Song 6 | XteSC | STEP | Yerusalem mutu kaber nerapudi pepi upu Uo nun ka nero! Amutu neitamaida, kaber nerapu denge pio weik akunung dinin, sunda sun urasin cap, sun kunge keca capda, yambul telep kununge. Sunda yambul telep kununge dinin, kan tenpuda, kan kumem keca cap, kan urasin capda, pio-pio teleppu kukerure! Dinino, kandi pio kange deipmumdi, mun perum ngeboda, dan mutu pio bendopu do? Tali tep men asipetepkepe. Deiyoda, nun cap, kan cap, ‘Angebo dan mutu bena kurur do?’ tenen, ‘Kikiman erbenkamepe’ tenen, asipetepkepe. Kaber nerdi pepu upu

Song of Solomon 6

Yerusalem mutu kurami kaber nerapudi, angebo erpeteramidi, perami upu

Yerusalem mutu kaber nerapudi pepi upu

1 Uo nun ka nero! Amutu neitamaida, kaber nerapu denge pio weik akunung dinin, sunda sun urasin cap, sun kunge keca capda, yambul telep kununge.
Sunda yambul telep kununge dinin, kan tenpuda, kan kumem keca cap, kan urasin capda, pio-pio teleppu kukerure!
Dinino, kandi pio kange deipmumdi, mun perum ngeboda, dan mutu pio bendopu do?
Tali tep men asipetepkepe. Deiyoda, nun cap, kan cap, ‘Angebo dan mutu bena kurur do?’ tenen, ‘Kikiman erbenkamepe’ tenen, asipetepkepe.

Kaber nerdi Yerusalem mutu kurami kaber nerapu tep, tampra pepu upu

Kaber nerdi pepu upu

2 Gume, ne ila di bicau tenenedi, er tep pio kange derinun ngeboda, ne damai konum yare. Ukupmantoda, er wa tu damai konum yanmare. Ada, ‘Ne wa neitamaida, pio tau telep peramre keca, er sida rempah-rempah kouamsinge epkamne’ tenepudi, diryanmare.
Tonda, erdi, ‘Ne domba bisam dopra, ne wai dam deipnyopda, sundi awa damai paramu keca jenkameng’ tenen, yanmare. Tonda, erdi, ‘Urasin pio telep kait keca, er sida bunga bakung ngeda, dakra kipkamne’ tenen, yanmare.
3 Ne ila di bicau tenenedi, pio mun penun ngeboda, tek sisi neda er ner kunune. Ange utopu, ne dopkamner ngeboda, erdi ne tep kange derinerura cadi, neda er ner sisa utopu kunune. Nun buteneda, pio kange deipdananumudi kunume.
Atep nengeda, ne dopkamner ngeboda, ne damai yakaredi, er domba bisam dopra, amutu paramre kait keca, er sida bunga bakung koupipa parura neitamai deiprepa, jenunge. ^{▼▼jenunge – Aupu pepra seku ngeda, domon upu deiki di pepu. Aupu nong neitamai deiyo ngeda, anerdi, ‘Ne cap, ne dopkamner ngebo cap, kikiman mapnemedi, kange deipdankamanem’ tenen, pepu.}

Kaber ngebodi, er dopkamu ner tep, gispal dopra, telep upu pepunge ake

Kaber ngebodi pepu upu

4 Uo ne nero! Ila ati arum er sida, Tizra ^{▼▼Tizra mutu – Tizra mutuda, Israel tara nesaladi, ‘Nun ila ati arum deiyo mutu akurure,’ teneramidi domi mutu kwamu. Ange utopu, Yehuda tara ila ati arum deiyoida, Yerusalem mutu kwamu. Atep nengeda, amutu buteneda, “Urasin pio telep mutu dakurure,” pepra seku.} mutu, urasin pio telep kuramretopu, kan peda, urasin pio telep ner kurume.
Ange utopu ton, ila ati arum, er sida Yerusalem mutu domi ngeda, urasin pio telep kuramretopu, kan peda, urasin pio telep ner kurume.
Angepu gum dinin, jen talen neng, denge weika di bulupmengedi, ‘Nimi porbenkamep’ tenen, peten keman keca tep, lyom opkal erepra deriramengepa, yuk nesaladi ange epmengopda, ‘Uo’ tenen, kange lungdaramengtopu, nedi kan tep epkenyopda, ne kange lopnerepa, ‘Uo, erda pio telep kurure,’ tenekenune.
5 Uo, ne nero! Kandi ne tep dinenempa, ne kange dipru neitamaida, ‘Uo’ tenepnedi, ila di putapkenerepa, munpu pekenune. Ataruda, moupra men tenepmanto kunerure!
Atep nengeda, ange utopu ton, kandi ne damai tupa men dinkamnerume. Yukai dipapu, uo, ne ner kanda dinkamnerume!
Ukupmantoda, kambing cap, domba denge pio weik bulupmengedi, Gilead mutu-mutu buma deiki di, kwerepra yakanung utopu, kan embamem taruda, kan giso potong peda, welepna, kwerepna kemtokerure. Angeda pio telepe.
6 Ukupmantonge ton, nimidi sun peinung domba bisam dopra, me damai telep kupra kupmengedi, sun nong potong toupmengopda, adomba bisam nong pio kurun kuprepa, tamupra yakaramengtopu, kan sipyal pumbon si duda, pio kurukerure.
Kan si tupa telep kurukeredi, tenpunge peda, men saku. Kan si yumada, dumsisi nepra tengkerure. Ukurura cadi, angeda pio telepe.
7 ‘Tali nengdi epnenung’ tenen, kan urasin cap, giso capda, lyom opkal di getedarum dinin, ne kaele, kan katumda, bi bol cap, buma cap kukerure.
Ukupmantoda, tau peramre co du, er si delima urasin kuramretopu kukerure. Akurenge yumada, pio telepe tenepne.
8 Ukupmanto ngeda, tenpu ila nimi deiyo ngebodi, nerapu enam puluh (60) cap, tonda er kikiman melimna tep nerapu delapan puluh (80) cap, tonda kaber nerapu ton denge pio weik, men nukmanto doproptua peda, angeda yambul telepepu tenenune.
9 Deiyoda, ake. Animi deiyo ngebodi, nerapu men nukmanto doptua peda, sun kankan neitamai di, tenpu ner peda, kanda pio telep kurumtopu, pio men kuptue. Kan tenpuda pio telep ner kurume.
Kan nin sisadi deipkeudi, ‘Yuk ner nyapu ton deiamsi dinin, sun anerapuda yambul telep pua. Dinino, aner mida, pio telepngepu kurure. Er nong neitamai cap, er kure keca neitamai cap, tenpu keca peda, mali pio men kurure,” pepra, kan tep gispal doramkeu.
Kan mutu kaber nerapu yuma cap, nimi deiyo neng, Raja nengdi domi nerapu cap, nimi deiyo neng kikiman kuramidi melimami nerapu cap, sun yumadi kan diramkeidi, “Gume, aner tenpuda, pio telep kurure. Tek sisi anerda kange deipra kurure,” pepra, kan tep gispal doramkei.
10 Aner yakanmarada, ware mutu ner kurur do? Aner er sida dan do? Gume, ukupmanto ngeda, lukunda mapmepya, berekyopda, ipna taru keteng dirin epmepedi, pio telep kange derirameptopu, ayakanmar aner peda epmepyopda, kange derinupe.
Anerda, lukunda taru im neitamai di war urasin pio telep kuramretopu, tonda, sintarada, keteng er ila dirineda, ‘Ila di merenglang-merenglang peramretopu, aner peda, urasin pio telep ner kurure,’ tenepne.
11 Tenpu taruda, ‘Ne kouamsi co palpal neitamaida, co du konum moupu do?’ tenen, bena dirbenkamane. Tonda, ‘Ila banaida, kait keca weika di parurai bena dirbenkamane’ tenen, benmasi. Tonda, ne anggur tapu kouamsi ngeda, konum er kait popu do, gum do?’ tenen, ‘Dirbenkamane,’ tenepsi.
Tonda, ‘Tau peramre co du, er sida delima coda, amenda moupkamre’ tenen, ‘Peten kemna tep, er kaitda konum popu do?’ tenen, ‘Ne wa damai dirbenkaman,’ tenepsi.
12 Utenepra, ne wa peamsai benmanu dinin, tali kange doupra kunmasanen, dato-dato di, ne ner kan tep tenepkesidi, ‘Uo, ne ner cap kikiman kuteneme’ tenen, kan tep ila di putapneu.
Ukupmantoda, ila nimi deiyo ngebo, er kereta perang deiki bukra, ne damai yatudi, “Kan cap, ne cap, acapu kikiman buktenemedi, embankamneme,” pepra moropnetupa, pio kange deipra kuramtene utopu, kan tep tenepsidi, kange deipsi. Kan tep ila di putapnera tepa.

Yerusalem kaber nerapudi pepi upu

13 Yerusalem kaber nerapudi pepi ngeda ake.
“Uo, kanda Sulam mutu nengdi deiamkei kaber nero! Nun mutu neitamai tamupra yatumpa, epketepe!
Ada, tali tep gum dinin, ‘Ada, nun yumadi, Sulam mutu ner, kanda urasin pio telep nerda, kange di ton cap epketepe’ tenen, moropokepe! Atep, nun mutu tamupra yarume, nun ka nero!” pepi.

Akaber nerdi tamupra pepu upu

“Gume, sun Yerusalem mutu kurumu kaber nerapudi, neda Sulam mutu nengdi deipnei ner, warya deiyo tep ne ton dinkamnerum do?
Ukupmanto ngeda, sundi ne tep tenepmanerum ngeda, ‘Er Sulam mutu kaber nerda, nimi pona tep taruda, ton jen neng ortara, ton jen neng atara tekra dinmangepa, daneitamaida, tenpu urasin telep ner mut peptudi moropseptupa, kange deipdatenge’ tenen, derinung ner, ange utopu ner kurura cadi, nundi ton cap aner dinkamepe,’ tenepnerumdi, aupuda pepra moropmanerum do?” pepu.