Song 4 | XteSC | STEP | 4:1-15 Kaber ngebodi pepu upu Uo nedi dopkamne nero! Kanda tek sisi urasin pio telep ner kurume! Nedi kan tep ila di bicau tenekenuna cadi, nedi kan tep kange deipkene. Ukupmantoda, yalma ma er asuru kamoda, pio telep kuramretopu, kan asuru peda, pio teleppu kukerure. Kanda, ‘Tali nengdi epnenung’ tenen, kan urasin cap, giso capda, telep opkal di lelimdongomemdi, embarum dinin, kan asuru katuai tupa kurura cadi, kan pio telep asuru epnyopda, kange derikenune. Tonda, kan lyom giso potongda, miripredi pio telep kurura cadi, kandi embamem taruda, kan giso potongda welepna, kwerepna kemdarure. Ukupmanto ngeda, kambing bisam gung di, ila mutu buma er si Gilead mutu deiki tara di, kwereryakange taruda, kange deipra im kuruka busuk yakaramengtopu, kandi embamem taruda, kan giso potongda, welepna, kwerepna kemrure. Ange peda, pio telepe tenepne.

Song of Solomon 4

Kaber ngebodi, er dopkamu kaber ner tep, ‘Uo, kanda urasin cap, nong cap, pio-pio telep ner kurume,’ pepra, kange lona tep upu pepu

4:1-15

Kaber ngebodi pepu upu

1 Uo nedi dopkamne nero! Kanda tek sisi urasin pio telep ner kurume! Nedi kan tep ila di bicau tenekenuna cadi, nedi kan tep kange deipkene.
Ukupmantoda, yalma ma er asuru kamoda, pio telep kuramretopu, kan asuru peda, pio teleppu kukerure.
Kanda, ‘Tali nengdi epnenung’ tenen, kan urasin cap, giso capda, telep opkal di lelimdongomemdi, embarum dinin, kan asuru katuai tupa kurura cadi, kan pio telep asuru epnyopda, kange derikenune.
Tonda, kan lyom giso potongda, miripredi pio telep kurura cadi, kandi embamem taruda, kan giso potongda welepna, kwerepna kemdarure.
Ukupmanto ngeda, kambing bisam gung di, ila mutu buma er si Gilead mutu deiki tara di, kwereryakange taruda, kange deipra im kuruka busuk yakaramengtopu, kandi embamem taruda, kan giso potongda, welepna, kwerepna kemrure. Ange peda, pio telepe tenepne.
2 Ne dopkamne nero, kan si duda, gwalina gum, kwiryepu pio lepsisikra nepkeue. Tonda, kan si du yumada, pio lengna kukeredi, kurupnapu kupkeue.
Ukupmantoda, nimidi sun peingnung ner domba bisam dopra, telep embaramre me damai dubengedi, adomba bisam nong cap, bol capda, pio telep kupra me kupmengopda, adomba bisamda, mekin di ka tamupra nimi ati damai yakange taruda, pio telep, kurupredi lengamretopu, kan si du peda, pio kurupredi, lengnapu kukerure.
Tonda, domba bisamdi nyapu weik deipmengepa, tenpunge peda men depyopda, domba bisam nyapu weik kurameng utopu, kan pe si du yuma peda, tupa telep kukerura cadi, tenpunge peda, ton men luksakudi, gum kupu. Kan si du yuma tupa teleppu kukerure.
3 Kan sipyal bambolda, yapi bi kurura cadi, pio teleppu kukerure. Ukupmantoda, opkal win tapu, pio yapi bi kuramretopu kukerura cadi, angeda pio telepe.
Kanda, ‘Tali nengdi epnenung’ tenen, kan urasin cap, giso capda, telep opkal di lelimdongopra embarum dinin, aopkal pumbon di, kan katum bolda, urasin pio telep kukerure. Ada, co du, er sida delima co du mouramredi, urasin buma atonun, kan katum peda utopu atonun kukerure. Ange peda, pio telepe tenenune.
4 Tonda, kan kum damda, pio lyom cap, buma cap (bulat), telep kukerura cadi, kan urasinda pio telep kukerure.
Tonda, kan kum damaida, Raja Dauddi, urasin telep gel dopra, taplakra deiamudi, ila lyom gel atida, nimi pon jen derina tep domukpa, urasin telep kuretopu, kan kum peda, urasin pio telep kukerure.
Tonda, kan kum damaida, kweirya keca emasnge garakmengepa, urasin pio telep kuretopu, kan urasin peda pio telep kukerure.
Angeda, jen talena nengdi, nimi podan taruda, ‘Nimidi mar dopmengepa, nun nong deiki mar dopmengepa, bengyaserur’ tenen, sun nong lelimna keca, er si perisai, denge pio weik seribu (1.000) dopra, lelepra dumsisipu deipmengedi, urasin pio telep kuramretopu, kan kum damai garangrum kweirya keca, emasdi ketekeiami ngeda, ange utopu kukerure.
5 Tonda, kan moumda, urasin telep kukerure.
Ukupmantoda, kan moum butene ngeda, rusa bisam nyapu butene do, kijang bisam nyapu butene do, sun urasinda pio telep kurerunga utopu, kan moum butene peda, utopu urasin teleppu kukerure.
Tonda, rusa bisam nyapu buteneda, urasin telep kait keca, er sida bunga bakung neitamai embarengedi, sun jen jeramrenge taruda, urasin pio telep kuretopu, kan moum butene peda, urasin pio teleppu kukerure.
6 Kan moum butene neitamaida, mapmanyane, nintong telep pekerura cadi, neda acapu mapmanedi, tupa kunkamne.
Ukupmantoda, mutu buma butene bungamnga deikida, nintong pio telep peramre keca buteneda, mur cap, kemenya cap, kouptengepa, nintong telep peramtupa gekeptepetopu, kan nong bol deikida, nintong teleppu pekerura cadi, ‘Kan moum butene neitamaida, acapu maptenye,’ tenenune.
Ange tep nengeda, alukunda taru neitamai yumada, acapu kikiman mapmanemyanen, ambutumi berekure taruda, bul kumanya di pung peprepa, dua cap, kunungna cap, kapul men dubere taruda, ne benkamane.
7 Uo, ne dopkamne nero! Tek sisi kandi pio telep kurema cap, urasin pio telep kukerenge capda, pio-pio teleppu kukerure. Ne kangeda, kan nong yumada, pio teleppu kukerure. Tenpu keca peda, mali ton pio men kukerure.
Ange tep nengda, nedi kan tep, ila di bicau tenekenedi, kan tep pio telep kange doupra kunune.
8 Uo, ne ka nero! Kanda amutupu kurum dinin, kan damai men yanmanto kununa cadi, ne kangeda, kanda pio pera karen mutu neitamai utopu kurume. Atep nengeda, neda kan damai men yanmanto kunune.
Ukupmantoda, iknapi dam tara, Libanon mutu neitamai, ila mutu deiki kutumpa, neda kan damai men yanmanto kuptene. Atep, kan cap, ne cap, ila lyom buku mutu dup di tapra, ban mutu kikiman kwereryateneme!
Uo, ne dopkamne nero, Libanon mutu pio karenai kuretopu, kan damaida men yanmanto kunmana cadi, kwerepmemdi, ne damaipu yankurume!
Ukupmantonge ton, pio karen mutu dup deiki utopu kurume. Ada, Amana mutu dup di do, tonda, Hermon mutu dup di do, kwerepmemdi, ne damai yatumtoda, ne kange deiptene.
Ange utopu, bura tara tali gam kure keca, ila yu pus er sida Singa pus kururai di do, tonda, yu kuramre gam keca, er sida Macan Tutul kururai di do, amutu tapra, ne damai kwereryatumpa, kikiman kuteneme teptoda, kange deiptene.
9 Uo, ne dopkamne nero! Kandi ne kange dipru yuma konum dopropmaneruma cadi, kan teppu pio putanerepa, kan teppu pio kange deipra, tupa-tupa tenekenune.
Nedi mun pekenun nero, ue tenpu taruda, kandi ne tep epmanerumpa, ukupmuma deiki di, adipapu ne kange dipru yuma dalupra dopropnemumpa, nedi kan tep pio kange deipkesi.
Atep nengda, ne kange neitamaida, kanda, ne weit ner utopu kurume. Tonda, ne kange dipru neitamaida, kanda ne dopkamne ner kurure tenenune.
Ange utopu ton, kan kum dam garangrum kweirya keca, urasin telep kurura cadi, tenpunge peda epnyopda, adeiki di neda kan tep, ila di bicau tenekenedi, kan tep kange derikenune.
10 Uo nedi dopkamne nero! Ne kange dipru neitamaida, kanda ne weit ner do, ne dopkamne ner do, utopu tenekenedi, pio bicaue tenekenune.
Nimidi kange yawaramre anggur me jepmengedi, kange derinung dinin, angeda yambula pua. Pio telep ngeda, kandi ne tep bicau tenepnememdi, ne tep pio kange deipra tenenerume.
Tonda, kandi nintong pio telep minyak me dopra, kan nong bol deiki likipmempa, adeiki di nintong pio telepngepu pekerepa, gekekenune.
Angeda pio-pio telep dinin, yuk nintong telep keca er sida rempah-rempah yala-yala yumada, nintong yambul teleppu kurure.
11 Ne kange derikenun nero, kanda ne dopkamken ja! Tali men pepkuken dinino, kan sipyal bam bol di, mutupnemempa, tau weik penerepa, pio kange derinune. Angeda, pio telep mong mokon cap, sapi bisam moum teyung cap, tapakra jeptepyopda, ila di tau peramsertopu kunerure.
Tonda, kandi kenengrum opkal yumada, Libanon mutu neitamai paramre cemara codi, nintong pio telep peramretopu, perepa gekenune. ‘Ange peda, pio telepe,’ tenenune.
12 Uo, nedi dopkamken nero, kanda ne weit ner utopu kurume. Tonda, nedi kan tep, ‘Aner dopkamne’ tenen, kan tep mun penun dinino, ukutaruda, nedi kanda kapul men dopketene. Atep kikiman kapul men kuteneme.
Atep nengeda, ukupmanto ngeda, nimidi pio telep wa konum pepmengedi, yal keca konum koupmengopda, ‘Tali neng wekmengedi, awa neitamai konum koupmap kecada, upula dopropsenung’ tenen, awa dana-dana tara yumada, lyom gel beilya ton wipra ongomdongonunge.
Ange utopu ton, nimidi me bungna pio telepnge bukra embaruraida, ‘Mali nengdi yana, atelep me yuma tali lupra gwepmengedi, jepropsenung’ tenen, ame bungnai yuma kalengna tep, beilya wipra deipmengedi, ame bungna deiki tarada, gel di buplan bon dopra dengdongonunge.
13 Uo, nedi dopkamne nero, kanda co du mouramre co palpal utopu kurume. Ada pio tau peramre co du er sida delima co du utopu kurume.
Tonda, ila wa neitamai, nimidi, pio telep du mouramre co yala-yala yuma koupmengedi, tonda nintong telep peramre keca er sida henna cap, tonda, narwastu cap, koununga utopu kurume.
14 Tonda, awa neitamaida, pio telep tau peramre keca cap, telep jen keca cap, nintong pio telep peramre keca cap, yala-yala yuma ton koununge.
Sundi kounung keca sida, narwastu cap, kunyit cap, tebu gwei cap, kayu manis, ada min-min pio telep peramre co cap, kemenyan cap, mur cap, gaharu co cap, rempah-rempah cap, ayala-yala keca pio weika di koununge. Kanda awa pio telep kuramretopu, kan peda utopu, pio telep ner kurume.
15 Uo, tek sisi ne ka nero, nimidi wa pepmengedi, awa neitamaida, pio telep me bungna bungrurai cap, iknapi dam tara Libanon mutu deiki di pio telep yo me embaramre yo me kuramretopu, pio telep ner kurume.
Ada, kanda pio-pio telep kuruma tep pepkene, nedi kan tep kange derikenun nero!

Kaber nerdi, er mun peramu ngebo tep, “Kanda adipapu sepdaro ne damai yarume,” pepu upu

Kaber nerdi pepu upu

16 Uo, kanda iknapi dam tara di pung perur kumanya cap, dapu tara di pung perur kumanya capda, adipapu gonga kepra, pung penkamrerume!
Ada tali tep gum dinin, deiyoda, ne wai dam deiki tara pung pererumupanen, ne wa neitamai nintong pio telep keca kwamnere ngeda, akumanya di, anintong telep peramrenge dopra, dana-dana tara embankamre.
Embaryopda, neda ila di bicau tenenun ngebo tek sisi gekenkamre. Ne kange deipsi ngebo, ne nintong telepnge gekepyopda, adipapu ne wai neitamai dam yana, wekredi, ne wa neitamai pio telep kure co du cap, yuk telep keca cap, yuma dopra jeredi, ^{▼▼jeredi – Ayat 16 seku upuda, domon upu utopu kurure. Aupu nong neitamainge deiyoda, ake. Ada, anerdi, ‘Ne mun penun ngebodi, ne dopnetupa, erda ne cap konum kutenemnyopda, kikiman kunemedi, tonpa mapkamteneme’ tenena tep, pepu.} kange deipra kunkamre!
Ada, ‘Er cap, ne cap kikiman kunkamneme,’ tenena tep pepne.