Song 7 | XteSC | STEP | Kaber ngebodi pepu upu Uo, nedi dopkamken nero! Kanda, ila nimi deiyo ngebo Raja dororur kaber ner utopu kurume. Kan yanda, yan kemna tep keca, er sida sandal dongopmempa, urasin pio teleppu kukerure. Tonda, kan kail cap, bukke capda, galemna teleppu kukerure. Kan nong yumada, ila kael keamu ngebodi, dopmanto keca utopu kurume. Kanda, urasin pio telep ner kuruma tepa.

Song of Solomon 7

Kaber ngebodi, er dopkamu ner tep pepu upu

Kaber ngebodi pepu upu

1 Uo, nedi dopkamken nero! Kanda, ila nimi deiyo ngebo Raja dororur kaber ner utopu kurume.
Kan yanda, yan kemna tep keca, er sida sandal dongopmempa, urasin pio teleppu kukerure. Tonda, kan kail cap, bukke capda, galemna teleppu kukerure.
Kan nong yumada, ila kael keamu ngebodi, dopmanto keca utopu kurume. Kanda, urasin pio telep ner kuruma tepa.
2 Nedi dopkamken nero! Kan mundu deiyoida, jen keca jen mau, er sida cawan utopu kukerure. Ada, nimidi me mau dopra, anggur du me gwepmengedi, amau dikdongopmengepa, pio dinikra embaramretopu kukerure.
Ukupmantonge ton, gandum du bulupra deipmengedi, yambulanun mutu buma utopu kuprepa, anengdi kait keca dopra, agandum du dana-dana tara ongopgenepra deipmengepa, urasin pio telep kuretopu, kan mundu yumada, utopu kukerure.
3 Kan moum buteneda, rusa bisam nyapu butene, urasin pio telep kuramreteng utopu kukerure. Angetopu, bura tara gam kuramre kuda bisam, er sida kembar kijang, kwa nyapu butene deiprepa, urasin telep kuramrerung utopu, kan moum buteneda, ange utopu kukerure.
4 Ukupmantonge ton, kan kumda, lyom cap, kurun cap kuretopu, bura tara ila gam kure keca, er sida gaja bisam, er lyom ekwe doproptenga deiki di, lyom kurun ati doptengopda, ange utopu, kan kumda utopu kukerure.
Tonda, Hesbon mutu neitamaida, amutu wengbana tep bisi buplan damai, me mokon deipkaida, keteng deiprepa, amokon deiki dirin weika di melang-melang peramretopu, kan asuru peda, pio telep kupra melang-melang perure.
Tonda, Libanon mutu neitamai, pio lyoma di dopra deiami gel atida, amutu deiyoi kota, er sida Damsyik mutu, urasin tara pio telep kuramretopu, kan u peda, urasin pio telep kukerure.
5 Ukupmanto ton, nun kuramep mutu neitamai, pio ila mutu bukuaida, amutu keca-keca yumada, deiki tarapu katuai kurure. Amutu sida, Karmel mutu tupa penunge. Ange utopu, kan nong deiki tarada, kan giso deiki kukerure.
Kan giso erepra embamempa, amutu nesala yuma, epkengedi, ‘Uo, anerda ila mambul nere,’ tenenkamkenge.’ Ange peda, urasin pio telep kukerure, tenepne. Kanda, dana-dana tara embaramumpa, kan giso deiki kwamu lyom potongda, welepna, kwerepna kemtokerure.
‘Apotongda, pio telep, mirin weik kuredi, melang-melang perur dinin, lyom weik kurura cadi, nimi deiyo ngebo Raja peda, apotong neitamai tomopketua peda, pio men loptapdatudi, men betue,’ tenepne.
6 Uo nedi dopkamne nero! Kanda tek sisi, urasin pio telep kuna cap, dipru dakra bouna di amu kuna cap ner kurume!
Nimidi, nerapu weika di bicau tenengedi, kange derinung dinin, anerapu kankan neitamaida, kanda, pio-pio telep ner kurume. Kan kurumtopu, yuk nerapu tenpu nerapu peda, men kununge.
Atep, nedi kan tep, pio ila di bicau tenekenedi, kange derikenune.
7 Ukupmantonge ton, ila lyom co, er sida korma co, lyoma di nepredi, tengamredi, er mourur duda, pio urasin telep kuramretopu, kanda, nong lyom ner kumemdi, kan moum butene peda, urasin pio telep moum butene utopu kukerunge.
8 Atep nengeda, neda kan nengedi upepkene. Alyom korma coda, welepnedi, er teru talepkamne ja! Tonda, akorma co welepnyopda, er mouramre du dakra jepnyopda, anggur du pio tau peramretopu, kan moum peda, pio teleppu kupkamre, tenepne.
Tonda, co du er sida apel, jepmepepa, tau pio telep peramsertopu, kan sipyal bam bol deiki mutupkenyopda, kan isin puto peda gekepnepa, nintong pio telep pepkamnere, tenepne.
Tonda, anggur tapu du me, pio tau peramrenge jepmepepa, tau weik peramsertopu, ne kangeda, kan tep mutupkenyopda, kan sipyal bam bol peda, pio tau weik pepkamnere.

Kaber nerdi er kange deipu ngebo tep, pepu upu

Kaber nerdi tamupra pepu upu

9 Uo, ne dopkamnerem ngebo! Kandi, “Anggur du me pio telepnge jepkamne,” pepmanerem ngeda, ‘Angeda, tamna gum di, pio embaredi, kan sipyal pumbon cap, kan si deiki cap, kan sipyal bam bol deiki capda, pio embaramtupa, kange pio derinkamkene’ tenen, putanerura tep, angeda pio tenenune.
10 Neda, ne kange deipra, pio mun penun ngeboda, ne nenge tek sisi dopsi ngebo kurure.
Ange utopu, erdi ne tep, ila di bicau teneneredi, pio putanerura cadi, neda er ner sisa kunune. Nun buteneda, konum kange deipdanapu kupnumutopu, tupa kunume.
11 Ange tep nengeda, ‘Ne konum dopkamner’ tenen, ila di bicau tenekenuna cadi, kan cap, ne cap, kikiman bura tara mutu neitamai, embanemedi, pio telep kait keca paruraida, kikiman mapkamaneme.
Ada, akait er sida bunga bakung ^{▼▼bunga bakung – Menop taruda, sun Israel nesalada, kange pio deridaramidi, peten kemna tep, akait keca dakra karerdaramya tep, akait keca er si tep ton, ‘bunga pacar’ ton perami.} tep pepkene.
12 Tonda, kandi konum dopnetumpa, nun butene kikiman mapmanemyanen, berekyopda, ipna taru sisi di, kan cap, ne cap anggur tapu du wa damai kikiman betenemedi, ‘Nun anggur tapu du, konum wisipmar do, gum do?’ tenen, anggur tapu yuma dipetepteneme.
Tonda, ange utopu, nun butenepu kikiman wisipra embetenemedi, ‘Nun anggur tapu kaitda, konum popmar do, kapul do?’ tenen, dipetenteneme. Tonda, ange utopu, nun butenepu kikiman wisipra embetenemedi, ‘Nun delima coda, du moupkamra tep, er kaitda, konum poramre do, kapu do?’ tenen, dipetepteneme.
Ange yuma konum dipetepneme dingeda, nedi kan tep, ‘Telepe, ukutaru kikiman mapteneme,’ pepra, moropketenyopda, kikiman mapteneme dingeda, ne pio kange deriketene!
13 Tonda, ne dopkamnerem ngebo! Nun ati wengna tep buplan deiki tara, konum deipkamnem co du cap, kait keca capda, er sida mandrak, ^{▼▼mandrak – Aupuda, Ibrani upu pepra sekmepu. Israel mutu neitamaida, akeca paramu. Sun ataru kurami nesaladi, ‘Ange er nintong telepnge gekepmepedi, kikiman mapmepyopda, nun nerapuda, tek sisi mundu doupmengedi, nyapu weik derinkamsenge,’ tenerami. Tonda, ataru kurami nerapudi, ‘Nun nengedi, mandrak nintong gekepmengopda, sundi nun tep, kange deipsengedi, ila di putapkamsere,’ tenerami. Aupu kael kemna tep, Kejadian 30:14-16 ton dinkurume.} nintong pio telep penkamsere.
Angeda, ‘Kikiman mapteneme’ tenen, nedi orminggu neitamai ton akeca dakra nun buplan deiki tara konum deipmatene ngeda, nintong telep pepsetue.
Tonda, akeca utopunge dinin, ataruda, ukupunge ton dakra deipmatengedi ton, er nintong telep pepsetupa, kikiman gekepkamteneme. Akeca yumada, nedi kan tepapu dopra deipkamken ja. Nedi kanda ne dopkamnerem ngebo tep pepkene.