Song 3 | XteSC | STEP | 3:1-5 Kaber nerdi pepu upu Uo, lukunda taru yumada, ne dipru neitamai di, ila di bicau tenenun ngebo tep, ‘Ne damai yatue’ tenen, putanerure. Putaramneupa, ‘Dan cei kurur do?’ tenen, embaramsidi, epeteramsi dinin, men epsi. “Uo, ne nengo! Dan mutu bena kurum do?” pepra, er tep kong pepteremsi dinin, erdi tamupra upu tenpunge peda men pepneu.

Song of Solomon 3

Kaber nerdi, er pio putaramunge tep, pepu upu

3:1-5

Kaber nerdi pepu upu

1 Uo, lukunda taru yumada, ne dipru neitamai di, ila di bicau tenenun ngebo tep, ‘Ne damai yatue’ tenen, putanerure. Putaramneupa, ‘Dan cei kurur do?’ tenen, embaramsidi, epeteramsi dinin, men epsi.
“Uo, ne nengo! Dan mutu bena kurum do?” pepra, er tep kong pepteremsi dinin, erdi tamupra upu tenpunge peda men pepneu.
2 Ange tep nengeda, ukutaruda, ne bukronedi, ila ati arum kunupa neitamaida, ne dipru neitamai di, pio kange derinun ngebo tep, ‘Dan cei kunmar do?’ tenen, pio erpeterbenkamane.
Ada nun mutu nesala yuma embanup bisiai yuma cap, ‘Upu talepkup’ tenen, bulumengai yuma cap, uda amutu neitamai dinin, dana-dana tara yuma capda, ‘Dan cei kunmar do?’ tenen, pio epetepra embenkamane.
Tek sisi ngeda, nedi ne ila di bicau tenenun ngebo tep, konum weika di dipetepra embaramsi dinin, er tep pio men epsi.
3 Ne dopkamner ngebo men epsi dinin, amutu ila ati arum neitamai dipetepra embaramsi taru neitamaida, amutu yuma kalengna deiyo nengdi, ne damai yanmaipa, nedi, ‘Ne kayapu nengo, neda ila di bicau tenenung ngeboda, sun ton epmarum do, gum do?’ pepra, asipetepsi.
4 Asipetepsidi, ka tamupra bisi embandenkap, ataru dipapu, ne ila di bicau tenenung ngebo, antapdanemu. Ukupnemudi, ne dopkamner ngebo epsidi kange deipsi.
Kange deipsidi, nedi mun penun ngebo tep pio iripra talepsidi, ‘Ne nengo, kanda pio men tapkamakene.
Pio talepra irinkamkene. Pio talepra iriramsanen, ‘Na nin sisa, er ati damai dubenkamane’ tenen, angebo talepra dubanmasanen, benemu.
Ne deipneu ner, er ati pumbon neitamaida, nedi mun penun ngeboda, dubena deipmasipa, aceipu kikiman kunmanemu.
5 Atep nengeda, sun Yerusalem ila ati arum neitamai kurumu kaber nerapu yumada, moupra gekepkunerume. Ada, sundi ne tep, pedina upu deiki di pepkunerume.
Ada, tali pertamna gum dinin, bura tara gam kure keca, sun sida rusa bisam cap, kijang bisam cap, sun si deiki di pedina upu pepkamnerume.
Ada, sundi upepkunerume, “Gume, kan cap, kandi mun perum ngebo cap, kikiman kunkamrerum taru neitamai yumada, nundi sun damai dato-dato di, pio men yankamepe. Kikiman kunmarerumyanen, konum bukronmarerum taru puda, sun damai yankamepe,” pepra, pedina upu deiki di pepnerume, pepsene.

Bicau tenedana tep mut, weneringe pepu upu

6 Dinino ukutaruda, sun yuma ortara bisi dipetepso! Ila pala weik mutu, nimi pio men kunge mutu neitamai, katuai mutu neitamai di yakanmar ngeboda, ware ngebo do? Erda, menmena di sepdaro yakanmar adano.
Ukupmanto ngeda, nimidi ila uku ipmengepa, ketda dato-dato di pio weika di weleramretopu kupra, er peda, nun damai menmena sepdaro yakanmare!
Dinino, sun nintong pio telep keca kunumna deiyo nengdi, nintong telep keca yala-yala yuma kunumamengepa, nintong pio telepnge peramretopu, nedi mun penun ngebo peda, er nong bol deiki nintong teleppu perure.
Nintong telep peramre keca er sida, mur cap, kemenya cap, nong bol deiki lingna minyak me cap, akeca yuk-yuk nge yuma cap, nintong pio telep peramretopu, ne dopkamner ngebo peda, er nong bol deikida, nintong teleppu perure.
7 Tonda, sun yuma dipetepso! Ortara mutu di yakare kecada, tali keca guma! Ada nun ila nimi deiyo ngebo Salomo, ‘Erda yuk-yuk mutu embankamra tep, ketekepra domi bungna keca erepra duyakanmange.
Abungna keca dana-dana tara yumada, Israel yala neng dinin, ila kael keami jen talena nengda, nimi denge weik enam puluh (60) nengdi, abungna keca erepra, sun morokyo deiki deipmangdi duyakanmang adano!
8 Ajen talena neng yumadi, sun nimi podan keca weika di konum kael keami.
Atep, sun nimi pona parang ya cap, tema cap, sun kail tu deiki, tapu di getepmangudi, ketenepra yakanmange. Sun aneng yumada, nimi pon keca yuma weika di konum kael keami.
Ada tali tep gum dinin, deiyoda, ‘Lukunda neitamaida, wareto mali keca cap, ware mutu yu neng capdi, nun deiyo ngebo Salomo tep, ‘Angebo poptaptepe,’ tenepmengedi, nun damai yana popetepseteng do?’ tenen, ketenepra kalengyakanmange.
9 Nun mutu ila deiyo ngebo Salomodi peipupa, er amutara pel dona ila kael nengdi, er yuk-yuk mutu embana tep, akeca deiki bukra embana tep keca, er sida tanduk, ketekepra deipi.
Ada Libanon mutu beidi, pio urasin telep cap, gat cap kure co kweprapidi, abungna keca ketekepra deipipa, adeiki bukra embarure.
10 Raja Salomodi, “Ukupkurume,” pepra deipupa, er mutu ila kael nengdi, abungna keca, er sida kursi, ‘Er yanda, urasin pio telep kupkamre’ tenen, kunumna weik keca, er sida perak doprapidi, abungna keca er yanda, co deiki palepra deipi.
Tonda, abungna keca, er sida kursi deiki tara yumada, kunumna weik keca, er sida emas doprapidi, atelep co deiki tarange palepra deipi.
Tonda, akursi bungnai deikida, ‘Gat men kupkamre’ tenen, boun keca er sida bantal ketekepra deipi. Angeda, kunumna pio weik, bi mirin opkal er sida ungu wipra, abantal yuma getepra deipipa, Salomodi akeca deiki bungrure.
Yerusalem mutu nerapudi, ‘Salomo tep nengeda, nundi telep kange deipra kunupe,’ tenen, akeca-keca yumada, pio telep kupra ketekepra deiami.
11 Uo, sun Yerusalem mutu kurumu kaber nerapu yumada, sun ati pumbon di tapra, abisi damai yamumdi, Salomo yakanmarada, moupra dinkurume. Ada, sun Sion mutu neitamai kurumu nerapu yuma, sun yumadi Raja Salomo er giso deiki kenengrur keca, er sida mahkota, moupra dinkurume.
Angeda, pio urasin telep kurure. Salomodi ner dopu taruda, er nin sisadi, agiso galuna keca, er sida mahkota dopra, ‘Ne mi Salomoda, amutu yuma talepredi, ila nimi deiyo ngebo Raja kunkamsere’ tenen, peten kemna tep, agaluna ngeda, er giso deiki deipu.
Tek sisi atumida, Raja Salomoda, pio telep kange deipudi, pingpingapu kuramu.