Tonda, anggur wa damai beneme dingeda, bura tara gam kure keca, kam sisa mi urasin utopu ngeda, er sida rubah, ‘Erdi nun anggur tapu dakredi, anggur du jepra gawal dakserur’ tenen, nun butenedi ametek rubah tomorbenkamaneme. Atep, bukromempa, adipapu benkuneme,” pepkene.

Kaber nerdi tamupra pepu upu

16 Nedi ne dopkamner ngebo tep, ila di bicau tenenedi, er teppu ne kange derinune. Er tenpuda, ne nenge kurure. Yuk ngebo ton pio men putanerure.
Ange utopu, ne kange derinun ngebodi, ne teppu, ila di bicau teneneredi, ne tep kange derirure. Atep, neda, er ner utopu kunune. Yuk nerapu yuma tep nengeda, pio men putarure.
Nun butenedi, pio bicau tenedanapu kunemedi, kange deipdanapu kunume. Ukupmanto ngeda, domba bisam peina deiyo ngebodi, er domba bisam duberedi, urasin telep kait keca, er sida bunga bakung neitamai deiprepa, jepmengepanen, epredi kange deriramretopu, nedi mun penun ngebodi, ne sipyal bam bol deiki mutupnere taruda, pio kange deipra kurure.
17 Uo, ne dopkamnerem ngebo! Alukunda taru neitamai yumada, kikiman mapmanemu dinin, berekbau taruda, bul kumanya pung peprepa, dua cap, kunungna capda, gum kupbenkure. Atep nengeda, ‘Ne mutu nengdi epkenung’ tenen, kanda sepdaro bendopkurume!
Ukupmantoda, rusa bisam cap, kijang bisam cap, sundi pio menmena sepdaro baramengtopu, kan peda, puto di sepdaro bendopkurume. Ne ati tapmemdi, tamupra benkumem taruda, ‘Ila mutu er si Beter mutu dupda kirikra bendopkurem’ tenen, pepkene ne ka bo.